“17–23 junio: “Li Jesukristo taachalq chixtojb’al rix lix tenamit.” Alma 8–12,” Kim, Taaqehin—Choq’ re li ochoch ut li iglees: Lix Hu laj Mormon 2024 (2023)
“17–23 junio. Alma 8–12,” Kim, Taaqehin—Choq’ re li ochoch ut li iglees: 2024 (2023)
Jalam-uuch
laj Alma najultikan aatin
Xk’utb’al li tz’aqal yaal tzol’leb’, xb’aan laj Michael T. Malm
Ink’a’ taasachmanq lix k’anjel li Dios. A’b’anan, wan naq chanchan naq nasachman lix yalb’al qaq’e chi tenq’ank sa’ lix k’anjel—malaj ut ink’a’ naqil sa’ junpaat li naqaj naq taak’ulmanq. Maare naqeek’a jo’ kireek’a laj Alma naq kixjultika li evangelio sa’ Ammonihah—tz’eqtaananb’il, chuub’anb’il, ut isinb’il chaq. A’b’an, naq jun li anjel kixye re naq taasutq’iiq ut tixyal wi’chik, laj Alma “sa’ junpaat kisutq’i” chi kaw xch’ool (Alma 8:18), ut li Dios kixkawresi lix b’e. Ink’a’ ka’ajwi’ kixkawresi li tzakemq choq’ re laj Alma ut jun li na’ajej taaruuq taahilanq wi’, a’an kixkawresi ajwi’ laj Amulek, li ki’ok choq’ jun rech aj k’anjel, jun kawil aj kolol rix li evangelio, ut jun tz’aqal ramiiw. Naq naqak’ul li ch’a’ajkilal malaj li rahilal naq nokok’anjelak sa’ li rawa’b’ejihom li Qaawa’, naru taajultiko’q qe chan ru naq li Dios kixtenq’a ut kixk’am xb’e laj Alma, ut naru taqakanab’ qib’ chiru li Dios, naq a’an tooxtenq’a ut tixk’am ajwi’ qab’e, us ta sa’ ch’a’ajkilal wanko.
Li na’leb’ re tzolok sa’ li ochoch ut sa’ li iglees
Lix yalb’al inq’e chixwotzb’al lix evangelio li Jesukristo naraj ru li kuyum.
Ma xayal jun sutaq xwotzb’al lix evangelio li Jesukristo rik’in jun kristiaan, a’b’an kitz’eqtaanaak laa b’oqom? Laj Alma kixk’ul ajwi’ a’an. K’a’ru nakatzol rik’in a’an sa’ Alma 8:13–16 chirix xwotzb’al li evangelio us ta wan li ch’a’ajkilal ut li yale’k-ix? Ileb’ li raqal 17–32, ut k’e reetaleb’ li ch’ol aatin nakate’xmusiq’a chixwotzb’al li evangelio, us ta sa’eb’ li hoonal naq chanchan naq maak’a’ na’ok wi’.
Eb’ li profeet ut li apostol a’aneb’ sik’b’il ru aj yehol nawom chirix li Kristo, jo’kan naq wankeb’ naab’aleb’ lix musiq’anb’il na’leb’ li te’xwotz chirix xch’olob’ankil xyaalal a’an. Il li kixye li Elder Dieter F. Uchtdorf sa’ “Maare jwal ch’a’aj” (jun raqal sa’ “Li misioneerik: xwotzb’al li wan sa’ laa ch’ool,” Jolomil ch’utub’aj-ib’ re abril 2019) malaj li kixye li Elder Gary E. Stevenson sa’ “Rahok, wotzok, b’oqok,” (Jolomil ch’utub’aj-ib’ re abril 2022). K’a’ru nakataw sa’ li raatineb’ li naru naxtenq’a jun kristiaan li nalukta xch’ool chirix xwotzb’al li evangelio?
Chan ru raj taak’os ru chixjunil li xatzol arin sa’ jun malaj wiib’ li ch’ol aatin aj waklesinel ch’oolej chirix xwotzb’al li evangelio? K’oxla xyiib’ankil jun nimla hu malaj k’a’ruhaq chik li tatxmusiq’a laa’at (ut eb’ laa was aawiitz’in) chixyalb’al aaq’e.
