laj Moroni natz’iib’ak chiruheb’ li perel ch’iich’

Laj Moroni natz’iib’ak chiruheb’ li perel ch’iich’ oor, xb’aan laj Dale Kilborn

4–10 noviembre: “Nekexwaatina chanchan naq wankex chiwu”

Mormon 7–9

Laj Moroni kixnaw li junaatalil sa’ jun ruchich’och’ aj maak—q’axal junaatal chik kikana chirix naq kikam lix yuwa’ sa’ pleet ut ke’sache’ laj Nefita. “Laa’in ajwi’ injunes ninkana,” kixtz’iib’a. “Maak’a’ ani wochb’een chi moko b’ar tinxik” (Mormon 8:3, 5). Maare chanchan naq maak’a’ li yo’onihom, a’b’an laj Moroni kixtaw yo’onihom rik’in li Jesukristo ut rik’in lix nawom xch’ool naq “lix junelikil aajom li Qaawa’ taatololnaq chi uub’ej” (Mormon 8:22). Ut laj Moroni kixnaw naq jun xcha’al li junelikil ajom a’an li aajel ru, a’an lix Hu laj Mormon—li esil yoo chixk’eeb’al xch’ool chixchoyb’al, li esil li sa’ junaq kutan tixk’ameb’ naab’aleb’ li kristiaan “chixnawb’al chirix li Kristo” (Mormon 8:16; 9:36). Sa’ xk’ab’a’ lix paab’aal chirix li k’a’ru yeechi’inb’il, laj Moroni kiru chixyeeb’al reheb’ li te’ril li hu a’an sa’ junaq kutan chalel, “Nekexwaatina chanchan naq wankex chiwu,” ut “ninnaw naq taawanq eerik’in li waatin” (Mormon 8:35; 9:30). Anajwan wankeb’ li raatin qik’in, ut lix k’anjel li Qaawa’ yoo chi tololnak chi uub’ej, xb’aan naq laj Mormon ut laj Moroni ink’a’ ke’xkanab’ lix k’anjeleb’, us ta naq sa’ junaatalil ke’wan.

Li na’leb’ re tzolok sa’ li ochoch ut sa’ li iglees

Mormon 7

“Chepaabʼ li Jesukristo” ut “chechap eeribʼ chiru lix evangelio.”

Chirix xk’osb’al ru lix tz’iib’anb’il esilal lix tenamit, laj Mormon kixk’e xraqik li raatin sa’ Mormon 7. K’a’ut naq kixsik’ ru xtz’iib’ankil li na’leb’ a’in? K’a’ru naraj naxye choq’ aawe li aatin “chechap eeribʼ chiru lix evangelio li Kristo.” (Mormon 7:8).

Chi’ilmanq ajwi’ “Ninpaabʼ li Kristo,” Ebʼ li Bʼich, 75.

Mormon 7:8–10; 8:12–16; 9:31–37

K’a’jo’ xnimal xloq’al lix Hu laj Mormon.

Li Awa’b’ej Russell M. Nelson kixpatz’: “Wi k’eeb’ileb’ raj eere li diamante malaj li lemtz’il q’ol malaj keeb’il eere lix Hu laj Mormon, b’arwan li teesik’ ru? Relik chi yaal, b’arwan li nim wi’chik lix tz’aq choq’ eere?” (“Lix Hu laj Mormon: K’a’ru raj xjalanil laa yu’am chi maak’a’ li hu a’an?,” Jolomil ch’utub’aj-ib’ re octubre 2017).

K’a’ru nakataw sa’ Mormon 7:8–10; 8:12–22; ut 9:31–37 li nakatxtenq’a chixtawb’al ru k’a’ut naq nim xloq’al lix Hu laj Mormon sa’ li qakutan? K’a’ut naq nim xloq’al choq’ aawe? Naru nakataw xkomon chik aana’leb’ chirix a’in sa’ 1 Nefi 13:38–41; 2 Nefi 3:11–12; ut Tzol’leb’ ut Sumwank 33:16; 42:12–13.

lix Hu laj Mormon sa’ k’iila paay aatinob’aal

Eb’ lix tz’iib’ahomeb’ li profeet sa’ lix Hu laj Mormon neke’k’anjelak sa’ qayu’am

Mormon 8:1–11

Naru ninpaab’eb’ li taqlahom us ta wankeb’ li ani ink’a’ neke’xpaab’eb’.

Maare wan naq nakaweek’a naq aajunes wankat sa’ xyalb’al aaq’e chixpaab’ankileb’ li taqlahom. K’a’ru naru nakatzol rik’in laj Moroni li naru nakatxtenq’a? (chi’ilmanq Mormon 8:1–11). Wi ta tatruuq chixpatz’b’al re laj Moroni chan ru naq kikana chi tiik chi paab’ank, k’a’ raj ru tixye aawe?

