25 nō Novema–1 nō Tītema : « Nā roto i te fa’aro’o e tupu mai ai te mau mea ato’a. » Etera 12–15
« 25 nō Novema–1 nō Tītema : ‘Nā roto i te fa’aro’o e tupu mai ai te mau mea ato’a.’ Etera 12–15 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 25 nō Novema–1 nō Tītema. Etera 12–15 », Mai, pe’e mai—Nō te ’utuāfare ’e te fare purera’a : 2024 (2023)
Hōho’a
Etera e tomo ra i roto i te ana
Etera e tāpuni ra i roto i te ana, nā Gary Ernest Smith
25 nō Novema–1 nō Titema : « Nā roto i te fa’aro’o e tupu mai ai te mau mea ato’a »
E mea « rarahi ’e te māerehia » te mau parau tohu a Etera i te mau ’āti Iareda (Etera 12:5). « ’Ua fa’a’ite mau ’oia ia rātou i te mau mea ato’a i tupu mai te ha’amatara’a mai o te ta’ata nei » (Etera 13:2). ’Ua ’ite ātea ’oia i « te mau mahana o te Mesia » ’e te Ierusalema ’āpī i te mau mahana hope’a (Etera 13:4). ’E ’ua parau ’oia ’ia « ti’aturi ē tē vai ra te hō’ē ao maita’i roa, ’oia ïa, te hō’ē vāhi i te rima ’atau o te Atua » (Etera 12:4). ’Ua pāto’i rā te mau ’āti Iareda i tāna mau parau, mai te ta’ata e pāto’i pinepine nei i te mau parau tohu a te mau tāvini a te Atua i teie mahana—« nō te mea ’aita rātou i ’ite mata atu i te reira » (Etera 12:5). Tītauhia te fa’aro’o nō te ti’aturi i te mau mea i parauhia mai ’e ’aore rā, te mau fa’aarara’a nō ni’a i te mau mea ’aita tō tātou mata e ’ite nei, mai tei tītauhia ia Etera te fa’aro’o nō te tohu i « te mau mea rarahi ’e te māerehia » i te hō’ē nūna’a ta’ata ti’aturi ’ore. Tītauhia ia Moroni te fa’aro’o nō te ti’aturi ē, e ti’a i te Fatu ’ia rave i tōna « paruparu i te pāpa’i » ’e ’ia taui i te reira ’ei pūai (hi’o Etera 12:23–27). Nō te reira huru fa’aro’o e ti’a ai ia tātou « ’ia tāmau noa i roto i te mau ’ohipa maitata’i, ’e ’ia arata’ihia nō te fa’ahanahana i te Atua » (Etera 12:4). ’E nō te reira huru fa’aro’o « e tupu mai ai te mau mea ato’a » (Etera 12:3).
Mana’o nō te ’apo i te ha’api’ira’a i te ’utuāfare ’e i te fare purera’a
Te fa’aro’o ia Iesu Mesia e arata’i te reira i te mau temeio.
Mea mātarohia i teie mahana, mai te tau o Etera, te mau ta’ata e hina’aro e hi’o i te mau fa’a’itera’a hou ’a ti’aturi ai i te Atua ’e i tōna mana. E aha tā ’oe i ’apo mai mai roto mai i te Etera 12:5–6 nō ni’a i teie mana’o ?
’A tai’o ai ’oe i te Etera 12, e tāpa’o na ’oe i te mau taime ato’a e fārerei ai ’oe i te ta’o ra « fa’aro’o. » ’A feruri e aha tā te mau hi’ora’a tāta’itahi e ha’api’i nei nō ni’a i te fa’aro’o. E riro te mau uira’a mai teie i te tauturu : E aha te fa’aro’o ? E aha te aura’a te fa’a’ohipara’a i te fa’aro’o ? E aha te mau hotu nō te fa’aro’o ia Iesu Mesia ? E nehenehe ato’a tā ’oe e pāpa’i i tō ’oe mau mana’o nō ni’a i te mau ’itera’a pāpū i ’apohia mai « i te hope’ara’a nō te tāmatara’a o tō ’outou fa’aro’o » (Etera 12:6).
E vaiiho ia vetahi ’ē ’ia fa’a’ite mai, ’e i te tahi mau taime ’ia ha’api’i mai. E ’apo maita’i roa a’e te mau ta’ata ’ia fāna’o ana’e rātou i te taime nō te fa’a’ite i te mea tā rātou i ’apo mai ’e ’aore rā, ’ia ti’a mai rātou nō te ha’api’i. I te fare ānei ’e ’aore rā i te fare purera’a, e nehenehe e vaiiho ia vetahi ’ē, mai te feiā ’āpī, ’ia ha’api’i i te tahi tuha’a o te ha’api’ira’a.
