3 Nīfai 8–10

Ko e Leʻo ʻo e Fakamoʻuí ʻi he Fakapoʻulí

ko ha fāmili mo ha kiʻi taʻahine kui ʻokú ne ongoʻi e laʻaá talu mei he ʻaho ʻe tolu ʻo e fakapoʻuli hili hono tutuki ʻo Sīsū Kalaisí

Naʻe fakaʻilongaʻi ʻe he fakaʻauha mo e fakapoʻuli lahi ʻi he Ongo ʻAmeliká, ʻa hono tutuki ʻo e Fakamoʻuí. Naʻe folofola ʻa Sīsū Kalaisi ki he kakaí ʻi ha taimi lolotonga e ʻaho ʻe tolu ʻo e fakapoʻuli matolú. ʻI he kuonga muʻá mo e taimí ni, ʻe lava ke hoko e ngaahi fakatamaki fakaenatulá, faingataʻaʻiá, mo e ngaahi ʻahiʻahí ko ha ngaahi faingamālie ke ako mo tafoki ai kia Sīsū Kalaisi. ʻE ʻomi ʻe he lēsoni ko ʻení ha ngaahi ʻulungaanga ʻo Sīsū Kalaisí ʻe lava ʻo tokoni atu ke ke ongoʻi ha ʻofa mo ha falala lahi ange kiate Ia.

Poupouʻi e kau akó ke tokanga taha kia Sīsū Kalaisi. Tokoni ki he kau akó ke fakatefito ʻenau ako ki he ongoongoleleí ʻia Sīsū Kalaisí kae lava ke fakamālohia ʻe he Laumālie Māʻoniʻoní ʻa ʻenau mahino mo e houngaʻia ʻiate Iá. Ko e founga ʻe taha ke fai ai ʻení ko hono fai ha ngaahi fehuʻi ʻe tokoni ki he kau akó ke nau fekumi ki ha fakamoʻoni ʻo Hono mālohí, ʻaloʻofá, mo e misiona fakaleleí.

Teuteu ʻa e tokotaha akó: Fakaafeʻi e kau akó ke lau ʻa e 3 Nīfai 8, ʻo fakakaukauloto pe naʻe mei fēfē nai kapau naʻa nau ʻi ai lolotonga e ngaahi meʻa ko ʻeni naʻe hokó.

Ngaahi ʻEkitivitī Ako ʻOku Ala Fakahokó

“Fuʻu matangi lahi”

ʻahiohio ʻoku fononga ʻi ha ngoueʻanga

tapa ʻa e ʻuhilá

faʻaki ʻa e ʻuha mo e havili ʻo ha matangi ki ha kolo

Fehuʻi ki he kau akó pe ʻoku ʻi ai ha taha ʻiate kinautolu kuó ne ʻi ha matangi fakalilifu, fītaʻa pe aʻusia ha faʻahinga fakatamaki fakaenatula kehe. Fakaafeʻi ha toko taha pe toko ua ke vahevahe pe naʻe fēfē ʻenau aʻusiá, pe ko hoʻo vahevahe ha aʻusia naʻá ke maʻu.

ʻI he taimi naʻe tutuki ai ʻa Sīsū Kalaisi ʻi Selusalemá, naʻe fakatupu ʻe ha matangi mo ha mofuike fakalilifu ʻi he ongo ʻAmeliká ha fakaʻauha lahi. Naʻe fakahoko ʻe he ngaahi meʻá ni ʻa e kikite ʻa Samuela ko e tangata Leimaná fekauʻaki mo e ngaahi fakaʻilonga ʻo e pekia ʻa e Fakamoʻuí (vakai, Hilamani 14:20–27).

Lau ʻa e 3 Nīfai 8:5–22 ke ako fekauʻaki mo e ngaahi fakaikiiki ʻo e ngaahi meʻa fakalilifu ko ʻeni naʻe hokó. Te ke lava foki ʻo mamata ʻi he foʻi vitiō, “Ko e Hā ʻa Sīsū Kalaisi ʻi he Ongo ʻAmelika he Kuonga Muʻá,” mei he time 0:00–3:19. ʻOku maʻu ʻa e vitioó ʻi he ChurchofJesusChrist.org.

