Eb’ li seraq’ sa’ Alma 30–31 neke’xk’ut chi saqen ru lix wankilaleb’ li aatin—choq’ re li us ut li ink’a’ us. Xmaak li “sahil aatin” ut li “ninqi taqenaqil aatin” re jun aj tzolonel aj b’alaq’, aj Korihor xk’ab’a’, kiru raj naq “te’k’ame’q k’iila aamej taq’a sa’ li sache’k” (Alma 30:31, 47). Jo’kan ajwi’, eb’ lix k’utum laj Tzoram, li kirisi chaq rib’ sa’ xyanqeb’ laj Nefita, ke’xk’am jun ch’uut chi kristiaan chi t’ane’k “sa’ li nimla sachk” ut “chixpo’b’al ru lix b’e li Qaawa’” (Alma 31:9, 11).
Chi junpak’al chik, ink’a’ kiru chi eek’asiik lix paab’aal laj Alma chirix naq li raatin li Dios “k’a’jo’ wi’chik xwankil sa’ xb’een xk’a’uxleb’ li tenamit chiru li yok’leb’ ch’iich’, malaj k’a’aq chik ru li na’uxman reheb’” (Alma 31:5). Li raatin laj Alma kixk’ut li junelikil yaal ut kixb’oq lix wankilal li Jesukristo re xch’anab’ankil laj Korihor (chi’ilmanq Alma 30:39–50), ut li raatin kixb’oq ajwi’ li rosob’tesihom sa’ xb’eeneb’ li xkoheb’ chirix re xk’amb’aleb’ chaq laj Tzoramita wi’chik sa’ li yaal (chi’ilmanq Alma 31:31–38). A’ineb’ chaab’il na’leb’ choq’ reheb’ li neke’taaqenk re li Kristo sa’ li kutan a’in naq neke’tam li b’alaq’il na’leb’. Laa’o naru taqataw li yaal wi, jo’ kixb’aanu laj Alma, taqakanab’ qib’ chiru “xchaab’ilal li raatin li Dios” (Alma 31:5).
Li na’leb’ re tzolok sa’ li ochoch ut sa’ li iglees
Laj tza naxsik’ inb’alaq’inkil rik’in li b’alaq’il k’utum.
Sa’ Alma 30, naxye naq laj Korihor a’an “aj xik’ ilonel re li Kristo” (raqal 6). Laj xik’ ilonel re li Kristo a’an yalaq ani malaj yalaq k’a’ru li naxka’pak’ali li Jesukristo ut lix evangelio chi k’utk’u malaj chi muqmu. B’ar wankeb’ li raqal sa’ Alma 30:6–31 li neke’xk’ut naq laj Korihor a’an jun aj xik’ ilonel re li Kristo? Xtzolb’al lix b’alaq’il na’leb’ laj Korihor naru nakatxtenq’a chixk’eeb’al reetal ut chixtz’eqtaanankil xkomon chik li na’leb’ jo’ a’an. Xb’aanunkileb’ li kok’ k’anjel a’in maare tatxtenq’a chi tzolok:
Ma wankeb’ li k’a’aq re ru naru tate’xtenq’a chixtawb’al ru xjalanil lix k’utum li Kolonel rik’in lix b’alaq’il na’leb’ laj Satanas? Qayehaq, jun li ra’al re karab’k, li pak’b’il tumin, ut li b’alaq’il na’leb’ reheb’ aj k’ay. Chan ru naru nakak’e reetal naq b’alaq’ jun li na’leb’? Chan ru naru nakak’e reetal li yaal?
K’oxla xtz’iib’ankileb’ li b’alaqil na’leb’ kixk’ut laj Korihor sa’ Alma 30:6–31. B’ar wan reheb’ lix na’leb’ atawal ru sa’ li kutan a’in? (chi’ilmanq Alma 30:12–18, 23–28). K’a’ru li rahilal naru taa’uxq rik’in xk’ulub’ankil li na’leb’ jo’ a’an? K’a’ru li b’alaq’il na’leb’ naroksi laj tza re xyalb’al aab’alaq’inkil sa’ li kutan a’in?
K’a’ru kixb’aanu laj Alma re xka’pak’alinkil lix k’utum laj Nehor rik’in li yaal? (chi’ilmanq Alma 30:31–54). Chan ru naru nakawoksiheb’ li na’leb’ a’an sa’ laa yu’am?
Jo’ laj Alma, eb’ li profeet ut apostol reheb’ li kutankil a’in nokohe’xtenq’a chixk’eeb’al reetal k’a’ru li yaal ut k’a’ru lix tik’t’i laj Satanas. K’a’ru li na’leb’ nakataw sa’eb’ li aatin a’in: Gary E. Stevenson, “Minaab’alaq’i” (Jolomil ch’utub’aj-ib’ re octubre 2019); Dallin H. Oaks “No se dejen engañar” (Liahona, noviembre 2004, 00).
Chixjunil li k’a’aq re ru wan naxch’olob’ xyaalal naq wan li Dios.
Wankeb’ naab’al li kristiaan anajwan li ink’a’ neke’xpaab’ naq wan jun li Dios. K’a’ru nakataw sa’ Alma 30:39–46 li naxk’e chanaw naq wan li Dios? K’a’ru naramok qe chixnawb’al ru a’an? Ma wan k’a’ chik ru xk’utb’esihom li Dios chawu li naxk’ut naq yo’yo?
