«Մորոնի 6. Մասնակցեք և ծառայեք Տիրոջ Եկեղեցում», Մորմոնի Գիրք. Ուսուցչի ձեռնարկ (2024 թ․)
«Մորոնի 6», Մորմոնի Գիրք. Ուսուցչի ձեռնարկ
Մորոնի 6
Մասնակցեք և ծառայեք Տիրոջ Եկեղեցում
Մենք՝ որպես Քրիստոսի Եկեղեցու մկրտված անդամներ, բազմաթիվ եղանակներով Եկեղեցում մասնակցելու և ծառայելու հնարավորություններ ունենք: Մորոնի 6 գլխում Մորոնին շարունակեց իր ցուցումները՝ Եկեղեցին ամրացնելու և կառուցելու համար: Այս դասը կօգնի ձեզ ուժեղացնել ուրիշներին ծառայելու և Փրկչին հետևելու ձեր ձգտումը՝ որպես Հիսուս Քրիստոսի Վերջին Օրերի Սրբերի Եկեղեցու անդամ։
Ձգտեք լինել ուրիշներին սիրելու օրինակ: Փրկիչը հետևողականորեն ցույց է տվել Իր անկեղծ հոգածությունը յուրաքանչյուր մարդու հանդեպ: Երբ դուք ձեր ուսանողների հանդեպ զարգացնեք սիրո և հարգանքի ոգին, ձեր քրիստոսանման օրինակն իրենց կոգեշնչի գնահատել միմյանց: Ուսանողներին հորդորեք զորացնել միմյանց և լավը փնտրել յուրաքանչյուրի մեջ:
Ուսանողի նախապատրաստում․ ուսանողները կարող են կիսվել, թե ինչպես կարող են Եկեղեցու բոլոր անդամները զորացնել միմյանց, նույնիսկ առանց պաշտոնական կոչման ծխում կամ ճյուղում:
Հնարավոր ուսումնական վարժություններ
Քրիստոսի եկեղեցու անդամներ
Կարող եք ցուցադրել Եկեղեցու ժողովի նկարը և քննարկել այն բազմաթիվ պատճառները, որոնցով մարդիկ ընտրում են Փրկչի Եկեղեցու անդամ լինել։
Հետևյալ վարժությունը կատարելու համար կարող եք գրատախտակին նկարել մարդու պատկեր, որպեսզի ուսանողները կարողանան ամբողջ դասարանով կատարել վարժությունը:
Ձեր ուսումնական օրագրում կամ առանձին թղթի վրա գիծ քաշեք, որը կբաժանի էջը երկու մասի։ Առաջին կեսում նկարեք մարդու պատկեր, որը խորհրդանշում է Փրկչի Եկեղեցու անդամին: Մարդու պատկերը մեծ նկարեք, որպեսզի դրա ներսում կարողանաք գրել: Ձեր նկարած պատկերի ներսում գրեք երկու կամ երեք բան, որ դուք արել եք կամ ցանկանում եք անել՝ Եկեղեցում մկրտությանը նախապատրաստվելու համար: Ամբողջ դասի ընթացքում կարող եք պատկերի ներսում ավելացնել ձեր գրառումների ցանկը։
Մորոնի 6 գլխում Մորոնին շարունակեց Եկեղեցու կառուցման և նրա անդամներին զորացնելու մասին իր ուսմունքները: Այս գլխում մենք իմանում ենք մեր բազմաթիվ դերերի և հնարավորությունների մասին՝ Տիրոջ աշխատանքն Իր Եկեղեցում իրականացնելու համար:
Կարդացեք Մորոնի 6.1–3 հատվածները՝ փնտրելով Մորոնիի ուսմունքներն այն մասին, թե ինչպես կարող է մարդը ցույց տալ իր պատրաստվածությունը՝ Քրիստոսի Եկեղեցում մկրտվելու համար: Ձեր նկարած մարդու պատկերի մեջ ավելացրեք այն, ինչ գտնում եք:
-
Ըստ ձեզ, ինչպե՞ս են այս գործողությունները և մոտեցումները նախապատրաստում մարդուն մկրտության:
