«អាលម៉ា 45–46៖ មេទ័ពមរ៉ូណៃលើកទង់ឥស្សរភាព» សៀវភៅណែនាំគ្រូបង្រៀនព្រះគម្ពីរមរមន (2024)
«អាលម៉ា 45–46» សៀវភៅណែនាំគ្រូបង្រៀនព្រះគម្ពីរមរមន
អាលម៉ា 45–46
មេទ័ពមរ៉ូណៃ លើកទង់ឥស្សរភាព
នៅពេលដែលមរ៉ូណៃបានឮអំពីការខ្វែងគំនិតគ្នាក្នុងចំណោមប្រជាជនគាត់ដែលបង្កឡើងដោយអាម៉ាលិកាយនោះគាត់បានខឹងណាស់។ គាត់បានបង្កើតទង់ឥស្សរភាព ហើយនៅលើនោះគាត់បានរាយការណ៍រឿងសំខាន់ៗប្រាប់ដល់ប្រជាជនគាត់ឲ្យចងចាំជានិច្ច។ ពាក្យសម្ដីរបស់មរ៉ូណៃបានបំផុសគំនិតប្រជាជនទាំងនោះឲ្យពង្រឹងការតាំងចិត្តរបស់ពួកគេចំពោះព្រះ។ មេរៀននេះអាចជួយអ្នកឱ្យយល់ដឹងរបៀបដែលអ្នកអាចបង្ហាញឲ្យឃើញច្បាស់នូវការប្តេជ្ញាចិត្តរបស់អ្នកចំពោះព្រះបាន។
ចូរជួយសិស្សឲ្យចងចាំព្រះអម្ចាស់។ ការចងចាំព្រះអម្ចាស់ និងសេចក្តីល្អរបស់ទ្រង់គឺជាគោលរឿងច្បាស់លាស់មួយនៅក្នុងព្រះគម្ពីរមរមន (សូមមើល នីហ្វៃទី 2 10:2; យ៉ាកុប 6:4; មរ៉ូណៃ 10:3)។ ចូរហៅសិស្សឲ្យចូលរួមក្នុងសកម្មភាពសិក្សានានាដែលនឹងជួយឲ្យពួកគេចងចាំព្រះយេស៊ូវគ្រីស្ទ ហើយឆ្លុះបញ្ចាំងមើលអំពីរបៀបដែលទ្រង់បានប្រទានពរ និងពង្រឹងពួកគេ។
ការរៀបចំសិស្ស៖ ចូរហៅសិស្សឲ្យធ្វើបញ្ជីនៃអ្វីៗដែលបំផុសគំនិត ឬរំឭកពួកគេឲ្យរក្សាបទបញ្ញត្តិ/ក្រឹត្យវិន័យនៃព្រះ។
សកម្មភាពរៀនសូត្រដែលអាចកើតមាន
កុំភ្លេច
សូមដាក់បង្ហាញសំណួរខាងក្រោម ។ សិស្សអាចនឹងឆ្លើយសំណួរទាំងនេះជាមួយដៃគូ ឬនៅក្រុមតូចមួយ។ អ្នកក៏អាចនឹងផ្សព្វផ្សាយគំរូឬឧទាហរណ៍ផ្ទាល់ខ្លួនអំពីជីវិតអ្នកផងដែរ។
-
តើនៅពេលណាដែលអ្នកភ្លេចរឿងមួយដែលសំខាន់? ជាលទ្ធផល តើមានរឿងអ្វីបានកើតឡើង ?
-
តើមានរឿងអ្វីខ្លះដែលអ្នកមិនដែលចង់បំភ្លេច? ហេតុអ្វី ?
