laj Alma li alalb’ej najultikan aatin

Laj Alma li alalb’ej najultikan aatin, xb’aan laj Gary L. Kapp

3–9 junio: “Ke’wan chi xaqxo junelik ut chi ink’a’ neke’eek’an”

Mosiah 29–Alma 4

Wankeb’ li ani maare te’ril lix na’leb’ li rey aj Mosiah naq te’wanq aj raqol aatin li sik’b’ileb’ ru xb’aan li tenamit ruuchileb’ li rey jo’ yal jun chaab’il jalok sa’ xjolominkil li tenamit. A’b’anan, choq’ reheb’ laj Nefita, ut q’axal wi’chik choq’ reheb’ li wanjenaqeb’ chaq rub’el xwankil li maa’us aj rey Noe, li jalok a’in kiwan ajwi’ xyaalalil sa’ musiq’ej. Ak rilomeb’ chaq k’a’ru kixb’aanu jun li maa’us aj rey choq’ re lix tenamit, ut “q’axal anchaleb’ chik xch’ool” naq ach’ab’anb’ilaqeb’ chiru li maa’usilal a’an. Li jalok a’in tixk’e naq teneb’anb’ilaq sa’ xb’een li junjunq lix tiikilal xch’ool ut naq taawanq xch’ool li junjunq “chixsumenkil ru tz’aqal lix maak” (Mosiah 29:38).

A’b’an, lix raqik li rawa’b’ejileb’ li rey maawa’ xraqikeb’ li ch’a’ajkilal sa’ xyanqeb’ li tenamit aj Nefita. Eb’ li winq q’axal seeb’eb’ xb’alaq’ jo’ laj Nehor ut laj Amlici ke’xjultika li b’alaq’il na’leb’, eb’ li maawa’eb’ aj paab’anel ke’xrahob’tesiheb’ laj santil paab’anel, ut k’iila komon re li Iglees ke’xq’etq’eti rib’ ut ke’risi rib’. A’ut eb’ li “neke’taaqen re li Dios chi tuulaneb’ xch’ool” ke’kana “chi xaqxo junelik ut chi ink’a’ neke’eek’an,” maak’a’ naxye li k’a’ru yoo chi k’ulmank chixsutameb’ (Alma 4:15; 1:25).

Li na’leb’ re tzolok sa’ li ochoch ut sa’ li iglees

Mosiah 29:26–27; Alma 2:1–7

Naru tinwanq jo’ aj b’aanuhom chaab’ilal sa’ li tenamit wankin wi’.

Yal oob’ chihab’ chaq xtiklajik li rawa’b’ejileb’ laj raqol aatin naq kichal jun nimla ch’a’ajkilal li tixyal rix lix na’leb’ laj Mosiah naq chi kok’ aj xsa’ lix yaab’ xkux li tenamit tixsik’ ru li k’a’ru tiik (chi’ilmanq Mosiah 29:26). Il Alma 2:1–7 re xnawb’al k’a’ru li ch’a’ajkilal a’an ut k’a’ru ke’xb’aanu laj Nefita re xtuqub’ankil. Kʼaʼ raj ru kikʼulman wi ta “li ani wankebʼ saʼ li iglees” inkʼaʼ raj keʼxkʼe chi abʼimank lix yaabʼ xkuxebʼ? K’a’ chik ru nakatzol sa’ li seraq’ a’in chirix li naraj li Qaawa’ naq taab’aanu sa’ laa tenamit? (chi’ilmanq ajwi’ Mosiah 29:26–27).

K’a’ruheb’ li ch’a’ajkilal aajel ru sa’ li tenamit wankat wi’? K’oxla chan ru nakatru, jo’eb’ laj Nefita, chixk’eeb’al chi ab’imank lix yaab’ aakux sa’ “lix yaab’ xkux li tenamit”? K’a’ chik ru naru nakab’aanu, jo’ aj taaqenel re li Jesukristo, re xchaab’ilob’resinkil laa tenamit?

Chi’ilmanq ajwi’ Dallin H. Oaks, “Charaheb’ li xik’ neke’ilok aawe,” Jolomil ch’utub’aj-ib’ re octubre 2020.

Alma 1

Li raatin li Dios naru nikinixten’qa chixk’eeb’al reetaleb’ li b’alaq’il na’leb’.

Us ta sa’ xraqik laj Nehor kixch’olob’ naq moko yaal ta li k’a’ru kixk’ut, toj kiwan xwankil li raatin sa’ xyanqeb’ laj Nefita chiru k’iila chihab’. K’a’ut naq kiwulak chiruheb’ li kristiaan lix k’utum laj Nehor? Sa’ Alma 1:2–6, k’e reetaleb’ lix tik’ti’ laj Nehor—sa’ lix k’utum ut eb’ li yaal kiroksi re xmuqb’aleb’ li tik’ti’ a’an.

