Laj Alma maak’a’ xnawom chirix li cho’ok re xnumsinkil li aamej nab’aanuman sa’ li qakutan, sa’ li nanumsiman wi’ jun chaab’il aamej sa’ xna’aj jun aamej li po’jenaq malaj wan xyajel. A’b’an, a’an wan xnawom chirix jun sachb’a-ch’oolejil “xjalajik li ch’oolej” li nimaq xwankil chiru a’an (Alma 5:26)—b’ar wi’ li Kolonel naxk’e chi ak’ob’resiik li qamusiq’ejil yu’am, jo’ chanchan li yo’laak wi’chik (chi’ilmanq Alma 5:14, 49). Laj Alma kiru chixk’eeb’al reetal naq li jalaak a’in sa’ ch’oolej, a’an tz’aqal li ki’ajman ru choq’ re naab’al reheb’ laj Nefita. Ke’wan li b’ihomeb’ ut ke’wan li neb’a’eb’, li q’etq’eteb’ ut li tuulaneb’ xch’ool, li ke’rahob’tesink ut li ke’rahob’tesiik (chi’ilmanq Alma 4:6–15). A’ut chixjunileb’ ke’raj ru chalk rik’in li Jesukristo re te’k’irtesiiq—jo’ chanru naq ajb’il ru choq’ qe chiqajunjunqal. Maak’a’ naxye ma yooko chixyalb’al qaq’e chi numtaak sa’ xb’een li q’etq’etil malaj chi kuyuk chiru li ch’a’ajkilal, juntaq’eet li raatin laj Alma: “Chalqex ut mexxuwak” (Alma 7:15). Kanab’ naq li Kolonel tixjal jun aamej li kawujenaq, aj maak, malaj toch’enaq, choq’ jun li aamej li tuulan, saq ru, ut ak’.
Li na’leb’ re tzolok sa’ li ochoch ut sa’ li iglees
Li Awa’b’ej M. Russell Ballard kixye: “Tento naq chi kok’ aj xsa’ tink’oxlaq b’ayaq ut tinpatz’ wib’, “Chan ru wankin?” … Jo’ jun aj k’amol inb’e sa’ li tz’ilok-ix injunes wib’, nawulak chiwu rilb’al ru ut xk’oxlankil li aatin sa’ li ch’ol 5 re Alma” (“Li sutq’iik ut li k’uluk,” Jolomil ch’utub’aj-ib’ re abril 2017).
K’oxla rilb’al Alma 5:14–33 jo’ chanchan naq laa’at yookat chixtz’ilb’al aawix ut chixtz’ilb’al rix aach’ool. Maare taak’anjelaq aawe xtz’iib’ankil lix sumehomeb’ li patz’om a’an. K’a’ru nakatzol chawix laa’at? K’a’ru eek’asinb’ilat chixb’aanunkil xb’aan li tz’ilok-ix a’in?
Naru tink’ul xnawom inch’ool chirix li Kolonel ut eb’ lix k’utum rik’in li Santil Musiq’ej.
Sa’ Alma 5, naq laj Alma kixch’olob’ chan ru kixk’ul xnawom xch’ool chirix li Kolonel, ink’a’ kixye resil naq kiril jun li anjel (chi’ilmanq Mosiah 27:10–17). Chan ru ki’ok laj Alma chixnawb’al li yaal xjunes? Naru nakawoksi li nakataw sa’ Alma 5:44–51 re xtz’iib’ankil jun tusb’il na’leb’ choq’ re xk’ulb’al jun xnawom ch’oolej chirix li Jesukristo ut eb’ lix k’utum. K’a’ruheb’ li k’anjeleb’aal (eb’ li na’leb’ re li evangelio) ut li ch’olob’ank (li naru naqab’aanu re xsik’b’al li yaal) li kiroksi laj Alma? Kʼaʼruheb’ li k’anjeleb’aal ut chʼolobʼank naru nakakʼe saʼ laa tusb’il na’leb’ li aak’ulum saʼ laa yuʼam, malaj aawilom sa’eb’ li loqʼlaj hu?
“Ninkʼe reetal naq wankex saʼ xbʼehil li tiikilal.”