នៅថ្ងៃនេះ អ្នកនឹងរៀនអំពីគ្រាមួយដែលពួកសាសន៍នីហ្វៃមិនបានសម្រេចចំពោះការចងចាំព្រះអម្ចាស់ សូម្បីតែក្រោយពេលដែលពួកគេបានជួបប្រទះការសង្គ្រោះដោយអព្ភូតហេតុតាមរយៈទ្រង់ក៏ដោយ។ អ្នកប្រហែលអាចចាំបានពីការសិក្សា អាលម៉ា 43–44 ដែលថាព្រះអម្ចាស់បានជួយឲ្យពួកសាសន៍នីហ្វៃកម្ចាត់ពួកសាសន៍លេមិននៅសមរភូមិមួយ បើទោះបីជាពួកសាសន៍នីហ្វៃមានចំនួនច្រើនជាងយ៉ាងណាក៏ដោយ (សូមមើល អាលម៉ា 43:51–54)។
ចូរអាន អាលម៉ា 45:1 ដោយការរកមើលពីរបៀបដែលពួកសាសន៍នីហ្វៃមានប្រតិកម្មនៅបន្ទាប់ពីការទទួលបានជ័យជំនះដ៏អព្ភូតហេតុនេះ។
-
តើអ្នកបានរកឃើញអ្វីខ្លះ ?
នៅអំឡុងពេលមានសន្តិភាពនេះ ហេលេមិនដែលជាកូនប្រុសអាលម៉ាបានតែងតាំងពួកបូជាចារ្យ និងពួកគ្រូបង្រៀនឲ្យធ្វើការសាសនាចក្រទូទាំងដែនដី ហើយគាត់បានផ្សាយបន្ទូលព្រះប្រាប់ទៅបងប្អូនគាត់។
សូមអាន អាលម៉ា 45:23–24; 46:1–5, 7–8 ដោយការរកមើលរបៀបដែលមនុស្សបានឆ្លើយតបចំពោះការបង្រៀនទាំងនេះ។
-
តើមានអ្វីខ្លះដែលលេចធ្លោចំពោះអ្នកអំពីអាកប្បកិរិយា និងឥរិយាបថនៃពួកសាសន៍នីហ្វៃនៅក្នុងខគម្ពីរទាំងនេះ?
-
តើសេចក្ដីពិតមួយដែលយើងអាចស្វែងយល់ដឹងពី ខគម្ពីរ 8 អំពីអ្វីដែលអាចកើតមានឡើងនៅពេលដែលយើងបំភ្លេចព្រះអម្ចាស់?
សេចក្ដីពិតមួយដែលយើងអាចស្វែងយល់ដឹងពី អាលម៉ា 46:8 គឺថា នៅពេលដែលយើងបំភ្លេចព្រះអម្ចាស់អាចមានការដឹកនាំយើងឲ្យប្រព្រឹត្តអំពើទុច្ចរិតកាន់តែងាយ។
ចូរគិតអំពីរបៀបដែលអ្នកបានឃើញមានភស្តុតាងនៃសេចក្ដីពិតនេះនៅក្នុងជីវិតផ្ទាល់ខ្លួនអ្នក។ នៅពេលអ្នកបន្តសិក្សានៅថ្ងៃនេះ ចូររកមើលការបង្រៀនដែលអាចជួយអ្នកឱ្យចងចាំព្រះអម្ចាស់បានកាន់តែច្បាស់ ហើយនិងបង្ហាញការប្តេជ្ញាចិត្តរបស់អ្នកចំពោះទ្រង់។
មរ៉ូណៃ បង្កើតទង់ឥស្សរភាព
នៅពេលនោះមរ៉ូណៃបានខឹងនឹងអាម៉ាលិកាយ ដែលបានបង្កការខ្វែងគំនិតគ្នាទាំងនេះក្នុងចំណោមពួកសាសន៍នីហ្វៃ។
សូមអាន អាលម៉ា 46:12–14, 19–20 ដោយការរកមើលអ្វីដែលមរ៉ូណៃបានធ្វើដើម្បីបំផុសគំនិតដល់ពួកសាសន៍នីហ្វៃឲ្យស្មោះត្រង់ចំពោះព្រះ។
នៅមុនពេលត្រូវសួរសំណួរខាងក្រោម សូមពិចារណាលើការរាយបញ្ជីចំណុចទាំងនេះដែលចេញពី ខគម្ពីរ 12 នៅលើក្ដារខៀន៖ ព្រះ, សាសនា, សេរីភាព, សន្តិភាព, ក្រុមគ្រួសារ (ប្រពន្ធនិងកូនៗ)។
-
ហេតុអ្វីបានជាអ្នកគិតថា មរ៉ូណៃបានសម្រេចបង្ហាញពាក្យទាំងនេះដើម្បីឲ្យអ្នកដទៃបានឃើញក្នុងអំឡុងពេលដ៏លំបាកនេះ?
