Ether 12:1–22

Pagdawat og Saksi sa Kamatuoran

batan-ong mga babaye nga nagtuon sa ebanghelyo

Unsa ang nakatabang kanimo sa imong mga paningkamot sa pagkat-on sa espirituhanong kamatuoran? Human sa pagdetalye sa daghang katuigan sa kasaysayan sa Jaredite, gipaila ni Moroni ang pangalagad ni propeta Ether. Gipakigbahin dayon ni Moroni ang pipila ka mga panalangin nga moabot gikan sa pagpakita og hugot nga pagtuo kang Jesukristo, lakip kon sa unsang paagi nga ang pagsulay sa atong hugot nga pagtuo makatabang kanato nga makadawat og saksi sa kamatuoran. Kini nga leksiyon gituyo aron sa pagtabang kanimo sa paggamit sa hugot nga pagtuo aron makadawat og espirituhanong pagsaksi sa kamatuoran.

Andama ang imong kaugalingon sa pagtudlo. Tungod kay ang Espiritu nagpamatuod sa kamatuoran ug mao ang tinubdan sa pagkakabig, ang gamhanang mga magtutudlo sa ebanghelyo taudtaod nga nag-andam sa ilang kaugalingon sa espirituhanong paagi sa dili pa sila motudlo. Dapita ang Espiritu Santo ngadto sa imong pagpangandam sa leksiyon pinaagi sa sinsero nga pag-ampo, ug tinguhaa ang pagsunod sa Iyang giya samtang magpunting ka sa pagtudlo sa doktrina ug mga baroganan.

Pagpangandam sa estudyante: Dapita ang mga estudyante sa paghunahuna og mga ehemplo gikan sa mga kasulatan diin ang matinud-anon nga mga binuhatan misangpot sa espirituhanong mga pagsaksi, mga panalangin, o mga tubag gikan sa Dios.

Mga Posibleng Kalihokan sa Pagkat-on

“Giunsa nimo pagkahibalo?”

Si Sister Rebecca L. Craven, Ikaduhang Magtatambag sa Kinatibuk-ang Kapangulohan sa Young Women, mipakigbahin sa mosunod nga kasinatian nga iyang nasinati samtang nakigsulti sa usa ka batan-ong babaye:

Sister Rebecca L. Craven

Ako adunay nindot nga kasinatian uban sa usa ka pinalangga nga batan-ong babaye nga sinsero kaayo og pangutana: “Sister Craven, giunsa nimo pagkahibalo nga ang bisan unsa mahitungod sa Simbahan tinuod? Tungod kay ako walay gibati.”

Sa wala pa motubag, ako nangutana una niya og pipila ka pangutana. “Sultihi ko bahin sa imong personal nga pagtuon sa kasulatan.”

Siya mitubag, “Wala ko magbasa sa mga kasulatan.”

Ako nangutana, “Kumusta man ang imong pamilya? Nagdungan ba mo sa pagtuon sa Dali, Sunod Kanako?”

Miingon siya, “Wala.”

Ako nangutana mahitungod sa iyang mga pag-ampo: “Unsa man ang imong bation kon mag-ampo ka?”

Ang iyang tubag: “Wala ko mag-ampo.” (Rebecca L. Craven, “Buhata Unsay Labing Mahinungdanon,” Liahona, Mayo 2022, 62)

• Base sa imong mga kasinatian, unsay imong masulti aron matabangan kining batan-ong babaye?

Human mahisgoti sa mga estudyante ang miaging pangutana, dapita sila sa pagpakigbahin og mga ehemplo sa piho nga mga kamatuoran nga tingali gikinahanglan sa mga tawo nga pangitaan og espirituhanong saksi. Isulat ang ilang mga tubag diha sa pisara. (Ang mga tubag mahimong maglakip og saksi nga ang Basahon ni Mormon tinuod, nga ang pagpuyo og malimpyo ug maligdong nga kinabuhi importante, o nga ang Pulong sa Kaalam usa ka balaod sa Dios.)

Paghunahuna og espirituhanong mga kamatuoran nga gusto nimong makadawat og espirituhanong saksi o mas lig-on nga pagpamatuod. Ikonsiderar ang pagsulat niini diha sa imong journal sa pagtuon. Samtang magtuon ka karon, pangitaa ang mga pagtulun-an nga makatabang kanimo nga makaangkon og espirituhanong pagsaksi o makapalig-on sa imong pagpamatuod.

