“4–10 Maj: ‘Mifala I Glad long Kraes.’ 2 Nifae 20–25,” Kam Folem Mi—Blong Hom mo Jos: Buk blong Momon 2024 (2024)
“4–10 Maj. 2 Nifae 20–25,” Kam Folem Mi—Blong Hom mo Jos: 2024 (2024)
4–10 Maj: “Mifala I Glad long Kraes”
2 Nifae 20–25
Insaed long ol raeting blong Aesea, i gat ol strong woning, be oli givim tu hop mo glad. Hemia nao wan risen from wanem Nifae i putum insaed long rekod blong hem: “Mi raetem sam long toktok blong Aesea,” hem i talem, “blong mekem se evri man … we oli luk ol toktok ia bae oli save leftemap hat blong olgeta mo glad from evri man” (2 Nifae 11:8). Long wan wei, invitesen ia blong ridim ol raeting blong Aesea, i wan invitesen blong stap glad. Yu save stap glad, semmak olsem Nifae, long ol profesi blong Aesea long saed blong kam tugeta blong Isrel, taem ia we bae Mesaea i kam, mo pis blong taosen yia we i kam olsem promes long olgeta we oli stret mo gud. Yu save stap glad blong laef long wan dei we oli profesae from taem we Lod “bae i leftemap wan flag blong ol kantri, mo bae i karem i kam tugeta olgeta we oli bin sakemaot long Isrel” (2 Nifae 21:12). Taem yu tosta from stret mo gud fasin, yu save “wetem glad … kasem wota aot long ol wel blong fasin blong sevem man” (2 Nifae 22:3). Long nara toktok, yu save “glad long Kraes” (2 Nifae 25:26)
Ol Tingting blong Stap Lan long Hom mo long Jos
Mi save faenem pis long Jisas Kraes
Ol pikinini blong Lihae oli gat wan problem wetem fasin blong raorao. Problem ia i kam moa nogud wetem ol fiuja jeneresen, we i lidim olgeta blong oli seraot, go long kalabus, fulap sore, mo prapa spolem olgeta. Mo fasin blong raorao i gohed blong stap wan problem tedei.
Wetem evri samting ia long maen, tingbaot ol profesi long 2 Nifae 21–22. Tingting long hao Sevya i fulfilim ol profesi ia. ?Profesi ia se wael dog tu bae i “stap wetem smol sipsip” i minim wanem long yu? (2 Nifae 21:6). Tingting hevi long wanem yu save mekem blong stap wan man blong putum pis.
Luk long Dale G. Renlund, “Pis blong Kraes I katemaot Nogud Filing Agensem Man,” Liahona, Nov. 2021, 83–85.
Lod bae i karem ol pipol blong Hem oli kam tugeta.
Nifae mo famli blong hem oli bin ol witnes long haos blong Isrel we i seraot (luk long 2 Nifae 25: 10). Naoia yu save tekpat long kam tugeta blong Isrel (luk long 2 Nifae 21:12). Taem yu stap ridim 2 Nifae 21:9–12, tingbaot olsem wanem yu save help blong fulfilim ol profesi we ol ves ia i stap tokbaot.
Eksampol, taem yu rid abaot “flag” (standet o bana) we bae oli leftemap blong karem i kam ol pipol blong God i kambak, tingbaot hao yu luk God i karem ol pipol blong Hem i kam, long saed blong mit mo bun, mo long saed blong spirit. ?Wanem nao i pulum tingting blong ol pipol i go long Lod mo long Jos blong Hem?
?Wanem nao yumi filim wetem insperesen blong go mo mekem blong pulum tugeta ol pipol blong God?
Ol rij samting blong Babilon bae i foldaon.
Kingdom blong Babilon i bin wan strong ples blong politik mo militeri atak blong olfala Isrel. Be long ol pipol blong Nifae—mo long yumi tedei—bigfala atak hem i wanem we Babilon i ripresentem: ol samting blong wol mo sin. Tingting long hao ol woning long 2 Nifae 23–24 i save spolem ol pipol we oli fraet o laekem tumas o trastem ol rij samting mo paoa blong Babilon (eksampol luk long 23:6–9, 11, 19–22; 24:10–19). ?Wanem sam samting we i semmak we i mekem yumi fraet o laekem tumas o trastem tedei? ?Wanem nao yu filim abaot mesej blong Sevya i go long yu long ol japta ia? Tingbaot hao yu save soem se yu “glad long [Lod] se hem i hae” (2 Nifae 23:3).
“Mifala i tokbaot Kraes … mifala i glad long Kraes.”
Nifae i bin open blong stap serem ol bilif blong hem—speseli testemoni blong hem abaot Jisas Kraes. Truaot long stadi blong yu long 2 Nifae 25, tingbaot wanem we Nifae i wantem tumas, blong “winim tingting blong ol pikinini blong [hem] … blong oli biliv long Kraes, mo blong oli stretem olgeta wetem God” (ves 23). ?Wanem nao Nifae i wantem ol pipol blong oli save abaot Sevya? (luk long ol ves 12–13, 16). Olsem wanem Nifae i traem blong winim tingting blong ol pipol blong bilivim Hem? (Luk long ol ves 19–29). Makem ol sentens long japta ia we i winim yu blong bilivim long mo folem Jisas Kraes.
