2–8 nō Tītema : « Nō te tāpe’a ia rātou i ni’a i te ’ē’a ti’a. » Moroni 1–6
« 2–8 nō Tītema : ‘Nō te tāpe’a ia rātou i ni’a i te ’ē’a ti’a.’ Moroni 1–6 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 2–8 nō Tītema. Moroni 1–6 », Mai, pe’e mai—Nō te ’utuāfare ’e te fare purera’a : 2024 (2023)
Hōho’a
Tē bāpetizo nei Alama i roto i te pape nō Moromona
Minerva Teichert (1888–1976), Alma Baptizes in the Waters of Mormon [Tē bāpetizo nei Alama i roto i te pape nō Moromona], 1949–1951, pēni hinu, 35⅞ x 48 ’initi. Brigham Young University Museum of Art, 1969
2–8 nō Tītema : « Nō te tāpe’a ia rātou i ni’a i te ’ē’a ti’a »
I te fa’ahopera’a Moroni i te pāpa’a parau a tōna metua tāne nō ni’a i te mau ’āti Nephi ’e i te ha’apotora’a i te pāpa’a parau a te mau ’āti Iareda, ’ua mana’o ’oia ē, ’ua oti tāna ’ohipa i te ha’apa’ora’a i te pāpa’a parau (hi’o Moroni 1:1). E aha atu ā pa’i tē parau nō ni’a i nā nūna’a e piti tei mou roa ? ’Ua ’ite rā ’o Moroni i teie nei tau tō tātou (hi’o Moromona 8:35), ’e ’ua fa’auruhia ’oia ’ia « pāpa’i […] i te tahi fa’ahou mau mea iti noa, penei a’e ’o te faufa’ahia […] i te tahi mau mahana i mua nei » (Moroni 1:4). ’Ua ’ite ’oia ē tē tae mai ra te hō’ē tāivara’a rahi, ’āpe’ehia ’e te ta’a-’ore-ra’a i te mau ’ōro’a o te autahu’ara’a ’e te ha’apa’ora’a fa’aro’o. ’O te reira paha te tumu ’oia i vauvau ai i te parau ha’amāramaramara’a nō te ’ōro’a, te bāpetizora’a, te hōro’ara’a i te hōro’a nō te Vārua Maita’i ’e te mau ha’amaita’ira’a nō te ha’aputuputu i te feiā fa’aro’o « nō te tāpe’a [te tahi i te tahi] i ni’a i te ’ē’a ti’a […] ma te ti’aturi noa i te mau maita’i rahi o te Mesia, ’oia ho’i te tumu ’e te fa’aotira’a nō tō [tātou] fa’aro’o » (Moroni 6:4). I teie mau hi’ora’a faufa’a rahi e tumu ai tō tātou nō te māuruuru ē ’ua fa’aherehere te Fatu i te ora o Moroni ’ia ti’a iāna ’ia « pāpa’i […] i te tahi fa’ahou mau mea iti noa » (Moroni 1:4).
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe au e pe’e ia Iesu Mesia noa atu te pāto’ira’a.
’A tai’o ai ’oe i te Moroni 1, e aha tā ’oe e fa’ahiahia nei i te ha’apa’o-maita’i-ra’a o Moroni i te Fatu ’e i tāna pi’ira’a ? E aha te tahi mau rāve’a te ta’ata e « huna [ai] i te Mesia » ? (Moroni 1:2–3). ’A feruri e nāhea ’oe e ha’apa’o maita’i ai ia Iesu Mesia, noa atu ē e fa’aruru ’oe i te mau tāmatara’a ’e te pāto’ira’a.
Tītau-roa-hia i te fa’atere i te mau ’ōro’a o te autahu’ara’a mai tei fa’auehia mai e te Fatu.
Tē horo ra ’o Moroni nō tōna ora ’a pāpa’i ai ’oia i teie mau pene parau. Nō te aha ’oia e ha’ape’ape’a ai nō te pāpa’i i teie mau parau arata’ira’a mai te huru ravera’a i te mau ’ōro’a ? ’A feruri i te reira ’a tai’o ai i te Moroni 2–6. I tō ’oe mana’o, nō te aha e mea faufa’a teie mau fa’ata’ara’a nō te Fatu ? Teie te tahi mau uira’a tē nehenehe e arata’i i tā ’oe tuatāpapara’a :
Te ha’amaura’a (Moroni 2 ; 6:4).E aha te mau arata’ira’a a te Fa’aora i roto i te Moroni 2:2 e ha’api’i nei ia ’oe nō ni’a i te ’ōro’a nō te ha’amaura’a ? E nāhea ’oe i te tātara mai i te aura’a nō te parau « te fa’aitoitora’ahia ’e te tāmāra’ahia nā roto i te mana o te Vārua Maita’i » ? (Moroni 6:4).
Te fa’atōro’ara’a autahu’ara’a (Moroni 3).E aha tā ’oe e ’ite ra i roto i teie pene ’o tē nehenehe e tauturu i te hō’ē ta’ata ’ia fa’aineine nō tōna fa’atōro’ara’a i te autahu’ara’a ? E aha tā ’oe e ’ite ra ’o tē tauturu atu i te hō’ē ta’ata ’ia fa’aineine iāna nō te rave i te tahi fa’atōro’ara’a ?
Te ’ōro’a mo’a (Moroni 4–5 ; 6:6).E aha tā ’oe e nehenehe e rave nō te fa’ariro i te ’ōro’a mo’a ’ei tūramara’a vārua i tō ’oe hepetoma ?
Te bāpetizora’a (Moroni 6:1–3).E aha tā ’oe e rave nō te tāmau ā i te pāhono i te mau tītaura’a nō te bāpetizora’a ?
Hōho’a
feiā ’āpī tamāhine e fāri’i ra i te hō’ē ha’amaita’ira’a
’Ua ha’api’i ’o Iesu e nāhea i te rave i te mau ’ōro’a
’Ia au i te ha’api’ira’a tā ’oe i ’apo mai, e nāhea ’oe ’ia taui i tā ’oe huru hi’ora’a ’e tā ’oe huru ravera’a, ’aore rā tā ’oe huru fa’aineinera’a i te ta’ata ’ia ’āmui i roto i teie mau ’ōro’a ?
Ha’utira’a ta’ata ora. Hō’ē rāve’a maita’i roa nō te ha’amana’o i te mea tā ’oe i ’apo mai, ’o te fa’ata’ara’a ïa i te reira ia vetahi ’ē. ’Ei hi’ora’a, e tāmata i te ha’uti ta’ata ’ora i te ’ohipa mai teie te huru : Te uiui ra te mana’o o te tahi hoa ’ua ineine ānei ’oia nō tōna bāpetizora’a. E nāhea ’oe i te fa’a’ohipa i te Moroni 6 nō te tauturu iāna ?
Te ravera’a i te ’ōro’a mo’a, e tauturu te reira iā’u nō te ha’afātata atu ā ia Iesu Mesia.
’Ua fa’aro’o a’ena paha ’oe i te mau pure nō te ’ōro’a mo’a e rave rahi taime, terā rā, e aha te pinepinera’a tō ’oe ferurira’a i te aura’a o te mau ta’o ? E nehenehe e tāmata i te pāpa’i i nā pure ’ōro’a e piti ma te hi’o ’ore i te reira. I muri iho, ’a fa’aau i te mea tā ’oe i pāpa’i i te mea i roto i te Moroni 4:3 ’e te 5:2. E ’ohipa ānei tā ’oe i tāpe’a mai nō ni’a i teie nau pure ’aita ’oe i ha’apa’o i te mātāmua ra ?
E nehenehe e tu’u i te hō’ē hīmene ’ōro’a i roto i tā ’oe tuatāpapara’a, mai te hīmene « ’Ei mana’ora’a teie » (Te mau hīmene, N°106).