Chi’ilmanq ajwi’ “Que todos puedan conocer la verdad: La promesa de Moroni” (video), Biblioteca del Evangelio.

Mormon 8:26–41; 9:1–30

Lix Hu laj Mormon kitzʼiibʼaman choqʼ re li qakutan.

Li Jesukristo kixk’ut chiru laj Moroni li yooq chi k’ulmank naq taak’utmanq lix Hu laj Mormon (chi’ilmanq Mormon 8:34–35), ut xb’aan a’an naq kixtz’iib’aheb’ li kawil tijom choq’ re li qakutan. Naq yooqat chirilb’al Mormon 8:26–41 ut 9:1–30, k’oxla chan ru naq nak’anjelak li raatin sa’ laa yu’am. Jo’ eetalil, sa’eb’ li raqal a’in sa’ xhu laj Moroni wankeb’ 24 chi patz’om. K’a’ru nakawil sa’eb’ li patz’om a’in li naxk’ut xyaalal naq laj Moroni kiril li qakutankil? Chan ru naq lix Hu laj Mormon naru natenq’an rik’ineb’ li ch’a’ajkilal kiril laj Moroni chi rub’elaj?

Ab’i li Musiq’ej. K’e reetal li nakak’oxla ut nakaweek’a, us ta maare jalan wi’ rik’in li aatin li yookat chirilb’al. Naru naq li k’a’ru nakak’ul a’an ajwi’ li taaraj laa Choxahil Yuwa’ naq taatzol. Qayehaq, k’a’ru li musiqanb’il na’leb’ nakak’ul chirix naq xatz’il rixeb’ lix patz’om laj Moroni sa’ Mormon 9:1–30?

Mormon 9:1–25

reetalil li seminario

Li Jesukristo a’an jun Dios re sachb’a-ch’oolej.

Laj Moroni kixchoy lix tz’iib’ahom lix yuwa’ rik’in jun xnimal ru na’leb’ choq’ reheb’ li kristiaan sa’ li qakutan li ink’a’ neke’xpaab’ naq wankeb’ li sachb’a-ch’oolej (chi’ilmanq Mormon 8:26; 9:1, 10–11). K’a’ut naq aajel ru li paab’aal chirixeb’ li sachb’a-ch’oolej sa’ li kutan a’in? Il Mormon 9:9–11, 15–27 ut Moroni 7:27–29 ut k’oxlaheb’ li patz’om a’in:

• K’a’ru nintzol chirix li Kolonel sa’eb’ li raqal a’an?

• K’a’ru nintzol chirixeb’ li sachb’a-ch’oolej re najter kutan ut re li kutan a’in?

• K’a’ru li chaab’ilal naqak’ul naq naqapaab’ naq li Jesukristo a’an jun Dios re sachb’a-ch’oolej? K’a’ru nak’ulman naq ink’a’ naqapaab’ a’in?

• K’a’ruheb’ li sachb’a-ch’oolej—li ninq jo’eb’ ajwi’ li kok’—li xk’anjelahom li Kolonel sa’ lin yu’am? K’a’ru neke’xk’ut li sachb’a-ch’oolej a’an chiwu chirix li Kolonel?

Li Awa’b’ej Russell M. Nelson kixye: “Laj Kolol qe ut laj Tojol qix, li Jesukristo, tixb’aanu xkomoneb’ lix k’anjel q’axal ninqeb’ chalen chaq anajwan toj taak’ulunq wi’chik. Taqil xnimal ru k’utb’esihom naq li Dios Yuwa’b’ej ut li Ralal, li Jesukristo, neke’xjolomi li Iglees a’in sa’ nimajwalil ut loq’alil” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018). K’a’ruheb’ li sachb’a-ch’oolej a’an? K’a’ru naru nakab’aanu re xtenq’ankil li Kolonel chixtz’aqob’resinkileb’ ru?

K’a’ru nakatzol chirix li paab’aal ut eb’ li sachb’a-ch’oolej rik’in lix numsihomeb’ laj santil paab’anel aj Samoa, aj Tonga, aj Fiji, ut aj Tahiti naq ke’ula’aniik xb’aan li Awa’b’ej ut li Hermana Nelson? (chi’ilmanq Russell M. Nelson, “Xwakli li Kristo; Li paab’aal chirix a’an tixjal xna’ajeb’ li tzuul,” Jolomil ch’utub’aj-ib’ re abril 2021).

Chi’ilmanq ajwi’ Ronald A. Rasband, “K’e reetal! Laa’in jun Dios re sachb’a-ch’oolej,” Jolomil ch’utub’aj-ib’ re abril 2021; Temas del Evangelio, “Milagros,” Biblioteca del Evangelio.

