Վարդապետության սերտում. Եթեր 12․6

«Նախքան ձեր հավատքի փորձությունը դուք վկայություն չեք ստանում»:

երկու երիտասարդ կին քննարկում են

Երբ ուսումնասիրում էիք Եթեր 12.1–22 հատվածները, դուք սովորեցիք, թե ինչպես հավատք գործադրել Հիսուս Քրիստոսի և Նրա ավետարանի հանդեպ՝ նախքան ճշմարտության մասին հոգևոր վկայություն ստանալը (տես Եթեր 12.6 հատվածը): Այս դասը կօգնի ձեզ մտապահել Եթեր 12․6 հատվածի վարդապետության սերտման հղումն ու հիմնական սուրբգրային արտահայտությունը, բացատրել այս հատվածում ուսուցանվող վարդապետությունը և իրատեսական իրավիճակներում կիրառել հոգևոր գիտելիքներ ձեռք բերելու սկզբունքները։

Ուսանողներին հորդորեք օգտագործել հոգևոր գիտելիքներ ձեռք բերելու սկզբունքները: Երբ ուսանողներն ավելի լավ տիրապետեն հոգևոր գիտելիքներ ձեռք բերելու սկզբունքներին, նրանք ավելի բնական եղանակով դրանք կկիրառեն իրենց ունեցած խնդիրների համար: Հետևողական և ստեղծագործ եղեք, երբ առաջարկում եք նրանց վերանայել սկզբունքները տարբեր եղանակներով:

Ուսանողի նախապատրաստում․ ուսանողներին առաջարկեք փնտրել սուրբ գրությունների հատվածներ, որոնք կարող են օգնել մարդուն հավատք գործադրել առ Հիսուս Քրիստոս: Սուրբ գրություններ գտնելու համար նրանք կարող են որոնել «Հավատք» թեման Սուրբ գրքերի ուղեցույցում կամ Թեմաների ուղեցույցում։

Հնարավոր ուսումնական վարժություններ

Վարդապետության սերտման այս հատվածի դասը նախատեսված է անցկացնել «Եթեր 12․1–22» դասից հետո, որը Եթեր 12․6 վարդապետության սերտման հատվածի ուսումնասիրման համատեքստային դասն է։ Եթե վարդապետության սերտման այդ դասն անհրաժեշտ է տեղափոխել մեկ այլ շաբաթ, համոզվեք, որ այդ շաբաթ կուսուցանվի նաև համապատասխան համատեքստային դասը:

Բացատրեք և մտապահեք

Նախորդ դասի ընթացքում Եթեր 12.6 հատվածից դուք սովորեցիք հետևյալ ճշմարտությունը․ եթե մենք ցանկանում ենք հոգևոր վկայություն ստանալ, ապա նախ պետք է հավատք գործադրենք առ Հիսուս Քրիստոս և Նրա ավետարանը:

Ուսանողներին առաջարկեք Եթեր 12.6 հատվածի ուսմունքները բացատրել դասընկերոջը: Քննարկման համար ուսանողներին ցուցադրեք հետևյալ հարցադրումը:

• Ի՞նչ խորհուրդ է տրվում Եթեր 12.6 հատվածում նրանց, ովքեր անպատասխան հարցեր ունեն կամ դեռ «չեն տեսնում» ճշմարտությունը:

Ուսանողներին օգնեք մտապահել Եթեր 12.6 հատվածի հղումն ու հիմնական սուրբգրային արտահայտությունը: Հետևյալը դա անելու եղանակներից մեկն է:

Նախագահ Էզրա Թաֆտ Բենսոնը (1899–1994) ուսուցանել է, որ յուրաքանչյուր մարդ, ի վերջո, հենված է հավատքի պատին և պետք է իր տեղը գտնի այնտեղ (տես «Մորմոնի Գիրքն Աստծո խոսքն է», Ensign, մայիս 1975, 65): Այլ կերպ ասած, բոլորն իրենք իրենց հավատքով պետք է որոշեն հավատալ և իմանալ ճշմարտությունը:

Նկարեք նկար, որտեղ մի մեծ պատ է պատկերված որի առջև կանգնած եք դուք: Օգտագործեք «հավատքի պատը», որպեսզի մտապահեք Եթեր 12.6 հատվածի հղումը և հիմնական սուրբգրային արտահայտությունը: Ձևավորեք ձեր պատը՝ վերևում գրելով «Եթեր 12.6», ապա մի քանի անգամ պատին գրեք «Նախքան ձեր հավատքի փորձությունը դուք վկայություն չեք ստանում»: Երբ ձեր պատի ամբողջ տարածքը լցված կլինի հիմնական սուրբգրային արտահայտությամբ, փորձեք մի քանի անգամ բարձրաձայն ասել այն՝ առանց նայելու:

Գործնական կիրառում

Նախքան գործնական կիրառման վարժությունը սկսելը՝ մտածեք ստեղծագործական եղանակներ, որոնք կօգնեն ուսանողներին սովորել և կրկնել հոգևոր գիտելիքներ ձեռք բերելու սկզբունքները: Այդ վարժությունները պարբերաբար կատարելը կօգնի նրանց հաջողությամբ կիրառել այս սկզբունքները:

Դա անելու եղանակներից մեկն է՝ գրատախտակին գրել հոգևոր գիտելիքներ ձեռք բերելու բոլոր երեք սկզբունքները: Այնուհետև պատահական հերթականությամբ յուրաքանչյուր սկզբունքից գրեք գաղափարներ կամ հասկացություններ և ուսանողներին առաջարկեք համապատասխանեցնել գաղափարները ճիշտ սկզբունքներին:

Ուսանողների հետ կիսվեք հետևյալ սցենարով կամ մտածեք նույն նպատակն ունեցող ձեր սեփական սցենարի մասին։

Քրիստիանան և Նիսետան լավ ընկերներ են: Քրիստիանան Հիսուս Քրիստոսի Վերջին Օրերի Սրբերի Եկեղեցու անդամ է: Նա ջանում է օրինակ լինել Նիսետայի համար, որը չի հավատում կազմակերպված կրոնին: Նիսետան հաճախ կասկածի տակ է դնում Քրիստիանայի համոզմունքները և զարմանում է, թե նա ինչու է կիրակի օրը հաճախում եկեղեցի, վճարում տասանորդը, ապրում Իմաստության խոսքով և համեստ հագնվում:

Քրիստիանան Նիսետային բացատրում է, որ զգում է, որ այն պատվիրաններն ու չափանիշները, որոնցով նա ապրում է, ճշմարիտ են և ուղարկված են Աստծուց: Նիսետան սիրալիր պատասխանում է. «Ինչպե՞ս կարող ես ասել, որ գիտես, թե այս ամենը ճշմարիտ է: Ինչպե՞ս կարող ես իմանալ, որ այն, ինչ դու չես կարող տեսնել, ճիշտ է»:

Ուսանողներին կարող եք բաժանել փոքր խմբերի և առաջարկել նրանց քննարկել, թե այս իրավիճակում ինչպես կարող են օգտագործել Եթեր 12.6 հատվածը և հոգևոր գիտելիքներ ձեռք բերելու սկզբունքները։ Ուսանողներին հիշեցրեք, որ վարդապետության սերտման գործնական կիրառման սցենարները հնարավորություն են տալիս իրենց կիրառել հոգևոր գիտելիքներ ձեռք բերելու սկզբունքները: Նրանց գաղափարներն ու պատասխանները հղկված կամ կատարյալ լինելու կարիք չունեն:

Ուսանողներին կարող եք առաջարկել սկսել իրենց քննարկումը հետևյալ հարցերով. «Հոգևոր գիտելիքներ ձեռք բերելու ո՞ր սկզբունքներից կսկսեիք օգնել ձեր ընկերոջը: Ինչո՞ւ»: Օգտակար կլինի նաև, որ իրենց քննարկման ընթացքում ուսանողներն անդրադառնան հետևյալ հարցերին։

Քննեք հասկացություններն ու հարցերը հավերժության հեռանկարից

• Ինչպե՞ս կցանկանայիք օգնել Նիսետային ավելի լավ հասկանալ ճշմարտությունները կամ հասկացությունները: Ինչո՞ւ։

• Ի՞նչով կարող եք կիսվել Նիսետայի հետ Տիրոջ մասին և այն մասին, թե նա ինչպես է աշխատում մեզ հետ:

Ձգտեք մեծացնել հասկացողությունը աստվածայնորեն սահմանված աղբյուրների միջոցով

• Եթեր 12.6 հատվածի ո՞ր ուսմունքները կարող են օգնել այս իրավիճակում: Ինչո՞ւ։

  Ուսանողներին օգտակար կլինի տեսնել Եկեղեցու ղեկավարի համապատասխան խոսքերը, օրինակ՝ քույր Բոնի Լ. Օսկարսոնի խոսքերը նախորդ դասի «Բացատրական և պատմական տեղեկություններ» բաժնից:

• Որո՞նք են սուրբ գրությունների այն լրացուցիչ հատվածները կամ Եկեղեցու ղեկավարների խոսքերը, որոնք կարող են օգնել և առաջնորդել Նիսետային:

Գործեք հավատքով

• Հիսուս Քրիստոսի հանդեպ հավատք գործադրելու ի՞նչ փորձառություններ եք ունեցել դուք կամ ուրիշները: Նիսետայի հետ այս ամենով կիսվելն ինչպե՞ս կօգնի նրան գործել հավատքով:

• Ինչպիսի՞ գործողություններ խորհուրդ կտայիք անել Նիսետային, որպեսզի նա սկսի գործել հավատքով:

Երբ ուսանողներն ավարտեն իրենց քննարկումները, առաջարկեք մի քանիսին կիսվել, թե ինչպես են իրենք արձագանքել և ինչ են սովորել իրենց փորձառությունից:

Կարող եք ուսանողների հետ քննարկել, թե ինչպես կարող է այս վարժությունն օգտակար լինել իրենց հիմա և ապագայում: Օրինակ՝ կարող եք առաջարկել ուսանողներին մտածել ներկա կամ ապագա այնպիսի իրավիճակների մասին, երբ Եթեր 12.6 հատվածի ուսմունքները և հոգևոր գիտելիքներ ձեռք բերելու սկզբունքները կարող են օգնել իրենց կամ ուրիշներին անցնել հավատքի փորձության միջով և ի վերջո ճշմարտության մասին վկայություն ստանալ:

Վարդապետության սերտման կրկնություն

Առաջիկա դասի ընթացքում գրատախտակին նկարեք պատի նկար, որի դիմաց կանգնած է մի մարդուկ: Ուսանողներին առաջարկեք հիշել, թե վարդապետության սերտման որ հղումն է առնչվում նկարի հետ (Եթեր 12.6), և հորդորեք նրանց ընկերակցի հետ արտասանել հիմնական սուրբգրային արտահայտությունը: Հիմնական սուրբգրային արտահայտությունն է՝ «Նախքան ձեր հավատքի փորձությունը դուք վկայություն չեք ստանում»: