Siviʻi Hono 8 Hoʻo Akó

3 Nīfai 8–Molomona 6

kiʻi fuʻu ʻakau ʻi he ngaahi tuʻunga kehekehe ʻo e moʻuí

ʻE lava ke tokoni hoʻo fakakaukau mo vakaiʻi hoʻo ako fakalaumālié ke ke ofi ange ai ki he Fakamoʻuí. ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú, pea mo e tupulaki kuó ke aʻusia lolotonga hoʻo ako kimuí ni ʻa e 3 Nīfai 8 ki he Molomona 6.

ʻOange ha taimi ki he kau akó ke nau fakakaukauloto ai. Tuku ha taimi ki he kau akó ke nau manatuʻi mo fakakaukauloto ai ki he meʻa kuo nau akó. ʻEke ha ngaahi fehuʻi pe fai ha ngaahi ʻekitivitī ke tokoni ki he kau akó ke nau manatuʻi ai ʻenau ngaahi ongó. Te ke lava ʻo fakaafeʻi ha ngaahi taimi fakalongolongo ʻaki haʻo kole ki he kau akó ke nau fakakaukau, fakaongoongo, pea tohi.

Teuteu ʻa e tokotaha akó: Fakaafeʻi ʻa e kau akó ke nau omi mateuteu ke vahevahe ʻa e meʻa kuo nau akó pe ngaahi founga kuo nau tupulaki fakalaumālie ai ʻi he ngaahi uike siʻi kuo hilí. Mahalo ʻe tokoni ke toe vakaiʻi ʻe he kau akó ʻenau tohinoa akó pe ngaahi fakamatala ʻi heʻenau folofolá.

Ngaahi ʻEkitivitī Ako ʻOku Ala Fakahokó

Lisi vakaiʻi kimuʻa pea mavahé

Naʻe vahevahe ʻe Palesiteni Tieta F. ʻUkitofa, naʻe ʻi he Kau Palesitenisī ʻUluakí he taimi ko iá, ha lēsoni mahuʻinga naʻá ne ako mei he taimi naʻá ne hoko ai ko ha pailaté:

Palesiteni Dieter F. Uchtdorf

ʻI hono pailateʻi ʻo ha vakapuna, ʻoku vave ʻete ako ʻoku makatuʻunga lahi ʻete halanga folaú ʻi he founga ʻokú te matuʻuaki ʻaki ʻa e ngaahi ivi tākiekina faingataʻa mei tuʻa hangē ko e havilí mo e ʻeá. Ka ʻoku toe mahuʻinga ange ʻa e ngaahi fili ʻokú te fai ke matatali ʻaki ʻa e ngaahi ivi tākiekina ko ia mei tuʻá. … Koeʻuhí ke te lava ʻo fakahoko totonu ʻa e ngaahi fili ko iá, ʻoku tokoni ke te ʻiloʻi ʻa e tuʻunga totonu ʻokú te ʻi aí. (Dieter F. Uchtdorf, “As You Embark upon This New Era,” BYU Speeches, Apr. 23, 2009, 4)

• Ko e hā ʻoku mahuʻinga ai ke ʻiloʻi ʻe he pailaté hono tuʻunga totonú kimuʻa pea toki fai ha filí?

• ʻOku fekauʻaki fēfē ʻa e sīpinga ʻo hono ʻiloʻi ʻe ha pailate ʻa hono tuʻunga totonú mo hono fakatupulaki fakalaumālie kitá?

Kimuʻa peá ke toe vakaiʻi ha ngaahi tefito pau kuó ke ako ʻi he seminelí, fakakaukau pe ko e hā ha meʻa kuo mahuʻinga makehe kiate koé. ʻE lava ke tokoni atu ʻa e ngaahi fehuʻi ko ʻení. Fakakaukau ke lekooti hoʻo talí ʻi hoʻo tohinoa akó.

Fakakaukau ke fakaʻaliʻali ange ʻa e ngaahi fehuʻi ko ʻení. Hili hono tuku ha taimi feʻunga ke tohi ai ʻa e kau akó, fakaafeʻi ke nau vahevahe ʻenau talí mo e kalasí.

• Ko e hā ha meʻa kuó ke ako mei hoʻo ako kimui ní kuo mātuʻaki ʻaonga ʻaupitó?

• Ko e hā ha ngaahi liliu kuó ke fakatokangaʻi kimuí ni mai ʻi hoʻo ngaahi ongó mo e ngaahi tōʻongá?

• Ko e hā ha ngaahi founga ʻe niʻihi kuó ke fakaʻaongaʻi ai ʻa e meʻa kuó ke akó?

ʻI he lēsoni ko ʻení, ʻe maʻu ai ʻe he kau akó ʻa e faingamālie ke fakamatalaʻi ʻa e tokāteline ʻo Kalaisí, siviʻi ʻa e nunuʻa ʻo ʻenau ako ʻa e 3 Nīfaí ki heʻenau ngaahi ongo fekauʻaki mo Sīsū Kalaisí, pea fakakaukauloto ki he founga ʻoku nau kau ai ki hono tānaki ʻo ʻIsilelí. Kapau ʻe fiemaʻu, liliu ʻa e ngaahi ʻekitivitī ʻi he lēsoni ko ʻení ke tokoni ki hoʻo kau akó ke nau siviʻi kinautolu ʻi he ngaahi meʻa naʻe fakamamafaʻi lolotonga hono ako ʻe he kalasí ʻa e 3 Nīfai ki he Molomona 6.