Մորոնին ուսուցանել է, որ մկրտվելուց հետո մենք «համարվում ենք Քրիստոսի եկեղեցու ժողովրդի շարքում» (Մորոնի 6.4): Մենք մասնակից ենք դառնում մի եկեղեցական կազմակերպության, որի նպատակն է զորացնել և ամրացնել մեզ որպես Հիսուս Քրիստոսի աշակերտներ: Շարունակելով ուսումնասիրել Մորոնի 6 գլուխը՝ մտածեք, թե ինչպես կարող եք ծառայել և զորացնել ուրիշներին որպես Հիսուս Քրիստոսի Վերջին Օրերի Սրբերի Եկեղեցու մկրտված անդամ:
Հնարավորություններ և պարտականություններ
Ձեր նկարած պատկերի շուրջ գրեք Եկեղեցու անդամների կարիքներից, հույսերից կամ ցանկություններից մի քանիսը:
Ուսանողներին օգնեք հասկանալ, որ ճանաչելով այս կարիքներն իրենց և ուրիշների մեջ, իրենք կարող են դասեր քաղել Մորոնիի հաջորդ ուսմունքներից: Նրբանկատ եղեք և վստահեցրեք ուսանողներին, որ իրենք կարող են չկիսվել իրենց գրածով: Նրանց բավականաչափ ժամանակ հատկացրեք՝ իրենց նկարած պատկերի մեջ մի քանի գաղափար գրելու համար:
Գրատախտակին գրեք հետևյալ անավարտ ճշմարտությունը՝ տեղ թողնելով, որպեսզի ուսանողները մի քանի եղանակով ավարտեն այդ ճշմարտության խոսքերը:
Ձեր թղթի կամ օրագրի էջի մյուս կեսում գրեք հետևյալ անավարտ ճշմարտությունը. Լինելով Փրկչի Եկեղեցու անդամ՝ մենք կարող ենք օգնել և զորացնել միմյանց, երբ …
Ուսումնասիրեք Մորոնի 6.4–9 հատվածները՝ փնտրելով մի քանի եղանակ, որոնցով կարող եք ավարտել այդ ճշմարտության խոսքերը: Ձեր թղթի վրա գրեք տարբեր պնդումներ: Օգտակար կլինի իմանալ, որ սնուցել նշանակում է աջակցել կամ խրախուսել աճը:
Ուսանողները կարող են ավարտել արտահայտությունը մի քանի եղանակով, ներառյալ հետևյալը.
-
հիշենք Եկեղեցու մյուս անդամներին (հատված 4)։
-
հոգևոր առումով սնուցենք միմյանց Աստծո բարի խոսքով (հատված 4)։
-
հոգ տանենք և աղոթենք միմյանց համար (հատված 4)։
-
օգնենք միմյանց ապավինել Փրկչին և Նրա Քավությանը (հատված 4):
-
հաճախ հավաքվենք՝ միասին ծոմ պահելու և աղոթելու համար (հատված 5):
-
զորացնենք միմյանց հոգևոր առումով (հատված 5):
-
ընդունենք հաղորդությունը՝ ի հիշատակ Հիսուս Քրիստոսի (հատված 6):
-
ներենք ուրիշներին, երբ նրանք ապաշխարեն (հատվածներ 7–8):
-
ուսուցանենք և աղոթենք Սուրբ Հոգու զորությամբ (հատված 9):
Կարող եք օգտագործել հետևյալ հարցերից մի քանիսը, որպեսզի օգնեք ուսանողներին հասկանալ յուրաքանչյուր պարտականությունը և մտածել, թե ինչպես այն իրականացնել: Սա կարող է հարմար ժամանակ լինել՝ առաջարկելու ուսանողներին կիսվել ուսանողի նախապատրաստմանն ուղղված իրենց գաղափարներով:
-
Այս գործողություններից ո՞րն է ձեզ ավելի հեշտ թվում: Ո՞րը կարող է դժվար լինել: Ինչո՞ւ։
-
Ինչպիսի՞ն կարող են լինել այս գործողությունները ձեր դասարանում կամ քվորումում:
-
Ինչպե՞ս կարող են այս ճշմարտությունների վրա հիմնված գործողություններն օգնել ձեզ հոգալ ձեր կարիքները:
Տվեք և ստացեք
Օգտակար կլինի ուսանողին ցուցադրել հետևյալ խոսքերը՝ բարձրաձայն կարդալու համար:
Երիտասարդ կանանց նախկին գերագույն նախագահ Բոննի Լ. Օսկարսոնը նկատել է.
