« ហេលេមិន ១–៤, ៦ ៖ ‹ មានការទាស់ទែងគ្នាជាខ្លាំង › » ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤ )
« ហេលេមិន ១–៤, ៦ » ព្រះគម្ពីរមរមន សៀវភៅសិក្សាសម្រាប់គ្រូបង្រៀន
ហេលេមិន ១–៤, ៦
« មានការទាស់ទែងគ្នាជាខ្លាំង »
តើអ្នកឃើញការទាស់ទែងគ្នា ការបែកបាក់ ការមិនចុះសម្រុង ឬការបះបោរនៅក្នុងពិភពលោកជុំវិញអ្នកនៅឯណា ? មិនយូរប៉ុន្មានបន្ទាប់ពីការស្លាប់របស់មេទ័ពមរ៉ូណៃ ហេលេមិន និងមេចៅក្រម ពេហូរ៉ាន នោះពួកសាសន៍នីហ្វៃបានទទួលរងផលវិបាកនៃការទាស់ទែងគ្នាជាច្រើន ។ ទោះជាយ៉ាងនេះក្ដី អ្នកខ្លះបានជ្រើសរើសស្វែងរកសន្តិភាពតាមរយៈព្រះយេស៊ូគ្រីស្ទ ។ មេរៀននេះអាចជួយសិស្សឲ្យយល់ពីផលនៃការទាស់ទែងគ្នា និងរបៀបរកឃើញសេចក្ដីសុខសាន្តនៅក្នុងព្រះគ្រីស្ទនៅក្នុងពិភពលោកនៃការទាស់ទែងគ្នានេះ ។
សូមជួយសិស្សបណ្ដុះនូវអារម្មណ៍នៃការមានចំណែក ។ ថ្នាក់សិក្ខាសាលាគួរតែជាទីជម្រកនៃសុវត្ថិភាពសម្រាប់សិស្ស ។ សូមផ្តល់ឱកាសសម្រាប់សិស្សដើម្បីបង្កើនការរួបរួម និងការយល់ដឹង នៅពេលពួកគេនិយាយ និងស្តាប់គ្នាទៅវិញទៅមក ។ សូមលើកទឹកចិត្តសិស្សឲ្យគោរព និងឲ្យតម្លៃបទពិសោធន៍ និងទស្សនៈរបស់អ្នកដទៃ ។
ការរៀបចំសិស្ស ៖ សូមអញ្ជើញសិស្សឲ្យអធិស្ឋានសម្រាប់នរណាម្នាក់ ឬអំពី អ្វីមួយដែលជាប្រភពនៃការទាស់ទែងគ្នានៅក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
ចំណាំ ៖ វដ្តនៃការឆ្មើងឆ្មៃនៅក្នុងព្រះគម្ពីរមរមនត្រូវបានគេលើកយកមកពិភាក្សាគ្នានៅក្នុងគម្រោងការសិក្សាសម្រាប់ ហេលេមិន ១–៦ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរមរមន ឆ្នាំ ២០២៤ ។
ការទាស់ទែងគ្នា
ដើម្បីជួយសិស្សឲ្យមើលឃើញពីផលប៉ះពាល់នៃការទាស់ទែងគ្នា សូមពិចារណាបង្កើតដ្យាក្រាមពពុះដូចរូបខាងក្រោមនៅលើក្ដារខៀន ហើយអញ្ជើញសិស្សឲ្យធ្វើដូចគ្នានៅក្នុងសៀវភៅកំណត់ហេតុការសិក្សារបស់ពួកគេ ។
សូមសរសេរពាក្យ ការទាស់ទែងគ្នា នៅចំកណ្តាលដ្យាក្រាមពពុះនេះ ។ ជុំវិញពាក្យនេះ សូមសរសេរផ្នែកខ្លះនៃជីវិតរបស់អ្នក ដែលអ្នកមើលឃើញការទាស់ទែងគ្នា ដូចជានៅលើប្រព័ន្ធផ្សព្វផ្សាយសង្គម ឬនៅក្នុងចំណោមមិត្តភក្តិ ។ អ្នកនឹងបន្ថែមទៅក្នុងដ្យាក្រាមនេះនៅពេលក្រោយនៅក្នុងមេរៀននេះ ។
អ្នកអាចអញ្ជើញសិស្សឲ្យសញ្ជឹងគិត ឬពិភាក្សាសំណួរខាងក្រោម ។
-
តើការទាស់ទែងគ្នាដោយផ្ទាល់ ឬដោយប្រយោលប៉ះពាល់ដល់ជីវិតរបស់អ្នកយ៉ាងដូចម្តេចខ្លះ ?