Laj Gideon kixxaqab’ rib’ chiru laj Nehor “rik’in li raatin li Dios” (Alma 1:7, 9). Wahe’ junjunqeb’ li raqal li neke’xka’pak’ali lix b’alaq’il na’leb’ laj Nehor: Mateo 7:21–23; 2 Nefi 26:29–31; Mosiah 18:24–26; ut Helaman 12:25–26. Yal xk’osb’al ru li junjunq chi raqal a’in. Kʼaʼru ak xatzol rik’ineb’ li yo’yookil profeet li naxk’ut naq moko yaal ta li b’alaq’il na’leb’ sa’ li qakutankil?

Alma 1:19–31; 4:6–15

Eb’ lix tz’aqal tzolom li Jesukristo “nekeʼtaaqen re li Dios chi tuulanebʼ xchʼool.”

Sa’eb’ li ch’ol 1 ut 4 re li hu Alma yeeb’il resileb’ li hoonal b’ar wi’ naq yoo chi usaak li iglees, a’ut jalan li ke’xb’aanuhatq li komon. Qayehaq, juntaq’eeta Alma 1:19–30 rik’in Alma 4:6–15 re xk’eeb’al reetal chan ru naq ke’jala li komon re li Iglees sa’ yaal wiib’ oxib’ chihab’. Rik’in li k’a’ru xawil, k’a’ru neke’reek’a li tz’aqal neke’taaqen re li Jesukristo chirixeb’ li kristiaan jalaneb’ xpaab’aal? K’a’ru neke’xk’oxla li tz’aqal neke’taaqen re li Jesukristo chirix li b’ihomal ut li usaak? K’a’ru eek’asinb’ilat chixjalb’al sa’ aana’leb’ laa’at?

Juntaq’eetaheb’ li loq’laj hu rik’in laa yu’am. K’oxla chan ru naq eb’ li seraq’ ut li k’utum sa’eb’ li loq’laj hu neke’k’anjelak sa’ laa yu’am. Qayehaq, naru nakak’e reetal chan ru naq eb’ li ch’a’ajkilal re li kutan wanko wi’ chanchaneb’ li ch’a’ajkilal ke’xk’ul laj Nefita sa’ Alma 1–4.

Alma 4:6–20

reetalil li seminario

Lin b’aanuhom ut lin ch’olob’ahom naru neke’xjal li aamej.

Maare laa’at aaweek’ahom li rahil ch’oolejil kireek’a laj Alma naq kiril li yoo chi k’ulmank sa’ lix tenamit. Sik’eb’ li ch’a’ajkilal kiril a’an sa’ Alma 4:6–15. Ma nakak’e reetaleb’ li ch’a’ajkilal a’an sa’ li kutan a’in? Maare yoo laa k’a’uxl chirix jun aakomon li nach’a’ajko’ chi jo’ka’in. Ma aak’oxlahom jun sutaq k’a’ru naru nakab’aanu re xtenq’ankil?

Wankeb’ li maare te’xye naq laj Alma, jo’ xb’eenil aj raqol aatin, a’an li kristiaan q’axal kiru chiru xtuqub’ankileb’ li ch’a’ajkilal a’in. A’b’an laj Alma kireek’a naq wan jun b’e chaab’il wi’chik chiru a’an. Naq nakawileb’ li raqal 16–20, k’a’ru naxtoch’ aach’ool chirix lix na’leb’ re xtenq’ankil lix tenamit?

Jwal nim xpaab’aal laj Alma chirix li raatin li Dios ut li “saqen ruhil yaal chi ch’olob’anb’il” (raqal 19). Chan ru naq aawilom lix wankil li saqen ruhil yaal chi chʼolobʼanbʼil? Naq yooqat chixk’oxlankil chan raj ru naru nakawotz lix nawom aach’ool chirix li Jesukristo ut lix evangelio, naru nakawil wi’chik Alma 4:6–14. K’a’ru neke’xk’ut lix b’aanuhomeb’ li komon re li Iglees sa’eb’ li raqal a’in chirix lix nawomeb’ xch’ool chirix li Jesukristo ut eb’ lix k’utum? K’a’ru nakawil chirix lix toch’omeb’ lix b’aanuhom—rik’eb’ a’an ut rik’in jalaneb’ chik li kristiaan? Naru ajwi’ nakak’oxla chan ru naq xat-osob’tesiik xb’aan li saqen ruhil yaal ch’olob’anb’il xb’aaneb’ jalan chik li kristiaan, chi wotzb’il rik’in aatin malaj b’aanuhom.

K’oxla chan ru naru nakawotz lix nawom aach’ool chirix li Jesukristo—rik’in aatin malaj b’aanuhom. Ani taa’osob’tesiiq raj xb’aan lix nawom aach’ool?

Chi’ilmanq ajwi’ Gary E. Stevenson, “Xch’oolaninkil ut xwotzb’al lix nawom aach’ool,” Jolomil ch’utub’aj-ib’ re octubre 2022; “Lix nawom inchʼool,” Ebʼ li Bʼich, 78; “Alma cede el asiento judicial” (video), Biblioteca del Evangelio; Temas del Evangelio, “Revelación,” Biblioteca del Evangelio.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Alma 1:2–9

Li Qaawa’ naru nikinixten’qa chixk’eeb’al reetaleb’ li b’alaq’il k’utum.

