Naespirituan a Gameng
Bayat ti panangusaryo iti pammatiyo iti Apo ken ti bileg ti priesthoodna, dumakkel ti kabaelanyo nga umas-asideg itoy naespirituan a gameng nga inted kadakayo ti Apo.
Agyamanak iti dayta napintas a musika. Bayat ti panangtakdertayo a nangkanta iti dayta a pangibabaet a himno, “We Thank Thee, O God, for a Prophet,” immay kaniak ti dua a makarimbaw a kapanunotan. Maysa ti maipapan ken ni Propeta Joseph Smith, ti propeta daytoy a dispensasion. Dimmakkel ti panagayat ken panagdayawko kenkuana iti panaglabas ti tunggal aldaw. Napasamak ti maikadua a kapanunotak bayat ti panangkitak iti asawak, dagiti annakko a babbai, appokok a babbai, ken appokok a babbai iti tumeng. Nariknak a kayatko a tuntonen ti tunggal maysa kadakayo kas paset ti pamiliak.
Sumagmamanon a bulan ti limmabas, iti gibus ti sesion iti endowment iti templo, kinunak iti asawak a ni Wendy, “Sapay koma ta maawatan dagiti kakabsat a babbai ti naespirituan a gameng a kukuada iti templo.” Kakabsat a babbai, masansan a matakuatak iti bagik a pampanunotenkayo, agraman iti dua a bulan a limmabas nga ibibisitami ken ni Wendy iti Harmony, Pennaylvania.
Daytoy ti maikadua a biahemi idiay. Agpada a panawen a natignaykami unay bayat ti pannagnami iti dayta sagrado a lugar. Iti asideg ti Harmony ti nagparangan ni Juan Bautista ken ni Joseph Smith ken nakaisublian ti Aaronic Priesthood.
Idiay ti nagparangan da Apostol Pedro, Santiago, ken Juan a nangisubli iti Melchizedek Priesthood.
IIdiay Harmony ti nagserbian ni Emma Hale Smith nga immuna a para surat ti asawana bayat ti panangipatarus ni Propeta Joseph iti Libro ni Mormon.
Idiay met la Harmony ti nangawatan ni Joseph iti paltiing a nangiparangaran ti Apo iti pagayatanna ken ni Emma. Binilin ti Apo ni Emma a mangilawlawag kadagiti nasantuan a kasuratan, mangparegta iti Simbaan, mangawat iti Espiritu Santo, ken mangbubos iti panawenna “nga agadal iti adu pay.” Nabalakadan pay ni Emma a “manglaksid kadagiti banag ti lubong ken mangsapul kadagiti nasaysayaat a banag,” ken kumpet a naimbag kadagiti katulaganna iti Dios. Inggibus ti Apo ti bilinna kadagitoy a balikas: “Daytoy ti bilinko iti amin.”1
Amin a napasamak iti daytoy a lugar ket adda nauneg a kaipapananna para iti biagyo. Ti pannakaisubli ti priesthood, a kakuyog ti balakadna ken ni Emma, maiturong ken maparaburanna ti tunggal maysa kadakayo Anian nga ayatko a maawatanyo a ti pannakaisubli ti priesthood mainugot unay kadakayo kas babai a kas iti asino man a lalaki. Gapu ta naisublin ti Melchizedek Priesthood, agpada a babbai ken lallaki nga agtungtungpal iti katulagan ket maikkan iti gundaway iti “amin a naespirituan a bendision ti simbaan,”2 wenno, makunatayo, iti amin a naespirituan a gameng nga adda iti Apo para kadagiti annakna.
Tunggal babai ken lalaki a makitulag iti Dios ken agtungpal kadagita a katulagan, ken maikari a makiraman kadagiti ordinansa ti priesthood, maikarida unay iti bileg ti Dios. Kadagiti natalugadingan iti balay ti Apo umawatda iti sagut ti bileg ti priesthood ti Dios babaen ti saguday ti katulaganda, karagpin ti sagut ti pannakaammo tapno maammuan no kasano a mayasideg iti dayta a bileg.