• Ko e hā naʻá ke mei fakakaukau ki ai pe ongoʻi kapau naʻá ke aʻusia ʻa e ngaahi meʻa ko ʻení?

ʻI he ngaahi taʻu kimuʻa ʻi he fakaʻauha ko ʻení, naʻe tafoki ha tokolahi ʻo e kau Nīfaí mei he ʻEikí pea kapusi ki tuʻa ʻa e kau palōfita kuo fekauʻi mai ʻe he ʻOtuá ke malanga kiate kinautolú (vakai, 3 Nīfai 7:7–8, 14, 21).

Lau ʻa e 3 Nīfai 8:23–25, ʻo kumi ʻa e meʻa naʻe fai ʻe kinautolu naʻa nau hao moʻuí hili ʻenau aʻusia e ngaahi tūkunga fakaʻauha ko ʻení.

• Te ke fakamatalaʻi fēfē nai ʻenau ngaahi ongó?

Ngaahi moʻoni fekauʻaki mo Sīsū Kalaisí

ʻI he tangi ʻa e kakaí ʻi he fakapoʻulí, naʻa nau fanongo ki he leʻo ʻo Sīsū Kalaisí ʻoku folofola mai kiate kinautolu. Naʻá Ne folofola ʻaki ha ngaahi kolo lahi peá Ne fakamatalaʻi kuo fakaʻauha e ngaahi kolo mo e kakai ko iá koeʻuhí ko ʻenau faiangahalá. Naʻá Ne akoʻi leva ki he kakaí ha ngaahi moʻoni mahuʻinga lahi fekauʻaki mo Ia.

Makehe mei hono faʻu ʻe he kau akó ʻa e lisi ʻoku fakamatalaʻi atu ʻi he palakalafi ko ʻení, fakakaukau foki ke faʻu ha lisi ʻe lava ke fakaʻaliʻali ki hoʻo kalasí ʻi he kotoa hoʻomou ako e 3 Nīfaí. Te ke lava ʻo fakaʻaongaʻi ha pousitā lahi pe laʻipepa ke hiki ai e ʻuluʻi tohi ʻoku hiki atu ʻi laló ʻi he mataʻitohi fakahihifí. Hiki takatakai heni e ngaahi ʻilo naʻe maʻu ʻe he kau akó fekauʻaki mo Sīsū Kalaisi lolotonga ʻa e lēsoni ko ʻení pea ʻi he ngaahi lēsoni hokó.

Ke tokoni atu ki hono fokotuʻutuʻu ʻo e ngaahi moʻoni ko ʻení, faʻu ha ʻuluʻi tohi ʻi hoʻo tohinoa akó ʻoku ui ko e: Ako fekauʻaki mo Sīsū Kalaisi ʻi he 3 Nīfaí. Mahalo te ke fie tuku ha ngaahi peesi lahi ʻi hoʻo tohinoa akó ke ke lava ʻo tānaki atu ha ngaahi moʻoni ki he lisi ko ʻení lolotonga hoʻo ako e ngāue fakafaifekau ʻa e Fakamoʻuí ki he kau Nīfaí ʻi he ngaahi uike siʻi ka hokó.

Fakapapauʻi ke ʻoange ha taimi feʻunga ki he kau akó ke nau maʻu ha aʻusia mahuʻingamālie ʻi hono ako ʻo e folofola ʻa e Fakamoʻuí ʻi he ngaahi veesi ko ʻení. Mahalo naʻa ʻaonga ke tā ha ngaahi fasi ʻapasia pea tuku ke nau ako fakafoʻituitui.