Ko e fakamatalaʻi ʻa e tokāteline ʻo Kalaisí

ʻOku fakataumuʻa ʻa e konga ko ʻeni ʻo e lēsoní ke ʻoange ki he kau akó ha faingamālie ke nau fakamatalaʻi ʻa e tokāteline ʻo Kalaisí ʻo fakaʻaongaʻi ʻEne ngaahi akonaki mei he 3 Nīfai 11:31–39 mo e 3 Nīfai 27:13–22.

Mahalo te ke manatuʻi naʻe hili ha taimi nounou mei he fuofua hā ʻa e Fakamoʻui kuo toetuʻú ki he kakai Nīfaí, naʻá Ne vahevahe ha ngaahi moʻoni mahuʻinga fekauʻaki mo e meʻa kuo pau ke tau fai ke tau maʻu ai ʻa e ngaahi tāpuaki ʻo e moʻui taʻengatá (vakai, 3 Nīfai 11:31–39 mo e 3 Nīfai 27:13–22). ʻOku tau faʻa lave ki he ngaahi akonaki ko ʻení “ko e tokāteline ʻeni ʻa Kalaisí” (2 Nīfai 31:21). Te ke maʻu ha faingamālie ke fakamatalaʻi ʻa e ngaahi akonaki ʻa e Fakamoʻuí ʻi hoʻo lea pē ʻaʻau ʻaki hono fakaʻaongaʻi ʻa e tūkunga ko ʻení:

Fakakaukau ke vahe ʻa e kau akó ke nau tauhoa ke ngāueʻi ʻa e tūkunga ko ʻení. Hili hono tali ʻe he hoa ʻuluakí ʻa e fehuʻí, te ke lava ʻo fakaafeʻi ʻa e kau ako kuo teʻeki ke nau fai ha vahevahé ke nau kumi ha hoa foʻou ke vahevahe ʻenau talí mo ia ke ʻoua naʻa nau ongoʻi ʻoku nau vahevahe pē ʻa e meʻa tatau.

Fakakaukauloto ʻoku ʻi ai haʻo kaungāmeʻa ko Siua, ʻokú ne fie ʻilo ki he Siasí. Neongo ʻokú ne ongoʻi fiemālie pē ki he meʻa ʻokú ne akó, ka ʻoku ʻikai mahino kiate ia ʻa e fiemaʻu ko ia ke ne papitaisó.

• Ko e ngaahi veesi fē mei he Tohi ʻa Molomoná te ke ala fakaʻaongaʻi ke tokoni ke mahino kia Siua ʻa e tokāteline ʻo Sīsū Kalaisí? (Kapau ʻoku ʻikai ke ke fakapapauʻi ʻa e feituʻu ke kamata aí, te ke lava ʻo sio ki he 3 Nīfai 11:31–39 pe 3 Nīfai 27:13–22.)

• ʻOkú ke pehē ʻe tokoni fēfē ʻa e ngaahi akonaki ʻa e Fakamoʻuí ʻi he ngaahi veesi ko ʻení ke fakamatalaʻi ʻa e meʻa ʻoku hohaʻa ki ai ʻa Siuá?

Fakakaukauloto ki hoʻo ngaahi ongo fekauʻaki mo Sīsū Kalaisí

ʻOku fakataumuʻa ʻa e konga ko ʻeni ʻo e lēsoní ke ʻoange ki he kau akó ha faingamālie ke nau fakakaukau ki he founga kuo liliu ai ʻenau ongo ki he Fakamoʻuí ʻe he meʻa ne nau ako fekauʻaki mo Ia lolotonga ʻenau ako ʻa e 3 Nīfaí.

Ko e folofolá ko ha maʻuʻanga tokoni mahuʻinga ia kiate kitautolu ke tau ako lahi ange ai ki he ʻulungaanga ʻo Sīsū Kalaisí. ʻI ha ngaahi lēsoni kehekehe, ʻo kamata ʻi he 3 Nīfai 8–10, naʻe fakaafeʻi ai koe ke ke faʻu ha lisi ʻo e ngaahi meʻa kuó ke ako fekauʻaki mo Sīsū Kalaisi ʻi Heʻene ngāue fakaetauhi ki he kakai Nīfaí hili ʻEne Toetuʻú. Mahalo kuó ke aʻusia foki ha ngaahi meʻa ʻa ia naʻá ke fakakaukauloto ai ʻokú ke moʻui ʻi he taimi naʻe ngāue fakaetauhi ai ʻa e Fakamoʻuí ki he kakai Nīfaí. ʻE lava ke tokoni ʻa hoʻo fakakaukauloto ki he ngaahi meʻa naʻá ke tohí pe ngaahi momeniti naʻá ke fakalaulaulotoá, ke ke ongoʻi ai ʻa e ʻofá ki he Fakamoʻuí pea mei he Fakamoʻuí.