Tē hōro’a nei Iesu Mesia ia tātou i te « ti’aturira’a rahi a’e. »
Hau atu te mau ’ite hōhonu nō ni’a i te fa’aro’o, e rave rahi ato’a i roto i te Etera 12 nō ni’a i te tīa’ira’a. E vaiiho i teie mai uira’a ’ia arata’i i tā ’oe tuatāpapara’a :
E aha te mau tumu Etera i « ti’aturi ē tē vai ra te hō’ē ao maita’i roa » ? (hi’o Etera 12:2–5).
E aha te fā nō te hō’ē tūtau ? E aha tā te tī’aturi e rave nō tō ’oe vairua, mai te reira ato’a te tūtau nō te hō’ē poti ? (hi’o Etera 12:4).
E nehenehe Iesu Mesia e taui i tō’u paruparu ’ei pūai.
’Ia tai’o tātou i te mau pāpa’ira’a pūai a Moroni, e mea ’ōhie ’ia ha’amo’e ē, ’ua pe’ape’a ’oia i tōna « paruparu i te pāpa’i » ’e ’ua taiā ’oia e vahavaha mai te ta’ata i tāna mau parau (hi’o Etera 12:23–25). Mai te mea i pe’ape’a a’ena ’oe nō tō ’oe iho paruparu, ’a tai’o i te mau fifi o Moroni—’e te pāhonora’a a te Fa’aora—i roto i te Etera 12:23–29. E nehenehe ato’a ’oe e feruri i te mau taime ’a tauturu ai ’o Iesu Mesia ’ia ’oe ’ia ’ite i tō ’oe paruparu ’e ’ia ha’apūai ia ’oe—noa atu ē ’aita ’oia i ’īriti hope roa i te reira. ’A feruri ato’a i te mau paruparu tā ’oe e ora nei i teie taime. E aha tē tītauhia ia ’oe ’ia rave nō te fāri’i i te fafaura’a a te Fa’aora ’oia « e fa’ariro ai i te mau mea paruparu ’ei mea pūai » ? (Etera 12:27).
E nehenehe e mā’imi i teie mau tuha’a parau i muri nei nō te hi’o atu e mea nāhea vetahi mau ta’ata i roto i te mau pāpa’ira’a mo’a i te fāri’ira’a i te pūai nā roto i te maita’i rahi o Iesu Mesia :
Te pāto’ira’a i te mau peropheta a te Fatu ’o te tu’ura’a ïa iā’u i roto i te ’ati pae vārua.
I roto i te ’ā’ai, e pārahira’a ataata mau te ti’ara’a ari’i nō te mau ’āti Iareda. Mai te reira ïa nō Korianetumera, inaha « e rave rahi ta’ata pūai […] ’ua tītau rātou ’ia taparahi ia Korianetumera » (Etera 13:15–16). I roto i te Etera 13:15–22, ’a hi’o na i tā Korianetumera i rave nō te pāruru iāna, ’e te mea tā te peropheta Etera i parau iāna e rave. ’Ia tai’o ’oe i te toe’a o te buka a Etera, ’a feruri i te mau fa’ahope’ara’a nō te pāto’ira’a i te mau peropheta. E aha tē tupu i ni’a i te mau ta’ata i te taime « [’ia] fa’aea te Vārua o te Fatu i te tūtava ’e ’o rātou, » ? (Etera 15:19). E aha ra te ha’api’ira’a tā te Fatu e hina’aro ia ’oe ’ia ’apo mai i roto i teie mau fa’ati’ara’a ? ’A feruri e aha tā ’oe e rave nō te pe’e i tāna mau peropheta.
Te faʼaroʼo ’o te ti’aturira’a ïa i te mau mea ’aore e ʼite-mata-hia e au.
’A tauturu i tā ’oe mau tamari’i ’ia fa’ahiti nā muri iho ia ’oe « te fa’aro’o ’o te ti’aturira’a ïa i te mau mea ’aore i hi’ohia » i roto i te Etera 12:6. E riro paha rātou i te ’oa’oa i te māta’ta’ira’a i te mau hōho’a tei fa’a’ite i te mau hi’ora’a nō te fa’aro’o i roto i te Etera 12:13–15, 19–21 (hi’o Buka hōho’a o te ’evanelia, nūmera 78, 85, ’e te ’api fa’a’ana’anataera’a nō teie hepetoma). E vaiiho i tā ’oe mau tamari’i ’ia tātara mai e aha tā rātou i ’ite nō ni’a i te ’ā’amu tāta’itahi. Teie te tahi mau uira’a nō te tauturu ia ’outou ’ia ’āparau nō ni’a i teie mau hi’ora’a nō te fa’aro’o :
E aha te ti’aturi o teie mau ta’ata ?