Te ke lava foki ʻo vahevahe ʻa e kau akó ki ha fanga kiʻi kulupu iiki pea vahe ki he kulupu takitaha ke ako mo aleaʻi ha taha ʻo e ngaahi potufolofola ko ʻení: 3 Nīfai 9:13–18; 3 Nīfai 9:19–22; 3 Nīfai 10:4–7; mo e 3 Nīfai 10:8–12. ʻE lava ke fakaafeʻi ʻa e kau mēmipa mei he kulupu takitaha ke vahevahe ʻa e meʻa naʻa nau ako fekauʻaki mo Sīsū Kalaisi mei he ngaahi veesi naʻa nau akó.

Lau ʻa e 3 Nīfai 9:13–22 mo e 10:4–12, ʻo kumi ʻa e meʻa naʻe akoʻi ʻe Sīsū Kalaisi ki he kakaí ni fekauʻaki mo Iá. Hiki e ngaahi moʻoni ko ʻení ʻi lalo ʻi he ʻuluʻi tohi ʻi hoʻo tohinoa akó.

Hili hano maʻu ʻe he kau akó ha taimi feʻunga ke nau ako aí, aleaʻi ʻa e meʻa naʻa nau akó. ʻOange ki ha kau akó ha faingamālie ke vahevahe ʻenau ngaahi fakakaukau mo e ongo kau kia Sīsū Kalaisí. Fakaʻaongaʻi ha ngaahi fehuʻi hangē ko ʻení ke tokoni ki hono tataki ʻo e fealēleaʻaki ko ʻení.

• Ko e hā naʻe akoʻi ʻe he Fakamoʻuí fekauʻaki mo Ia naʻe mātuʻaki mahuʻinga kiate koé? Ko e hā hono ʻuhingá?

  ʻE lava ke ʻilo ʻe he kau akó ha ngaahi moʻoni lahi fekauʻaki mo Sīsū Kalaisi. Mahalo te ke fiemaʻu ke fakapapauʻi ʻoku fakatokangaʻi ʻe he kau akó ʻa e meʻá ni: ʻOku fakamafao mai e toʻukupu ʻaloʻofa ʻo Sīsū Kalaisí kiate kitautolu (3 Nīfai 9:14); Ko Sīsū Kalaisi ʻa e maama mo e moʻui ʻo e māmaní (3 Nīfai 9:18); ʻOku kole mai ʻa Sīsū Kalaisi ke tau foaki kiate Ia ha loto-mafesifesi mo ha laumālie fakatomala (3 Nīfai 9:20); ʻOku finangalo ʻa Sīsū Kalaisi ke fakatahatahaʻi mo maluʻi kitautolu (3 Nīfai 10:4–7).

  Fakakaukau ke hiki e ngaahi moʻoni ko ʻení ʻi he palakipoé. Te ke lava ʻo fakaafeʻi ʻa e kau akó ke kumi ha ngaahi fakamatala kehe ʻi he folofolá ʻoku fakahaaʻi ai ʻe Sīsū Kalaisi ha foʻi moʻoni ʻe taha pe lahi ange kuo nau ʻilo fekauʻaki mo Ia.

  Ke maʻu ha ngaahi fakakaukau fekauʻaki mo e founga te ke lava ai ʻo fakaʻaongaʻi ha taimi lahi ange ʻi ha niʻihi ʻo e ngaahi akonaki pau ʻa e Fakamoʻuí mei he ngaahi veesi ko ʻení, vakai ki he konga “Ngaahi ʻEkitivitī Fakalahi ki he Akó”.

• ʻE liliu fēfē ʻe he ngaahi moʻoni kuó ke ako fekauʻaki mo Sīsū Kalaisí hoʻo ʻofa mo e falala kiate Iá?

• Ko e hā ha ngaahi tūkunga kuó ke ʻi ai, pe te ke ʻi ai, ʻa ia ʻe mahuʻinga ai hoʻo manatu ki ha taha ʻo e ngaahi moʻoni ko ʻení pe ki ha ngaahi moʻoni lahi ange?

Fakamoʻoni ki he ngaahi moʻoni kuo mou aleaʻi ʻi he ʻaho ní. Poupouʻi e kau akó ke hokohoko atu ʻenau fekumi ki he ngaahi moʻoni mahuʻinga fekauʻaki mo Sīsū Kalaisí ʻi he hokohoko atu ʻenau ako ʻEne ngāue fakafaifekau ʻi he lotolotonga ʻo e kau Nīfaí.