“Pagsulay sa inyong hugot nga pagtuo”

Samtang si Moroni nagpadayon sa pagpamubo sa rekord sa mga Jaredite, iyang gipaila ang pangalagad ni propeta Ether. Bisan pa sa pagkahimugso ngadto sa pagkabihag ug sa pagpuyo uban sa mga tawo kinsa misalikway sa mga propeta (tan-awa sa Ether 11:20–23), si Ether nagpuyo og matarong nga kinabuhi ug gitawag sa Dios nga mahimong propeta.

Basaha ang Ether 12:2–5, mangita kon sa unsang paagi gidawat sa mga Jaredite ang pagsangyaw ni Ether.

• Ngano nga ang mga tawo nagdumili sa pagtuo sa mga pulong ni Ether?

Basaha ang Ether 12:6, mangita sa unsay gitudlo ni Moroni kon sa unsang paagi kita makabaton og espirituhanong pagsaksi sa kamatuoran.

Ang Ether 12:6 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Si Elder Richard G. Scott (1928–2015) sa Korum sa Napulog Duha ka Apostoles mipakigbahin og usa ka kahulogan sa hugpong sa mga pulong nga pagsulay sa inyong hugot nga pagtuo:

Elder Richard G. Scott

Makakat-on kamo sa paggamit sa hugot nga pagtuo nga mas epektibong paagi pinaagi sa paggamit niini nga baroganan nga gitudlo ni Moroni: “Ang hugot nga pagtuo mao ang mga butang nga gilaoman ug dili makita; busa, ayaw pakiglalis tungod kay kamo wala makakita, kay kamo dili makadawat og saksi hangtod human sa pagsulay sa inyong hugot nga pagtuo” [Ether 12:6; gihatagan og gibug-aton]. Mao nga, matag higayon nga inyong sulayan ang inyong hugot nga pagtuo, buot ipasabot nga, takos nga mobuhat sa usa ka impresyon, makadawat kamo sa mapamatud-anong ebidensiya sa Espiritu. Kana nga mga pagbati makapalig-on sa inyong pagtuo. Sa inyong pagsubli niana nga sumbanan, ang inyong pagtuo mahimong mas lig-on. (Richard G. Scott, “Ang Maabagon nga Gagum sa Hugot nga Pagtuo sa Walay Kasigurohan nga mga Panahon ug Pagsulay,” Liahona, Mayo 2003, 76)

• Unsa ang imong nakat-onan gikan sa Ether 12:6 ug niini nga pamahayag nga makatabang sa usa ka tawo kinsa nagtinguha nga makabaton og espirituhanong saksi o mas lig-on nga pagpamatuod sa kamatuoran?

Usa ka kamatuoran nga atong makat-onan gikan sa Ether 12:6 mao nga kon kita magtinguha og espirituhanong pagsaksi, nan kinahanglan una kita mopakita og hugot nga pagtuo diha kang Jesukristo ug sa Iyang ebanghelyo.

Si Sister Rebecca L. Craven miasoy kon giunsa niya pagtubag ang batan-ong babaye nga iyang gikaistorya:

Sister Rebecca L. Craven

Ang akong tubag niya yano ra: “Kon ikaw gusto nga masayod sa bisan unsa, ikaw kinahanglang adunay buhaton.”

Dili ba kana tinuod kon kita adunay gustong makat-onan o masayran? Ako midapit sa akong bag-ong higala sa pagsugod sa pagbuhat sa ebanghelyo ni Jesukristo: pag-ampo, pagtuon, pagserbisyo sa uban, ug pagsalig sa Ginoo. Ang pagkakabig dili moabot kon walay gihimo. Kini moabot pinaagi sa gahom sa Espiritu Santo kon kita mohimo og tinuyo nga paningkamot aron masayod pinaagi sa pagpangayo, pagpangita, ug pagpanuktok. Kini moabot pinaagi sa pagbuhat. (Rebecca L. Craven, “Buhata Unsay Labing Mahinungdanon,” Liahona, Mayo 2022, 62)

• Ngano sa imong hunahuna nga ang pagpakita og hugot nga pagtuo kang Jesukristo pinaagi sa atong mga binuhatan usa ka mahinungdanon nga aspeto sa pagdawat og espirituhanong pagsaksi Kaniya ug sa Iyang ebanghelyo?

• Sa unsang paagi nga ang pagsunod sa ebanghelyo sa Manluluwas makaapekto sa atong mga pagbati alang Kaniya?

Mga ehemplo sa hugot nga pagtuo

Paghunahuna og mga kasinatian diin ikaw o ang uban nakadawat og espirituhanong pagsaksi isip resulta sa pagsunod sa ebanghelyo sa Manluluwas ug pagpakita og hugot nga pagtuo diha Kaniya.