Mea nāhea tō rātou fa’aro’o i te tāmatara’ahia ?
E aha tei tupu maoti tō rātou fa’aro’o ?
E nehenehe ato’a ’oe e fa’a’ite i tā ’oe iho fa’a’ohipara’a i te fa’aro’o.
E au te ti’aturi mai te hō’ē tūtau nō tō’u vairua.
Nō te māramarama e aha tā Etera 12:4 e ha’api’i nei nō ni’a i te ti’aturi, e nehenehe ’outou tā ’oe mau tamari’i e hi’o i te hōho’a nō te hō’ē poti ’e tōna tūtau. Nō te aha tītauhia ai te tūtau nō te poti ? E aha tē tupu i ni’a i te hō’ē poti ’aita tōna e tūtau ? ’A tai’o ’āmui ai ’outou i te Etera 12:4 ’a paraparau e nāhea te ti’aturi e tauturu ia tātou mai te hō’ē tūtau e tauturu i te hō’ē poti. E ani i tā ’oe mau tamari’i ’ia pāpa’i i te hōho’a nō te hō’ē poti ’e te tūtau, ’ia ha’api’i rātou te tahi i te tahi nō ni’a i te ti’aturi.
Mai te mea e hina’aro tā ’oe mau tamari’i i te tahi tātarara’a nō te ti’aturi, ’a tauturu ia rātou ’ia ’imi hō’ē i roto i te Arata’ira’a nō te mau pāpa’ira’a mo’a,« Ti’aturi » (Vaira’a buka ’evanelia). ’Ia au i teie tātarara’a ’e te Etera 12:4, 32, i ni’a i te aha tō tātou ti’aturi e ti’a ai ? (hi’o ato’a Moroni 7:40–42). E tauturu i tā ’oe mau tamari’i ’ia feruri i te tahi mau ta’o nō te ti’aturi, ’e tae noa atu te mau ta’o huritua nō ti’aturi. E nehenehe ato’a ’outou e fa’a’ite te tahi i te tahi i te tahi mau parau mau tei hōro’a ia ’outou i te ti’aturi.
E nehenehe Iesu Mesia e tauturu iā’u ’ia pūai i te pae varua.
I te tahi taime e fa’aruru te mau tamari’i i te mau ’ohipa e paruparu ai tō rātou ferurira’a, mai ia Moroni ato’a. Tauturu i tā ’oe mau tamari’i ’ia ’imi nō te aha i tupu ai terā mana’o i roto ia Moroni, i roto i te Etera 12:23–25, ’e e ani ia rātou ē ’ua tupu ānei te reira mau mana’o i roto ia rātou. I muri iho, e ani ia rātou ’ia tai’o i te mau ’īrava 26–27 ’ia ’ite rātou e mea nāhea tō te Fatu fa’aitoitora’a ia Moroni.
Pēnei a’e e nehenehe tā ’oe mau tamari’i ’ia pāpa’i i te hōho’a nō te hō’ē ’ohipa paruparu ’e te tahi ’ohipa pūai. I muri iho, e tu’u rātou i ni’a i tā rātou hōho’a i te tahi mau ta’o ’e te mau parau nō roto mai i te Etera 12:23–29 tēi ha’api’i ia rātou e nāhea te Fa’aora i te huri i tō tātou paruparu ’ei mea pūai. E fa’aitoito i tā ’oe mau tamari’i ’ia feruri i tō rātou paruparu e vai ra ’e i muri iho, ’ia ’imi i te tauturu a te Fa’aora e ta’ata pūai ai rātou. E hōro’a i te tahi hi’ora’a nō te tauturura’a te Fa’aora i te fa’anava’i i tō ’oe pūai nō te rave i te hō’ē mea pa’ari.
Nō te tahi atu ā mana’o, ’a hi’o i te ve’a Hoa nō teie ’āva’e.
Hōho’a
Tē tūturi ra ’o Etera i te auvaha o te ana
Marvelous Were the Prophecies of Ether [E mea fa’ahiahia ’e te au ho’i te mau tohu a Etera], nā Walter Rane