Wan naq chanchano li kristiaan aran Tzarahemla, li ke’raj ru b’oqe’k chixjalb’aleb’ xk’a’uxl (chi’ilmanq Alma 5:32). Ut wan naq chanchano li tenamit aj Gideon, li ke’xyal xq’e chi b’eek “saʼ xbʼehil li tiikilal” (Alma 7:19). K’a’ru nakataw sa’ li kixye laj Alma aran Gideon (sa’ Alma 7) li chanchan li kixye aran Tzarahemla (sa’ Alma 5)? K’a’ru li jalan li nakak’e reetal? K’e reetal li k’a’aq re ru kixye laj Alma naru nakatxtenq’a chi kanaak “sa’ li b’e li naxik sa’ li rawa’b’ejihom li Dios” (Alma 7:19).
Li Kolonel kixk’ul sa’ xb’een a’an lin maak, lin rahilal, ut lin ch’a’ajkilal.
Ma aaweek’ahom jun sutaq naq maa’ani naxtaw ru laa ch’a’ajkilal malaj lix yalb’al aawix? Wi jo’kan, li na’leb’ k’utb’il xb’aan laj Alma naru nakatxtenq’a. Naq yooqat chirilb’al a’an, k’oxla k’a’ru neke’xk’ut li raqal a’in chirix li rajb’al lix mayej li Kolonel. Naru nakayiib’ jun tusulal rik’in li jolomil aatin K’a’ru li rahilal kixk’ul li Kolonel ut K’a’ut naq kixk’ul li rahilal ut taatz’iib’a li na’leb’ nakataw sa’ Alma 7:7–16 (chi’ilmanq ajwi’ Isaias 53:3–5). Ma naru nakak’oxlaheb’ hoonal naq kixk’uleb’ li rahilal a’an? Wahe’ junjunqeb’ sa’eb’ li loq’laj hu: Mateo 4:1–13; 26:55–56; 27:39–44; Markos 14:43–46; Lukas 9:58. Ma wan chik li nakawil sa’eb’ li raqal a’in naru nakatiq sa’ laa tz’iib’ahom?
Us xpaab’ankil naq li Kolonel kixk’ul li rahilal sa’ aak’ab’a’. A’ut, chan ru naq li rahilal kixk’ul yoo chixjalb’al laa yu’am wulaj wulaj? Wahe’ junjunqeb’ li raqal re li loq’laj hu li neke’xk’ut chan ru li Jesukristo naru nakatxtenq’a: Enos 1:5–6; Mosiah 16:7–8; 21:15; 24:14–15; 3 Nefi 17:6–7; Eter 12:27–29; Tzol’leb’ ut Sumwank 121:7–10. K’a’ru nakatzol sa’eb’ li raqal a’in? Chan chik ru nachal re aatenq’ankil? Joʼqʼe ak xak’ul lix tenq’ sa’ laa yu’am?
Jun b’ich jo’ “Rajlal nawaj aawu” malaj “Ninnaw naq yoʼyo inKolonel” (Eb’ li B’ich, 53, 77), naru naxchamob’resi laa b’antioxihom choq’ re lix tenq’ li Kolonel. K’a’ruheb’ li ch’ol aatin sa’eb’ li b’ich a’in li neke’xk’ut li nakaweek’a chirix li Kolonel?
Chi’ilmanq ajwi’ Temas del Evangelio, “Expiación de Jesucristo,” Biblioteca del Evangelio; “Su gracia” (ch’uut chi video), Biblioteca del Evangelio.
Ye xnawom aach’ol chirix li Jesukristo. K’oxla chan ru naru nakawotz lix nawom aach’ool chirix li Kolonel ut lix choxahilal, li rusilal, ut lix rahom. Naru nakawaklesi xch’ooleb’ li ani nakatk’utuk chiru chixch’olob’ankil xyaalal a’an wi nakawoksiheb’ li patz’om li naxk’eheb’ chixwotzb’al k’a’ru neke’reek’a chirix a’an.
Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.
Naru nintaw xnawom inch’ool rik’in li Santil Musiq’ej.
Re xtenq’ankileb’ laa kok’al chinimob’resinkil xjuneseb’ lix nawom xch’ooleb’, naru nakak’ut chiruheb’ li jalam-uuch wankeb’ arin ut nakapatz’ reheb’ chan ru naqatenq’aheb’ li kok’ xul chi k’iik. Chirix a’an naru nakajuntaq’eeta a’an rik’in xch’olaninkil lix nawom qach’ool. K’a’ru li ch’olaniik naraj ru lix nawom qach’ool? K’a’ru naqanaw wi’ naq yoo chi k’iik?