-
តើអ្នកមើលឃើញចំណុចមួយ ឬច្រើនទាំងនេះកំពុងត្រូវបានគេបំភ្លេចចោល ឬមិនត្រូវបានគេសង្កត់ធ្ងន់ឬផ្ដោតជាសំខាន់លើពិភពលោកសព្វថ្ងៃនេះដោយរបៀបណា?
ដូចគ្នានឹងមរ៉ូណៃ ក្រុមអ្នកដឹកនាំសាសនាចក្រនៅជំនាន់យើងបានហៅយើងឲ្យចងចាំ និងការពារតម្លៃដូចគ្នាទាំងនេះ។ សូមអានការថ្លែងខាងក្រោម ដោយការរកមើលការបង្រៀនសម័យទំនើបដែលទាក់ទងនឹងចំណុចដែលមានរាយនៅលើទង់ឥស្សរភាព។
ចូរចែកចាយក្រដាសចែកឲ្យសិស្សខាងក្រោម ហើយផ្តល់ពេលដល់សិស្សសិក្សាការថ្លែងដែលមាននៅលើវារៀងៗខ្លួន ឬជាមួយដៃគូ។
បើមិនដូចម្នោះទេអ្នកអាចនឹងបោះពុម្ពការថ្លែងដាច់ដោយឡែក ហើយបង្ហាញវានៅលើជញ្ជាំងជុំវិញថ្នាក់រៀន។ ការថ្លែងនីមួយៗអាចនឹងមានការបោះពុម្ព ឬបិទភ្ជាប់លើរូបភាពនៃទង់ ដើម្បីមើលទៅឲ្យដូចជាទង់ឥស្សរភាព។ អាចនឹងមានការផ្ដល់ពេលឲ្យសិស្សដើរមើលជុំវិញ និងអានការថ្លែងនីមួយៗ។
ការបង្រៀននៅសម័យទំនើបដែលទាក់ទងនឹងទង់ឥស្សរភាព
ព្រះគម្ពីរមរមន សៀវភៅសិក្សាសម្រាប់គ្រូបង្រៀន ( ឆ្នាំ ២០២៤)—« អាលម៉ា ៤៥-៤៦ ៖ មរ៉ូណៃ លើកទង់ឥស្សរភាព »
«នៅក្នុងការចងចាំព្រះរបស់យើង»
អែលឌើរ នែល អិល អាន់ឌើរសិន (Elder Neil L. Andersen)ក្នុងកូរ៉ុមនៃពួកសាវកដប់ពីរនាក់បានបង្រៀនថា ៖
មានមនុស្សមួយចំនួននៅលើផែនដីស្គាល់ព្រះយេស៊ូវគ្រីស្ទតិចតួច ហើយនៅផ្នែកខ្លះទៀតនៃពិភពលោកដែលព្រះនាមរបស់ទ្រង់ត្រូវបានប្រកាសរាប់សតវត្សមកហើយ តែបែរជាជំនឿលើព្រះយេស៊ូវគ្រីស្ទកំពុងតែថយចុះទៅវិញ ។ …
កាលដែលលោកិយមិនសូវនិយាយអំពីព្រះយេស៊ូវគ្រីស្ទ ចូរយើងនិយាយអំពីទ្រង់ឲ្យបានកាន់តែច្រើនឡើង ។ នៅពេលបុគ្គលិកលក្ខណៈពិតរបស់យើងក្នុងនាមជាសិស្សរបស់ទ្រង់ត្រូវបានបង្ហាញ នោះមនុស្សជាច្រើននៅជុំវិញយើងនឹងត្រៀមខ្លួនស្តាប់ ។ (នែល អិល អាន់ឌើរសិន(Neil L. Andersen) «យើងជជែកគ្នាអំពីព្រះគ្រីស្ទ» Ensign (អេនសាញ) ឬ Liahona (លីអាហូណា), វិច្ឆិកា 2020,ទំព័រ 88, 90)
«នៅក្នុងការចងចាំ…សាសនារបស់យើង»
