eb’ laj Jaredita neke’b’eek sa’ li yamyookil ch’och’

Eb’ laj Jaredita neke’el chaq Babel, xb’aan laj Albin Veselka

11–17 noviembre: “Teepej li tz’apleb’ t’ikr a’an re xmaak’a’il eepaab’aal”

Eter 1–5

Us ta yaal naq lix na’leb’ li Dios taqenaq wi’chik chiru li qe ut junelik aajel ru naq taqakanab’ qib’ chiru li rajom a’an, a’an naxwaklesi ajwi’ qach’ool chi k’oxlak ut chi k’anjelak qajunes qib’. A’an jun na’leb’ kixtzol laj Jared ut li ras. Jo’ eetalil, li na’leb’ re xik sa’ jun ak’ ch’och’ “li sik’b’il ru sa’ xb’een chixjunil li ch’och’” kitikla rik’in laj Jared, ut li Qaawa’ kixk’ulub’a li rajom, ut kixye re li ras laj Jared, “Ut chi jo’kan tinb’aanu aawe xb’aan naq chiru li k’iila kutan a’in kat-elajin chiwu” (chi’ilmanq Eter 1:38–43). Ut naq li ras laj Jared kiraj ru li saqen sa’eb’ li k’amonel jukub’ li te’xik wi’ sa’ li yeechi’inb’il ch’och’, li Qaawa’ kiroksi jun patz’om li k’aynaqo laa’o chixpatz’b’al re a’an: “K’a’ru teeraj naq tinb’aanu?” (Eter 2:23). A’an naraj rab’inkil li qak’oxlahom ut li qana’leb’, ut a’an toorab’i ut tixye naq us a’an, malaj ut tixk’e jalan chik qana’leb’. Wan naq ka’ajwi’ ramrookeb’ chiqu li osob’tesink naqasik’ xb’aan “li tz’apleb’ t’ikr re xmaak’a’il qapaab’aal,” ut wi naru “taqapej li tz’apleb’ t’ikr a’an” (Eter 4:15), maare taasachq raj qach’ool rik’in li wan xch’ool li Qaawa’ chixb’aanunkil choq’ qe.

Chi’ilmanq ajwi’ li video chirix li ras laj Jared naq li Qaawa’ kixk’utb’esi rib’ chiru, li wan sa’ li Biblioteca del Evangelio.

Li na’leb’ re tzolok sa’ li ochoch ut sa’ li iglees

Eter 1:33–43

Naq nintz’aamank chiru li Qaawa’, a’an tixtoq’ob’a wu.

Sa’ Eter 1:33–43 yeeb’il resileb’ oxib’ li tij kixk’e li ras laj Jared. K’a’ru nakatzol rik’in chan ru li Qaawa’ kixsume li junjunq chi tij a’an? K’oxlan chirix jun hoonal naq li Qaawa’ xtoq’ob’a aawu naq xattz’aaman chiru rik’in tijok. Maare us xtz’iib’ankil resil li numsihom a’an ut xwotzb’al rik’in anihaq chik li maare naraj ru rab’inkil lix nawom aach’ool.

Chiʼilmanq ajwiʼ “Tijok saʼ muqmu,” Ebʼ li Bʼich, 79.

Eter 2; 3:1–6; 4:7–15

reetalil li seminario

Naru nink’ul li k’utb’esinb’il na’leb’ choq’ re inyu’am.

Li Awa’b’ej Russell M. Nelson kixye: “Nin’elajink cheru naq teekawresi lee wankilal chixk’ulb’al li k’utb’esinb’il na’leb’. … Sik’omaq ru xb’aanunkil li k’anjel aajel ru choq’ re xk’ulb’al li Santil Musiq’ej ut rab’inkil li Musiq’ej chi kok’ aj xsa’ ut chi saqen ru” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).

Naq nakawil Eter 2; 3:1–6; 4:7–15, k’a’ru nakatzol chrix li “musiq’ejil k’anjel” ki’aatinak wi’ li Awa’b’ej Nelson? Naru nakaweetaliheb’ lix patz’om malaj lix k’a’uxl li ras laj Jared ut li k’a’ru kixb’aanu rik’in jun b’on, ut rik’in jalan chik b’on naru nakaweetali chan ru li Qaawa’ kixtenq’a ut kixk’e chi nawmank li rajom a’an.

Wahe’ junjunq li patz’om naru nakak’oxla naq yooqat chi tzolok:

• K’a’ru nawulak chawu chirix lix sumehom li Qaawa’ choq’ re lix patz’om li ras laj Jared sa’ Eter 2:18–25?

