“ʻEta 6–11: Vakai Fakalūkufuá,” Tohi ʻa Molomoná – Tohi Lēsoni ʻa e Faiakó (2024)
“ʻEta 6–11,” Tohi ʻa Molomoná – Tohi Lēsoni ʻa e Faiakó
ʻEta 6–11
Vakai Fakalūkufuá
Neongo naʻe lōloa mo faingataʻa e fononga ʻa e kau Sēletí, ka naʻa nau ʻiloʻi naʻe tokoniʻi kinautolu ʻe he ʻEikí ʻi heʻenau fonongá. Hili ʻenau tūʻuta ki he fonua ʻo e talaʻofá, naʻe loto ʻa e kakaí ke fili ha tuʻi, ʻa ia naʻe fakatokanga ki ai ʻa e tokoua ʻo Sēletí ʻe iku ki he nofo pōpulá. Naʻe ʻikai ke tokanga ʻa e kakaí ki he fakatokanga ko ʻení, pea naʻe iku ia ki ha ngaahi nunuʻa mamafa ʻi ha ngaahi toʻu tangata lahi. Naʻe tupu ha ngaahi kautaha fufū ʻi honau lotolotongá pea iku ai ki honau fakaʻauhá.
Teuteu ke Akoʻí
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.
ʻEta 6
Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakatatau ʻe he kau akó ʻa e folofolá ke nau ako ʻa e ngaahi moʻoni ʻe lava ʻo tokoni kiate kinautolu lolotonga ʻenau fononga ʻi he moʻuí.
-
Teuteu ʻa e tokotaha akó: Fakaafeʻi ʻa e kau akó ke lau ʻa e “Kautaha Fufuú, Ngaahi” ʻi he Fakahinohino ki he Ngaahi Folofolá ʻi he scriptures.ChurchofJesusChrist.org
-
Meʻa ke fakaʻaliʻalí: Ko e sitepu ʻe fā ki hono fakatatau ʻo e folofolá
-
Fokotuʻu ki hono akoʻi ʻi he konifelenisi vitioó: Hili hono maʻu ʻe he kau akó ha taimi ke akoako fakatatau ai ʻa e folofolá kiate kinautolú, fakakaukau ke tuku kinautolu ki ha ngaahi loki fakataha ke vahevahe ʻa e meʻa naʻa nau akó mo ha niʻihi ʻo e kalasí.
ʻEta 7–11
Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga ʻo e muimui ki he kau palōfita ʻa e ʻEikí.
-
Teuteu ʻa e tokotaha akó: Fakaafeʻi ʻa e kau akó ke omi mateuteu ke vahevahe ha niʻihi ʻo e ngaahi faleʻi pe fakatokanga fakaepalōfita kuo tau maʻu ʻi hotau kuongá. Te nau lava ʻo maʻu ha ngaahi sīpinga ʻi he Ki Hono Fakamālohia ʻo e Toʻu Tupú (tohi tufa, 2022) pe mei he ngaahi lea ʻo e konifelenisi lahi fakamuimuitahá.
-
ʻĪmisí: Ko ha tokotaha ʻi ha fale fakapōpula
-
Naunaú: Ngaahi tatau ʻo e Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (tohi tufa, 2022) mo e ngaahi pulusinga Liahona ʻo e konifelenisi lahi kimuí ni maí maʻá e kau ako ʻoku ʻikai ke nau maʻu ha naunau fakaʻilekitulōniká
-
Vitiō: “Ko e Angalelei Vave ʻa e ʻOtuá” (11:39; mamata mei he taimi 3:37 ki he 6:33)
-
Fokotuʻu ki hono akoʻi ʻi he konifelenisi vitioó: ʻI hono fakatahatahaʻi ʻe he kau akó ha lisi ʻo e ngaahi fakatokanga fakaepalōfita ʻo e kuonga ní ʻa ia ʻe lava ʻo tokoni ke tau fakaʻehiʻehi mei he nofo pōpulá, fakakaukau ke fakaʻaongaʻi ʻa e polokalama palakipoé ke fakafaingamālieʻi hono lekooti ʻenau tali ki he ngaahi fehuʻí. Fakakaukau ke fakaafeʻi kinautolu ke fakamatala ki he ʻuhinga naʻa nau tali ai ʻi he founga naʻa nau faí pea mo e founga ʻoku fakahaaʻi ai ʻe he ngaahi fakatokanga ko ʻení ʻa e ʻofa mo e finangalo ʻo e ʻOtuá kiate kitautolú.