ប្រធាន ដាលីន អេច អូកស៍ (Dallin H. Oaks)ក្នុងគណៈប្រធានទីមួយបានបង្រៀនថា ៖
បើយើងឈប់ឱ្យតម្លៃសាសនាចក្រយើងដោយហេតុផលណាមួយ នោះយើងគំរាមកំហែងដល់ជីវិតខាងព្រលឹងវិញ្ញាណផ្ទាល់ខ្លួនយើងហើយៗ ជនគណនាដ៏សំខាន់ៗដែលបំបែកខ្លួនពួកគេចេញពីព្រះកាត់បន្ថយពរជ័យរបស់ទ្រង់ចំពោះប្រជាជាតិយើង។
ការចូលរួម និងសកម្មភាពនៅក្នុងព្រះវិហារមួយ ជួយយើងឲ្យក្លាយជាមនុស្សកាន់តែប្រសើរឡើង ហើយជះឥទ្ធិពលកាន់តែខ្លាំងលើជីវិតរបស់មនុស្សដទៃផងដែរ ។ នៅសាសនាចក្រ មានការបង្រៀនយើងអំពីរបៀបអនុវត្តគោលការណ៍សាសនា។ យើងរៀនពីគ្នាទៅវិញទៅមក។…
… ខ្ញុំសូមអធិស្ឋានឲ្យយើងទាំងអស់គ្នានឹងមានភាពខ្ជាប់ខ្ជួននៅក្នុងបទពិសោធន៍នៃសាសនាចក្រទាំងនេះ នៅពេលដែលយើងស្វះស្វែងរកជីវិតដ៏អស់កល្បជានិច្ចដែលជាអំណោយទានដ៏អស្ចារ្យបំផុតនៃព្រះ។ (ដានលីនអេចអូកស៍(Dallin H. Oaks) «ចាំបាច់ត្រូវមានព្រះវិហារមួយ» Liahona (លីអាហូណា), វិច្ឆិកា 2021,ទំព័រ 24, 26)
«នៅក្នុងការចងចាំអំពីសេរីភាព … របស់យើង»
អែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
តើអ្វីទៅជាសេរីភាពខាងសាសនា ?
វាគឺជាសេរីភាពនៃការថ្វាយបង្គំតាមគ្រប់ទម្រង់ទាំងអស់ ៖ សេរីភាពនៃការប្រមូលផ្តុំ សេរីភាពនៃការបញ្ចេញមតិ សេរីភាពក្នុងការធ្វើសកម្មភាពលើជំនឿផ្ទាល់ខ្លួន និងសេរីភាពសម្រាប់មនុស្សដទៃដើម្បីធ្វើដូចគ្នានេះដែរ ។ សេរីភាពខាងជំនឿសាសនាអនុញ្ញាតឲ្យយើងម្នាក់ៗ ធ្វើការសម្រេចចិត្តសម្រាប់ខ្លួនយើងផ្ទាល់សម្រាប់អ្វីដែលយើងជឿ របៀបរស់នៅ និងធ្វើស្របតាមជំនឿរបស់យើង និងអ្វីដែលព្រះសព្វព្រះទ័យពីយើង ។ …
ខ្ញុំសូមអញ្ជើញបងប្អូនឲ្យគាំទ្រដល់បុព្វហេតុនៃសេរីភាពខាងជំនឿសាសនា ។ វាគឺជាការបង្ហាញនៃគោលការណ៍សិទ្ធិជ្រើសរើសដែលបានប្រទានមកពីព្រះ ។
សេរីភាពខាងសាសនានាំមកនូវតុល្យភាពចំពោះទស្សនវិជ្ជាប្រកួតប្រជែង ។ ភាពល្អនៃសាសនា ព្រំដែនប្រសិទ្ធភាពរបស់វា និងទង្វើប្រចាំថ្ងៃនៃសេចក្តីស្រឡាញ់ដែលសាសនាបំផុសគំនិតឱ្យកើនឡើង នៅពេលដែលយើងការពារសេរីភាពក្នុងការបញ្ចេញមតិ និងធ្វើសកម្មភាពលើជំនឿសំខាន់ៗ។ (រ៉ូណល អេ រ៉ាសបាន(Ronald A. Rasband) «ព្យាបាល (ប្រោស)ពិភពលោក» Liahona (លីអាហូណា), ឧសភា 2022,ទំព័រ 91, 93)