Մենք պարզապես վերցնողներ ու տվողներ չենք այն ամենի, ինչն առաջարկվում է Եկեղեցում, մենք պիտի լինենք տվողներ և հոգացողներ: Երիտասարդ տղամարդիկ և երիտասարդ կանայք, հաջորդ անգամ, երբ դուք գնաք [երիտասարդական միջոցառման], ձեր հեռախոսը վերցնելու փոխարեն, որպեսզի տեսնեք, թե ձեր ընկերներն ինչով են զբաղված, կանգ առեք, նայեք ձեր շուրջը և հարցրեք ինքներդ ձեզ. «Այսօր իմ կարիքն ո՞վ ունի»: Դուք կարող եք լինել այն բանալին, որը կհասնի և կազդի հասակակիցների կյանքի վրա կամ կքաջալերի ընկերոջը, որը լուռ մաքառում է:
Խնդրեք ձեր Երկնային Հորը ցույց տալ շրջապատի այն մարդկանց, ովքեր ունեն ձեր կարիքը և ոգեշնչի ձեզ, թե ինչպես լավագույնս ծառայել նրանց: Հիշեք, որ Փրկիչը շատ հաճախ ծառայում էր նրանց մեկ առ մեկ: (Բոննի Լ. Օսկարսոն, «Կարիքները մեր առջև են», Ensign կամ Լիահոնա, նոյեմբեր 2017 թ․, 26)
-
Ըստ ձեզ, ի՞նչն է կարևոր հիշել քույր Օսկարսոնի խորհրդից և ինչու:
-
Ե՞րբ եք գործողության մեջ տեսել Մորոնիի ուսուցանած ճշմարտությունները: Ինչպե՞ս է փոփոխվել ուրիշների կյանքն այս ճշմարտությունների համաձայն գործելու արդյունքում:
-
Ինչպե՞ս կարող է Մորոնիի խորհրդին հետևելն օգնել ձեզ ավելի նմանվել Փրկչին:
Մորոնիի խորհուրդը կիրառած երիտասարդ կնոջ մի օրինակ տեսնելու համար կարող եք դիտել «Աչքեր՝ տեսնելու համար» տեսանյութի 4:55-6:55-ը հատվածը՝ ChurchofJesusChrist.org կայքում։
Տեսանյութը ցուցադրելիս կարող եք քննարկել, թե ինչպես է երիտասարդ կինը կիրառում Մորոնիի խորհուրդը և հետևում Փրկչի օրինակին:
Իմ հաջորդ քայլերը
Ուսանողներին բավարար ժամանակ տվեք, որպեսզի խորհեն և օրագրերում գրի առնեն իրենց տպավորությունները։ Եթե ժամանակը ների, մի քանի պատրաստակամ ուսանողի առաջարկեք դասարանի հետ կիսվել իրենց գաղափարներով:
Մի պահ խորհեք, թե ինչ եք սովորել և զգացել այսօր: Այնուհետև պատկերացրեք, թե ինչպես եք դուք գնում Եկեղեցու հաջորդ ժողովին կամ միջոցառմանը: Ըստ ձեզ, Փրկիչն ի՞նչ կցանկանար, որ դուք անեիք: Կարող եք ձեր օրագրում նշումներ անել, որոնք կօգնեն ձեզ հիշել ձեր ստացած ուղղորդումը:
Կարող եք նաև ցանկանալ աղոթքով դիմել Երկնային Հոր օգնությանը, որպեսզի իմանաք, թե ով ունի ձեր ուշադրության և օգնության կարիքը: Խնդրեք Նրան օգնել ձեզ իմանալ, թե ինչ կարող եք անել Եկեղեցու մյուս անդամների մասին հոգ տանելու համար այնպես, ինչպես Փրկիչը կաներ: