Ether 6

Ang mga Jaredite Mibiyahe paingon sa Gisaad nga Yuta

Ang Jaredite nga mga barko gihapak sa mga balod

Handurawa kon unsa kaha ang gibati sa mga Jaredite sa pagsulod sa ilang mga barko ug sa pagtabok sa dagkong katubigan samtang sila mipanaw paingon sa gisaad nga yuta. Bisan tuod og ang ilang panaw taas ug lisod, nakita sa mga Jaredite nga ang Ginoo nagtabang kanila paingon ngadto. Ang Ginoo makatabang usab kanato atol sa atong panaw sa mortalidad ug pabalik ngadto sa presensiya sa Langitnong Amahan. Kini nga leksiyon makatabang kanimo sa pagpahisama sa mga kasulatan aron makakat-on sa mga kamatuoran nga makatabang kanimo sa panahon sa imong panaw sa kinabuhi.

Tabangi ang matag estudyante nga makatampo diha sa kasinatian sa pagkat-on.Tinud-anay nga ilha gayod nga ang matag estudyante gikinahanglan ug adunay kontribusyon nga himoon. Ang ubang mga estudyante mahimong mas hilig sa pag-apil kay sa uban. Paghimo og dugang nga paningkamot ug pagmamugnaon aron madasig ang matag estudyante sa pagtampo sa makahuloganon nga mga paagi.

Pagpangandam sa estudyante: Mahimong basahon sa mga estudyante ang Ether 6:1–12 ug maghunahuna sa mga aspeto niini nga asoy nga mahimong simbolikanhong magamit sa ilang mga kinabuhi. Ang kalihokan sa pagtuon alang niini nga mga bersikulo sa Dali, Sunod Kanako—Alang sa mga Indibidwal ug mga Pamilya: Basahon ni Mormon 2024 makatabang niini.

Mga Posibleng Kalihokan sa Pagkat-on

Ang panaw sa kinabuhi

Ang mosunod gituyo aron sa pagtabang sa pag-andam sa mga estudyante sa pagpahisama sa ilang pagtuon sa Ether 6 ngadto sa ilang mga kinabuhi. Agi og dugang sa pagdapit sa mga estudyante sa pagkompleto sa kalihokan diha sa ilang mga journal sa pagtuon, ikonsiderar ang pagkompleto niini diha sa pisara.

Ang atong mortal nga kinabuhi mahimong ikatandi sa usa ka taas nga panaw, nga ang gitinguha nga destinasyon mao ang kinabuhing dayon. Sa imong journal sa pagtuon, isulat ang “Ako” sa usa ka bahin sa pahina ug ang “Kinabuhing Dayon” sa pikas bahin. Diha sa luna tali niining duha ka mga ulohan, isulat ang pipila ka mga babag nga mahimong motumaw atol sa atong panaw nga makapalisod kanato sa pagbalik nga takos ngadto sa Langitnong Amahan. Dayon hunahunaa kon kumusta ang dagan sa imong panaw paingon sa kinabuhing dayon ug hain sa giila nga mga babag ang imong giatubang karon.

Karon imong tun-an ang mahitungod sa panaw nga gihimo sa mga Jaredite paingon sa gisaad nga yuta human sila makahuman sa paghimo sa ilang mga barko. Samtang magtuon ka, pangitaa ang mga kamatuoran nga makatabang kanimo sa pagbuntog sa mga babag nga imong giatubang sa imong panaw pabalik sa presensiya sa Dios.

Pagpahisama sa mga kasulatan sa imong kinabuhi

Ang mosunod nga mga lakang makatabang kanimo sa pagtandi, o pagpahisama, unsay imong mabasahan sa mga kasulatan ngadto sa imong personal nga mga kahimtang. Sa imong journal sa pagtuon, isulat ang ulohan nga “Mga paagi sa pagpahisama sa mga kasulatan ngadto sa akong kinabuhi.” Irekord kini nga mga lakang ubos sa ulohan.

Ipakita kini nga mga lakang aron makopya kini sa mga estudyante ngadto sa ilang mga journal.