Sam long yumi bae i no filim strong olsem Nifae abaot fasin blong stap tokbaot Kraes. Be ating yu save faenem wan samting long ol tijing blong Nifae long 2 Nifae 25:23–26 we i givim insperesen long yu blong tokbaot Hem wetem ol nara man wetem wan open hat. Eksampol, long toktok blong Nifae “Yumi glad long Kraes” maet i givim wan filing long yu blong tingbaot hao Sevya i givim glad long yu—mo hao yu save serem glad ia wetem ol narafala wan.
Long mesej ia “Yumi Toktok abaot Kraes” (Liahona, Nov. 2020, 88–91), Elda Neil L. Andersen i givim tingting long hao yumi save toktok wetem open hat abaot Kraes long ol defren ples. ?Wijwan long ol tingting blong hemia, i kamaot moa long yu? ?Wanem janis yu gat blong toktok abaot Kraes wetem ol narafala man?
?Wanem nao yu filim tru insperesen blong talem long ol narafala man abaot Jisas Kraes? Sapos yu nidim sam tingting, yu save lukluk long “Kraes we I Laef: Testemoni blong Olgeta Aposol” (ChurchofJesusChrist.org/study?lang=bis). Wan hym olsem “I Believe in Christ” (Hymns, no. 134) i save givim yu moa tingting.
Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Jisas Kraes bae i jaj wetem stret mo gud fasin.
-
Blong helpem ol pikinini blong yu i pikjarem ol ves ia, luk sapos yu save faenem wan tri we oli jes katemdaon o wan branj we i gru aot long wan tri (o yusum pikja andanit ia) Sapos “branj” ia long 2 Nifae 21:1 i ripresentem Jisas Kraes, wanem nao ol ves 2–5 i tijim yumi abaot Hem?
Jisas Kraes i givim pis mo glad.
-
?Wanem nao 2 Nifae 21:6–9 i tijim abaot wanem we i save hapen taem evriwan i folem Sevya? (luk tu long 4 Nifae 1:15–18). ?Olsem wanem nao yumi save mekem hom blong yumi i kam moa olsem ia? Ol pikinini blong yu, maet oli glad blong stap lukluk long ol pikja blong ol animol we oli tokbaot long ol ves 6–7—ol animol we oli no laeklaekem olgeta bakegen be oli no save mekem nogud long olgeta bakegen taem Jisas bae i kambak bakegen (luk long aktiviti pej long wik ia). Ol pikinini blong yu oli save droem ol pikja blong olgetawan mo ol animol ia oli stap kwaet long pis wetem Jisas.
Lod bae i karem ol pipol blong Hem oli kam tugeta.
-
Aesea i talem se Lod bae i sendem wan “flag i go long ol kantri” blong helpem karem i kam ol pipol blong Hem (luk long 2 Nifae 21:11–12). Helpem ol pikinini blong yu blong andastanem se wan ensaen i olsem wan flag. Ating bae oli glad blong droem flag blong olgetawan. Oli save gat ol pikja o ol toktok we i ripresentem ol risen we i mekem oli kam long Jisas Kraes mo long Jos blong Hem. Letem olgeta oli tokabaot ol flag blong olgeta, mo helpem olgeta blong tingbaot hao oli save helpem ol narafala man blong “kam tugeta” long Jisas Kraes.
-
Afta riding 2 Nifae 22:4–5 tugeta, maet yu toktok wetem ol pikinini abaot sam long “ol gudfala samting” we Lod i bin mekem. ?Wanem sam long ol samting we Lod i “mekem long medel blong [yumi]” we yumi save talemaot? Blong helpem ol pikinini blong yu i tingbaot kwestin ia, maet yu wantem blong singsing tugeta wan singsing abaot Sevya, olsem “I Believe in Christ” (Hymns, no. 134). Yufala i save givim taem long wanwan blong komplitim wan sentens olsem hemia: Mi biliv long Kraes; Hem .” ?Olsem wanem yumi save helpem ol nara man i save abaot wanem Sevya i mekem blong yumi?
“Mifala i glad long Kraes”
-
?Olsem wanem nao yu save helpem ol pikinini blong yu blong “stap glad long Kraes”? Ating yu save talem wan stori abaot Jisas Kraes we i stap mekem ol nara man i glad, o yu save soem wan vidio olsem “Jesus Heals a Man Born Blind” o “Suffer the Little Children to Come unto Me” (Gospel Library). Ol pikinini blong yu i save poenemaot ol pat long stori o vidio ia we oli glad o hapi. Afta, taem yu rid tugeta 2 Nifae 25:26, bae oli save tokbaot from wanem oli stap “glad long Kraes.”
Testifae abaot Kraes. ?No tingting se famli blong yu i save hao yu filim abaot Sevya? Talem long olgeta, mo letem ol filing blong yu abaot Sevya bae i jenisim olgeta long wei we bae yu mitim olgeta.
Blong moa tingting, lukaotem namba blong manis ia blong Fren magasin.
Talem Se Mi Redi blong Go, Masta, i kam long Ramon Ely Garcia Rivas