Sisasagana met ti langit kadagiti babbai a natalugadingan iti bileg ti Dios a maibukbok manipud iti katulaganda iti priesthood a kas kadagiti lallaki nga addaan iti priesthood. Ikararagko a dayta a kinapudno sumlepto met iti tunggal maysa kadagiti puspusoyo gapu ta mamatiak a daytoyto ti mangbaliw iti biagyo. Kakabsatko a babbai, adda kalinteganyo a mayasideg iti bileg ti Mangisalakan a tumulong iti pamiliayo ken dadduma pay nga ipatpategyo.
Mabalin a kunkunayo iti bagbagiyo, “Nakaskasdaaw daytoy, ngem kasano nga aramidek daytoy? Kasano a mayasidegko ti bileg ti Mangisalakan iti biagko?”
Diyo masarakan daytoy a proseso iti ania man a pagbasaan. Ti Espiritu Santo ti mangisuro kadakayo no ipamaysayo nga awaten ti kayat ti Apo a nasken a maammuan ken aramidenyo. Saan a nalaka wenno alisto daytoy a proseso, ngem makabang-ar daytoy iti espiritu. Ti ad-adda a makaay-ayo ngem iti pannakipagtrabaho iti Espiritu a mangammo iti bileg ti Dios—bileg ti priesthood?
Ti masaok kadakayo a ti panangusaryo iti bileg ti Dios iti biagyoket agkasapulan iti isu met laeng nga imbilin ti Apo ken ni Emma ken iti tunggal maysa kadakayo nga aramidenyo.
Isu nga awisenkayo a nainkararagan nga adalenyo ti benneg 25 ti Doktrina ken Katulagan ket takuatenyo no ania ti isuronto ti Espiritu Santo kadakayo. Ti bukod a naespirituan nga aramidyo ipaayannakayto iti rag-o bayat ti pananggun-od, pannakaawat, ken panangusaryo iti bileg a a nakatalugadinganyo.
Paset daytoy nga aramid ti tumulong kadakayo a manglipat kadagiti adu a banag daytoy a lubong. No dadduma kasla aleng-alengtayo ti panangtallikudtayo iti lubong nga addaan iti sinnupanget, mangallilaw nga awis, ken palso a pilosopia. Ngem pudno a panangaramid iti daytoy ket agkasapulan nga amirisenyo ti bagiyo a naannad ken masansan. No aramidenyo, ipariknanto kadakayo ti Espiritu Santo no ania ti saanen a kasapulan, no ania ti awanen pategna iti panawen ken kabaelanyo.
Iti panangtallikudyo kadagiti nailubongan a pannakasinga, dagiti banag a kasla napateg kadakayo itan ket umadayodan. Masapul nga ibagayo a saanen iti sumagmamano a banag, nupay kasla saanda a makadangran. Iti pannakiraman ken panangituloyyo itoy ingga’t biag a proseso a pangipaayyo iti biagyo iti Apo, masdaawkayto iti panagbaliw ti pannirigan, rikna, ken ti naespirituan a bilegyo!
Ita sangkabassit a balikas a pammallaag. Adda dagiti mangipababa iti kabaelanyo nga umawat iti bileg ti Dios. Adda dagiti banag a mamagduadua iti bagiyo ken mangibaba iti naespirituan a kabaelanyo kas maysa a nalinteg a babai.
Kangrunaanna, saan a kayat ti kabusor a maawatanyo ti katulagan nga inaramidyo iti panagbuniag wenno ti napateg a sagut ti pannakaammo ken bileg nga inawatyo wenno awatenyonto iti templo—ti balay ti Apo. Ket awan duadua a di kayat ni Satanas a maawatanyo a tunggal maikari nga agserbi ken agrukbabkayo iti templo, ik-ikkanyo iti kaipapanan ti bileg ti Dios ken dagiti anghelna a “mangaywan” kadakayo.3
Kanayon a mangted ni Satanas ken dagiti pasurotna kadagiti tubeng a manglapped kadakayo iti pannakaawat kadagiti naespirituan a sagut a nakaparaburanyo ken mabalin a mangbendision kadakayo. Daksanggasat, adda dagiti lapped nga agbalin a bunga ti kinasukir dagiti dadduma. Maldaanganak a mangpanunot nga adda kadakayo mangipapan a nakedngan wenno saanen a pinati ti lider ti priesthood wenno inabuso wenno binaybay-an ti asawa, ama, wenno maibilang a gayyem. Maldaanganak unay nga adda kadakayo mangipapan a maipapaigid, wenno, di marespeto wenno napagbiddutan. Awan lugar dagiti kasta a nagbasolan iti pagarian ti Dios.