• Chan ru naru nakawoksi Eter 3:1–5 re xtenq’ankil jun kristiaan li yoo chixtzolb’al chan ru tijok?

• K’a’ru naru naramok aawe chixk’ulb’al laa na’leb’ chi k’utb’esinb’il xb’aan li Qaawa’? (chi’ilmanq Eter 4:8–10). Chan ru naq taak’ul xkomon chik laa na’leb’ chi k’utb’esinb’il xb’aan? (chi’ilmanq Eter 4:7, 11–15).

• K’a’ru naraj naxye “xpejb’al li tz’apleb’ t’ikr re xmaak’a’il aapaab’aal” sa’ laa yu’am? (Eter 4:15).

K’a’ chik ru nakatzol rik’in li ras laj Jared chirix li k’utb’esinb’ na’leb’?

Li Elder Dale G. Renlund kik’utuk chirix “Jun k’uub’anb’il eetalil re xk’ulb’al li k’utb’esinb’il na’leb’” (Jolomil ch’utub’aj-ib’ re octubre 2022). Naru nakayiib’ xjalam-uuch jun li kaaxukuut ut nakatz’iib’a sa’ kahichal xcha’al li k’uub’anb’il eetalil. Chan ru naq li k’uub’anb’il eetalil a’in naru tatxtenq’a “chixk’ulb’al xkomon chik li k’utb’esinb’il na’leb’”?

Chi’ilmanq ajwi’ Temas del Evangelio, “Revelación,” Biblioteca del Evangelio.

Eter 2:14–15; 3:1–20

Rik’in lix q’usum, li Qaawa’ nikinixb’oq chixjalb’al ink’a’uxl ut chi chalk rik’in a’an.

Jun xnimal ru profeet jo’ li ras laj Jared a’an ajwi’ kiraj ru q’use’k xb’aan li Qaawa’. K’a’ru nakatzol sa’ Eter 2:14–15 chirix lix q’usum li Qaawa’? K’oxla chan ru naq lix q’usum li Qaawa’ ut lix sumehom li ras laj Jared ke’tenq’an chixkawresinkil a’an choq’ re li kixk’ul sa’ Eter 3:1–20.

Eter 2:16–25

Li Qaawa’ tinixkawresi re tinq’ax ru li “nimla chamal ha’” re inyu’am.

Wan naq, xq’axb’al ru li “nimla chamal ha’” a’an li junaj chi b’e re xtz’aqob’resinkil ru li rajom li Dios choq’ qe. Ma nakawil li k’a’ru juntaq’eet rik’in laa yu’am sa’ Eter 2:16–25? Chan ru xatxkawresi li Qaawa’ re xnumsinkileb’ laa ch’a’ajkilal? K’a’ru li yoo chixpatz’b’al aawe naq taab’aanu anajwan re xkawresinkil aawib’ choq’ re li naraj naq taab’aanu sa’ junaq kutan chalel?

Chi’ilmanq ajwi’ L. Todd Budge, “Li kanab’ank-ib’ rajlal ut rik’in kawilal,” Jolomil ch’utub’aj-ib’ re octubre 2019.

Yu’ami li nakatzol. Tento naq xtzolb’al li evangelio tooxmusiq’a chixjalb’al li qayu’am. Chirix rilb’al Eter 4:11–12, naru nakatz’iib’a resileb’ li wankilal neke’k’anjelak sa’ laa yu’am ut ma yookeb’ chab’eresinkil re taab’aanu li us. K’a’ru li nakaweek’a naq tento taajal?

Eter 5

Eb’ laj yehol nawom neke’xch’olob’ naq yaal lix Hu laj Mormon.

Naq yooqat chirilb’al lix profeetil aatin laj Moroni sa’ Eter 5, k’oxla k’a’ut naq li Qaawa’ kixkawresiheb’ naab’al aj yehol nawom chirix lix Hu laj Mormon. K’a’ru aawilom malaj aawab’ihom li nakatxmusiqa’ chixpaab’ankil naq lix Hu laj Mormon a’an li raatin li Dios? Chan ru naq lix Hu laj Mormon ak naxk’ut chawu “lix wankil li Dios ut joʼkan ajwiʼ li raatin”? (Eter 5:4).

Li na’leb’ re xtzolb’aleb’ li kok’al

Eter 1:33–37; 2:16–25; 3:1–6

Lin Choxahil Yuwa’ narab’iheb’ ut naxsumeheb’ lin tij.