E aupuru te mau pipi a Iesu Mesia i te vairua o te tahi ’e te tahi.
Te mā’itira’a i te pe’e atu i te Mesia e hina’aro ta’ata hō’ē ïa, nō te ta’ata tāta’itahi, terā rā, e nehenehe te hoa fa’aro’o e tauturu ia tātou ’ia fa’aea noa « i ni’a i te ’ē’a ti’a » (Moroni 6:4–5). E aha tā te mau melo o te ’Ēkālesia i rave i te tau o Moroni nō te fa’aitoito i te tahi ’e te tahi ? ’A tai’o ai ’oe i te Moroni 6:4–9, ’a feruri i te mau ha’amaita’ira’a e tae mai nō te mea « ’ua tai’ohia [’oe] i rotopū i te mau ta’ata o te ’ēkālesia a te Mesia » (Moroni 6:4).
E nehenehe ato’a ’oe e feruri i te mau ta’ata e haere mai nei i roto i tā ’oe pāroita ’e ’aore rā, te ’āma’a. Tē vai ra ānei te tahi melo tei hina’aro ta’a ’ē i tō ’oe here—pēnei a’e e melo ’āpī ’e ’aore rā e melo tei ho’i mai i te purera’a ? Nāhea ’oe e tauturu ai ia rātou ’ia tū’ati rahi a’e tā rātou haerera’a i te fare purera’a mai te mau ’ohipa tā Moroni i fa’a’ite ? (nō te mau mana’o, ’a hi’o Te ’ē’a nō te fafaura’a ’e ’aore rā te mau video « Ha’apa’arira’a i te mau melo ’āpī » i roto i te Vaira’a buka ’evanelia). E nehenehe e noa’a mai te tahi fa’aurura’a i roto i te tuha’a 1 nō te a’ora’a a te peresideni Dallin H. Oaks « E mea hina’arohia te hō’ē ’Ēkālesia » (Liahona, Novema 2021, 24–25).
’A feruri ai ’oe i te aura’a ’ia « fa’a’amuhia […] i te parau maita’i a te Atua » (Moroni 6:4), e mea maita’i paha ’ia feruri i te aupurura’a o te hō’ē huero ’e ’aore rā o te hō’ē ’aiū—’e e aha tē tupu mai te mea e’ita te reira e ha’apa’ohia. ’A mā’imi i roto i te Moroni 6:4–9 i te mau mana’o e nāhea ’oe e tauturu ai i te « fa’a’amu » ia vetahi ’ē i te pae vārua. Mea nāhea tō te mau hoa pipi tauturura’a i te fa’a’amura’a ia ’oe ?
E ’ere i te mea ’ōhie nō te mau melo ato’a ’ia māramarama nō te aha e mea faufa’a ai ’ia « tai’ohia rātou i rotopū i te mau ta’ata o te ’ēkālesia a te Mesia » ’e ’ia « ha’aputuputu pinepine » i roto i te mau purera’a a te ’Ēkālesia. Nāhea ’oe i te fa’ata’a i te ta’ata i te tumu ’oe e māuruuru ai i te rirora’a ’ei melo nō te ’Ēkālesia a Iesu Mesia ? (hi’o i te tahi atu mau tuha’a o te a’ora’a a te peresideni Oaks « E mea hina’arohia te hō’ē ’Ēkālesia »).
E rave rahi taime te fa’ahitira’ahia te Vārua Maita’i ’e ’aore rā te Vārua i roto i te Moroni 2–6. Pēnei a’e e nehenehe ’oe e ani i tā ’oe mau tamari’i ’ia ’imi i te mau ’īrava ato’a e fa’ahiti ra iāna, ’a tai’o atu ai i te reira mau ’īrava, ’e ’a tāpura atu ai i te mea tā rātou i ’apo mai nō ni’a i te Vārua Maita’i. E nehenehe ato’a ’outou e fa’a’ite te tahi i te tahi i te mau taime ’ua putapū ’outou i te fa’aurura’a a te Vārua.
