K’oxlaheb’ li jar paay chi na’leb’ tixye raj junaq chirix k’a’ut naq ink’a’ naxwotz li evangelio: “Moko tz’aqal ta innawom” malaj “Ink’a’ ninnaw ma taawulaq ta raj chiru” malaj “Ninxuwa naq tine’xtz’eqtaana.” Maare xak’e reetal naq wan naq xak’oxla chi jo’kan. Kiwan jun chik ajom reheb’ laj Nefita chirix k’a’ut naq ink’a’ ke’xwotz li evangelio rik’ineb’ laj Lamanita: kiyeeman naq eb’ a’an “jun li tenamit xulo’jenaqeb’ ut kawujenaqeb’ ut josq’eb’; jun tenamit li neke’saho’ xch’ool rik’in xkamsinkileb’ laj Nefita” (Alma 17:14; chi’ilmanq ajwi’ Alma 26:23–25). A’b’anan, eb’ li ralal laj Mosiah ke’wan jun li rajomeb’ nim wi’chik chiru a’an chirix k’a’ut naq ke’reek’a naq tento te’xwotz li evangelio rik’ineb’ laj Lamanita: “Ke’raj raj naq taach’olob’amanq li kolb’a-ib’ chiru li junjunq li yo’ob’tesinb’il, xb’aan naq ink’a’ ke’ru chixkuyb’al naq taa’oso’q raam ani junaq chi winq” (Mosiah 28:3). Li rahok li kixwaklesi xch’ool laj Ammon ut eb’ li ras riitz’in naru ajwi’ tixwaklesi aach’ool laa’at chixwotzb’al li evangelio rik’in laa junkab’al, laa wamiiw, ut xkomoneb’ chik—jo’kaneb’ ajwi’ li ani chanchan naq ink’a’ te’xk’ulub’a.
Li na’leb’ re tzolok sa’ li ochoch ut sa’ li iglees
Eb’ li kok’ b’aanuhom re loq’onink chiru li Kristo nikine’xtenq’a chixk’ulb’al lix wankil.
K’a’ru nakatzol sa’ Alma 17:1–4 chirix xkawob’resinkil lix nawom ut lix kawilal aach’ool chirix li Jesukristo? K’a’ru ke’xb’aanu li ralal laj Mosiah, ut chan ru naq li Qaawa’ kirosob’tesiheb’?
Naq nakawil li ke’xk’ul li ralal laj Mosiah sa’ Alma 17–22, k’e reetal chan ru naq lix kawresinkileb’ rib’ sa’ musiq’ej kik’utman sa’ xk’anjeleb’ sa’ xyanqeb’ laj Lamanita (jo’ eetalil, chi’ilmanq Alma 18:10–18, 34–36; 20:2–5; 22:12–16). K’a’ru eek’asinb’ilat chixb’aanunkil re xtaaqenkil li reetalileb’?
Naru tinwanq choq’ k’anjeleb’aal sa’ ruq’ li Dios.
Jwal aj sachol ch’oolej eb’ li numsihom li neke’k’ulman sa’eb’ li seraq’ chirix li jalok-ch’oolej sa’ li loq’laj hu, a’ut sa’ xch’oolileb’ li seraq’ a’an naqataweb’ li kristiaan li ke’wan xkawilaleb’ xch’ool re aatinak ut xwotzb’al lix paab’aaleb’ chirix li Jesukristo. K’oxlan chirix li na’leb’ a’in naq yooqat chirilb’al li seraq’ chirix li xAbix ut eb’ li ralal laj Mosiah chiru li xamaan a’in.
K’a’ru naraj naxye wank choq’ k’anjeleb’aal sa’ ruq’ li Dios? Naru nakak’oxlaheb’ li k’anjeleb’aal li nakawoksi sa’ laa yu’am wulaj wulaj. Naq nakawil Alma 17:6–12, sik’ li k’a’ru ke’xb’aanu li ralal laj Mosiah re naq ke’ru chi wank choq’ k’anjeleb’aal sa’ ruq’ li Dios. K’a’ru naru taab’aanu re wank jo’ chaab’il k’anjeleb’aal re xtenq’ankileb’ laa was aawiitz’in chi chalk rik’in li Kristo?