• Wi nakanaw junaq chik aatinob’aal li ink’a’ neke’xnaw laa kok’al, ye reheb’ k’a’ru te’xb’aanu rik’in li aatinob’aal a’an (malaj oksi junaq li video sa’ jalan chik aatinob’aal). Naru nakawoksi a’in re xch’olob’ankil k’a’ut naq li ras laj Jared kitijok re xk’ulb’al xtenq’ sa’ Eter 1:33–37. Ka’jultika k’a’ru kireek’a li Qaawa’ chirix li tij a’in ut chan ru naq kixsume (chi’ilmanq ajwi’ “Ch’ol 50: Eb’ laj Jaredita neke’el chaq Babel,” Eb’ li Esilal sa’ lix Hu laj Mormon, 143–144).

• Laa kok’al naru neke’xk’utb’esi naq yookeb’ chixyiib’ankil jun li k’amonel jukub’, naq yooqat chirilb’al Eter 2:16–17. Chirix a’an naru nekeril resileb’ li ch’a’ajkilal ke’xtaw laj Jaredita rik’ineb’ lix k’amonel jukub’ (chi’ilmanq Eter 2:19) ut chan ru naq li Qaawa’ kixsumeheb’ lix tij li ras laj Jared (chi’ilmanq Eter 2:19–25; 3:1–6). Li jalam-uuch ut li perel re kok’ k’anjel li wankeb’ sa’ xraqik li tusleb’ aatin a’in naru nekexxtenq’a chixyeeb’al li seraq’. K’a’ru naqatzol rik’in li ras laj Jared chirix li tijok? Naru nakawotz jun aanumsihom b’ar wi’ naq xattijok re xpatz’b’al aatenq’ ut li Qaawa’ xatxtenq’a.

Eter 3:6–16

Kinyo’ob’tesiik jo’ chanru xjalam-uuch li Dios.

• Naq yooqeb’ chi k’iik, laa kok’al te’xtaw k’iila b’alaq’il esil chirix li Dios, chirixeb’ ajwi’ a’an, ut chirix lix tib’eleb’. Naru nakapatz’ reheb’ naq tate’xtenq’a chixtawb’al li yaal chirixeb’ li na’leb’ a’in sa’ Eter 3:6–16. Re xka’jultikankil li yaal li k’utb’il sa’ Eter 3:13, 15, naru nekeril jun xjalam-uuch li Kolonel ut taapatz’ reheb’ laa kok’al naq te’xk’ut chi ruq’ jalan jalanq xcha’al lix tib’el. Chirix a’an naru te’xk’ut ajwi’ chi ruq’ li cha’alil a’an sa’ xjunxaqalileb’. Naru ajwi’ nekeb’icha jun li b’ich chirix li qajunxaqalil, maare “Jun santil ochoch k’eeb’il we” (B’ichleb’aal choq’ reheb’ li Kok’al, 73). Naru neketz’il rix k’a’ut naq nekeb’antioxi naq wan eejunxaqalil.

jun ch’ina al na’alinak chirix kab’l

Yoʼobʼtesinbʼilo joʼ xjalam-uuch li Dios

Eter 5

Oxibʼ chi aj yehol nawom ke’xchʼolobʼ xyaalal lix Hu laj Mormon.

• Laj Moroni kixye profeetil aatin chirixeb’ li oxib’ chi aj yehol nawom li te’tenq’anq chixk’ojob’ankil lix yaalalil lix Hu laj Mormon. Re xk’utb’al k’a’ru jun aj yehol nawom, naru nakapatz’ reheb’ laa kok’al naq te’xye resil k’a’ruhaq rilomeb’ malaj xnumsihomeb’ li moko ke’ril ta malaj ke’xnumsi ta li jun siir chik. Chirix a’an, naq yooqex chirilb’al Eter 5, naru neketz’il rix k’a’ut naq li Dios naroksiheb’ laj yehol nawom sa’ lix k’anjel. Naru ajwi’ nekewotz cherib’il eerib’ chan ru nekenaw naq yaal lix Hu laj Mormon ut chan ru naq naru nekewotz lix nawom eech’ool rik’ineb’ lee ras eeriitz’in.

Re xtawb’al xkomon chik li na’leb’, chi’ilmanq li hu Amigos re li po a’in.

li Jesus naxtoch’eb’ li waqlaju pek chiru rilob’aal li ras laj Jared

Ma wan chik k’a’ru xawil?, xb’aan laj Marcus Alan Vincent

perel re kok’ k’anjel: Li qaChoxahil Yuwa’ kixsume lix tij li ras laj Jared