“3 Nīfai 28: Fakaʻamu ke ʻOmi ʻa e Niʻihi Kehé kia Sīsū Kalaisí,” Tohi ʻa Molomoná – Tohi Lēsoni ʻa e Faiakó (2024)
“3 Nīfai 28,” Tohi ʻa Molomoná – Tohi Lēsoni ʻa e Faiakó
3 Nīfai 28
Fakaʻamu ke ʻOmi ʻa e Niʻihi Kehé kia Sīsū Kalaisí
Ko e taha ʻo e ngaahi holi maʻongoʻonga taha ʻe lava ke tau maʻu ʻi heʻetau moʻuí ko hono tokoniʻi ʻa e kakai kehé ke nau maʻu ʻa e ngaahi tāpuaki ʻoku foaki mai ʻe Sīsū Kalaisi mo ʻEne Fakaleleí (vakai, Tokāteline mo e Ngaahi Fuakava 15:6). Naʻe fakaʻaliʻali ʻeni ʻe ha kau ākonga Nīfai ʻe toko tolu ʻi ha founga makehe ʻi he taimi naʻa nau holi ai ke nofo ʻi he māmaní pea ʻomi ha ngaahi laumālie kia Sīsū Kalaisi kae ʻoua kuo aʻu ki Heʻene Hāʻele ʻAnga Ua Maí. ʻOku fakataumuʻa ʻa e lēsoni ko ʻení ke tokoniʻi koe ke ke ongoʻi ha loto-holi lahi ange ke ʻomi ʻa e niʻihi kehé kia Sīsū Kalaisi.
Tokoniʻi ʻa e kau akó ke nau ako ke falala kia Sīsū Kalaisi. ʻI he feinga ʻa e kau akó ke muimui ʻia Sīsū Kalaisí, mahalo te nau ongoʻi veiveiua fekauʻaki mo ʻenau tuʻunga malava ke fakahoko honau ngaahi fatongiá pe ngāué. Fakamanatu ki he kau akó ko e taimi ʻoku nau ngāue ai ʻi he tuí, ʻe fakamālohia kinautolu ʻe he ʻEikí. Poupouʻi kinautolu ke fekumi ki ha tataki mo ha loto-toʻa ʻaki ʻenau tafoki ki he Tamai Hēvaní ʻi he lotu.
Teuteu ʻa e tokotaha akó: Fakaafeʻi ʻa e kau akó ke fakakaukau ki ha ngaahi aʻusia kuo nau maʻu ʻi hono vahevahe ʻo e ongoongoleleí pea mo e meʻa naʻá ne tokoniʻi kinautolu ke maʻu ʻa e loto-holi ke fakahoko ʻa e meʻa naʻa nau faí.
Ngaahi ʻEkitivitī Ako ʻOku Ala Fakahokó
Ko e hā ʻa e meʻa ʻokú ke fiemaʻú?
Fakakaukau ke fakaafeʻi ʻa e kau akó ke fakalaulauloto ki he ongo fehuʻi ko ʻení.
-
Ko e hā haʻo tali kapau naʻe hā atu ʻa Sīsū Kalaisi kiate koe ʻo fehuʻi atu, “Ko e hā ʻa e meʻa [‘okú ke] fie maʻu meiate aú?”
-
Ko e hā naʻá ke fili ai ʻa e meʻa naʻá ke filí?
Fakakaukau ke fakaafeʻi ha kau ako ʻe niʻihi ʻe fiemālie ke vahevahe ʻenau ngaahi talí.
Lolotonga ʻa e ngāue fakafaifekau ʻa e Fakamoʻuí ʻi he lotolotonga ʻo e kau Nīfaí, naʻá Ne fai ʻa e fehuʻi ko ʻení ki Heʻene kau ākongá (vakai, 3 Nīfai 28:1).
Lau ʻa e 3 Nīfai 28:2–6, ʻo kumi ʻa e tali ʻa e kau ākonga Nīfaí ki he fehuʻi ʻa e Fakamoʻuí.
-
Ko e hā ʻa e meʻa naʻá ke maʻú?
Naʻe fakahā ʻe he Fakamoʻuí ʻi he veesi 6, naʻe fiemaʻu ʻe ha toko tolu ʻo e kau ākonga Nīfaí ʻa e meʻa tatau naʻe fiemaʻu ʻe Sione ʻOfeiná. Lau ʻa e Tokāteline mo e Ngaahi Fuakava 7:1–3, ʻo kumi ʻa e meʻa naʻe fiemaʻu ʻe Sioné.