1. Pangita og importante nga mga detalye.

2. Paghimo og mga pagtandi.

3. Pagkaplag og bililhong mga leksiyon.

4. Tinoa ang personal nga paggamit.

Sa dili pa hatagan ang mga estudyante og kahigayonan sa pagpraktis sa paggamit niini nga mga lakang sa ilang kaugalingon, ikonsiderar ang pagbuhat sa mosunod nga ehemplo isip usa ka klase. Seguroha ang paggahin og daghang oras alang sa mga estudyante nga makapraktis sa ilang kaugalingon sa ulahing bahin sa leksiyon.

Lakang 1: Pangita og importante nga mga detalye

Basaha ang Ether 6:1–3, mangita sa importante nga mga detalye. Kini nga mga detalye mahimong maglakip sa mga tawo, mga lugar, mga butang, o mga binuhatan nga gihatagan og gibug-aton.

Hangyoa ang mga estudyante sa pagpakigbahin og importante nga mga detalye nga ilang nakaplagan niini nga mga bersikulo. Mahimo kining isulat diha sa pisara. Mahimo nimong hisgotan ang mosunod:

Usa ka importante nga detalye nga tingali imong namatikdan mao nga ang Ginoo mipahimo sa mga bato nga bag-ohay lang gidala sa igsoon nga lalaki ni Jared ngadto Kaniya (tan-awa sa Ether 3:1–6) nga mohayag aron ang mga Jaredite makabaton og kahayag sa ilang mga barko.

Lakang 2: Paghimo og mga pagtandi

Hunahunaa kon sa unsang paagi ang mga detalye nga imong namatikdan sa miaging lakang mahimong ikatandi sa usa ka butang nga espirituhanon o sa mga sitwasyon sa imong kinabuhi.

• Unsa nga mga pagtandi ang imong mahimo gamit ang mga detalye nga imong nahibaloan sa miaging lakang?

Sama pananglit, mahimo nimong itandi ang misanag nga mga bato ngadto sa mga tinubdan sa espirituhanong kahayag nga gipanalangin kanato sa Langitnong Amahan, sama sa mga pagtulun-an ug ehemplo ni Jesukristo, sa Espiritu Santo, sa mga kasulatan, ug sa buhing mga propeta. (Tan-awa sa Salmo 119:105; Juan 8:12; ug 1 Nephi 17:13. Mahimo nimong i-cross-reference kini nga mga bersikulo ngadto sa Ether 6:3.)

Lakang 3: Pagkaplag og bililhong mga leksiyon

Hunahunaa kon unsa nga mga leksiyon o mga kamatuoran ang imong nakat-onan samtang imong gitandi kini nga mga bersikulo diha sa imong kinabuhi o sa usa ka butang nga espirituhanon. Ikonsiderar usab ang imong nakat-onan mahitungod sa Langitnong Amahan ug ni Jesukristo.

• Unsa ang pipila ka mga leksiyon o mga kamatuoran ang imong nakat-onan gikan niini nga mga bersikulo? Unsa ang imong napalgan nga makatabang kanimo sa imong inadlaw-adlaw nga kinabuhi?

Usa ka kamatuoran nga atong makat-onan mao nga ang Langitnong Amahan ug si Jesukristo naghatag kanato og giya ug kahayag aron sa pagtabang kanato atol sa atong panaw sa mortalidad.

Mahimo nimong dapiton ang mga estudyante sa pagpakigbahin og pipila ka mga paagi nga ang Dios mihatag kanila og giya ug espirituhanong kahayag sa ilang mga kinabuhi.

Lakang 4: Tinoa ang personal nga paggamit

Pamalandongi kon unsaon nimo sa paggamit diha sa imong kinabuhi ang mga leksiyon nga imong nahibaloan sa miaging lakang.

• Unsa ang imong mahimo aron sa pagsunod o pagdawat og dugang nga kahayag sa Dios diha sa imong kinabuhi?

Tingali nakahunahuna ka og mga aksiyon sama sa pagpalambo sa imong pagtuon sa kasulatan, mainampoong pagtinguha og giya gikan sa Langitnong Amahan sa imong inadlaw-adlaw nga mga desisyon, o mas makugihong pagpaningkamot sa paghupot sa Espiritu Santo isip imong kanunay nga kauban.

Pagpraktis sa pagpahisama sa ubang mga bersikulo gikan niini nga asoy

Jaredite nga barko

Mahimong kompletohon sa mga estudyante ang mosunod nga mga kalihokan sa pagtuon nga magtinagsa, uban sa usa ka pares, o diha sa gamay nga grupo.

