« 13–19 nō Mē : ‘Te hō’ē māramarama […] ’o tē ’ore roa e pōiri.’ Mosia 11–17 », Mai, pe’e mai—Nō te ’utuāfare ’e te fare purera’a : Buka a Moromona 2024 (2024)
«13–19 nō Mē. Mosia 11–17 », Mai, pe’e mai—Nō te ’utuāfare ’e te fare purera’a : 2024 (2024)
Abinadi before King Noah [Abinadi i mua i te ari’i Noa], nā Andrew Bosley
13–19 nō Mē : « Te hō’ē māramarama […] ’o tē ’ore roa e pōiri »
Mosia 11–17
Nā te hō’ē noa pura e fa’a’ama i te hō’ē auahi rarahi. ’O Abinadi ana’e tei fa’a’ite i tōna ’itera’a pāpū i mua i te hō’ē ari’i pūai ’e tāna pūpū ta’ata. ’Ua vahavahahia te rahira’a o tāna mau parau ’e ’ua fa’ahapahia ’oia i te utu’a pohe. ’Āre’a rā, maoti tōna ’itera’a pāpū nō Iesu Mesia, ’oia ho’i « te hō’ē māramarama hope ’ore, ’o tē ’ore roa e pōiri » (Mosia 16:9), i tū’ama ai te tahi mea i roto i te tahu’a ’āpī ra ia Alama. ’E ’ua tupu marū noa te reira pura fa’afāriu ’a fa’ahaere ato’a mai ai Alama i te ta’ata i te tātarahapara’a ’e i te fa’aro’o ia Iesu Mesia. ’Ua pohe atu te auahi tei ha’apohe ia Abinadi, te auahi fa’aro’o rā tā tāna mau parau i ha’apura, e vai maoro noa ïa i ni’a i te mau ’āti Nephi—’e i ni’a ia rātou e tai’o ra i tāna parau i teie mahana. E’ita roa te rahira’a o tātou e fa’aruru i tā Abinadi i fa’aruru nō tō tātou ’itera’a pāpū, tātou pā’āto’a rā tē nā roto atu i te mau taime e riro tō tātou pe’era’a ia Iesu Mesia ’ei tāmatara’a i tō tātou itoito ’e i tō tātou fa’aro’o. Pēnei a’e e ha’apuai ato’a te ’itera’a pāpū o Abinadi i te ’ama o te ’itera’a pāpū ’e o te itoito i roto i tō ’oe ’ā’au.
Hi’o ato’a « Abinadi Testifies of Jesus Christ [Tē fa’a’ite pāpū nei ’o Abinadi nō Iesu Mesia] » (video), Vaira’a buka ’evanelia.
Mana’o nō te ’apo i te ha’api’ira’a i te ’utuāfare ’e i te fare purera’a
E nehenehe tā’u e ti’a nō Iesu Mesia, noa atu ē, ’o vau ana’e tē ti’a.
’A tuatāpapa ai ’oe te Mosia 11–13 ; 17, ’a hi’o i te mau hōho’a nō Abinadi i roto i teie arata’i ha’api’ira’a. E aha tā ’oe i ’apo mai nō ni’a i te ti’ara’a ’ite nō te Mesia ? Ta’a ’ē noa atu i te reira, e nehenehe ’oe e rōtahi i tā ’oe tuatāpapara’a i ni’a i te mau tuha’a ’īrava ’e te mau uira’a mai teie :
-
E aha tā ’oe e parau nō Noa ’e tōna mau ta’ata ? Nō te aha e tītauhia te itoito nō Abinadi nō te fa’a’ite i te poro’i a te Atua ia rātou ? (hi’o Mosia 11:1–19, 27–29 ; 12:9–15).
-
E aha tā ’oe e parau nō Abinadi ? E aha tā Abinadi i māramarama tei tauturu iāna ’ia itoito noa i roto i tōna ’itera’a pāpū ? (hi’o Mosia 13:2–9, 28, 33–35 ; 17:8–10, 20).
E aha te taime i mana’o ai ’oe ē, tē ti’a ’ōtahi ra ’oe nō te pāruru i te Fa’aora ’e tāna ’evanelia ? Nāhea ’oia i te tauturura’a ’ia ’oe i te ’itera’a ē, tei pīha’i ato’a iho ’oia ia ’oe ? ’A feruri ai ’oe i te reira, e nehenehe ’oe e tai’o i te ’ā’amu nō Elisaia ’e tāna tāvini ’āpī i roto i 2 Te mau Ari’i 6:14–17. E aha te mea i fa’auru ia ’oe i roto i teie ’ā’amu ?
E nehenehe ato’a ’oe e mā’imi i roto i te mau api 31–33 o te Nō te Pūai o te Feiā ’Āpī : E arata’i nō te rave i te mau mā’itira’a, nō te ’imi i te mau parau e fa’aitoito nei ia ’oe ’ia pāruru i te parau mau. ’Aore rā e nehenehe tā ’oe e nā reira ato’a i roto i te mau parau o te hō’ē hīmene mai te hīmene ra « ’A ha’apa’oha’apa’o maita’i » ’e ’aore rā « Ara mai tātou » (Te mau hīmene, N°143, 148).