K’a’ru nawulak chawu chirix li xAbix sa’ Alma 19:16–36? K’a’ru nakatzol rik’in a’an chirix xtenq’ankileb’ li kristiaan chixtawb’al xpaab’aaleb’ chirix li Kristo? Qayehaq, k’a’ru nakak’oxla naq taatenq’anq reheb’ li kristiaan nakaraheb’ “chixpaab’ankil lix wankil li Dios”? (Alma 19:17).
Naru ajwi’ nakajuntaq’eeta lix numsihom li xAbix rik’ineb’ li na’leb’ kixk’ut li Elder Dieter F. Uchtdorf sa’ “Li misioneerik: xwotzb’al li wan sa’ laa ch’ool” (Jolomil ch’utub’aj-ib’ re abril 2019). Chan ru naq li xAbix kixk’anjelaheb’ li “oob’ chi na’leb’” kixye li Elder Uchtdorf? Yal xtz’iib’ankil k’a’ru truuq raj taaye chirix li Jesukristo. Qayehaq, “Choq’ we laa’in, li Jesukristo …” malaj “Li Kolonel nikinxtenq’a …”
Chi’ilmanq ajwi’ Temas del Evangelio, “Ministrar,” Biblioteca del Evangelio; “Nalemtz’un chaq li ruxtaan,” Eb’ li B’ich, 206; “Venir y ver,” “Venir y ayudar,” “Venir y pertenecer” (eb’ li video), Biblioteca del Evangelio.
Oksiheb’ li k’anjeleb’aal sa’ li k’utuk. Naq eb’ li kristiaan naru neke’ril malaj neke’xtoch’ k’a’ruhaq li naxk’am rib’ rik’in li yookeb’ chixtzolb’al, taanaq a’an chi us sa’ xch’ooleb’. Wi yookat chi k’utuk chirix Alma 17:11, naru nakak’uteb’ li wajb’ malaj li tz’iib’leb’ re xtenq’ankileb’ chi aatinak chirix li wank choq’ k’anjeleb’aal sa’ ruq’ li Dios.
Naq naqaraheb’ li qas qiitz’in, naru naqatenq’aheb’ chixk’ulb’al lix evangelio li Jesukristo.
Sik’eb’ li raqal sa’ Alma 17–19 li neke’xk’ut chan ru naq lix rahom laj Ammon choq’ reheb’ laj Lamanita kixtenq’a chixwotzb’al lix evangelio li Jesukristo. Kʼaʼ chik ru nakatzol chirix xwotzbʼal li evangelio rikʼin lix bʼaanuhom aʼan?
Chi’ilmanq ajwi’ “Ammón sirve y enseña al rey Lamoni” (video), Biblioteca del Evangelio.
Jalam-uuch
laj Ammon naxkoleb’ lix karneer li rey
Li xMinerva Teichert (1888–1976), Laj Ammon naxkoleb’ rix lix ketomq li rey, 11949–1951, óleo en masonite, 35 15/16 × 48 pulgadas. Museo de Arte, Universidad de Brigham Young, 1969.
Chirix xtz’iib’ankil resil lix jalajik xch’ool laj Lamoni ut lix tenamit, laj Mormon kixch’olob’ li seraq’ rik’in jun na’leb’ chirix li Jesukristo. K’a’ru naxk’ut Alma 19:36 chawu chirix xwanjik li Qaawa’? K’a’ chik ru naxk’ut chawu li seraq’ sa’ Alma 19:16–36 chirix a’an? Jo’q’e aaweek’ahom li ruq’ li Qaawa’ chi ye’b’il aawe?
Xnawb’al ru li Dios naxqʼax joʼ nimal li mayejanbʼilaq raj qabʼaan.
Juntaq’eeta li kixye lix yuwa’ laj Lamoni naq tixk’e raj re xkolb’al lix yu’am (chi’ilmanq Alma 20:23) rik’in li k’a’ru moqon tixk’e raj re xk’ulb’al li sahil ch’oolejil naxk’e li evangelio ut re xnawb’al ru li Dios (chi’ilmanq Alma 22:15, 18). K’oxla li taamayeja raj re xnawb’al ru li Dios chi naab’al wi’chik.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Naru ninwotz lix evangelio li Jesukristo rik’ineb’ li was wiitz’in.
