28 nō ’Ātopa–3 nō Novema : « ’E ’ua hina’aro roa vau ’ia fa’afāriu mai i tō te mau hope’a tā’āto’a […] ’ia tātarahapa. » Moromona 1–6
« 28 nō ’Ātopa–3 nō Novema : ‘’E ’ua hina’aro roa vau ’ia fa’afāriu mai i tō te mau hope’a tā’āto’a […] ’ia tātarahapa’. Moromona 1–6 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
« 28 nō ’Ātopa–3 nō Novema. Moromona 1–6 », Mai, pe’e mai—Nō te ’utuāfare ’e te fare purera’a : Buka a Moromona 2024 (2023)
Hōho’a
Moromona e pāpa’i ra i ni’a i te mau ’api ’auro
Mormon Abridging the Plates [Tē ha’apoto ra Moromona i te mau ’api], nā Tom Lovell
28 nō ’Ātopa–3 nō Novema : « ’E ’ua hina’aro roa vau ’ia fa’afāriu mai i tō te mau hope’a tā’āto’a […] ’ia tātarahapa »
’Ua fa’aherehere Moromona ia tātou i te « tā’āto’ara’a o te ’ā’amu » i te « ’ohipa ri’ari’a » o te ’ino ’e te ha’amani’ira’a toto, ’o tāna i ’ite i rotopū i te ’āti Nephi (Moromona 2:18 ; 5:8). ’Ua nava’i noa rā te mea tāna i pāpa’i i roto te Moromona 1–6 nō te fa’aha’amana’o ia tātou i te hi’ara’a rahi o te hō’ē nūna’a parauti’a i mua a’e nei. I roto i terā ’ino e tupu ra, ’aita e ta’ata e nehenehe e fa’ahapa ia Moromona i te fiura’a ’e i te paruparura’a te mana’o. Teie rā, nā roto i te mau ’ohipa ato’a tāna i ’ite ’e tei orahia, ’aita roa i mo’ehia iāna te mana’o nō te aroha rahi o te Atua ’e tōna ti’aturira’a ē, ’o te tātarahapa te rāve’a nō te fāri’i i te reira. ’E noa atu ā ’ua pāto’i te nūna’a iho o Moromona i tāna mau tāparura’a ’ia tātarahapa, ’ua ’ite ’oia e pupu ta’ata ’ā’ano a’e tāna e ’ume mai. ’Ua nā ’ō ’oia : « Inaha, tē pāpa’i nei au i tō te mau ’ōti’a o te ao nei ». E nehenehe ïa e parau ē, tē pāpa’i ra ’oia nō ’oe (hi’o Moromona 3:17–20). ’E tāna poro’i ia ’oe i teie mahana, hō’ē ā ïa poro’i ’o te nehenehe e fa’aora i te mau ’āti Nephi i tō rātou tau : « ’Ia ti’aturi… i te ’evanelia a Iesu Mesia… ’Ia tātarahapa ’e ’ia fa’aineine nō te ti’a atu i mua i te vāhi ha’avāra’a a te Mesia » (Moromona 3:21–22).
Hi’o ato’a « Mormon Preserves the Record to Bring the House of Israel to Christ [’Ua fa’aherehere Moromona i te mau pāpa’a parau nō te ’āfa’i mai te ’utuāfare o ’Īserā’ela i te Mesia ra] » (video), Vaira’a buka ’evanelia.
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe au e pe’e ia Iesu Mesia noa atu ā te mea tā te tahi mau ta’ata e rave ra.
I te 10ra’a o tōna matahiti, e mea ta’a ’ē mau roa Moromona i te mau ta’ata ’ati a’e iāna. ’A tai’o ai ’oe te Moromona 1–6, ’a ’imi e mea nāhea te fa’aro’o o Moromona ia Iesu Mesia i te fa’arirora’a iāna e mea ta’a ’ē ’e ’ua hōro’a iāna i te mau rāve’a nō te tāvini ’e nō te ha’amaita’i ia vetahi ’ē. E nehenehe te mau ’īrava i muri nei e tauturu ia ’oe ’ia ha’amata :
Moromona 1:2–3, 13–17.E aha te mau ta’a-’ē-ra’a tā ’oe e ’ite ra i rotopū ia Moromona ’e tōna mau ta’ata ? E aha te mau maita’i e vai ra iāna tei tauturu iāna ’ia vai pūai noa i te pae vārua i roto i te hō’ē tau fifi mau ?
Moromona 2:18–19.E aha te mau parau tā Moromona i fa’a’ohipa nō te fa’ata’a i te parau nō te ao tāna e ora ra ? Nāhea ’oia i te tāpe’a-noa-ra’a i te tīa’ira’a noa atu ā te mau mea e ha’ati ra iāna ?
Moromona 3:12.E aha te mana’o o Moromona nō ni’a i te mau ta’ata ’ati a’e iāna ? E aha te ti’a ia ’oe ’ia rave nō te fa’atupu i te here mai tōna ?