Wan xwankil li raatin li Dios re xk’amb’aleb’ xb’e li kristiaan sa’ tiikilal.
Li ch’a’ajkilal naq ke’xjach rib’ laj Tzoramita rik’ineb’ laj Nefita, chanchan naq ki’ajman ru xtaqlahom li jolomil tenamit malaj li pleetik re xtuqub’ankil ru (chi’ilmanq Alma 31:1–4). A’b’anan laj Alma ak kixtzol xkanab’ankil rib’ chiru “xchaab’ilal li raatin li Dios” (Alma 31:5). K’a’ru nakatzol sa’ Alma 31:5 chirix lix wankil li raatin li Dios? (chi’ilmanq ajwi’ Hebreos 4:12; 1 Nefi 15:23–24; 2 Nefi 31:20; Jakob 2:8; Helaman 3:29–30).
Naq nakawil Alma 31, ma wankeb’ chik li yaal re li evangelio nakataw li neke’k’anjelak sa’ laa yu’am? Jo’ jun eetalil:
Chan ru aawilom li raatin li Dios chixk’amb’al xch’ooleb’ li kristiaan chixb’aanunkil li us? (chi’ilmanq raqal 5).
Juntaq’eeta lix k’a’uxl, li reek’ahom, ut lix b’aanuhom laj Alma chirixeb’ li ras riitz’in (che’ilmanq li raqal 34–35) rik’ineb’ li reheb’ laj Tzoramita (che’ilmanq li raqal 17–28). Chan ru naru tatwanq jo’ laj Alma?
K’a’ru nakataw sa’ Alma 31:30–38 li naru tixtenq’aheb’ li neke’raho’ xch’ooleb’ chirix xmaakeb’ li ras riitz’in?
Sa’ xk’ab’a’ li Jesukristo, chixjunil li kristiaan naru neke’jala.
K’e reetal li ch’uut chi kristiaan kixk’am laj Alma chirix re xk’utb’al li evangelio chiruheb’ laj Tzoramita (chi’ilmanq Alma 31:6). K’a’ru nakatzol chirix xyu’ameb’ li kristiaan a’an sa’ Mosiah 27:8–37; 28:4; Alma 10:1–6; 11:21–25; 15:3–12? K’a’ru nakatzol choq’ re laa yu’am rik’in li ke’xk’ul a’an?
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Lix Hu laj Mormon nikinixtij chirixeb’ li b’alaq’ aj k’utum.
Naru nakak’eheb’ chi kutankil junjunqeb’ k’a’aq re ru (jo’ li tumin malaj li tzakemq) ut reetalileb’ a’an jo’ b’atz’uul. A’in naru nekexxtenq’a chixtz’ilb’al rix chan ru xk’eeb’al reetal xjalanil li k’a’ru yaal rik’in li k’a’ru moko yaal ta. Chirix a’an naru taatenq’aheb’ laa kok’al chixk’eeb’al reetal sa’ Alma 30:12─18 li tik’ti’ malaj b’alaq aj k’utum kixk’ut laj Korihor chirix li Dios. Sa’ Alma 30:32–35, k’a’ru kixye laj Alma re xsumenkileb’ li tik’ti’ a’an? K’a’ru naqatzol rik’in li kixb’aanu?
Chixjunil li k’a’aq re ru naxch’olob’ xyaalal li Dios.
Laj Alma kixye naq li k’a’aq re ru wan sa’ choxa ut sa’ ch’och’ neke’xch’olob’ xyaalal naq yo’yo li Dios. Wi naru, elen chirix kab’l chi b’eek rik’ineb’ laa kok’al malaj xaqlinqex chiru jun li ventaan naq yooqat chixyaab’asinkil Alma 30:44. Patz’ reheb’ naq te’xk’uteb’ li k’a’aq re ru li neke’tenq’ank reheb’ chixnawb’al naq tz’aqal wan li Dios ut naq a’an naxraheb’. Naru ajwi’ neke’xyiib’ xjalam-uuch li k’a’ru neke’xtaw (chi’ilmanq li perel re kok’ k’anjel re li xamaan a’in).
Naq yooqex chixb’ichankil li b’ich “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al,16–17), numsihomaq sa’ junkab’al jun li b’olotz’ malaj k’a’ruhaq chik. Xaqab’ li son chi jo’q’ehaq ut patz’ re li ani li xkana wi’ li b’olotz’ naq tixye junaq k’a’aq re ru kixyo’ob’tesi li qaChoxahil Yuwa’ li naxb’antioxi a’an.
Eb’ li kok’al neke’tzolok rik’ineb’ li jalam-uuch. Eb’ li jalam-uuch te’xtenq’aheb’ laa kok’al chixtawb’al ru ut chixjultikankil li k’a’ru k’utb’il chiruheb’. Lix k’ihaleb’ li kok’ k’anjel choq’ reheb’ li kok’al li wankeb’ sa’ li hu a’in neke’xye k’a’ruheb’ li jalam-uuch naru neke’oksiman. Naru nakak’uteb’ wi’chik li jalam-uuch a’an moqon re xtenq’ankileb’ li kok’al chixjultikankil li k’a’ru ak xe’xtzol.