E rave au i te ’ōro’a mo’a nō te fa’a’ite ē, e ha’amana’o tāmau noa vau ia Iesu Mesia.
Te tai’ora’a i te mau pure ’ōro’a ’e tā ’oe mau tamari’i, e arata’i te reira i te tahi ’āparaura’a e nāhea i te fa’ariro rahi atu ā i te ’ōro’a mo’a ’ei ’ohipa faufa’a rahi. E mea au paha ’ia fa’aferuri ia rātou ē, tē haere mai nei te tahi hoa i te purera’a ’ōro’a nō te taime mātāmua roa. E nāhea tātou i te fa’ata’a i tō tātou hoa ē, e aha te ’ōro’a mo’a ’e nō te aha e mea mo’a ai te reira ? ’A fa’aitoito i tā ’oe mau tamari’i i te fa’a’ohipa i te tahi mea i roto i te Moroni 4 ’e ’aore rā te 5 nō tā rātou mau tātarara’a. E nehenehe te mau tamari’i ’āpī a’e e fa’a’ohipa i te ’api fa’a’ana’anataera’a nō teie hepetoma ’e ’aore rā te Buka hōho’a nō te ’evanelia, nūmera 108.
E nehenehe ’outou e hīmene ’āmui i te hō’ē hīmene ’o tē tauturu i tā ’oe mau tamari’i ’ia feruri i te Fa’aora (mai te « Humblement, calmement », Chants pour les enfants, 11). E nehenehe ato’a ’outou e ha’api’ipi’i i te pārahira’a ma te tura i te taime nō te ’ōro’a mo’a.
E nehenehe au e fa’aineine iā’u nō tō’u bāpetizora’a.
’O vai tē ti’a ia bāpetizohia ? ’A tauturu i tā ’oe mau tamari’i ’ia ’imi i te mau pāhonora’a i teie uira’a i roto i te Moroni 6:1–3. E aha te aura’a o te parau « ’ā’au ’oto ’e te vārua tātarahapa » ? (Moroni 6:2). Nāhea te reira i te tauturu ia tātou ’ia fa’aineine nō te bāpetizora’a ? E nehenehe e parau i tā ’oe mau tamari’i ’ua nāhea ’oe i te fa’aineinera’a nō tō ’oe bāpetizora’a.
Tē haere nei tātou i te purera’a nō te rave i te ’ōro’a mo’a ’e nō te pāturu i te tahi ’e te tahi.
’Ua ’ite ānei tā ’oe mau tamari’i nō te aha ’oe e au ai i te haere i te purera’a ? E nehenehe te tai’ora’a i te Moroni 6:4–6, 9 e hōro’a mai ia ’oe i te rāve’a nō te ’āparau ’āmui i te tahi mau mea tā tātou e rave nei i te fare purera’a. Pēnei a’e e nehenehe tā rātou e pāpa’i mai i te tahi hōho’a nō rātou iho i te ravera’a i teie mau mea i muri nei (te purera’a, te ha’api’ira’a, te hīmenera’a ’e te ravera’a i te ’ōro’a mo’a).
I muri mai i te tai’ora’a ’āmui i te Moroni 6:4 e nehenehe ’outou tā ’oe mau tamari’i e hi’o i te mau hōho’a ’e ’aore rā te mau hi’ora’a nō te mau mā’a fa’a’amura’a ma te fa’aau i tō tātou tino i te « fa’a’amuhia i te parau maita’i a te Atua ra. » E nehenehe ato’a ’outou e māta’ita’i i te video « Children Sharing the Gospel [Te mau tamari’i e fa’a’ite ra i te ’evanelia] » (Vaira’a buka ’evanelia).
Nō te tahi atu ā mana’o, ’a hi’o i te ve’a Hoa nō teie ’āva’e.
Hōho’a
Te tāponira’a Moroni i roto i te ana
Moroni in the Cave [Moroni i roto i te ana], nā Jorge Cocco