ʻEta 8
Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e fiemaʻu ke siʻaki ʻa e ngaahi kautaha fufuú ʻaki ʻenau muimui kia Sīsū Kalaisi.
-
Teuteu ʻa e tokotaha akó: Fakaafeʻi ʻa e kau akó ke feinga ke nau maheni mo e ʻuhinga ʻo e ngaahi kautaha fufuú, ʻaki ʻenau ako ʻa e fakamatala fakanounou ʻi he ʻuluʻi tohi “ʻEta 8:7–26: ʻOku ʻikai ngāue ʻa e ʻEikí ʻi he Fakapoʻulí” ʻi he lēsoni “ʻEta 6–11: ʻKoeʻuhí Ke Fakangata ʻa e Angahalá’” ʻi he Haʻu, ʻo Muimui ʻIate Au—Maʻá e ʻApí mo e Lotú: Tohi ʻa Molomoná 2024.
ʻEta 12:1–22
Taumuʻa ʻo e lēsoní: ʻE lava ke tokoni ʻa e lēsoni ko ʻení ke ngāue ʻaki ʻe he kau akó ʻenau tuí ke maʻu ha fakamoʻoni fakalaumālie ʻo e moʻoní.
-
Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi sīpinga mei he folofolá ʻa ia naʻe iku ai ʻa e ngaahi ngāue faivelengá ki ha ngaahi fakamoʻoni fakalaumālie, ngaahi tāpuaki, pe ngaahi tali mei he ʻOtuá.
-
Vitioó: “Fakahoko ʻa ia ʻOku Mahuʻinga Tahá” (10:45; mamata mei he taimi 1:56 ki he 2:34 pea mei he taimi 2:34 ki he 3:10); “The Sustaining Power of Faith in Times of Uncertainty and Testing” (15:54; mamata mei he taimi 5:08 ki he 5:53); “Tui Haohaoa mo Faingofuá” (5:21)
-
Fokotuʻu ki hono akoʻi ʻi he konifelenisi vitioó: Kimuʻa pea kamata ʻa e kalasí, kole ki ha tokotaha ako ʻe taha pe lahi ange ke teuteu ke vahevahe ha ngaahi aʻusia naʻa nau maʻu ai pe ko ha niʻihi kehe ha fakamoʻoni fakalaumālie ko ha ola ʻo ʻenau moʻui ʻaki e ongoongolelei ʻa e Fakamoʻuí.
Fakataukei Fakatokāteliné: ʻEta 12:6
Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e fakamoʻoni fakafolofola fakataukei fakatokāteliné mo e kupuʻi lea folofola mahuʻinga ki he ʻEta 12:6, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.
-
Teuteu ʻa e tokotaha akó: Fakaafeʻi ʻa e kau akó ke fekumi ki ha ngaahi potufolofola ʻe lava ʻo tokoni ki ha taha ke ngāue ʻaki ʻene tui kia Sīsū Kalaisí. Te nau lava ʻo fekumi ʻi he tefito “Tuí” ʻi he Fakahinohino ki he Ngaahi Folofolá ke maʻu ha ngaahi potufolofola.
-
Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha fanga kiʻi kulupu iiki ʻi he ngaahi loki fakatahá ke aleaʻi ʻa e tūkungá. Kapau te ke fili ʻeni, fakapapauʻi ke fakaʻaliʻali ʻa e ngaahi fehuʻi ke aleaʻí ʻi he polokalama fetohiʻakí ke lava ʻa e kau akó ʻo vakai ki ai.