16–22 nō Tītema : « ’A haere mai i te Mesia ’e ’ia maita’i roa ’outou iāna. » Moroni 10
« 16–22 nō Tītema : ‘’A haere mai i te Mesia ’e ’ia maita’i roa ’outou iāna.’ Moroni 10 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 16–22 nō Tītema. Moroni 10 », Mai, pe’e mai—Nō te ’utuāfare ’e te fare purera’a : 2024 (2023)
Hōho’a
Tē fāra’a ’o Iesu i te mau ’āti Nephi
That Ye May Know [’Ia ’ite ’outou ē], nā Gary L. Kapp
16–22 nō Tītema : « ’A haere mai i te Mesia ’e ’ia maita’i roa ’outou iāna »
Tē ha’amata nei te Buka a Moromona nā roto i tā Nephi parau fafau nō te fa’a’ite mai ia tātou ē, « tei ni’a iho tō te Fatu aroha ia rātou ato’a ’o tāna i mā’iti, nō tō rātou fa’aro’o » (1 Nephi 1:20). Tē ’ōpani nei te buka ma te tahi tītaura’a manihini a Moroni : « ’Ia ha’amana’o ’outou i tō te Fatu aroha » (Moroni 10:2–3). E aha te mau hi’ora’a nō te aroha o te Fatu tā ’oe i ’ite i roto i te Buka a Moromona ? E nehenehe ato’a ’oe e feruri i te aroha o te Atua i te arata’ira’a i te ’utuāfare o Lehi nā roto i te mēdēbara ’e nā ni’a i te mau pape rahi, te aroha marū tāna i fa’a’ite ia Enosa i te hia’aira’a tōna vārua i tōna fa’a’orera’a hara, ’e ’aore rā te aroha tāna i fa’a’ite ia Alama, te ’enemi ’ino ho’i o te ’Ēkālesia tei riro mai ’ei tino pāruru mata’u ’ore mau. ’Aore rā, e nehenehe tō ’oe mau mana’o e fāriu i ni’a i te aroha tā te Fa’aora ti’afa’ahou i fa’a’ite i te ta’ata ’a fa’aora ai ’oia i tō rātou ma’i ’e ’a ha’amaita’i ai i tā rātou mau tamari’i ri’i. Pēnei a’e te mea faufa’a roa a’e, e fa’aha’amana’o te reira mau mea ato’a ia ’oe i « tō te Fatu aroha » ia ’oe, ’ua pāpa’ihia ho’i te Buka a Moromona nō te tītau-manihini-ra’a ia tātou tāta’itahi ’ia fāri’i i te aroha o te Atua—e anira’a tei fa’ahiti-’ōhie-hia i roto i te mau parau fa’atau aroha a Moroni ra : « ’A haere mai i te Mesia ’e ’ia maita’i roa ’outou iāna » (Moroni 10:32).
Mana’o nō te ’apo i te ha’api’ira’a i te fare purera’a ’e i te ’utuāfare
E ti’a iā’u ’ia ’ite i te parau mau o te mau mea ato’a nā roto i te mana o te Vārua Maita’i.
’Ua taui te parau fafau i roto i te Moroni 10:3–7 i te orara’a o e tau mirioni ta’ata ’āti a’e i te ao nei. ’Ua nāhea te reira i te tauira’a ia ’oe ? ’A tai’o ai ’oe i te Moroni 10:3–7, ’a ha’apa’o maita’i i tā ’oe e tai’o atu, hou atu i te mātāmua. E nehenehe e hi’opo’a i te parau tāta’itahi ma te ui ’ia ’oe iho i te mau uira’a mai teie : E aha te aura’a ? Nāhea vau i te rave maita’i a’e i te reira ? E aha te mau ’ohipa tā’u i ’ite nō ni’a i te reira ?
’A feruri ai ’oe i tā ’oe iho mā’imira’a i te parau mau pae vārua, e mea au ato’a paha ’ia tuatāpapa ’ua nāhea vetahi i te ’itera’a i te parau mau nā roto i te mana o te Vārua Maita’i. ’Ua fa’ata’a mai ’o Elder Mathias Held i te ’ohipa i tupu nōna ’ei melo ’āpī nō te ’Ēkālesia (hi’o « Te ’imira’a i te ’ite nā roto i te Vārua », Liahona, Mē 2019, 31–33). ’Ua fa’ati’a mai ’o Elder David F. Evans i tōna pa’arira’a i roto i te ’Ēkālesia, terā rā tei roto noa ā ’oia i te uiuira’a (hi’o « Te parau mau o te mau mea ato’a », Liahona, Novema 2017, 68–70). E nehenehe e tai’o i te hō’ē ’e ’aore rā i teie nā a’ora’a e piti, ’e ’ia pāpa’i i te mau mea ato’a tā ’oe i ’apo mai i roto i tā rātou mā’imira’a i te parau mau, ’o tē tauturu i tā ’oe iho mā’imira’a.
