Sa imong hunahuna unsa kaha ang bation sa Dios kanato kon kita makasala? Daghang mga Nephite misukol batok sa Dios ug sa Iyang mga sugo, busa ang Dios mipadala ni Samuel ang Lamanite ngadto kanila dala ang klaro nga mensahe nga maghinulsol aron sila mapasaylo. Kini nga leksiyon makatabang kanimo nga mas makasabot sa maluluy-on ug mapinasayloong kinaiya sa Ginoo.
Pagatutoki ang hiyas ug kinaiya sa Langitnong Amahan ug ni Jesukristo. Ang kinabuhing dayon mao ang pag-ila sa Langitnong Amahan ug ni Jesukristo (tan-awa sa Juan 17:3). Dapita ang mga estudyante sa pagpunting sa unsay gitudlo sa mga kasulatan mahitungod sa hiyas ug kinaiya sa Langitnong Amahan ug ni Jesukristo. Ang mas maayo nga pagsabot sa ilang hiyas ug kinaiya makapalig-on sa relasyon sa mga estudyante ngadto Kanila.
Pagpangandam sa estudyante: Dapita ang mga estudyante nga motambong nga andam mopakigbahin kon unsay ilang gibati human masinati ang maluluy-on ug mapinasayloong kinaiya sa Ginoo sa ilang kinabuhi. Pahinumdomi sila sa dili pagpakigbahin sa bisan unsa nga personal ra kaayo.
Mga Posibleng Kalihokan sa Pagkat-on
Pagkasubo gikan sa sala
Timan-i nga ang sunod nga leksiyon magatutok sa paghinulsol. Hunahunaa kini samtang gitino nimo kon sa unsang paagi labing maayong itudlo kini nga leksiyon.
Ipakita o basaha ang mosunod nga mga pamahayag. Sa laing paagi, dapita ang mga estudyante sa pagmugna og usa ka mahanduraw apan tinud-anay nga kahimtang sa usa ka tawo nga mahimong mibati og kamiserable o kapildihan tungod sa sala, ug gamita kana agig puli sa mosunod nga istorya.
Si Presidente Russell M. Nelson misulti sa mosunod nga istorya mahitungod sa usa ka babaye nga anaa sa malisod nga mga kahimtang. Hunahunaa kon unsay gusto nimong mahibaloan niya mahitungod sa Langitnong Amahan ug ni Jesukristo. Tan-awa ang “Repentance and Conversion,” anaa sa ChurchofJesusChrist.org, gikan sa time code nga 0:00 hangtod 0:50, o basaha ang mosunod nga pamahayag.
Imahe
Presidente Russell M. Nelson
“Samtang si Elder David S. Baxter ug ako nagmaneho padulong sa stake conference, mihunong kami sa usa ka kan-anan. Human niadto sa pagbalik sa among sakyanan, gisugat kami og usa ka babaye nga nanawag namo. Nakugang kami sa iyang pagpakita. Ang iyang hitsura (o walay pagtagad niini) maoy akong matinahurong gitawag og “hilabihan.”” Nangutana siya kung kami mga elder ba sa Simbahan. Miingon kami og oo. Hapit sa walay pagpugong-pugong, iyang gisulti ang istorya sa trahedya sa iyang kinabuhi, naglunang sa sala. Karon, 28 anyos pa lang, miserable na siya. Iyang gibati ang pagka walay bili, nga wala nay pulos ang pagpakabuhi pa. … Maluhaon nga naghangyo, nangutana siya kon duna pa ba siyay paglaom, bisan asa sa iyang kawalay paglaom. (Russell M. Nelson, “Paghinulsol ug Pagkakabig,” Liahona, Mayo 2007, 102)
Kon ikaw makigsulti niini nga babaye, unsa ang mga kamatuoran mahitungod sa Langitnong Amahan ug ni Jesukristo ang gusto nimo nga mahibaloan niya?
Unsay imong buhaton aron sa pagsulay sa pagtabang niini nga babaye?
Sa unsang paagi ang iyang kasamtangang gibati makaimpluwensiya sa iyang tinguha sa pagdangop sa Manluluwas?
Tingali ikaw o usa ka tawo nga imong nailhan mibati usab nga walay bili o dili mapasaylo. Pamalandongi kon unsa gayod ang imong gituohan mahitungod sa Langitnong Amahan ug ni Jesukristo ug sa kapasayloan.