Fakamatala Fakamahinó mo e Puipuituʻá

ʻE fakamolemoleʻi moʻoni nai au ʻe Sīsū Kalaisi ʻi he taimi kuó u fai ai ha ngaahi fehalaaki lahí?

Naʻe fakamamafaʻi ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá:

Palesiteni Boyd K. Packer

Kuó u maʻu ha ʻū tohi meiate kinautolu kuo nau fai ha fehalaaki fakamamahi. ʻOku nau ʻeke mai, “ʻE lava ʻapē ke fakamolemolea au?”

Ko e talí ko e ʻio!

ʻOku akoʻi kitautolu ʻe he ongoongoleleí ʻe lava ke maʻu ʻa e tauʻatāina mei he mamahí mo e halaiá tuʻunga ʻi he fakatomalá. Tuku kehe ʻa e tokosiʻi kuo fili ki he malaʻia taʻengatá ʻi he hili ʻenau maʻu hono kakató, ʻoku ʻikai ha faʻahinga ʻulungaanga, anga tuʻu maʻu, fakafepaki, maumau fono, pe ha faihala ʻe fakasītuʻaʻi mei he fakamolemole kakató. (Boyd K. Packer, “The Brilliant Morning of Forgiveness,” Ensign, Nov. 1995, 19)

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻEletā Jeffrey R. Holland

ʻOku ʻikai fuʻu tokanga fēfē ʻa e ʻOtuá ia ki he tuʻunga naʻá ke ʻi aí ʻo tatau mo ʻEne tokanga ki he tuʻunga ʻokú ke ʻi aí pea, ʻi Heʻene tokoní, ki he tuʻunga ʻokú ke fie hoko atu ki aí. (Jeffrey R. Holland, “Ko e Lelei Tahá ʻOku Teʻeki ke Aʻusia,” [fakataha lotu ʻa e ʻUnivēsiti Pilikihami ʻIongí, 13 Sānuali, 2009], 27, speeches.byu.edu)

3 Nīfai 9:20. ʻOku ʻuhinga nai ki he hā ke maʻu ha loto-mafesifesi mo ha laumālie fakatomalá?

Naʻe akoʻi ʻe Palesiteni ʻEsela Tafu Penisoni (1899–1994) ʻa e ngaahi meʻá ni fekauʻaki mo ha loto-mafesifesi mo e laumālie fakatomalá:

Palesiteni Ezra Taft Benson

ʻOku kau ʻi he fakatomala moʻoní ha liliu ʻo e lotó kae ʻikai ko e liliu pē ʻo e tōʻonga moʻuí (vakai, ʻAlamā 5:13). Ko ha konga ʻo e fuʻu liliu lahi ko ʻeni ʻo e lotó ko hano ongoʻi ʻa e mamahi faka-ʻotuá koeʻuhí ko ʻetau ngaahi angahalá. Ko e ʻuhinga ʻeni ʻo e loto-mafesifesi mo e laumālie fakatomalá. ʻOku feʻunga pē ngaahi meʻafoaki ʻa e ʻOtuá ke tokoniʻi kitautolu ke tau ikunaʻi ʻetau ngaahi angahala mo e vaivai kotoa, kapau te tau tafoki kiate Ia ke maʻu ha tokoni. Kuo pau ke tau manatuʻi ko e lahi taha ʻo e fakatomalá ʻoku ʻikai kau ai ha ngaahi fuʻu liliu lahi pe ʻilo lahia fēfē, ka ko ha ngaʻunu, pau, mo fai maʻu ai pē, ʻi he sitepu ki he sitepu, ki he anga faka-ʻotuá. (Teachings of Ezra Taft Benson [1988], 71.)