Tun-i ang nahabilin nga istorya sa panaw sa mga Jaredite paingon sa gisaad nga yuta pinaagi sa pagbasa sa Ether 6:4–12. Pangita og dugang nga mga paagi nga ang panaw sa mga Jaredite mahimong makonektar sa imong panaw sa kinabuhi. Samtang magtuon ka, praktisa ang paggamit sa upat ka lakang nga proseso sa pagpahisama sa mga kasulatan.

Hatagi og espesyal nga pagtagad kon unsa ang gitudlo niini nga mga bersikulo kanimo mahitungod sa Langitnong Amahan ug ni Jesukristo.

Human maadunay igong panahon ang mga estudyante sa pagtuon, hisgoti kon unsay ilang nakat-onan. Kon nagkinahanglan sila og dugang nga tabang, ikonsiderar ang pagpangutana sama sa mosunod:

• Unsa ang gitudlo niini nga mga bersikulo diha kanimo mahitungod sa Langitnong Amahan ug ni Jesukristo?

• Unsa ang pipila sa “makusog kaayo nga [mga] hangin” (Ether 6:5) nga gitugot sa Ginoo nga atong masinati sa mga atong kinabuhi? Unsaon nato sa pagseguro nga ang atong mga pagsulay o mga hagit makatabang kanato nga mas mapaduol sa Dios?

• Unsa ang pipila ka mga paagi nga tingale bation nimo nga “nalubong” (Ether 6:6) diha sa imong panaw sa mortalidad? Unsay imong nakita diha sa bersikulo 7 nga makatabang kanimo atol sa maong mga panahon?

• Ngano sa imong hunahuna nga ang mga Jaredite midayeg sa Ginoo atol sa ilang malisod nga panaw? (tan-awa sa Ether 6:9). Unsay makatabang kanimo nga mobati og pasalamat ngadto sa Dios, bisan og nag-atubang ka og mga pagsulay?

Human sa diskusyon, dapita ang mga estudyante sa paghunahuna kon sa unsang paagi nga ang ilang gitun-an karon makatabang kanila sa ilang mga kinabuhi, lakip sa mga babag nga bag-ohay lang nilang gihisgotan. Dasiga sila sa pagrekord diha sa ilang mga journal sa pagtuon sa bisan unsang espirituhanong mga pag-aghat o mga panabot nga gusto nilang mahinumdoman.

Pagpamatuod sa mga kamatuoran nga nahisgotan karon. Dasiga ang mga estudyante sa pagpadayon sa pagpahisama sa unsay ilang nabasahan diha sa mga kasulatan ngadto sa ilang mga kinabuhi.

Komentaryo ug Background nga Impormasyon

Ether 6:4. Unsa ang gipasabot nga ang mga Jaredite mitugyan sa ilang mga kaugalingon ngadto sa Dios?

Si Elder L. Todd Budge sa Seventy mitudlo:

Elder L. Todd Budge

Nahisulat kini nga ang mga Jaredite kaniadto “misakay sa ilang … mga kasko [barko], ug milawig ngadto sa dagat, nagtugyan sa ilang mga kaugalingon ngadto sa Ginoo nga ilang Dios” [Ether 6:4]. Ang pagtugyan nagpasabot og pagsalig o pagtahan. Ang mga Jaredite dili lang ingon nga nanakay ngadto sa mga barko tungod kay nakahibalo gayod sila unsay mahitabo diha sa biyahe. Nanakay sila tungod kay nakat-on sila sa pagsalig diha sa gahom, kamaayo, ug kaluoy, ug busa sila andam nga motugyan sa ilang kaugalingon ug sa bisan unsa nga pagduhaduha o mga kahadlok nga lagmit anaa kanila ngadto sa Ginoo. (L. Todd Budge, “Makanunayon ug Lig-on nga Pagsalig,” Liahona, Nob. 2019, 48)

Ether 6:5–7. Sa unsang paagi ako mapanalipdan panahon sa mga pagsulay ug mga hagit nga akong giatubang sa kinabuhi?