E aha te tahi atu mau ’īrava i roto te Moromona 1–6 e ha’apāpū nei i te fa’aro’o o Moromona ia Iesu Mesia ? E aha te mau rāve’a tei hōro’ahia iāna, nō te mea ’ua mā’iti ’oia ’ia vai ha’apa’o noa ?
’A feruri i te tuatāpapa i te parau poro’i a te peresideni Thomas S. Monson « ’Ei hi’ora’a ’oe ’e ’ei māramarama » (Liahona, Novema 2015, 86–88), ma te ’imi mai i te mau tumu nō te aha e mea faufa’a nō te mau pipi a Iesu Mesia ’ia fa’ata’a ’ē mai ia rātou, ’aore rā ’ia vai ta’a ’ē rātou. Nāhea ’oe i te fa’a’ī i te mau parau mai teie ? « ’Ua riro ’o ’ei hi’ora’a nō’u i tōna . ’Ua tauturu te reira iā’u ’ia hina’aro ’ia . »
’Ua nehenehe ia Moromona ’ia mana’o ē, ’aita tōna hi’ora’a i fa’atupu i te hō’ē ta’a-’ē-ra’a i piha’i iho i tōna nuna’a. ’Āhiri ’ua fāna’o ’oe i te paraparau ia Moromona, e aha tā ’oe e parau iāna e mea nāhea tōna hi’ora’a i te fa’atupura’a i te hō’ē ta’a-’ē-ra’a nō ’oe ?
Tauturu ia vetahi ’ē ’ia fa’a’ite mai i te mea tā rātou i ha’api’i mai. ’Ia fa’a’ite ana’e mai te mau ta’ata i te mea tā rātou i ha’api’i mai, e ha’apūai rātou i tō rātou iho fa’aro’o ’e te fa’aro’o o vetahi ’ē (hi’o Te Ha’api’ira’a Tumu ’e te mau Fafaura’a 88:122). ’A tāmata i te ui i tō ’oe ’utuāfare ’aore rā i te mau pīahi e aha te mau ’itera’a tā rātou i fāri’i ’a tuatāpapa ai rātou i te parau a te Atua.
Te ’oto e au i te Atua, e arata’i ïa i te Mesia ’e i te tauira’a vai maoro.
I te ’itera’a Moromona i te ’oto o tōna mau ta’ata, ’ua tae mai tōna tīa’ira’a e tātarahapa rātou. Terā rā, « ’aita ho’i tō rātou māuiui i fa’atupu i te tātarahapa » (Moromona 2:13)—e ’ere i te ’oto e au i te Atua, e ’oto rā e au i tō te ao nei. Nō te māramarama i te ta’a-’ē-ra’a, e nehenehe e pāpa’i i te mea tā ’oe i ha’api’i mai nā roto mai te Moromona 2:10–15 i roto i te hō’ē tāpura mai teie i muri nei :
Nāhea ’oe e ’ite ai ē, e au tō ’oe oto i te Atua ’aore rā i tō te ao nei ? Mai te mea tē ora ra ’oe i te ’oto e au i tō te ao nei, nāhea ’oe e nehenehe ai e taui i te reira ’ei ’oto e au i te Atua ?
« ’Aita ho’i rātou i ’ite pāpū ē, nā te Fatu i fa’aherehere ia rātou ».
’Ua fa’a’ite Moromona ē, ’aita te ’āti Nephi i ’ite i te mau rāve’a ’a ha’amaita’i ai te Fatu ia rātou. ’A tai’o ai ’oe te Moromona 3:3, 9, ’a feruri nāhea ’oe e ’ite ai i te mana fa’auru o te Atua i roto i tō ’oe orara’a. E aha te mau ha’amaita’ira’a e tae mai ’ia ’ite ’oe i tōna mana fa’auru ? E aha te mau fa’ahope’ara’a nō te ’orera’a e ’ite iāna ? (hi’o Moromona 2:26 ; Te Ha’api’ira’a Tumu ’e te mau Fafaura’a 59:21).
Tē ti’a noa nei Iesu Mesia ma te rima fa’atoro noa nō te fāri’i iā’u.
Mai te peu noa atu e tae mai te mana’o paruparu ia ’oe nō tā ’oe iho mau hara, e nehenehe te fa’a’itera’a a Moromona nō te Fa’aora e ti’a ra « ma te rima fa’atoro noa nō te fāri’i mai ia [’oe] » e hōro’a mai i te ha’apāpūra’a. ’A tai’o ai ’oe te Moromona 5:8–24 ’e te 6:16–22, e aha tā ’oe i ha’api’i mai nō ni’a i te mau mana’o o te Metua i te ao ra ’e o Iesu nō ’oe, noa atu ā ’ua hara ’oe ? E mea nāhea tō ’oe ’itera’a ia Iesu i te fa’atorora’a mai i tōna rima mahora ia ’oe ? E aha tei fa’auruhia ia ’oe ’ia rave ?
Mai ia Moromona, e nehenehe au e pe’e ia Iesu Mesia.