Kapau naʻá ke faʻu mo e kalasí ʻa e lisi naʻe lave ki ai ʻi he palakalafi kimuʻá, ʻe ala tokoni ke fakaʻaliʻali ia ke lava ʻa e kau akó ʻo vakai ki ai lolotonga ʻa e ʻekitivitī ko ʻení.

Tuku ha kiʻi taimi ke ke toe vakaiʻi ai hoʻo lisí ʻi hoʻo tohinoa akó, ʻo kumi ʻa e meʻa naʻá ke ako fekauʻaki mo Kalaisí ʻe ala poupou ki hoʻo ngaahi ongo fekauʻaki mo Iá. Pe, te ke lava ʻo toe vakaiʻi ʻa e ngaahi ʻuluʻi fakamatala ʻo e vahé pe ngaahi potufolofola naʻá ke fakaʻilongaʻi ʻi hoʻo ako ʻa e tohi 3 Nīfaí mo fakakaukau pē ki he meʻa tatau.

• Ko e hā ha niʻihi ʻo e ngaahi meʻa mahuʻinga taha kuó ke ako pe ongoʻi fekauʻaki mo Sīsū Kalaisí ʻi hoʻo ako ʻEne ngāue fakaetauhi ki he kakai Nīfaí? Ko e hā hono ʻuhingá?

Hili hono maʻu ʻe he kau akó ha taimi ke fakakaukau mo hiki ai ʻenau tali ki he ongo fehuʻi ko ʻení, te ke lava ʻo vahevahe ʻa e kau akó ki ha fanga kiʻi kulupu tokosiʻi ke nau vahevahe ʻa e meʻa ne nau tohí. ʻE lava foki ke hoko ʻeni ko ha faingamālie lelei ke fakaafeʻi ai ha niʻihi ʻe loto-fiemālie ke nau vahevahe mo e kalasí ʻenau fakamoʻoni fekauʻaki mo e meʻa kuo nau ako mo ongoʻi fekauʻaki mo Sīsū Kalaisí.

Ko e kau atu ki hono tānaki ʻo ʻIsilelí

ʻOku fakataumuʻa ʻa e konga ko ʻeni ʻo e lēsoní ke tokoniʻi ʻa e kau akó ke nau fakakaukau ki he founga ʻoku nau kau pe ʻe lava ke nau kau ai ki hono tānaki ʻo ʻIsilelí.

ʻI hoʻo ako ʻa e 3 Nīfai 15–16; 20–22; mo e 25, naʻá ke ako ai ki he finangalo ʻa e ʻEikí ke tānaki ʻa ʻIsilelí. Mahalo kuó ke palani ke tokoniʻi ha taha ke ʻunu ke ofi ange kia Sīsū Kalaisi pea mo kau atu ki he ngāue fakatemipalé pe hisitōlia fakafāmilí.

Kapau naʻá ke fakaafeʻi ʻa e kau akó ke nau faʻu ha palani ke tokoni ke tānaki ʻa ʻIsileli ʻi hoʻomou ako ʻa e ngaahi vahe ʻoku lave ki ai ʻi he palakalafi kimuʻá, tuku ange ha taimi ke nau toe vakaiʻi ai ʻenau palaní.

Ko e kau ako ko ia kuo teʻeki ke nau faʻu ha palaní, ʻe ala tokoni ke tā ha foʻi siakale ʻi he palakipoé. ʻE lava ke fakafofongaʻi ʻe he lotoʻi siakalé ʻa e niʻihi ko ia kuo tānaki ki ʻIsilelí. Fakaafeʻi ʻa e kau akó ke nau tohi ʻi loto ʻi he siakalé ʻa e ngaahi founga kehekehe ʻe lava ke tokoni ai ʻa e toʻu tupú ki he ʻEikí ʻi hono tānaki ʻo ʻIsilelí. ʻE lava ke kau ʻi ha sīpinga ʻe taha ʻa hono vahevahe ʻa e ngaahi akonaki mei he Tohi ʻa Molomoná mo e niʻihi kehé, ʻo tatau ai pē pe ko e vahevahe fakahangatonu, ko e mītia fakasōsialé, pe ko ha toe founga kehe.

Tuku ha kiʻi taimi ke toe vakaiʻi ai ʻa e ngaahi palani naʻá ke toki faʻú ke tokoni ki hono tānaki ʻo ʻIsilelí.

Fakaʻaongaʻi ha konga pe kotoa ʻo e ngaahi fehuʻi ko ʻení ke tokoni ki hono siviʻi hoʻo fakalakalaka ʻi hoʻo ngaahi palaní:

• Ko e hā ha meʻa kuó ke fai ke ngāueʻi ai ho palaní?

• Ko e hā ha meʻa naʻá ke ako mei hono ngāueʻi hoʻo palaní? Naʻe founga fēfē hoʻo tupulakí?

• Ko e hā ha meʻa ʻokú ke kei fakaʻamu ke fakahoko ke kau ʻi hono tānaki ʻo ʻIsilelí?