Iti kasunganina, maayatanak no madamagko dagiti priesthood leader a sigagagar nga iramanda dagiti babbai kadagiti council ti ward ken stake. Maparegtaak ti tunggal asawa a lalaki a mangipakita a ti kapatgan a pagrebbenganna iti priesthood ket mangipateg iti asawana.4 Dayawek ti lalaki a mangrespeto unay iti kabaelan ti asawana nga umawat iti paltiing ken mangipateg kenkuana iti kallaysada kas agkabulig.
No maawatan ti lalaki ti tan-ok ken bileg ti nalinteg, agsapsapul, natalugadingan a Santa iti Ud-udina nga Aldaw, nakaskasdaaw kadi no mariknana nga agtakder no sumrek iti kuarto?
Manipud iti rugi ti panawen, naparaburanen dagiti babbai iti naidumduma a talugading—ti kabaelan a mangilasin iti umno ken biddut. Paneknekan daytoy a sagut dagiti agaramid ken agtungpal iti katulagan. Ken maksayan no iranta ti dadduma a liklikan dagiti bilin ti Dios.
Inayonko a dagus a diak pakawanen dagiti lallaki a mangliklik iti rebbengenda iti Dios a mangilasin iti umno ken biddut. Ngem patpatgek a kakabsatko a babbai, ti kabaelanyo a mangilasin iti pudno manipud iti biddut, tapno agbalinkayo a salaknib ti moralidad iti gimong, ket napateg kadagitoy nga ud-udina nga aldaw. Ket agpannuraykami kadakayo a mangisuro iti dadduma nga aramidenda met ti kasta. Bay-andak a mangiwlawagmaipapan iti daytoy: no mapukaw ti lubong ti kinalinteg dagiti babbaina, pulos a dinton makalung-aw ti lubong.
Saantayo a nailubongan a Santo iti Ud-udina nga Aldaw; natulagantayo nga Israel. Naawagantayo a mangisagana kadagiti tao iti Maikadua a Yaay ti Apo.
Ita, lawlawagak man ti sumagmamano a puntos maipanggep kadagiti babbai ken priesthood. No naset-apartkayo nga agserbi iti maysa a takem babaen ti panangiturong ti maysa nga addaan tulbek ti priesthood—kas iti bishop wenno stake presidentyo—naikkankayo iti turay ti priesthood a mangipatungpal iti dayta a pagrebbengan.
Mayarngi, iti nasantuan a templo napusganka a mangannong kadagiti ordinansa ti priesthood tunggal dumar-ayka. Isagananaka ti endowmentmo iti templo a mangaramid iti kasta.
No na-endowka ngem saanka a siaasawa iti lalaki nga addaan priesthood ken maysa ti agkuna kenka, “ladingitek iti kaawan ti priesthood iti balaymo,” awatem koma a biddut dayta a sao. Mabalin nga awananka iti priesthood bearer iti balaymo, ngem naaramidmo dagiti sagrado a katulagan iti Dios iti templona. Manipud kadagita a katulagan a maibukbok ti endowment ti bileg ti priesthoodna kenka. Ken laglagipem, a no matay ni lakaymo, sika ti mangidaulo iti pagtaenganyo.
Kas nalinteg, natalugadingan a Santa iti Ud-udina nga Aldaw, agsao ken mangisuroka nga addaan bileg ken turay ti Dios. Mangbalakad man wenno makisarita, kasapulanmi ti timekyo a mangisuro iti doktrina ni Cristo. Masapulmi ti kapanunotanyo kadagiti council iti pamilia, ward, ken stake. Napateg ti pannakiramanyo ket saan a kaano man a bambanti!