Sa imong pagtuon niini nga leksiyon, pangitaa ang mga panabot mahitungod sa kinaiyahan sa Langitnong Amahan ug ni Jesukristo ug kon unsa ang ilang gibati mahitungod kanato bisan kon kita makasala. Pamalandongi kon sa unsang paagi kini nga mga kamatuoran makatabang kanimo ug sa imong mga kaila.
Samuel ang Lamanite
Sama niini nga babaye, ang mga Nephite nahimong nalunang diha sa sala. Sa Iyang gugma, ang Ginoo mipadala sa propeta nga si Samuel dala ang mensahe alang kanila.
Ipakita ang mosunod nga mga pakisayran. Ikonsiderar ang pagpares sa mga estudyante ug sa pagdapit sa usa ka estudyante sa pagbasa sa mga bersikulo diha sa kapitulo 13 ug ang lain nga mobasa sa mga bersikulo diha sa mga kapitulo 14ug 15. Human sa igong panahon, dapita ang mga estudyante sa pagtudlo sa usag usa kon unsay ilang nakit-an ug nganong importante kini kanila.
Basaha ang Helaman 13:5–8, 11, 39; 14:11–13; 15:3, ug pangitaa ang imong nakat-onan mahitungod sa Ginoo, ilabina ang mga panabot nga makatabang kanato kon kita makasala. (Mahimong makatabang ang pagkahibalo nga ang pagpanton [tan-awa sa Helaman 15:3] nagpasabot sa pagtul-id o pagdisiplina. Tan-awa sa Giya ngadto sa mga Kasulatan,“Pagpanton, Panton,” scriptures.ChurchofJesusChrist.org)
Dapita ang mga estudyante sa pagpakigbahin kon unsay ilang nakat-onan. Isulat diha sa pisara ang bisan unsang tinuod nga mga baroganan nga ilang ipakigbahin. Kon mapuslanon, ikonsiderar ang pagpangutana sa pipila sa mosunod nga mga pangutana.
Ngano nga kini usa ka panalangin nga makadawat og usa ka pasidaan bahin sa mga negatibo nga sangpotanan nga atong atubangon kon dili kita maghinulsol? Sa unsang paagi ang pagkorihir sa Ginoo nagpakita sa Iyang gugma?
Nganong ang mensahe bahin Jesukristo nga moanhi sa kalibotan, uban sa atong abilidad sa paghinulsol, mahimong “malipayon nga mga balita”? (Helaman 13:7).
Unsa nga mga hugpong sa mga pulong ang nagpakita sa kaandam sa Ginoo sa pagpasaylo kon ang mga Nephite maghinulsol, bisan tuod sila nakahimo og seryoso nga sala?
Samtang mopakigbahin ang mga estudyante sa mga hugpong sa mga pulong, seguroha nga klaro kon unsang bersikulo sila anaa aron ang ubang mga estudyante makamarka usab nianang mga hugpong sa mga pulong.
Ang kaluoy ug pagpasaylo sa Ginoo
Usa ka kamatuoran nga atong makat-onan gikan niini nga mga tudling mao nga ang Ginoo maluluy-on nga nagpasidaan sa mga tawo sa mga sangpotanan sa sala ug mopasaylo niadtong maghinulsol.
Sa unsang paagi nga ang pagsabot sa maluluy-on ug mapasayloong kinaiya sa Ginoo makaapekto sa atong pagbati bahin sa atong mga sala ug mahitungod sa paghinulsol?
Importante nga masabtan nga bisan tuod ang Ginoo maluluy-on, Siya usab hingpit nga makiangayon. Siya dili mobalewala o mosalikway sa mga sangpotanan sa atong mga sala. Apan tungod kay ang Manluluwas mibayad sa atong mga sala diha sa Iyang Pag-ula ug “nakatagbaw sa mga gipangayo sa kaangayan” (Mosiah 15:9), Siya nagtanyag kanato og kapasayloan kon kita maghinulsol.
Sa unsang paagi nga ang pagkahibalo sa hingpit nga kaangayan ug kaluoy sa Ginoo makaimpluwensiya sa imong relasyon Kaniya?
Hunahunaa ang kalainan nga mahimong mahatag sa mas lawom nga pagsabot sa Ginoo ngadto sa babaye nga gihisgotan ni Presidente Nelson sa sinugdanan sa leksiyon. Pag-andam og pagpasabot alang kaniya pinaagi sa paghimo sa mosunod:
Pahinumdomi ang mga estudyante sa paggamit sa ilang pagpangandam sa klase sa mosunod nga kalihokan. Mahimo nila nga kompletohon ang kalihokan nga manag pares. Ang usa ka estudyante mahimong mokompleto sa kalihokan A, ug ang lain sa kalihokan B. Mahimo nilang ipakigbahin ang ilang gibuhat sa usag usa ug dayon kompletohon ang kalihokan C nga magkauban.