-
តើអ្នកឆ្លើយតបយ៉ាងដូចម្តេចនៅពេលអ្នកមិនយល់ស្របជាមួយអ្នកដទៃ ឬពេលប្រឈមមុខជាមួយបុគ្គលដែលមានចិត្តទាស់ទែង ?
នៅពេលអ្នកចាប់ផ្តើមការសិក្សារបស់អ្នកអំពីគម្ពីរហេលេមិន សូមយកចិត្តទុកដាក់លើរបៀបដែលការទាស់ទែងគ្នាបានប៉ះពាល់ដល់ពួកសាសន៍នីហ្វៃ ។ សូមគិតផងដែរអំពីរបៀបដែលអ្នកអាចស្វែងរកសេចក្តីសុខសាន្តមកពីព្រះយេស៊ូវគ្រីស្ទ នៅក្នុងពិភពលោកដ៏ទាស់ទែងគ្នាមួយនេះ ។
ការទាស់ទែងគ្នានៅក្នុងគ្រួសារ សាសនាចក្រ និងសហគមន៍
បន្ទាប់ពីសង្គ្រាមជាច្រើនឆ្នាំ សាសន៍នីហ្វៃអាចដណ្តើមយកទឹកដីរបស់ពួកគេមកពីពួកលេមិនមកវិញ ។ មេទ័ពមរ៉ូណៃ និងហេលេមិនបានស្លាប់នៅក្នុងអំឡុងពេលមានសេចក្តីសុខសាន្តក្រោយនោះ ។ កំណត់ត្រាពិសិដ្ឋត្រូវបានផ្តល់ឲ្យកូនប្រុសរបស់ហេលេមិន ដែលមានឈ្មោះថា ហេលេមិន ផងដែរ ។ មិនយូរប៉ុន្មានក្រោយមក ពួកសាសន៍នីហ្វៃ បានពោរពេញដោយការឆ្មើងឆ្មៃ ហើយក៏កើតមានការទាស់ទែងគ្នា ។
ដើម្បីជួយសិស្សឲ្យទទួលបានទិដ្ឋភាពទូទៅនៃព្រឹត្តិការណ៍នៅក្នុងជំពូកទាំងនេះ អ្នកអាចឲ្យពួកគេអានចំណងជើងជំពូក ហេលេមិន ១–៦ ។
នៅក្នុងសៀវភៅហេលេមិន យើងអានដំណើររឿងដែលបង្ហាញអំពីរបៀបដែលការទាស់ទែងគ្នាមានឥទ្ធិពលលើគ្រួសារ សាសនាចក្រ និងសហគមន៍ ។
ប្រសិនបើថ្នាក់របស់អ្នកមានសិស្សតិច នោះសិស្សអាចជ្រើសរើសផ្នែកខាងក្រោមមួយ ឬពីរដើម្បីសិក្សាជាថ្នាក់ទាំងមូល ។ ប្រសិនបើថ្នាក់របស់អ្នកមានសិស្សច្រើន នោះអាចបំបែកសិស្សជាក្រុមៗ ដើម្បីសិក្សាផ្នែកមួយ ឬច្រើនជាមួយគ្នា ។ នៅពេលសិស្សបានបញ្ចប់ការពិភាក្សារបស់ពួកគេរួចហើយ សូមអញ្ជើញសិស្សម្នាក់ឲ្យចែកចាយនូវអ្វីដែលពួកគេបានរៀនមកពីផ្នែកនីមួយៗ ។
សូមសិក្សាផ្នែកមួយ ឬច្រើននៃផ្នែកខាងក្រោម ។
-