Naʻe pehē ʻe ʻEletā Pulusi D. Poota (1952–2016) ʻo e Kau Fitungofulú:

ʻEletā Bruce D. Porter

Ko e anga vaivai haohaoa ʻa e Fakamoʻuí ki he Tamai Taʻengatá ko e fakatātā mahino ia ʻo e loto-mafesifesí mo e laumālie fakatomalá. ʻOku akoʻi mai ʻe he sīpinga ʻa Kalaisí kiate kitautolu ko e loto mafesifesí ko ha ʻulungaanga taʻengata ia ʻo e anga faka-ʻOtuá. ʻI heʻetau loto mafesifesí, ʻoku tau mātuʻaki fakaongo ai ki he Laumālie ʻo e ʻOtuá ʻo fakatokangaʻi ʻetau fakafalala kiate Ia ʻi he meʻa kotoa pē ʻoku tau maʻú mo e meʻa kotoa pē ʻoku tau hoko ki aí. Ko e feilaulau ʻoku feʻunga mo ʻení ko ha feilaulau ʻo e loto-hīkisiá ʻi hono faʻunga kotoa pē. Hangē ko e ʻumea ʻoku fakafuo ngofua ʻi he nima ʻo ha taukei tufunga ʻumeá, ʻoku pehē pē ʻa e malava ʻa e loto-mafesifesí ke faʻu mo fakafuo ʻi he toʻukupu ʻo e ʻEikí. …

… Ko kinautolu ʻoku nau maʻu ʻa e loto-mafesifesí mo e laumālie fakatomalá ʻoku nau fiemālie ke fai ha meʻa pē pea mo e meʻa kotoa pē ʻe kole ʻe he ʻOtuá meiate kinautolú, ʻo ʻikai ha fakafepaki pe tāufehiʻa. ʻOku ʻikai ke tau kei fai ʻa e meʻa kotoa pē ʻi heʻetau founga pē ʻatautolú, ka ke fai ia ʻo fakatatau ki he founga ʻa e ʻOtuá. (Bruce D. Porter, “A Broken Heart and a Contrite Spirit,” Ensign pe Liahona, Nov. 2007, 32)

Ngaahi ʻEkitivitī Fakalahi ki he Akó

3 Nīfai 9:14. “ʻOku mafao atu hoku nima ʻo e ʻaloʻofá kiate kimoutolu”

ʻE lava ke fakaafeʻi ʻa e kau akó ke nau fakakaukau ki he ngaahi fakakaukau hala ʻe ala maʻu ʻe he kakai kuo nau tafoki mei he ʻOtuá fekauʻaki mo Ia pe ko ʻEne ngaahi ongo kiate kinautolú. ʻE lava ke hiki e ngaahi tali ʻa e kau akó ʻi he palakipoé. Hili iá pea fakaafeʻi e kau akó ke lau ʻa e 3 Nīfai 9:13–14, 22, ʻo kumi e ngaahi lea mei he Fakamoʻuí ʻe lava ʻo tokoni ke fakatonutonu ʻaki e ngaahi fakakaukau hala ko ʻení. ʻE lava foki ke hiki e ngaahi foʻi lea pe kupuʻi lea ko ʻení ʻi he palakipoé. Fakaafeʻi e kau akó ke aleaʻi ʻa e founga ʻe lava ke tākiekina ai honau ʻulungāngá ʻe he mahino ʻoku nau maʻu ki he folofola ʻa e Fakamoʻuí ʻi he ngaahi veesi ko ʻení hili ʻenau fai ha ngaahi fehalaākí.

3 Nīfai 9:18. “Ko au ko e maama pea mo e moʻui ʻo e māmaní”

ʻI hoʻo fakaafeʻi e kau akó ke lau e folofola ʻa e Fakamoʻuí ʻi he 3 Nīfai 9:18, fakaafeʻi kinautolu ke fakakaukau ki he ʻuhinga naʻe mei mahuʻingamālie makehe ai ʻEne pōpoakí ki he kau Nīfaí ʻi he ʻātakai fakatuʻasino ne nau ʻi aí. Te mou lava foki ʻo aleaʻi ʻa e ʻuhinga ʻoku hoko ai ʻa e Maama ʻo Māmaní ko ha huafa ʻoku feʻunga mo Sīsū Kalaisí. Fakakaukau ke fakaafeʻi e kau akó ke nau ako ha niʻihi pe kotoa ʻo e ngaahi potufolofola ko ʻení ke fakaloloto ʻenau mahino ki he moʻoni ko ʻení: Sione 8:12; 3 Nīfai 18:16, 24; Tokāteline mo e Ngaahi Fuakava 6:21; 88:7–13.