Re tzolok chirix li wank choq’ k’anjeleb’aal sa’ ruq’ li Dios, jo’eb’ li ralal laj Mosiah, laa’at ut eb’ laa kok’al naru nekeril jun li k’anjeleb’aal ut teeye k’a’ru aj-e. Toja’ naq teeril Alma 17:11 ut teetz’il rix k’a’ru naraj naxye li wank choq’ k’anjeleb’aal sa’ ruq’ li qaChoxahil Yuwa’ re xtenq’ankileb’ lee ras eeriitz’in chi tzolok chirix li Jesukristo.
Sa’ li perel re kok’ k’anjel re li xamaan a’in wankeb’ li jalam-uuch neke’reetaliheb’ li na’leb’ kixk’ut laj Ammon chiru li rey aj Lamoni. Naru nakatenq’aheb’ laa kok’al chixtawb’aleb’ li na’leb’ a’an sa’ Alma 18:24–40. Laa kok’al naru neke’xk’oxla naq a’aneb’ misioneer ut te’xwotz k’a’ru neke’xnaw chirixeb’ li na’leb’ a’an.
Chirix naq nakawil resil li xAbix rik’ineb’ laa kok’al (chi’ilmanq Alma 19:16–20, 28–29), naru te’alinaq sa’ xna’ajeb’, te’xtoch’eb’ li okeb’aal, ut te’xye k’a’ru xk’ulman sa’ Alma 19:1–17, jo’ reetalil li kixb’aanu li xAbix. Chan ru naru nokowan jo’ li xAbix ut naqawotz k’a’ru naqanaw chirix li Jesukristo ut lix evangelio? Laa kok’al naru neke’xyiib’ xjalam-uucheb’ a’an naq yookeb’ chixwotzb’al li evangelio, malaj naru neke’xb’icha jun li b’ich chirix xwotzb’al li evangelio, maare “B’oqb’ilo choq’ xmoos” (B’ichleb’aal choq’ reheb’ li Kok’al, 94–95).
Naru nintenq’aheb’ li was wiitz’in chi chalk rik’in li Kristo naq nink’ut lin rahom choq’ reheb’.
Sa’ xtiklajik, li rey aj Lamoni ut lix yuwa’ kaweb’ li raameb’ chirix li evangelio. Moqon, ke’qʼunobʼresiik li raameb’, ut ke’xpaab’ li Jesukristo. Chan ru naq kik’ulman a’in? Tenq’aheb’ laa kok’al chixtawb’al xsumenkil li patz’om a’in naq nakaye reheb’ chixjunil kixnumsi laj Ammon. Naru neke’xk’utb’esi li nak’ulman sa’ “Ch’ol 23: Laj Ammon, jun xnimal ru moos” ut “Ch’ol 24: Laj Ammon naxk’ul xyuwa’ li rey aj Lamoni” (Eb’ li Esilal sa’ lix Hu laj Mormon, 64–68, 69–70). Malaj maare neke’raj xyiib’ankil xjalam-uucheb’ li seraq’ ut te’roksiheb’ li jalam-uuch re xyeeb’al li seraq’. K’a’ru kixb’aanu laj Ammon re xtenq’ankil laj Lamoni ut lix yuwa’ chixteeb’aleb’ xch’ool re te’xk’ul lix evangelio li Jesukristo? (chi’ilmanq Alma 17:21–25; 20:8–27; 22:1–3).
Maare laa’at ut eb’ laa kok’al naru nekek’oxla jun kristiaan li naraj ru xnawb’al ru li Jesukristo. Tenq’aheb’ chixk’oxlankil chan ru te’wanq jo’ chaab’il eetalil ut te’xk’ut xrahomeb’ choq’ re li kristiaan a’an, jo’ kixb’aanu laj Ammon choq’ re laj Lamoni ut lix yuwa’.
Re xtawb’al xkomon chik li na’leb’, chi’ilmanq li hu Amigos re li po a’in.