Patpatgek a kakabsatko a babbai, dumur-asto ti bilegyo bayat ti panagserbiyo kadagiti dadduma. Aglukatto ti langit kadakayo babaen dagiti kararagyo, panagayunoyo, panawenyo iti nasantuan a kasuratan, ken serbisioyo iti templo ken pakasaritaanyo iti pamilia.
Dawatek nga ipasnekyo nga adalen amin dagiti kinapudno maipanggep iti bileg ti priesthood. Mangrugikayo iti Doktrina ken Katulagan benneg 84 ken 107. Iturongdakayo dagita a benneg iti dadduma pay a binatog. Napno dagiti nasantuan a kasuratan ken pannursuro dagiti moderno a propeta, mammadto, ken mammaltiing, kadagitoy a kinapudno. Bayat ti idudur-as ti pannakaammoyo ken bayat ti panangusaryo iti pammatiyo iti Apo ken iti bileg ti priesthoodna, dumakkel ti kabaelanyo nga umas-asideg iti daytoy naesprituan a gameng nga inted kadakayo ti Apo. iti panangaramidyo iti kasta, mariknayo a sumaysayaat ti kabaelanyo a tumulong amangparnuay kadagiti agnanayon a pamilila a nakaykaysa, nailantip iti templo ti Apo, ken napnuan iti ayat para iti Nailangitan nga Amatayo ken para ken ni Jesucristo.
Amin a panagkagumaantayo nga agtitinnulong, mangipakdaar iti ebanghelio, mangpaan-anay kadagiti Santo, ken mangsubbot kadagiti natay babaen ti nsantuan a templo. Addaantayon iti 166 a templo iti intero a lubong, ken ad-adu pay ti mabangon.
Kas ammoyo, ti Salt Lake Temple, Temple Square, ken ti plasa iti asideg ti Church Office Building adda proyekto a mangpabaro a marugian iti gibus daytoy a tawen. Masapul a mataginayondaytoy sagrado a templo ken maisagana a mangparegta kadagiti masungad a henerasion, kas iti pannakaimpluensiatayo iti daytoy a henerasion.
Bayat ti panagdur-as ti Simbaan, ad-adu pay a templo ti mabangon tapno ad-adu a pamilia ti mairanud iti kapatgan ti amin a bendison, nga isu ti agnanayon a biag.5 Ibilangtayo ti templo a ti kasagraduan a pasdek ti Simbaan. Tunggal adda maipakaammo a mabangon a baro a templo, agbalin daytoy a napateg a paset ti pakasaritaantayo. Kas napagsaritaantayo ita a rabii, dakayo kakabsat a babbai tinapateg iti aramid iti templo, ket iti templo ti pangawatanyonto kadagiti kangatuan a naespirituan a gameng.
Dumngegkayo koma siaannad ken siraraem bayat ti panangipakaammok kadagiti plano a mangbangon iti walo a baro a templo. No maipakaammo ti maysa a napateg kadakayo, isingasingko nga agtamedkayo laeng a sikakakararag nga addaan iti panagyaman iti pusoyo. Maragsakankami a mangipakaammo kadagiti plano a mangipatakder kadagiti templo kadagiti sumaganad a lokasion: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; and Taylorsville, Utah. Agyamanak kadakayo, patpatgek a kakabsatko a babbai. Agyamankami unay iti yaawatyo kadagitoy a plano ken iti naraem a sungbatyo.
Ita, iti panangigibus, kayatko ti mangibati iti bendision kadakayo, tapno maawatanyo koma ti bileg ti priesthood a nakatalugadinganyo a mangpabaknangto iti bilegyo babaen ti panangusaryo iti pammatiyo iti Apo ken iti bilegna.
Patpatgek a kakabsat a babbai, addaan iti panangraem ken panagyaman, ipeksak ti ayatko para kadakayo. Sipapakumbaba nga ipakdaarko a sibibiag ti Dios! Ni Jesus ti Cristo. Simbaanna daytoy. Ipaneknekko iti sagrado a nagan ni Jesucristo, amen.