ក្រុមគ្រួសារ ៖ សូមអាន ហេលេមិន ១:១–១៣ សូមរកមើលរបៀបដែលការទាស់ទែងគ្នាប៉ះពាល់ដល់គ្រួសាររបស់ ពេហូរ៉ាន បន្ទាប់ពីគាត់បានស្លាប់ ។
-
សាសនាចក្រ ៖ សូមអាន ហេលេមិន ៤:១–១៣ សូមរកមើលថាតើការឆ្មើងឆ្មៃ និងការទាស់ទែងគ្នានៅក្នុងសាសនាចក្រប៉ះពាល់ដល់ប្រជាជាតិទាំងមូលយ៉ាងដូចម្តេច ។
-
សហគមន៍ ៖ ដោយសារតែមានការទាស់ទែងគ្នាអំពីអ្នកណាគួរធ្វើជាមេចៅក្រម បុរសទុច្ចរិតម្នាក់ឈ្មោះ គិសគូមេន បានបង្កើតក្រុមសម្ងាត់មួយ ។ មិនយូរប៉ុន្មានបុរសទុច្ចរិតម្នាក់ទៀតដែលមានឈ្មោះថា កាឌីអានតុន ពួតដៃគ្នាជាមួយគាត់ ( សូមមើល ហេលេមិន ២ ) ។ នៅក្នុងព្រះគម្ពីរមរមន ក្រុមប្រភេទទាំងនេះត្រូវបានហៅថាបក្សព័ន្ធសម្ងាត់ ( សូមមើល ហេលេមិន ៣:២៣ ) ។ សូមអាន ហេលេមិន ៦:១៥–២១, ៣៧–៤១ ដោយរកមើលអ្វីដែលបានកើតឡើងចំពោះពួកសាសន៍នីហ្វៃ ដោយសារការទាស់ទែងគ្នា និងអំពើទុច្ចរិតដែលពួកចោរកាឌីអានតុនបានបង្កឡើង ។
-
តើការឆ្មើងឆ្មៃ និងការទាស់ទែងគ្នាមានផលវិបាកអ្វីខ្លះ ?
សូមជួយសិស្សបន្ថែមទៅនឹងដ្យាក្រាមពពុះ ។ ពួកគេអាចបន្ថែមរង្វង់ ហើយបន្ទាប់មករាយបញ្ជីផលវិបាកនៃការឆ្មើងឆ្មៃ និងការទាស់ទែងគ្នានៅក្នុងផ្នែកនីមួយៗនៃជីវិតដែលបានរៀបរាប់ពីមុន ។
ចេញពីអ្វីដែលអ្នកអាន អ្នកអាចរកឃើញថា ការឆ្មើងឆ្មៃ និងការទាស់ទែងគ្នា អាចធ្វើឲ្យមានការបែកបាក់នៅក្នុងក្រុមគ្រួសារ សហគមន៍ និងប្រទេសជាតិបាន ។ អ្នកអាចពិចារណាកត់ត្រាសេចក្តីពិតនេះនៅក្នុងព្រះគម្ពីររបស់អ្នកនៅជិត ហេលេមិន ១:៤; ៤:១២–១៣ ឬ ៦:៣៨–៤០ ។
ព្រះអង្គសង្គ្រោះបានបង្រៀនសាសន៍នីហ្វៃអំពីសភាពដ៏បំផ្លិចបំផ្លាញនៃការទាស់ទែង ។ សូមអាន នីហ្វៃទី៣ ១១:២៩–៣០ ដោយរកមើលអ្វីដែលទ្រង់បានមានព្រះបន្ទូល ។
-
តើការទាស់ទែងមកពីណា ? ហេតុអ្វីបានជាការទាស់ទែងតែងតែនាំមកនូវបំផ្លិចបំផ្លាញជានិច្ច ?