Pagdapit og pipila ka estudyante sa pagpakigbahin sa mga kasinatian nga ilang nahunahunaan. Ipasabot nga kinahanglang dili gayod sila mopakigbahin og mga kasinatian nga personal ra kaayo. Ikonsiderar ang pagpakigbahin sa imong kaugalingong kasinatian isip kabahin niini nga diskusyon. Ang mosunod nga bidyo mahimo usab nga gamiton.

Aron makakita og ehemplo sa usa ka tawo kinsa nalig-on isip resulta sa pagpakita og hugot nga pagtuo sa Manluluwas, tan-awa ang “Pure and Simple Faith” (5:21), anaa sa ChurchofJesusChrist.org.

Samtang nagpadayon si Moroni sa iyang pakigpulong, mipakigbahin siya og daghang mga ehemplo sa mga indibidwal kinsa napanalanginan samtang sila mipakita og hugot nga pagtuo kang Jesukristo.

Alang sa mosunod nga kalihokan, ikonsiderar ang pagbahin sa mga estudyante ngadto sa upat ka mga grupo ug sa pag-assign sa matag grupo og usa sa mosunod nga mga hugpong sa mga bersikulo nga tun-an: Ether 12:7–10, 11–14, 15–18, 19–22. Dapita ang matag grupo sa pagpakigbahin ngadto sa klase sa mga ehemplo sa hugot nga pagtuo nga ilang nabasa.

Basaha ang Ether 12:7–22, mangita kon giunsa sa Ginoo pagpanalangin kining mga tawhana kinsa mipakita og hugot nga pagtuo diha Kaniya. Ikonsiderar ang pagmarka sa bisan unsang mga ehemplo nga mipatigbabaw diha kanimo.

• Hain niini nga mga ehemplo sa hugot nga pagtuo ang labing nakapadani kanimo pag-ayo? Ngano man?

• Sa unsang paagi nga ang usa o ang daghan pa sa mga ehemplo nga imong gitun-an makatabang kanimo sa imong personal nga mga kahimtang?

Ikonsiderar kon unsaon nimo sa paggamit ang imong nakat-onan karon sa imong kinabuhi. Pagrekord og duha o tulo ka mga buhat nga imong mahimo sa pagpakita og hugot nga pagtuo kang Jesukristo ug sa pagdawat o paglig-on sa imong pagsaksi sa ebanghelyo sa Manluluwas.

Komentaryo ug Background nga Impormasyon

Ether 12:6. Unsa ang gipasabot sa pagpakita og hugot nga pagtuo ug paglaom sa mga butang nga dili makita?

Si Sister Bonnie L. Oscarson, kanhi Kinatibuk-ang Presidente sa Young Women, mitudlo:

Presidente Bonnie L. Oscarson

Usahay bali ang atong buhaton. Pananglit, atong gamiton kini nga paagi: Malipay kong nagsunod sa balaod sa ikapulo, apan kinahanglan ko unang mahibaloan nga kini tinuod. Tingali mag-ampo kita aron makaangkon og pagpamatuod sa balaod sa ikapulo ug nanghinaot nga ang Ginoo mopanalangin kanato niana nga pagpamatuod sa dili pa gayod kita makasulat diha sa resibo sa ikapulo. Kini dili gayod mosalir. Ang Ginoo nagpaabot nga kita mopakita og hugot nga pagtuo. Kinahanglan kanunay kitang mobayad og hingpit ug tinud-anay nga ikapulo aron makaangkon og pagpamatuod sa ikapulo. Kining sama nga sumbanan magamit ngadto sa tanang mga baroganan sa ebanghelyo, mabalaod man sa kaputli, sa baroganan sa hustong pagsinina, sa Pulong sa Kaalam, o sa balaod sa puasa. (Bonnie L. Oscarson, “Magpakabig Kamo,” Liahona, Nob. 2013, 77)

Ether 12:12. Asa ako makakita og ubang mga asoy sa modernong-adlaw nga mga milagro nga miresulta gikan sa hugot nga pagtuo?

Tan-awa ang “A Wartime Miracle” aron makat-on gikan ni Presidente Thomas S. Monson (1927–2018) kon sa unsang paagi ang hugot nga pagtuo diha ni Jesukristo ug ang gahom sa Iyang pagkapari mosangpot ngadto sa mga milagro.

Basaha ang mahitungod sa dihang giayo ug gipabangon ni Joseph Smith ang usa ka tawo nga hapit na mamatay sa iyang gihigdaan human ang tawo mipahayag sa iyang hugot nga pagtuo kang Jesukristo (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 458–459).