Li na’leb’ re xtzolb’aleb’ li kok’al

Mormon 7:8–10

Lix Hu laj Mormon ut li Santil Hu neke’xch’olob’ xyaalal li Jesukristo.

• Re xka’jultikankil naq neke’xk’am rib’ li Santil Hu ut lix Hu laj Mormon, jo’ kixb’aanu laj Moroni, naru nakab’aanu jun li b’atz’unk jo’ a’in rik’ineb’ laa kok’al: Patz’ reheb’ naq te’xye “Najter Chaq’rab’, Ak’ Chaq’rab’” naq taak’e chi kutankil jun li Santil Hu, ut naq te’xye “Jun chik ch’olob’anb’il esil” naq taak’e chi kutankil lix Hu laj Mormon. Naru ajwi’ nakasik’ ru wiib’ oxib’ li seraq’ li ch’olob’anb’ileb’ xyaalal sa’ li Santil Hu jo’ ajwi’ sa’ lix Hu laj Mormon—maare lix yo’lajik, lix kamik, ut lix waklijik chi yo’yo li Jesus—ut taapatz’ reheb’ laa kok’al naq te’xtaweb’ xjalam-uucheb’ li seraq’ a’an (jo’ li wankeb’ sa’ Hu reheb’ li Jalam-uuch re li Evangelio).

• Re xtenq’ankileb’ laa kok’al chixtzolb’al li xwaqxaq raqalil li paab’aal, naru nakatz’iib’a li junjunq aatin chiruheb’ kok’ hu. Patz’ reheb’ laa kok’al naq sa’ komonil te’xtusub’eb’ li aatin ut naq te’xyaab’asiheb’ chi k’iilasutinb’il.

Mormon 8:1–7

Naru ninpaab’eb’ li taqlahom us ta naweek’a naq injunes wankin.

• Lix b’aanuhom laj Moroni naru naxmusiq’aheb’ laa kok’al chixpaab’ankileb’ lix taqlahom li Dios, us ta neke’reek’a naq xjuneseb’ wankeb’. Chirix rilb’al Mormon 8:1–7 rik’ineb’, naru neke’xwotz k’a’ raj ru ke’reek’a wi ta a’aneb’ laj Moroni. Sa’eb’ li raqal 1, 3, ut 4, k’a’ru kitaqlaak laj Moroni chixb’aanunkil, ut chan ru naq kixb’aanu? Chan ru naru nokowan jo’ laj Moroni?

• Naru nekex’aatinak chirixeb’ li hoonal b’ar wi’ tento te’xsik’ ru li us malaj li ink’a’ us naq maa’ani yoo chi ilok reheb’. Chan ru naq xpaabʼankil li Jesukristo nokoxtenqʼa sa’eb’ li hoonal a’an? Jun b’ich jo’ “Saqaq aawu” (B’ichleb’aal choq’ reheb’ li Kok’al, 81) naru natenq’an sa’ li aatinak.

Mormon 8:24–26; 9:7–26

Li Jesukristo a’an “jun Dios re sachb’a-ch’oolej.”

• Maare us naq taach’olob’ chiruheb’ laa kok’al naq jun sachb’a-ch’oolej a’an li naxb’aanu li Dios re xk’utb’al lix wankil ut rosob’tesinkil li qayu’am. Chirix a’an naru nakayaab’asiheb’ ch’ol aatin wankeb’ sa’ Mormon 9:11–13, 17 li neke’xye resil junjunq reheb’ lix sachb’a-ch’oolej li Dios, ut eb’ laa kok’al naru neke’xk’oxla jalaneb’ chik li sachb’a-ch’oolej (eb’ li jalam-uuch sa’ Hu reheb’ li Jalam-uuch re li Evangelio, jo’ 26, 40, 41, ut 83, naru neke’tenq’an). Aatinan chirixeb’ li sachb’a-ch’oolej xb’aanuhom li Dios sa’ laa yu’am.

• K’ut chiruheb’ laa kok’al jun receta, ut ye reheb’ k’a’ raj ru taak’ulmanq wi ta ink’a’ te’xk’e junaq xyuhil aajel ru. Ilomaq Mormon 8:24 ut 9:20–21 re xtawb’al “xyuhil” li naru neke’xk’e chi uxk lix sachb’a-ch’oolej li Dios.

Re xtawb’al xkomon chik li na’leb’, chi’ilmanq li hu Amigos re li po a’in.

laj Moroni naxk’e reetal lix sachlijikeb’ laj Nefita

Laj Moroni naxk’e reetal lix sachlijikeb’ laj Nefita, xb’aan laj Joseph Brickey

perel re kok’ k’anjel: Lix Hu laj Mormon ut li Santil Hu neke’xch’olob’ xyaalal li Kolonel