-
ហេតុអ្វីបានជាវាសំខាន់ដើម្បីដឹងថានៅពេលណាអ្នកត្រូវបានល្បួងឲ្យប្រព្រឹត្តដោយកំហឹង ឬត្រូវប្រឈមមុខទៅនឹងការទាស់ទែងគ្នា ?
-
តើព្រះអង្គសង្គ្រោះជាគំរូនៃអ្វីដែលទ្រង់បានបង្រៀនយ៉ាងដូចម្ដេចនៅក្នុង នីហ្វៃទី៣ ១១:២៩–៣០ ?
ការស្វែងរកសេចក្តីសុខសាន្តតាមរយៈព្រះយេស៊ូវគ្រីស្ទ
ប្រធាន រ័សុល អិម ណិលសុន បានផ្ដល់នូវការអញ្ជើញស្រដៀងគ្នាទាក់ទងទៅនឹងជម្លោះ និងការទាស់ទែងគ្នានៅក្នុងជីវិតរបស់យើង ។ សូមមើល វីដេអូ « អំណាចនៃសន្ទុះខាងវិញ្ញាណ » ចាប់ពីនាទីទី ១:៣៨ ដល់នាទីទី ៣:៣១ ឬអានសេចក្តីថ្លែងការណ៍ខាងក្រោម ។
បងប្អូនប្រុសស្រីជាទីស្រឡាញ់ ខ្ញុំ សូម អំពាវនាវនៅថ្ងៃនេះថា សូមបញ្ចប់ជម្លោះដែលដុតរោលនៅក្នុងដួងចិត្ត របស់បងប្អូន គេហដ្ឋាន របស់បងប្អូន និង ជីវិត របស់បងប្អូន ។ សូមកប់ចោលទំនោរចិត្តណាមួយ និង ទំនោរចិត្តទាំងអស់ណាដែលធ្វើឲ្យអ្នកដទៃឈឺចាប់—មិនថាទំនោរចិត្តទាំងនោះជាកំហឹង ការនិយាយអាក្រក់ ឬ ការថ្នាំងថ្នាក់ចំពោះអ្នកដែលធ្វើឲ្យបងប្អូនឈឺចាប់នោះទេ ។ ព្រះអង្គសង្គ្រោះត្រាស់បង្គាប់យើងឲ្យបែរទៅថ្ពាល់ម្ខាងទៀត ឲ្យស្រឡាញ់ពួកខ្មាំងសត្រូវ និងអធិស្ឋានឲ្យអ្នកណាដែលធ្វើទុក្ខបៀតបៀនដល់យើងវិញ ។ …
យើងគឺជាអ្នកដើរតាមម្ចាស់នៃមេត្រីភាព ។ យើងត្រូវការភាពសុខសាន្ដនាពេលនេះជាងពេលណាៗទាំងអស់ ។ តើយើងអាចរំពឹងថា មានភាពសុខសាន្ដក្នុងពិភពលោកនេះដោយរបៀបណា បើយើង ម្នាក់ៗ មិនស្វែងរកភាពសុខសាន្ដ និង ភាពសុខដុមផងនោះ ? បងប្អូនប្រុសស្រី ខ្ញុំដឹងថា អ្វីដែលខ្ញុំស្នើសុំនេះមិនងាយស្រួលនោះទេ ។ ប៉ុន្ដែអ្នកដើរតាមព្រះយេស៊ូវគ្រីស្ទ គួរតែធ្វើជាគំរូឲ្យមនុស្សទាំងអស់ក្នុងពិភពលោកនេះធ្វើតាម ។ ខ្ញុំសូមអង្វរបងប្អូនឲ្យធ្វើអ្វីគ្រប់យ៉ាង ដើម្បីបញ្ចប់ជម្លោះ ផ្ទាល់ខ្លួន ដែលកំពុងដុតរោលនៅក្នុងដួងចិត្ត និងជីវិតរបស់បងប្អូនបច្ចុប្បន្ននេះ ។ ( រ័សុល អិម ណិលសុន « អំណាចនៃសន្ទុះខាងវិញ្ញាណ » លីអាហូណា ខែ ឧសភា ឆ្នាំ ២០២២ ទំព័រ ៩៧ )
-
តើការអញ្ជើញរបស់ប្រធាន ណិលសុន អាចជួយយើងឲ្យដើរតាមព្រះយេស៊ូវគ្រីស្ទដោយរបៀបណា ?