Dugang nga mga Kalihokan sa Pagkat-on

Alternatibong pagsugod

Mahimong dapiton ang mga estudyante sa paghunahuna kon nganong importante ang pagbuhat sa mga butang sa usa ka piho nga han-ay. Pananglitan, mahimo nimong ipasulat sa mga estudyante ang mga numero nga 1, 2, ug 3 sa bisan unsang pagkahan-ay sa usa ka piraso nga papel. Dayon ipakita ang mosunod nga mga buluhaton ug dapita ang mga estudyante sa paghanduraw kon unsay mahitabo kon sila mosulay sa pagtuman sa mga buluhaton sa han-ay nga ilang gipili:

• (1) Isul-ob ang imong medyas. (2) Isul-ob ang imong sapatos. (3) Ihigot ang [liston sa] imong sapatos.

• (1) Ablihi ang imong toothpaste. (2) Pagbutang og toothpaste sa imong toothbrush. (3) Pagsipilyo sa imong ngipon.

• (1) Ablihi ang messaging app sa imong phone. (2) Pag-type og mensahe. (3) Ipadala ang mensahe.

Dapita ang mga estudyante sa paghunahuna og mga paagi nga ang paghimo og yano nga mga buhat sa hustong pagkahan-ay mahimong importante kon mahitungod sa espirituhanong mga butang.

Ether 12:1–4. Ang paglaom ug hugot nga pagtuo makaangkla sa atong mga kalag

Kon makabenepisyo ang mga estudyante gikan sa pagkat-on kon sa unsang paagi ang mga baroganan sa hugot nga pagtuo ug paglaom magtinabangay, ikonsiderar ang pagdapit kanila sa pagdrowing og barko ug sa pagsulat niini og “Akong Kinabuhi.” Sunod, dapita sila sa pagdrowing og angkla nga konektado sa barko, sulati kini og “Hugot nga Pagtuo ug Paglaom,” ug pagdrowing og mga balod sa palibot sa barko. Pangutan-a ang mga estudyante kon unsa kaha ang girepresentar sa mga balod kon ang barko nagrepresentar sa ilang mga kinabuhi. Dapita ang mga estudyante sa pagpasabot sa mga kaayohan sa usa ka angkla, ug basaha og dungan ang Ether 12:1–4 . Ikonsiderar ang pagpangutana sama sa mosunod:

• Unsay buot ipasabot nga adunay dapit diha sa tuo nga kamot sa Dios? (Ikonsiderar ang pagdirekta sa mga estudyante sa Mateo 25:31–34 alang sa tabang.)

• Sa unsang paagi nga ang hugot nga pagtuo kang Jesukristo nagtugot kanato nga molaom “uban sa kasiguroan” alang sa usa ka dapit diha sa tuo nga kamot sa Dios?

• Sa unsa nga paagi nga ang imong hugot nga pagtuo ug paglaom nakaangkla kanimo nga luwas panahon sa lisod nga mga panahon o personal nga mga unos?

Ether 12:6. Pag-cross-reference

Aron matabangan ang mga estudyante nga mapalawman pa ilang pagsabot sa doktrina nga gitudlo sa Ether 12:6, ikonsiderar ang pagdapit kanila sa pagsiksik sa mga kasulatan alang sa mga tudling nga nagtudlo og susama nga mga ideya o mga konsepto. Ilista ang mga pakisayran nga ilang makit-an diha sa pisara (mga ehemplo naglakip sa Juan 7:17; Mga Hebreohanon 11:1; Alma 32:21–31). Mahimo dayon nga dapiton ang mga estudyante sa paghimo og kadena sa kasulatan, magkonektar sa mga tudling nga ilang nakaplagan pabalik ngadto sa Ether 12:6.

Ether 12:7–22. “Diha sa gasa sa iyang Anak nga lalaki ang Dios miandam og usa ka labing maayo nga paagi”

Isip kabahin sa ilang pagtuon sa Ether 12:7–22, mahimong dapiton ang mga estudyante sa pagkat-on og dugang kon sa unsang paagi gipanalanginan ni Jesukristo ang pipila ka mga indibidwal nga gihisgotan niini nga mga bersikulo. Ang mga footnote alang niini nga mga bersikulo sa Ether 12 adunay mga cross-reference sa mga asoy nga ilang gipasabot. Mahimong dapiton ang mga estudyante sa pagbasa niini nga mga asoy ug sa pagbantay kon sa unsang paagi gipanalanginan ni Jesukristo ang mga tawo samtang ilang gigamit ang ilang hugot nga pagtuo diha Kaniya. Human makompleto sa mga estudyante ang ilang pagtuon, mahimo nimo silang dapiton sa pagpakigbahin sa unsay ilang nakat-onan nga makadugang sa ilang kaugalingong hugot nga pagtuo kang Jesukristo.