E nehenehe ato’a ’oe e hi’o e aha tā te Atua i ha’api’i nō ni’a i te parau mau nā roto i te tai’ora’a i te tahi o te mau ’īrava i roto i te Arata’i nō te mau pāpa’ira’a mo’a, « Parau mau » (Vaira’a buka ’evanelia). E aha te mau pāpa’ira’a mo’a faufa’a ta’a ’ē nō ’oe ? Pēnei a’e e nehenehe ’oe e mā’iti i te tahi nō te fa’a’ite i te tahi atu ta’ata e ’imi ato’a ra i te parau mau nā roto i te Vārua.
Tāpa’o i te mau mana’o e tae mai. Te aura’a nō te fa’afāriura’a i te ’evanelia a Iesu Mesia, ’o te ’itera’a ïa ’e te orara’a i te ’evanelia. E mea pāpū a’e e ha’a ’oe i ni’a i te mea tā ’oe i ha’api’i mai mai te mea ē, e pāpa’i ’oe i te reira. Mai te mea ē, tē ha’api’i ra ’oe i te ta’ata, ’a ani i te mau ta’ata tā ’oe e ha’api’i ra ’ia pāpa’i i tō rātou mau mana’o pae vārua.
’Ua hōro’a mai te Atua iā’u i te mau hōro’a pae vārua.
E rave rahi rāve’a nō te ta’ata ’ia « huna i te mau hōro’a a te Atua » (Moroni 10:8). Tē huna nei te tahi mau ta’ata i te vai-mau-ra’a roa o teie mau hōro’a. Tē vai ra e huna nei i tā rātou mau hōro’a nā roto noa i te tāu’a-’ore-ra’a i te reira ’e te ’orera’a e ha’amāti’e i te reira. ’A tai’o ai ’oe i te Moroni 10:8–25, ’a ’imi i te mau parau mau e tauturu ia ’oe ’ia ’ite i te mau hōro’a pae vārua ’e ’ia fa’a’ohipa i te reira nō te ha’amaita’i i te mau tamari’i a te Atua. E riro te mau uira’a mai teie i te tauturu : E aha te mau hōro’a pae vārua ? ’O vai te ta’ata e hōro’ahia te reira ? Nō te aha e hōro’ahia ai te reira ? Nahea tātou i te fāri’i i te reira ? E nehenehe ānei ’oe e feruri i te tahi mau ta’ata tei fa’a’ohipa i te mau hōro’a i tāpurahia i roto i te Moroni 10:9–16 ?
E ti’a iā’u ’ia tae i te maita’i-roa-ra’a nā roto i te maita’i rahi o Iesu Mesia.
E hau atu te a’o a Moroni ’ia « haere mai i te Mesia » i te ha’api’ira’a ’e te ferurira’a nō ni’a iāna. E tītaura’a manihini rā teie ’ia haere mai i te Mesia i tōna hopera’a—’ia riro mai iāna ra te huru. ’A tai’o ai ’oe i te Moroni 10:30–33, ’a hi’o maita’i i te mau parau ’o tē tauturu ia ’oe ’ia hāro’aro’a e aha te aura’a nō te haere mai i te Mesia ra, nāhea te reira i te tupu, ’e te mau hope’ara’a nō te ravera’a i te reira.
’A hi’o i tā ’oe tuatāpapara’a Buka a Moromona i teie matahiti i rātere, ’e ’a feruri i te mea tā ’oe i putapū ’e i ha’api’i nō ni’a ia Iesu Mesia. ’Ei hi’ora’a, ’ua nāhea te Buka a Moromona i te tauturura’a ia ’oe ’ia haere iāna ra ? ’Ua nāhea te reira i te tauturura’a ia ’oe ’ia tūru’i hope roa i ni’a i tōna maita’i rahi ? ’Ua nāhea te reira e tauturu ia ’oe « ’eiaha e huna » i te mana o te Fa’aora ? E nehenehe e fa’a’ite atu i tō ’oe iho ’itera’a pāpū nō te Buka a Moromona i te hō’ē ta’ata ’o tē hina’aro e fa’aro’o i te reira, mai te feiā herehia ’e te mau hoa tei ’ore i ’ite i tāna parau poro’i.
Hi’o ato’a « Moroni Invites All to Come unto Christ [Te ani manihini ra o Moroni i te feiā ato’a ’ia haere mai i te Mesia ra] » (video), Vaira’a buka ’evanelia.
E nehenehe au e ’ite nō’u iho ē e parau mau te Buka a Moromona.