Jalam-uuch
wiib’eb’ li kok’al rik’ineb’ ral li xul
Naq naqak’ulub’a li evangelio, a’an chanchan xtikib’ankil jun chik ak’ yu’am.
Chan ru naq laj Alma kixk’ul jun xnawom xch’ool jwal kaw chirix li Jesukristo? Naru nakawil Alma 5:44–46 rik’ineb’ laa kok’al re xtawb’al xsumenkil li patz’om a’in. Laa kok’al naru neke’xtz’iib’a chan ru te’xb’aanu jun reheb’ li k’a’aq re ru a’in chiru li xamaan a’in re xkawob’resinkil lix nawom xch’ooleb’.
Li Kolonel kixk’ul sa’ xb’een a’an lin maak, lin rahilal, ut eb’ lin ch’a’ajkilal.
Chan ru naru nakatenq’aheb’ laa kok’al chixtawb’al ru Alma 7:10–13 re naq naru te’xnaw naq neke’k’oxlaak xb’aan li Jesukristo ut naq a’an naru naxtenq’aheb’. Naru nakapatz’ reheb’ naq te’xwotz xnumsihomeb’ b’ar wi’ naq xe’yajer, xe’wan xrahilal, malaj xe’wan jalan chik ch’a’ajkilal li xk’ehok xrahileb’ xch’ool. K’a’ru ke’xb’aanu jalan chik li kristiaan re xwaklesinkileb’ xch’ool? Ch’olob’ xyaalal naq li Kolonel ajwi’ kixnumsi chixjunileb’ li ka’a’q re ru a’an, ut seraq’i resil jun hoonal naq a’an kixk’ojob’ aach’ool ut katxtenq’a.
Naq yooqex chirilb’al Alma 7:11–13, k’ehomaq reetal k’a’ruheb’ li rahilal kixk’ul li Jesukristo choq’ qe. Patz’ reheb’ laa kok’al naq te’roksi li aatin ut ch’ol aatin xe’ril re xtz’aqob’resinkil ru li ch’ol aatin a’in: “Li Jesus kixk’ul re naq a’an taaruuq tinixtenq’a.” Chan ru nokoxtenq’a xnawb’al naq li Jesus naxnaweb’ ru lix yalb’al qaq’e? Chan ru naq naqak’ul lix tenq’? Ye lix nawom aachʼool chirix li Jesukristo.
Xtaaqenkil li Jesukristo nikinixtenq’a chi kanaak sa’ li tiik ruhil b’e li nak’amok rik’in li qaChoxahil Yuwa’.
Kanab’eb’ laa kok’al chi ilok sa’ jun li lem naq yooqat chixyaab’asinkil Alma 5:14 (chi’ilmanq ajwi’ li perel re kok’ k’anjel re li xamaan a’in). K’a’ru naraj naxye xk’amb’al xjalam-uuch li Kolonel sa’ qilob’aal?
Chan ru naru nakawoksi lix ch’olob’ahom laj Alma chirix li b’e re q’ajk rik’in li qaChoxahil Yuwa’ re xtenq’ankileb’ laa kok’al chixtzolb’al xsik’b’aleb’ ru li k’a’ru us. Naru nakayaab’asi Alma 7:19–20 chiruheb’ ut taakanab’eb’ chi b’eek chiru jun “yokotzinbʼil bʼe” ut jun bʼe tiik ru. Tenq’aheb’ chixk’oxlankil k’a’aq re ru li teʼtenq’anq qe chi kanaak saʼ li bʼe ut jalan chik kʼaʼaq re ru teʼjalbʼehinq qe saʼ li bʼe. Naru ajwiʼ nekerilebʼ xjalam-uuch li Jesus ut nekexʼaatinak chirix li kʼaʼru kixbʼaanu re xkʼutbʼal chiqu li bʼe nakʼamok rikʼin li qaChoxahil Yuwaʼ. Jun bʼich joʼ “Chinwanq raj jo’ li Jesus” (B’ichleb’aal choq’ reheb’ li Kok’al, 40–41) naru naxkʼe eenaʼlebʼ.
Re xtawb’al xkomon chik li na’leb’, chi’ilmanq li hu Amigos re li po a’in.