• Re xtzolb’al Alma 1:2–4 rik’ineb’ laa kok’al, naru nakatenq’aheb’ chixtz’iib’ankil jun li examen, b’ar wi’ lix sumenkileb’ li patz’om a’an yaal malaj moko yaal ta, rik’ineb’ li na’leb’ kixk’ut laj Nehor, jun aj k’utunel aj b’alaq’. Chirix a’an naru neketz’il rix k’a’ut naq laj Satanas naxjunaji chi kok’ aj xsa’ li yaal rik’in li b’alaq’. Tenq’aheb’ laa kok’al chixk’oxlankileb’ junjunq li reetalil a’an. Sa’eb’ li raqal 7–9, chan ru naq laj Gideon kixxaqab’ rib’ chiru lix tik’ti’ laj Nehor? (Chi’ilmanq ajwi’ “Ch’ol 20: Laj Alma ut laj Nehor,” Eb’ li Esilal sa’ lix Hu laj Mormon, 54–55.)

Alma 1:19–25

Jo’ komon re lix Iglees li Jesukristo, ninraheb’ ut nink’anjelak chiruheb’ li was wiitz’in.

• Ke’wan li komon re lix Iglees li Qaawa’ sa’ lix kutankil laj Alma jwal k’eek’ookeb’ chaq xch’ool chi tenq’ank, ut ke’wan li komon q’etq’eteb’ ut maak’a’eb’ chaq xrahom. Re xtenq’ankileb’ laa kok’al chixtawb’aleb’ xna’leb’ rik’in a’in, naru nekeril Alma 1:27, 30 ut teetz’iib’aheb’ li jalan jalanq chi kristiaan li ke’tenq’aak xb’aaneb’ li komon re lix Iglees li Qaawa’. Ani naqanaw ru li maare “na’ajok tenq’aak” (Alma 1:30) xb’aan li qarahom ut li qatenq’? Naru ajwi’ nekeb’icha jun li b’ich chirix li rahok ut li tenq’ank, maare “Wik’in laa’in natikla li chaab’ilal” (B’ichleb’aal choq’ reheb’ li Kok’al, 83), ut taatenq’aheb’ laa kok’al chixk’oxlankileb’ eek’asink-ib’ li neke’xk’ul rib’ rik’in li raatinul li b’ich.

• K’a’ru tento taqab’aanu naq li kristiaan nokohe’xrahob’tesi? Naru nakawil rik’ineb’ laa kok’al k’a’ru ke’xk’ul li ke’taaqen re li Kristo sa’ Alma 1:19–20. Aatinanqex chirix li ke’xb’aanu sa’eb’ li raqal 22 ut 25. Naru nekex’aatinak chirix li k’a’ru us xb’aanunkil wi wan ani narahob’tesink.

Alma 4:8–20

Lix nawom inch’ool naru naxkawob’resiheb’ li was wiitz’in.

• Wan naq li “saqen ruhil yaal li ch’olob’anb’il” (Alma 4:19) xb’aan jun ch’ina al naru naxwaklesi xch’ooleb’ li komon. Re xtenq’ankileb’ laa kok’al chixk’eeb’al reetal a’in, naru nakawil Alma 4:8–12, 15 rik’ineb’, ut taatenq’aheb’ chixk’eeb’al reetaleb’ li ch’a’ajkilal li yookeb’ chi k’ulmank sa’ li Iglees. K’a’ru kiru chixb’aanunkil laj Alma re xtuqub’ankileb’ li ch’a’ajkilal a’in? Tenq’aheb’ chixk’eeb’al reetal li kixsik’ ru laj Alma chixb’aanunkil sa’ Alma 4:16–20. Naru nekewotz cherib’il eerib’ chan ru naq lix nawom xch’ool jun chik li kristiaan chirix li Kristo xkawob’resink eere.

• Wi laa kok’al neke’raj ru jun reetalil li xnawom xch’oolej, k’oxla xk’utb’al chiruheb’ xcha’al jun li video naxch’olob’ wi’ jun kristiaan lix nawom xch’ool sa’ li jolomil ch’utub’aj-ib’. Naru ajwi’ nekeroksi li perel re kok’ k’anjel re li xamaan a’in malaj naru nekeb’icha jun li b’ich jo’ “Lix nawom inchʼool” (Eb’ li B’ich, 78). K’a’ru naqatzol chirix li xnawom ch’oolej sa’eb’ li k’anjeleb’aal a’an? Kanab’eb’ laa kok’al rik’in chixwotzb’aleb’ lix nawom xch’ooleb’.

Re xtawb’al xkomon chik li na’leb’, chi’ilmanq li hu Amigos re li po a’in.

eb’ laj Nefita neke’pleetink reheb’ laj Amlicita

Laj Alma ut laj Amlici, xb’aan laj Scott M. Snow

perel re kok’ k’anjel: Lix nawom inch’ool naru naxkawob’resiheb’ li was wiitz’in