Si Presidente James E. Faust (1920–2007) sa Unang Kapangulohan mitudlo:

Presidente James E. Faust

Kitang tanan nag-atubang og makusog kaayo nga mga hangin sa kadaotan ug sa mga sulog sa daotan nga walay kalainan sa sitwasyon nga giatubang sa mga Jaredite samtang sila mibiyahe ngadto sa gisaad nga yuta. Sila gikusokuso diha sa mga balod sa dagat ug “sa daghan nga mga higayon nalubong diha sa mga kahiladman sa dagat, tungod sa bukid nga mga balod nga mihasmag diha kanila, ug usab sa dako ug makalilisang nga unos nga nahitabo tungod sa kapintas sa hangin” (Ether 6:6). Apan sila gipanalipdan tungod kay “sa diha nga sila nalubong diha sa lawod walay tubig nga makadaot kanila, ang ilang mga sakayan ingon nga hugot sama ngadto sa usa ka tadyaw” (Ether 6:7). Sa atong panahon adunay mga sakayan nga nanalipod batok niining makalilisang nga espirituhanong mga unos, ug kini mao ang atong mga templo, mga panimalay, mga korum, mga ward, ug mga stake. (James E. Faust, “We Believe in You!,” New Era, Okt. 2006, 8–9)

Ngano kaha nga makatabang ang paghunahuna mahitungod kon kumusta ang akong panaw sa kinabuhi?

Tan-awa ang bidyo nga “The Journey” (3:46). Niini nga bidyo, si Elder Dieter F. Uchtdorf sa Korum sa Napulog Duha ka Apostoles mipakigbahin og kasinatian ug mga panabot nga makatabang kanato sa atong panaw sa mortalidad.

Dugang nga mga Kalihokan sa Pagkat-on

Paggamit sa mga cross-reference

Mahimong makatabang ang pagdapit sa mga estudyante sa pagpangita og mga kasulatan nga may kalabotan sa mga kamatuoran nga ilang gitun-an gikan sa panaw sa mga Jaredite. Mahimo nilang ilista ang mga pakisayran nga ilang makit-an sunod sa may kalabotan nga mga bersikulo gikan sa Ether 6 diha sa ilang mga kasulatan. Mahimong mangita ang mga estudyante og ilang kaugalingon nga mga kasulatan, o mahimo nimong ipakigbahin ang may kalabotan nga mga kasulatan (sama niadtong anaa sa ubos), magdapit sa mga estudyante sa pagtuon ug pagdiskobre kon sa unsang paagi ang mga bersikulo may kalabotan sa Ether 6.

Ether 6:2–3, 10 — Salmo 119:105; Juan 8:12; 1 Nephi 17:13

Ether 6:4 — Mga Panultihon 3:5–6; Mosiah 7:19; Alma 38:5

Ether 6:5–8 — Mateo 7:24–25; Helaman 5:12; 2 Nephi 4:18–20, 35

Ether 6:9 — 1 Mga Taga-Tesalonica 5:18; 1 Nephi 18:16; Alma 34:38

Ether 6:11 —12 Nephi 31:20; Mosiah 24:15; Doktrina ug mga Pakigsaad 24:8

Ether 6:12 — Salmo 145:8–9; Lucas 17:11–19; Alma 7:23

Kalihokan sa pagdrowing

Adunay daghang mga elemento sa panaw sa mga Jaredite nga gihulagway sa Ether 6:1–12 nga makapaikag nga ihanduraw. Aron sa pagbuhat niini, mahimong maghimo ang mga estudyante og hulagway nga nagrepresentar sa usa ka konsepto o panghitabo gikan sa usa o sa daghan pa sa mga bersikulo nga ilang gitun-an. Mahimo usab silang mosulat og hugpong sa mga pulong gikan sa kasulatan nga ilang gitutokan sa usa ka bahin sa ilang hulagway. Mahimo dayon nga ipakigbahin ug ipasabot sa mga estudyante ang ilang drowing ngadto sa usa ka pares o sa gagmay nga grupo. Mahimong mopakigbahin ang pipila sa ilang hulagway sa tibuok klase.

Dugang nga mga leksiyon gikan sa panaw sa mga Jaredite

Aron matabangan ang mga estudyante sa pag-ila sa mga kamatuoran nga ilang makat-onan gikan sa panaw sa mga Jaredite, ikonsiderar ang pagpakita sa “Makanunayon ug Lig-on nga Pagsalig” gikan sa time code 2:58 hangtod sa 9:46. Niini nga pakigpulong, si Elder L. Todd Budge sa Seventy mipakigbahin og daghang mga paagi sa panaw sa mga Jaredite ngadto sa gisaad nga yuta nga mahimong may kalabotan sa atong kinabuhi.