-
ʻOkú ke pehē ko e hā naʻe fie nofo ai pē ʻa e kau ākonga ʻe toko tolu ko ʻení ʻi he māmaní?
Fakakaukau ki he holi ʻokú ke maʻu ke ʻomi ʻa e kakaí kia Sīsū Kalaisí. ʻE lava ke tokoni ʻa e vakaiʻi fakataautaha ko ʻení ke ke fakahoko ai ʻeni.
Fakakaukau ke fakaʻaliʻali ʻa e ʻekitivitī ko ʻení pea fakaafeʻi ʻa e kau akó ke vakaiʻi fakalongolongo pē kinautolu. ʻOua naʻá ke kole ki he kau akó ke vahevahe ʻenau ngaahi talí mo e kalasí.
Tali ʻa e fakamatala takitaha ko ʻení ʻaki ha taha ʻo e ngaahi tali ko ʻení: “maʻu pē,” “taimi ʻe niʻihi,” pe “tātātaha.”
-
ʻOku ou fekumi ki ha ngaahi faingamālie ke talanoa ki he kakaí fekauʻaki mo Kalaisi.
-
ʻOku ou lotua ha ngaahi faingamālie ke kumi ha kakai ke talanoa kiate kinautolu fekauʻaki mo Kalaisi.
-
ʻOku ou maʻu ha loto-holi ke tokoni ki he niʻihi kehé ke muimui ʻia Sīsū Kalaisi.
Fakatupulaki hoʻo loto-holi ke tokoni ki he niʻihi kehé ke haʻu kia Kalaisí
Makehe mei hono tā ʻe he kau akó ʻa e fakatātā ko ʻení ʻi heʻenau tohinoa akó, te ke lava ʻo tā ia ʻi he palakipoé.
Tā ʻi he vaeuaʻanga mālie ʻo ha peesi ʻi hoʻo tohinoa akó ha kiʻi fakatātā faingofua ʻokú ne fakafofongaʻi ha toʻu tupu ʻoku ʻikai ke ne maʻu ha loto-holi ke vahevahe ʻa e ongoongoleleí mo e niʻihi kehé. Hiki ʻi he ngaahi feituʻu ʻatā takatakai ʻi he kiʻi fakatātaá ha niʻihi ʻo e ngaahi ʻuhinga ʻoku ʻikai fie vahevahe ai ʻe he toʻu tupu ko ʻení ʻa e ongoongoleleí. Fakaʻatā ha feituʻu ke hiki ai ʻa e ngaahi moʻoni te ke ʻilo ʻi hoʻo ako he ʻaho ní.
ʻI he hokohoko atu hoʻo akó, kumi ʻa e ngaahi akonaki ʻe lava ʻo tokoni ki ha taha ke ne ongoʻi ha loto-holi lahi ange ke vahevahe ʻa e ongoongoleleí.
Lau ʻa e 3 Nīfai 28:7–10, ʻo kumi ʻa e meʻa naʻe talaʻofa ʻe he ʻEikí ki he kau ākonga Nīfai naʻe fakaʻamu ke nofo ʻi he māmaní ke ʻomi ha ngaahi laumālie kiate Iá.
-
Ko e hā ha tāpuaki naʻe foaki ʻe Sīsū kiate kinautolu ʻi he veesi 7–8 ke nau lava ʻo fakahoko ʻa e ngaahi meʻa naʻa nau fakaʻamu ki aí?
-
Ko e hā naʻe talaʻofa ʻe he Fakamoʻuí ki Heʻene kau ākongá te nau maʻu ʻi he veesi 9–10 koeʻuhí ko ʻenau ngaahi holi māʻoniʻoní?
Kuo talaʻofa mai ʻe he ʻEikí ʻi hotau kuongá, ha ngaahi tāpuaki kiate kinautolu ʻoku fekumi ke ʻomi ha ngaahi laumālie kiate Iá. Lau ʻa e Tokāteline mo e Ngaahi Fuakava 18:15–16, ʻo kumi ʻa e ngaahi tāpuaki ʻe lava ke tau aʻusia ʻi hono ʻomi ha ngaahi laumālie kia Sīsū Kalaisí.
-
Ko e hā ha moʻoni te tau lava ʻo ako mei he ongo veesi ko ʻení fekauʻaki mo e founga ʻe lava ke tāpuekina ai kitautolu ʻi heʻetau feinga ke ʻomi ʻa e ngaahi laumālié kia Sīsū Kalaisí?