សូមក្រឡេកមើលដ្យាក្រាមពពុះរបស់អ្នកម្តងទៀត ។ ដាក់សញ្ញាកែងនៅជាប់ទៅនឹងផ្នែកណាមួយនៃការទាស់ទែងគ្នា ដែលអ្នកមានអារម្មណ៍ថាអ្នកអាចមានឥទ្ធិពលល្អ ។
សូមបង្កើតតារាងជួរឈរពីរនៅលើក្តារខៀន ហើយសរសេរ ខ្ញុំរកឃើញសេចក្តីសុខសាន្តនៅក្នុងព្រះគ្រីស្ទដោយ… នៅខាងលើ ។ អ្នកប្រហែលជាត្រូវលុបដ្យាក្រាមពពុះដើម្បីមានកន្លែង ។ សូមសរសេរបណ្ដុំខគម្ពីរមួយខាងក្រោមនៅខាងលើនៃជួរឈរនីមួយៗ ហើយអញ្ជើញសិស្សពាក់កណ្តាលថ្នាក់ឲ្យសិក្សាបណ្ដុំនីមួយៗ ៖ ហេលេមិន ៣:៣២–៣៦; ហេលេមិន ៦:១–៩ ។
សូមអញ្ជើញសិស្សឲ្យបញ្ចប់សេចក្ដីថ្លែងការណ៍នៅលើក្ដារខៀនជាមួយនឹងអ្វីដែលពួកគេរកឃើញមកពីអំណានរបស់ពួកគេ ហើយពិភាក្សាអំពីរបៀបអ្វីដែលពួកគេបានរកឃើញអាចជួយពួកគេស្វែងរកសេចក្តីសុខសាន្តនៅក្នុងព្រះគ្រីស្ទ ។
-
សូមប្រើអ្វីដែលអ្នក អាននៅក្នុង ហេលេមិន ៣:៣២–៣៦ ឬ ហេលេមិន ៦:១–៩ សូមបញ្ចប់ប្រយោគ ខ្ញុំអាចរកឃើញសេចក្តីសុខសាន្តនៅក្នុងព្រះគ្រីស្ទដោយ…
-
តើការមករកព្រះយេស៊ូវគ្រីស្ទជាបុគ្គលម្នាក់ៗនាំឲ្យយើងនូវសេចក្តីសុខសាន្ត និងសាមគ្គីភាពជាមួយអ្នកដទៃដោយរបៀបណា ?
-
សូមជ្រើសរើសវិធីមួយដែលអ្នកបានរាយបញ្ជី ដើម្បីរកឃើញសេចក្តីសុខសាន្តនៅក្នុងព្រះគ្រីស្ទ ។ តើអ្នកអាចរៀន ឬអនុវត្តវានៅក្នុងជីវិតរបស់អ្នកដោយរបៀបណា ?
សូមលើកទឹកចិត្តសិស្សឲ្យស្វែងរកសេចក្តីសុខសាន្តដែលមានតែព្រះយេស៊ូវគ្រីស្ទប៉ុណ្ណោះដែលអាចប្រទានឲ្យបាន ( សូមមើល យ៉ូហាន ១៤:២៧ ) ។