Li rosob’tesihom li Dios nachal rik’in nimla teneb’ahom.
Naq naqil chan ru naq eb’ laj Nefita aran Ammonihah ke’xhob’eb’ lix moos li Qaawa’, naru nasach sa’ qach’ool naq junxil ke’paab’ank re li evangelio ut a’aneb’ chaq jun “tenamit q’axal usilanb’ileb’ xb’aan li Qaawa’” (Alma 9:20). Naq nakawil resil li xninqal ru osob’tesink kixk’e li Dios re li tenamit aj Nefita (chi’ilmanq Alma 9:14–23), k’oxla li xninqal ru osob’tesink li xk’eehom aawe. K’a’ruheb’ li teneb’ahom li neke’chal rik’ineb’ li osob’tesihom? K’a’ru yookat chixb’aanunkil re xb’aanunkil li teneb’anb’il sa’ aab’een?
Lix k’uub’anb’il na’leb’ li Dios a’an jun k’uub’anb’il na’leb’ re tojb’al-ix.
Sa’ Alma 11–12, lix k’uub’anb’il na’leb’ re li tojb’al-ix ke’xye laj Alma ut laj Amulek re lix k’uub’anb’il na’leb’ li Dios. Naq nakawileb’ li ch’ol a’an, k’oxla k’a’ut naq li aatin tojb’al-ix na’oksiman re xch’olob’ankil lix k’uub’anb’il na’leb’ li Dios. K’oxla xtz’iib’ankil jun xk’osb’al ru li k’a’ru ke’xk’ut laj Alma ut laj Amulek chirixeb’ li raqal a’in re li k’uub’anb’il na’leb’:
Li t’ane’k
Laj Tojol-ix
Li jalbʼa-kʼaʼuxlej
Li kamk
Li wakliik chi yo’yo
Li raqb’a-aatin
K’e reetal chan ru naq li raatin laj Amulek kixtoch’ xch’ooleb’ li kristiaan (chi’ilmanq Alma 11:46). Chan ru naq laa nawom chirix lix k’uub’anb’il na’leb’ li Dios naxjal laa yu’am?
Wi ink’a’ ninkawob’resi li waam, naru nink’ul xkomon chik li raatin li Dios.
Wankeb’ li maare neke’xpatz’ k’a’ut naq li qaChoxahil Yuwa’ ink’a’ naxk’e chi nawmank chixjunil chiqu. Sa’ Alma 12:9–14, laj Alma kixch’olob’ k’a’ut. Eb’ li patz’om a’in naru nakate’xtenq’a chixk’oxlankil li k’a’ru kixk’ut:
Li perel re kok’ k’anjel re li xamaan a’in naru nakatxtenq’a chixk’osb’al ru li kik’ulman sa’ Alma 8–10 choq’ reheb’ laa kok’al. Us raj naq taatenq’aheb’ chixk’eeb’al reetaleb’ li na’leb’ li ke’tenq’ank reheb’ laj Alma ut laj Amulek chi wank jo’ chaab’il misioneer. Jo’ eetalil, li ink’a’ ke’xkanab’ k’anjelak (chi’ilmanq Alma 8:8–13), ke’xch’olob’ xyaalal li Kristo (chi’ilmanq Alma 9:26–27), ut ke’k’anjelak sa’ komonil (chi’ilmanq Alma 10:12).
Jun b’ich chirix xjultikankil li evangelio, maare “Nawaj tinwanq choqʼ jun li misioneer” (B’ichleb’aal choq’ reheb’ li Kok’al, 90), naru naxk’ut chiruheb’ laa kok’al chan ru naru neke’xwotz li evangelio rik’ineb’ li ramiiw. Patz’ reheb’ naq te’xye malaj te’xtz’iib’a li na’leb’ neke’xtaw ut li ani aj-ik’in naru te’xwotz li evangelio. Naru ajwi’ nakak’e xhoonaleb’ re xk’utb’esinkil k’a’ raj ru te’xye malaj te’xb’aanu.