Nō te mea e mea ’āpī roa Moromona i te fa’ananeara’a i tōna fa’aro’o i te Mesia, e nehenehe ’oia e riro ’ei fa’aurura’a nō tā ’oe mau tamari’i. Penei a’e e nehenehe ’oe e tai’o te Moromona 1:1–3 ’e e nehenehe tā ’oe mau tamari’i e fa’aro’o e hia matahiti tō Moromona ’a hōro’a ai Amarona iāna i te hō’ē misiōni ta’a ’ē. E nehenehe ato’a ’oe e tauturu ia rātou ’ia ’imi mai i roto i teie mau ’īrava i te mau maita’i tā Amarona i ’ite i roto ia Moromona. Nāhea teie mau maita’i i te tauturu ia tātou ’ia pe’e ia Iesu Mesia ?
Hōho’a
Moromona ’ei tamaiti ’āpī
Mormon, Age 10 [Moromona, i te 10ra’a te matahiti], nā Scott M. Snow
Nō te mea ’ua pe’e Moromona ia Iesu Mesia, ’ua hōro’ahia iāna te mau rāve’a nō te tāvini ’e nō te ha’amaita’i ia vetahi ’ē. E nehenehe ’oe e ani i tā ’oe mau tamari’i ’ia tai’o i te hō’ē ’aore rā hau atu o teie mau ’īrava i muri nei ’e ’ia tauturu ia rātou ’ia fa’a’ite mai i te mea tā rātou i ha’api’i mai nō ni’a ia Moromona : Moromona 1:1–3 ; 2:1, 23–24 ; ’e 3:1–3, 12, 20–22 (hi’o ato’a « Pene 49 : Moromona ’e tāna mau ha’api’ira’a », Te mau ’ā’amu o te Buka a Moromona, 138–42). Nāhea ’oia i te pe’era’a ia Iesu Mesia ? Nāhea tōna fa’aro’o ia Iesu Mesia i te tauturura’a ’aore rā i te ha’amaita’ira’a ia vetahi ’ē ? Nāhea tō tātou fa’aro’o e nehenehe ai e tauturu i te mau ta’ata tā tātou i mātau ?
Te ’oto e au i te Atua, e arata’i ïa i te Mesia ’e i te tauira’a vai maoro.
Penei a’e e nehenehe ’oe e hāmani i te hō’ē tāpura mai teie i roto te « Mana’o nō te ’apo i te ha’api’ira’a i te ’utuāfare ’e i te fare purera’a », nō te tauturu i tā ’oe mau tamari’i ’ia hāro’aro’a i te ta’a-’ē-ra’a i rotopū i te ’oto e au i tō te ao nei ’e te ’oto e au i te Atua, ’a tai’o ai rātou te Moromona 2:8, 10–15. I muri iho e nehenehe ato’a rātou e ’imi i roto te Moromona 2:12 nō te ’ite mai i te mau tumu, nō te aha te tātarahapa e fa’atupu ai i te « ’oa’oa i tō tātou ’ā’au ». Nāhea tātou e pāpū ai ē, te ’oto tā tātou e fāri’i ra nō tā tātou mau hara, e arata’i te reira ia tātou ’ia ani i te tauturu a te Atua nō te taui ?
’Ua hōro’a mai te Metua i te ao ra iā’u e rave rahi ha’amaita’ira’a.
Te anira’a i tā ’oe mau tamari’i ’ia tāpura (’aore rā’ ’ia pāpa’i hōho’a i) te tahi mau mea tā rātou e māuruuru nei, e nehenehe e riro ’ei rāve’a maita’i nō te tauturu ia rātou ’ia ’ite i te māuruuru nō te Atua. I muri a’e i tō rātou hāmanira’a i te hō’ē tāpura, e nehenehe ’oe e tai’o te Moromona 3:3, 9 ’e e fa’ata’a ē, ’ua ha’amaita’i ato’a te Metua i te ao ra i te ’āti Nephi, ’aita rā rātou i ’ite i te reira. E aha tā tātou e nehenehe e rave nō te fa’a’ite ē, tē māuruuru nei tātou i te Metua i te ao ra nō tō tātou mau ha’amaita’ira’a ?
Tē hina’aro nei te Metua i te ao ra ’ia here au i te mau ta’ata ato’a.
Noa atu e mea ’ino te ’āti Nephi, ’aita Moromona i fa’aea i te here ia rātou. ’A tauturu i tā ’oe mau tamari’i ’ia ’imi i te mau ta’o « herehia » ’e « here » i roto te Moromona 3:12. E nehenehe ato’a ’outou e hīmene ’āmui i te hō’ē hīmene nō ni’a i te herera’a ia vetahi ’ē, mai te « Aimez chacun » (Chants pour les enfants, 39), ma te fa’a’ite i te mau hōho’a o te mau tamari’i nā te ao ato’a nei. ’A fa’a’ite pāpū i te here o te Atua nō tāna mau tamari’i ato’a.
Nō te tahi atu ā mana’o, ’a hi’o i te ve’a Hoa nō teie ’āva’e.
Hōho’a
mau ’api ’auro
’Ua pāpa’ihia te Buka a Moromona « ’ia ti’aturi tātou i te ’evanelia a Iesu Mesia » (Moromona 3:21).