Nāhea ’oe e tauturu ai i tā ’oe mau tamari’i ’ia fāri’i i te anira’a a Moroni nō te ani i te Atua ē e parau mau ānei te Buka a Moromona ? E nehenehe ’oe e hōro’a ia rātou i te tahi nau tuha’a ’api parau ’e teie mau ta’o i ni’a iho : Tai’o, Ha’amana’o, Feruri, ’e ani. E ’itehia i tā ’oe mau tamari’i i teie mau ta’o i roto i te Moroni 10:3–4. E aha tā tātou e tai’o, e ha’amana’o, e feruri hōhonu, ’e e ani ’ia roa’a mai, ’e ’aore rā, ’ia pūai mai tō tātou ’itera’a pāpū nō te Buka a Moromona ? E nehenehe tā ’oe mau tamari’i ’ia ’imi i te mau tū’ati’atira’a i rotopū i teie mau ’īrava ’e i te hīmene « Quand je lis l’Ecriture sainte » (Chants pour les enfants, 66).
E nehenehe tā ’oe mau tamari’i e fa’a’ohipa i te hōho’a i te pae hope’a o teie aratara’i ha’api’ira’a nō te paraparau nō ni’a i te hunara’a ’o Moroni i te mau ’api ’auro (hi’o ato’a « Pene 54 : Te fafaura’a o te Buka a Moromona », Te mau ’ā’amu o te Buka a Moromona, 156). E vaiiho i te mau tamari’i ’ia ha’uti ta’ata ora ia Moroni ra ’o tēi pāpa’i i ni’a i te mau ’api ’e te huna ra i te reira. ’A fa’a’ite i te tahi ’e te tahi i tō ’outou ’itera’a pāpū nō te Buka a Moromona.
E hōro’a mai te Metua i te ao ra i te mau hōro’a pae vārua iā’u.
Nō te ha’api’ira’a i tā ’oe mau tamari’i nō ni’a i te mau hōro’a pae vārua, e nehenehe e pāpa’i i te mau nūmera 9 ē tae atu i te 16 i ni’a i te mau ’api parau ta’a ’ē, ’e ’ia pū’ohu i te ’api parau tāta’itahi mai te hō’ē tao’a hōro’a. E nehenehe tā ’oe mau tamari’i e hōhora i te mau tao’a hōro’a, i te tai’ora’a i te mau ’īrava i roto i te Moroni 10:9–16 tei tū’ati i te mau nūmera, ma te parau e aha te hōro’a pae vārua tāta’itahi. E nehenehe ’oe e paraparau e mea nāhea tō tātou Metua i te ao ra e hina’aro ’ia fa’a’ohipa tātou i teie mau hōro’a nō te ha’amaita’i i tāna mau tamari’i. E nehenehe ato’a ’oe e tauturu atu i tā ’oe mau tamari’i ’ia ’ite i te mau hōro’a tā te Metua i te ao ra i hōro’a mai ia rātou.
Tē hina’aro nei ’o Iesu Mesia ’ia haere au iāna ra.
’Ua ’ite ānei tā ’oe mau tamari’i ē e aha te aura’a, ’ia haere mai i te Mesia ra ? Pēnei a’e e nehenehe ’oe e tai’o i te Moroni 10:32 ’e e ani ia rātou ’ia fa’ahiti fa’ahou i te reira parau nā muri iho ’ia ’oe. E ti’a ia rātou ’ia tāpiri i tō rātou mata ’a tu’u ai ’oe i te hōho’a o Iesu i te tahi vāhi i roto i te piha. I muri iho, e vaiiho ia rātou ’ia ’ara’ara i tō rātou mata, ’ia ’imi i te hōho’a, ’ia ha’aputuputu ’ati a’e i te reira, ’e ’ia paraparau nō ni’a i te mau rāve’a e nehenehe ai ia tātou ’ia haere mai i te Mesia ra. Pēnei a’e e mea maita’i ’ia pāpa’i i te uira’a E aha te aura’a te haerera’a i te Mesia ra ? Tauturu ia rātou ’ia mā’imi i roto i te Moroni 10:32–33 i te tahi mau pāhonora’a (hi’o ato’a Hīro’a Fa’aro’o 1:3–4). E ’ohipa ’āmui nō te tāpura e aha tā te Mesia e hina’aro ia tātou ’ia rave ’e e aha tāna i parau fafau e rave ’oia nō tātou.
Pēnei a’e e au mai tā ’oe mau tamari’i ’ia hāmani ’e ’ia fa’anehenehe i te mau tāreta hōho’a māfatu e parau ra ē : « ’Ua here au i te Atua ma tō’u mana ato’a, tō’u mana’o ato’a, ’e te pūai ato’a » (hi’o Moroni 10:32). ’A nā reira ai rātou, ’a paraparau ia rātou nō ni’a i te huru tātou e fa’a’ite ai i te Atua ē, ’ua here tātou iāna.
Nō te tahi atu ā mana’o, ’a hi’o i te ve’a Hoa nō teie ’āva’e.
Hōho’a
te hunara’a ’o Moroni i te mau pāpa’a ’auro
Hou ’a huna ai ’oia i te mau pāpa’a parau, ’ua ani manihini Moroni ia tātou ’ia « ha’amana’o […] i tō te Fatu aroha » (Moroni 10:3)