Ko ha moʻoni ʻe taha ʻe lava ke tau ako mei he ongo veesi ko ʻení ko e taimi ʻoku tau feinga ai ke ʻomi ha ngaahi laumālie kia Sīsū Kalaisí, te tau lava ʻo aʻusia ʻa e fiefiá. Fakakaukau ke hiki ʻa e moʻoni ko ʻení ʻi he fakatātā naʻá ke taá.
-
ʻOkú ke pehē ko e hā ʻoku hoko ai hono ʻomi ha ngaahi laumālie kia Sīsū Kalaisí ko ha fiefiaʻangá?
-
ʻE tokoni fēfē nai ʻa hono maʻu ha mahino ki he foʻi moʻoni ko ʻení ke ongoʻi ai ʻe ha tokotaha ha loto-holi lahi ange ke vahevahe ʻa e ongoongoleleí?
Fekumi ki ha ngaahi potufolofola pe fakamatala kehe ʻa e kau taki ʻo e Siasí ʻe lava ʻo tokoni ke fakatupulaki ʻetau loto-holi ke vahevahe ʻa e ongoongoleleí. Te ke lava ʻo fakaʻaongaʻi ʻa e ngaahi naunau ki he akó hangē ko e Ngaahi Tefito ʻo e Ongoongoleleí pe ko e Fakahinohino ki he Ngaahi Folofolá ke fekumi ki he ngaahi tefito hangē ko e “Ngāue Fakafaifekaú,” pe ko hoʻo ako ha niʻihi pe kotoa ʻo e ngaahi veesi ko ʻení. Tānaki ki he fakatātā ʻi hoʻo tohinoa akó ha ngaahi moʻoni ʻokú ke maʻu.
Fakaʻaliʻali ʻa e ngaahi veesi ko ʻení. ʻOange ha taimi ki he kau akó ke nau ako ai ʻa e ngaahi veesi ko ʻení pe ngaahi veesi kehe pe fakamatala ʻa e kau taki ʻo e Siasí ʻoku nau maʻu ʻiate kinautolu pē.
Fakaafeʻi ʻa e kau akó ke vahevahe ʻa e meʻa naʻa nau ako mei heʻenau akó. Makehe mei hono fai ʻo e fehuʻi ko ʻení, te ke lava ʻo fakaafeʻi ke nau hiki takatakai ʻa e ngaahi moʻoni ne nau maʻú ʻi he fakatātā ʻi he palakipoé.
-
Ko e hā ha ngaahi akonaki naʻá ke maʻu ʻe lava ʻo tokoni ki ha taha ke ne ongoʻi ha loto-holi lahi ange ke vahevahe ʻa e ongoongoleleí? ʻOkú ke pehē ko e hā ʻe tokoni ai ʻa e ngaahi akonaki ko ʻení?
-
Ko e hā ha ngaahi aʻusia kuó ne tokoniʻi koe ke ke ʻilo ʻa e ngaahi tāpuaki ʻe lava ke maʻu ʻi he taimi ʻoku tau vahevahe ai ʻa e ongoongoleleí?
Ke vakai ki ha ngaahi sīpinga ʻo e founga naʻe tāpuekina ai ha niʻihi fakafoʻituitui ʻo fakafou ʻi he ngāue fakafaifekaú, fakakaukau ke mamata ʻi he “Your Day for a Mission” (3:31) pe “By Small and Simple Things: Sharing the Gospel” (3:19). ʻE lava ke maʻu ʻa e ongo vitioó fakatouʻosi ʻi he ChurchofJesusChrist.org.
Fakakaukau ki he meʻa kuó ke ako pe ongoʻi he ʻahó ni naʻá ne tākiekina hoʻo loto-holi ke tokoni ki he niʻihi kehé ke nau haʻu kia Kalaisí. Lekooti ʻi hoʻo tohinoa akó ha faʻahinga fakakaukau pe ongo fakalaumālie kuó ke maʻu pea faʻu ha palani ke ngāueʻi hoʻo ngaahi ongó.
Fakakaukau ke fakamoʻoni ki he mālohi te tau lava ʻo maʻú pea mo e ʻofa ʻa e ʻOtuá te tau lava ʻo ongoʻi ʻi heʻetau ngāueʻi ʻa e loto-holi ke tokoniʻi ʻa e niʻihi kehé ke haʻu kia Sīsū Kalaisí.