Alang sa kalihokan C, ang mga estudyante mahimong mag drama-drama ingon nga sila nagtudlo sa babaye. Libot sa kwarto ug paminaw samtang nagtudlo sila. Tinoa kon nagkinahanglan silag dugang tabang sa pagsabot sa mensahe ni Samuel. Kon nagkinahanglan sila, ikonsiderar ang pagtudlo sa piho nga mga pulong o mga hugpong sa mga pulong gikan sa mga tudling aron matabangan sila sa kalihokan A.
Mahimo nimong ipakita ang mga instruksiyon alang sa matag kalihokan.
Pagpili og labing menos duha ka mga hugpong sa mga pulong gikan sa mga bersikulo nga imong nabasa diha sa Helaman, o pag-ila og ubang mga tudling nga naghulagway sa mapasayloong kinaiya sa Ginoo samtang kita maghinulsol, sama sa Mosiah 26:30 o Moroni 6:8. Sa unsang paagi kini nga mga hugpong sa mga pulong magtabang niini nga babaye?
Sa dili pagpakigbahin sa mga detalye bahin sa nangaging mga sala, paghatag usa ka panig-ingnan gikan sa imong kinabuhi, sa kinabuhi sa uban, o sa mga kasulatan diin ang maluluy-on ug mapinasayloon nga kinaiya sa Ginoo naklaro. Aron makakita og pipila ka mga panig-ingnan, mahimo nimong ribyohon ang Lucas 7:36–50 o Enos 1:1–8. o motan-aw sa “Painted into a Corner” (3:41). Kini nga bidyo anaa sa ChurchofJesusChrist.org.
Gamit ang mga tudling o ehemplo nga imong naila, tabangi ang babaye nga makasabot nga ang Ginoo mihatag sa Iyang kaluoy ug kapasayloan ngari kanato samtang kita maghinulsol.
Ikonsiderar usab ang pagpakigbahin og mga hugpong sa mga pulong o mga kasinatian.
Gipakigbahin ni Presidente Nelson kon unsa ang nahitabo niini nga babaye. Tan-awa ang “Paghinulsol ug Pagkakabig” gikan sa time code nga 0:50 hangtod sa 1:27, anaa sa ChurchofJesusChrist.org, o basaha ang mosunod nga pamahayag.
Imahe
Presidente Russell M. Nelson
Samtang siya nagsulti, ang kanindot sa iyang kalag misugod sa pagdan-ag. Maluhaon nga naghangyo, nangutana siya kon duna pa ba siyay paglaom, bisan asa sa iyang kawalay paglaom.
“Oo,” kami mitubag, “dunay paglaum. Ang paglaom gisumpay kana sa paghinulsol. Mahimo ka nga mag-usab. Mahimo ka nga “moduol ngadto ni Kristo, ug paghingpit diha kaniya[Moroni 10:32].” Amo siyang giaghat sa dili paglangay [tan-awa sa Alma 13:27; 34:33]. Siya mapaubsanong midanguyngoy ug matinuorong mipasalamat kanamo. (Russell M. Nelson, “Paghinulsol ug Pagkakabig,” Liahona, Mayo 2007, 102)
Pagpamatuod sa kaluoy ug kapasayloan sa Ginoo. Dapita ang mga estudyante sa matinud-anong pagpamalandong sa mosunod.
Ang sunod nga leksiyon magatutok sa paghinulsol ug sa unsa nga paagi kita makabuntog sa bisan unsang mga babag nga atong giatubang sa atong paghinulsol.
Paggahin og panahon sa pagpamalandong kon sa unsang paagi nga ang mas maayo nga pagsabot bahin sa Ginoo makatabang kanimo kon ikaw nakasala. Isulat unsa ang imong nakat-onan ug nabati nga labing makahuluganon kanimo ug ngano. Hunahunaa kon sa unsang paagi nga ang mas maayo nga pagsabot sa maluluy-on ug mapinasayloon nga kinaiya sa Ginoo ug ang kanunay paghinulsol makahatag og dugang nga kalinaw sa imong kinabuhi.
Ikonsiderar ang pagpakigbahin sa unsay imong nakat-onan ug gibati karon ngadto sa usa ka minahal sa kinabuhi.