Nāfea ’oe e fa’a’ohipa ai i te mea tā ’oe i ’apo mai nō roto mai ia Abinadi ? Tē fa’a’ite nei te video « Dare to Stand Alone [’Ia itoito i te ti’a o ’oe ana’e ra] » (Vaira’a buka ’evanelia) i te tahi mau ’ohipa e nehenehe ai ’oe e ti’a nō te Mesia ’e nō tāna ’evanelia. E aha te tahi atu ā mau hi’ora’a tā ’oe e nehenehe e feruri mai ?
Hi’o ato’a Roma 1:16 ; 2 Timoteo 1:7–8 ; « Pene 8 : Te pi’ira’a no te itoito ».
Ha’api’i nā roto i te Vārua. « Te ha’api’ira’a i te ’evanelia ma te pūai e ’ere ïa i te fa’anaho-noa-ra’a i te tahi ha’api’ira’a, ’o te fa’aineinera’a rā ia ’outou iho i te pae vārua [nō te] fa’aro’o ’e nō te pe’e i te arata’ira’a a te Vārua ’a ha’api’i ai ’outou » (Ha’api’ira’a mai tā te Fa’aora, 17).
Tītauhia ’ia tu’u vau i tō’u ’ā’au nō te māramarama i te parau a te Atua.
’Ua mātau te mau tahu’a a te ari’i Noa i te parau a te Atua. ’Ua nehenehe tā rātou e fa’ahiti i te mau ’īrava nō te pāpa’ira’a mo’a ma te parau ē, ’ua ha’api’i rātou i te ta’ata i te mau fa’auera’a. Terā rā ho’i, mai te huru ra ē, ’aita te ’evanelia a te Fa’aora i taui i tō rātou orara’a. Nō te aha ïa te reira ?
’A feruri i te reira ’a tai’o ai i te Mosia 12:19–37. I tō ’oe mana’o, e aha te aura’a ’ia tu’u i tō ’oe ā’au nō te hāro’aro’a i te parau a te Atua ? E aha te mau parau e fa’auru nei ia ’oe ’ia rave i te tahi mau tauira’a i roto i te huru ’oe e ’apo nei i te ’evanelia ?
ʼIa pāpaʼihia te mau faʼaueraʼa a te Atua i roto i tō’u ʼāʼau e tiʼa ai.
’A feruri na i te parau a Abinadi ē, ’aita te mau fa’auera’a « i pāpa’ihia i roto i [te] ’ā’au » o te mau tahu’a (Mosia 13:11). E aha ra te aura’a nō teie parau ? ’Ia tai’o ’oe i te Mosia 13:11–26, ’a feruri ē ’ua pāpa’ihia ānei teie mau fa’auera’a i roto i tō ’oe ’ā’au.
Hi’o atoa Ieremia 31:31–34 ; 2 Korinetia 3:3.
’Ua mamae Iesu Mesia nō’u nei.
I roto i te Mosia 14–15, a hi’o maita’i i te mau ta’o ’e te mau pereota tei fa’ahiti i te parau nō te Fa’aora ’e te mea tāna i mamae nō ’oe. E aha te mau ’īrava tei tauturu i te fa’ahōhonura’a i tō ’oe here ’e tō ’oe māuruuru iāna ?
E mea nāhea ’o Iesu Mesia te Metua ’e te Tamaiti ?
’Ua ha’api’i ’o Abinadi ē, te Atua te Tamaiti—Iesu Mesia—’o te Tāra’ehara ïa (hi’o Mosia 15:1), ’o tē noho mai i roto i te tino ’i’o nei, ’e ’o tē riro mai ’ei ta’ata ’e ’ei Atua (mau ’īrava 2–3). ’Ua auraro hope ’oia i te hina’aro o te Atua te Metua (mau ’īrava 5–9). Nō reira, ’o Iesu Mesia te Tamaiti a te Atua ’e te ti’a maita’i roa i ni’a i te fenua nei nō te Atua te Metua (hi’o Ioane 14:6–10).
’O Iesu Mesia ato’a te Metua, te aura’a ra, ’ia fāri’i ana’e tātou i tāna tāra’ehara, ’ua riro atu ra ïa tātou ’ei « hua’ai » nōna ’e « ’ei feiā ’āi’a […] i te bāsileia o te Atua » (Mosia 15:11–12). E nehenehe e parau ē, tē fānau-fa’ahou-hia nei tātou i te pae vārua nā roto iāna (hi’o Mosia 5:7).
I tō ’oe mana’o, nō te aha e mea faufa’a ’ia ’ite i teie mau parau mau nō ni’a i te Metua i te ao ra ’e nō ni’a ia Iesu Mesia ? Nāhea te ’itera’a pāpū o Abinadi i te ha’apūai i tō ’oe fa’aro’o i roto ia rāua ?
Mana’o nō te ha’api’i i te tamari’i
E nehenehe tā’u e ti’a nō Iesu Mesia, noa atu ē, ’o vau ana’e tē ti’a.