3 Nīfai 9:20. “Ko e loto mafesifesi mo e laumālie fakatomala”

Mahalo ʻe tokoni ke fakamanatu ki he kau akó kimuʻa pea hāʻele mai ʻa e Fakamoʻuí ki he māmaní, naʻe fekauʻi Hono kau muimuí ke nau feilaulauʻi ʻa e fanga monumanú ko ha konga ʻo e fono ʻa Mōsesé. Naʻe fakataipe ʻe he ngaahi feilaulau ko ʻení ʻa e feilaulau ʻe fakahoko ʻe he ʻAlo ʻo e ʻOtuá (vakai, Mōsese 5:5–8).

Fakaafeʻi e kau akó ke lau ʻa e 3 Nīfai 9:19–20, ʻo kumi ha fekau foʻou naʻe fakahoko ʻe he Fakamoʻuí fekauʻaki mo e feilaulaú. Ke tokoni ke mahino ki he kau akó ʻa e kupuʻi lea “te mou ʻoatu kiate au ʻa e feilaulau ko e loto-mafesifesi mo e laumālie fakatomalá” (3 Nīfai 9:20), fakakaukau ke fakaʻaongaʻi e lea ʻa ʻEletā Pulusi D. Poota ʻi he konga “Fakamatala Fakamahinó mo e Puipuituʻá”.

Aleaʻi ʻa e ʻuhinga ʻoku pehē ai ʻe he kau akó ʻe kole ʻe he Fakamoʻuí ke tau ʻoatu ha loto-mafesifesi mo ha laumālie fakatomala kiate Ia ko ha feilaulaú. Poupouʻi kinautolu ke fakakaukau ki ha ngaahi aʻusia kuo nau maʻu ʻa ia ne nau ongoʻi ai ha loto-mafesifesi mo ha laumālie fakatomala pea mo e meʻa naʻá ne tokoniʻi kinautolu ke nau ongoʻi peheé. ʻE ala tokoni ke vahevahe foki mo hoʻo ngaahi sīpingá.

ʻE lava ke fakaʻaongaʻi ʻa e fakamatala ko ʻeni ʻa ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ko ha konga ʻo e fealēleaʻakí:

“ʻOku ʻikai ko e feilaulau moʻoni mo fakatāutahá ʻa hono tuku ʻo ha monumanu ʻi he ʻōlitá. Ka, ko e loto-fiemālie ke tuku kitautolu [tangata fakakakanó] ki he funga ʻōlitá pea tuku ke fakamaʻá!” (Neal A. Maxwell, “Deny Yourselves of All Ungodliness,” Ensign, May 1995, 68).

3 Nīfai 10:6. “Ko e hā hano tuʻo lahi ʻo haʻaku tānaki fakataha ʻa kimoutolu”

Fakakaukau ke fakaʻaliʻali ʻa e fakatātā ko ʻení pea fakaafeʻi e kau akó ke nau sio ki ai ʻi heʻenau ako ʻa e 3 Nīfai 10:4–7. ʻOkú ke pehē ko e hā ha ngaahi moʻoni ʻoku fakaʻamu ʻa Sīsū Kalaisi ʻe mahino mo ongoʻi ʻe he kakaí fekauʻaki mo Ia mei he ngaahi veesi ko ʻení? Ko e hā ʻe mahuʻingamālie ai kiate koe ʻa e ngaahi moʻoni ko ʻení ʻi he taimi ʻokú ke aʻusia ai ha ngaahi taimi ʻo e faingataʻá?

Kuo Tuʻo Fiha, tā fakatātaaʻi ʻe Liz Lemon Swindle