Waklesi ch’oolej chi tz’aqonk. Naq nakakawresi aawib’ re k’utuk, sa’ xna’aj xk’uub’ankil li taaye, patz’ aawib’, “K’a’ru te’xb’aanu li kok’al re tzolok?” Wi te’k’ehe’q chi tz’aqonk, li kok’al te’tzoloq chi chaab’il wi’chik ut mas taajulitko’q reheb’ li na’leb’ te’xtzol.
Lix k’uub’anb’il na’leb’ li Dios a’an jun k’uub’anb’il na’leb’ re tojb’al-ix.
Laa kok’al naru neke’xyiib’ jalam-uuch li te’reetali li na’leb’ chirix li k’uub’anb’il na’leb’ re tojb’al-ix, jo’ lix t’anik laj Adan ut xEva, lix tojb’al rix li maak xb’aan li Jesukristo, li jalb’a-k’a’uxlej, li kamk, li wakliik chi yo’yo, ut li raqb’a-aatin. Chirix a’an naru nakatenq’aheb’ chixk’ulinkileb’ li jalam-uuch rik’ineb’ li raqal sa’ Alma 11–12 li neke’k’utuk chirixeb’ li na’leb’ a’an.
Naru nakapatz’ re jun reheb’ li kok’al naq tixk’oxla naq a’an laj Amulek ut jun chik reheb’ tixk’oxla naq a’an laj Alma naq laa’at yooqat chixseraq’inkil Alma 8:18–22. Chan ru naq laj Amulek a’an jun chaab’il amiiw choq’ re laj Alma? Chirix a’an eb’ laa kok’al naru neke’xwotz chan ru naq jun kristiaan kiwan jo’ chaab’il amiiw reheb’, ut k’a’ru ke’reek’a chirix li ke’xk’ul.
Naru nakayiib’ jun rompecabezas re amiiwul: taw malaj yiib’ jun xjalam-uuch li nareetali li amiiwul ut set sa’ kok’ cha’alej. Chiru li rix li junjunq chi cha’alej, tz’iib’a k’a’ruhaq naru naqab’aanu jo’ chaab’il amiiw, jo’eb’ ajwi’ li ke’xb’aanu laj Alma ut laj Amulek. Laa kok’al naru neke’xk’eheb’ xhoonal re xsik’b’al jun xcha’al ut xk’eeb’al sa’ li rompecabezas naq laa’at yooqat chixyaab’asinkil li tz’iib’anb’il chirix. Ani naraj ru naq toowanq choq’ amiiw?
Jalam-uuch
wiib’eb’ li ixqa’al neke’se’ek
Naru nokowan choq’ chaab’il amiiw choq’ reheb’ li qas qiitz’in.
Sa’ xk’ab’a’ li Jesukristo, laa’in tinwakliiq chi yo’yo.
Naru nakawoksi jun li tzolok jo’ a’in re k’utuk chirix li wakliik chi yo’yo: laa wuq’ taareetali laa musiq’, ut jun ramleb’ uq’ taareetali laa tib’el. Isi laa wuq’ sa’ li ramleb’ uq’ re xk’utb’esinkil naq li qamusiq’ ut li qatib’el neke’xjach rib’ sa’ xhoonalil li kamk. Chirix a’an ch’ik wi’chik laa wuq’ sa’ li ramleb’ uq’ re xk’utb’esinkil naq li qamusiq’ ut li qatib’el te’xjunaji wi’chik rib’ sa’ li wakliik chi yo’yo. Kanab’eb’ laa kok’al chixk’eeb’aleb’ xhoonal chiroksinkil ut chirisinkil li ramleb’ uq’ naq laa’at yooqat chixyaab’asinkil Alma 11:43. K’ut chi kutankil jun xjalam-uuch li Jesukristo waklijenaq chi yo’yo (chi’ilmanq Hu reheb’ li Jalam-uuch re li Evangelio, 59), ut ch’olob’ xyaalal naq sa’ xk’ab’a’ li Jesukristo chiqajunil toowakliiq chi yo’yo.
Re xtawb’al xkomon chik li na’leb’, chi’ilmanq li hu Amigos re li po a’in.
Jalam-uuch
laj Alma nawa’ak rochb’een laj Amulek
B’onb’il xjalam-uuch laj Alma naq nawa’ak rochb’een laj Amulek, xb’aan laj Dan Burr