-
I te tahi taime i roto i tō tātou ’orara’a, e fa’aruru pā’āto’a tātou i te ’ume’umera’a nō te rave i te mau mā’itira’a e ha’apa’o ’ore i tō tātou fa’aro’o ia Iesu Mesia. E aha te ha’api’ira’a tā tā ’oe mau tamari’i e nehenehe e ’apo mai mai roto mai ia Abinadi, nō ni’a i te ti’ara’a ’ei ’ite nō Iesu Mesia, noa atu e ’ere i te mea au-roa-hia e te ta’ata ? E tauturu mai paha te hōho’a i roto i teie arata’i ha’api’ira’a ’e ’aore rā i roto i te « Pene 14 : Abinadi ’e te ari’i Noa » (i roto i Te mau ’ā’amu o te Buka a Moromona, 38–42) ia rātou ’ia hi’o mata i te ’ā’amu i roto i te Mosia 11–13 ; 17. ’A ui i te mau tamari’i e aha tā rātou e au nei nō ni’a ia Abinadi.
-
E au paha tā ’oe mau tamari’i ’ia ha’uti ta’ata ora i te tahi mau tuha’a o te ’ā’amu o Abinadi. I muri iho e ha’uti ta’ata ora rātou i te tahi mau ’ohipa i roto i te orara’a, nō te ha’api’ipi’i i te mea tā rātou e rave mai te mea e hina’aro vetahi ’ē ’ia rave rātou i te tahi ’ohipa hape. ’E ’aore rā e nehenehe rātou e fa’a’ite mai i te tahi ’ohipa ’a vai itoito ai rātou i te pe’era’a ia Iesu Mesia. ’Ua nāhea Abinadi i te pe’era’a ia Iesu Mesia ? (hi’o Mosia 13:2–9 ; 17:7–10). Nō te aha ’aita te ari’i o Noa i rave ai i te mea tāna i ’ite ē e mea tano ? (hi’o Mosia 17:11–12).
E ha’apa’o vau i nā ture hō’ē ’ahuru.
-
’Ua ’ite te mau tahu’a a te ari’i Noa i te mau fa’auera’a ’aita rā « i pāpa’ihia i roto i [tō rātou] ’ā’au » (Mosia 13:11). E nāhea ’oe ’ia tauturu i tā ’oe mau tamari’i ’ia ’ite i te mau fa’auera’a ’e ’ia here i te reira ? Pēnei a’e e nehenehe rātou e pāpa’i i te mau fa’auera’a i roto i te Mosia 12:33–36 ’e te 13:11–24, i ni’a i te tahi mau ’api parau hōho’a māfatu. ’Ia nā reira rātou, ’a parauparau ia rātou i te aura’a nō teie mau fa’auera’a ’e nāhea i te pe’e atu i te reira. Nāhea tātou i te pāpa’i i teie mau fa’auera’a i ni’a i tō tātou ’ā’au ?
-
E nehenehe ato’a e hīmene ʼāmui i te hōʼē hīmene nō niʼa i te mau fa’auera’a, mai te « Pour trouver la paix » (Chants pour les enfants, 68). E aha te mau ha’amaita’ira’a tei tae mai nā roto i te ha’apa’ora’a i te mau fa’auera’a ?
Tē ha’api’i nei te mau pāpa’ira’a mo’a ia tātou i te mau fa’auera’a a te Atua.
’Ua tono mai te Metua i te ao ra ia Iesu Mesia nō te fa’aho’i iā’u iāna ra.
-
Noa atu ē, e pene poto, e rave rahi ta’o ’e te ’īrava i roto i te Mosia 14 e fa’ata’a ra i te parau nō Iesu Mesia. Pēnei a’e e nehenehe ’oe ’e tā ’oe mau tamari’i e tāpura i te reira ’a tai’o ’āmui ai i te pene. I muri iho e parauparau nō ni’a i tō ’outou mana’o nō ni’a i te Fa’aora ’a tuatāpapa ai i teie mau ta’o ’e te mau ’īrava.
-
Nō te ha’api’i i te ta’ata nō ni’a ia Iesu Mesia, ’ua fa’ahiti Abinadi i te parau a peropheta Isaia, tei fa’aau ia tātou i te māmoe mo’e. Pēnei a’e e nehenehe tā ’oe mau tamari’i e fa’a’ite i te tahi ’ohipa i tupu ’a mo’e ai te hō’ē mea tā rātou, ’e ’aore rā ’a mo’e ai rātou iho. E aha te mana’o i tae mai i roto ia rātou ? E aha tā rātou i rave ? I muri mai ’a tai’o ’āmui i te Mosia 14:6 ’e te 16:4–9. Nāhea tātou e riro ai ’ei māmoe tei haere ’ē ? Nāhea Iesu Mesia i te tauturu ia tātou ’ia ho’i mai ?
Nō te tahi atu ā mana’o, ’a hi’o i te ve’a Hoa nō teie nei ’āva’e.
His Face Shone with Exceeding Luster [’Ana’ana ihora tōna mata i te ’ana’ana rahi roa], nā Jeremy Winborg