«នៅក្នុងការចងចាំអំពីសន្តិភាព … របស់យើង»
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
អង្គព្យាបាលនៃរបួសគ្រប់យ៉ាង ទ្រង់ជាអង្គកែទោសកំហុសទាំងអស់ សុំឲ្យយើងធ្វើការជាមួយទ្រង់នៅក្នុងកិច្ចការលំបាកនៃការផ្សះផ្សាក្នុងពិភពលោក ដែលពុំរកឃើញភាពសុខសាន្តតាមរបៀបណាផ្សេងទៀតឡើយ ។ …
… នោះខ្ញុំសូមឲ្យបងប្អូនធ្វើជាអ្នកផ្សះផ្សាគេ—ឲ្យស្រឡាញ់ភាពសុខសាន្ត ឲ្យស្វែងរកភាពសុខសាន្ត ឲ្យបង្កើតភាពសុខសាន្ត ឲ្យរីករាយនឹងភាពសុខសាន្ត ។ ខ្ញុំសូមអំពាវនាវ ក្នុងព្រះនាមព្រះអង្គម្ចាស់នៃសេចក្ដីសុខ(សន្តិភាព)។ (ជែហ្វ្រី អរ ហូលែនដ៍(Jeffrey R. Holland) «ការងារបម្រើនៃការផ្សះផ្សា» Ensign (អេនសាញ) ឬ Liahona (លីអាហូណា), វិច្ឆិកា 2018,ទំព័រ 79)
«នៅក្នុងការចងចាំ[គ្រួសារ]…របស់យើង»
ស៊ិស្ទើរ បូនី អិល អូស្ការសុន អតីតប្រធានយុវនារីទូទៅបានបង្រៀន ៖
មនុស្សគ្រប់គ្នា មិនថាមានស្ថានភាពអាពាហ៍ពិពាហ៍យ៉ាងណា ឬមានកូនប៉ុន្មានទេ អាចធ្វើជាអ្នកការពារផែនការរបស់ព្រះអម្ចាស់ ដែលបានពិពណ៌នានៅក្នុងសេចក្ដីប្រកាសអំពីគ្រួសារបាន ។ បើវាគឺជាផែនការរបស់ព្រះអម្ចាស់ វាគួរតែជាផែនការរបស់យើងដែរ ! …
… សូមឲ្យយើងជួយកសាងរាជាណាចក្រព្រះដោយការក្រោកឈរឡើងយ៉ាងក្លាហាន ហើយធ្វើជាអ្នកការពារអាពាហ៍ពិពាហ៍ ភាពជាឪពុកម្តាយ និងផ្ទះសម្បែង។ ព្រះអម្ចាស់ត្រូវការឲ្យយើងក្លាហាន ខ្ជាប់ខ្ជួន និងក្លាយជាអ្នកចម្បាំងដ៏រឹងមាំដែលនឹងការពារផែនការរបស់ទ្រង់ ហើយបង្រៀនមនុស្សជំនាន់ក្រោយៗអំពីសេចក្ដីពិតរបស់ទ្រង់។ (បូនីអ៊ែលអូស្កាសុន(Bonnie L. Oscarson) «អ្នកការពារសេចក្ដីប្រកាសរបស់ក្រុមគ្រួសារ» Ensign (អេនសាញ) ឬ Liahona (លីអាហូណា), ឧសភា 2015,ទំព័រ 15, 17)
ចូរហៅសិស្សឲ្យឡើងនិយាយប្រាប់អំពីអ្វីដែលការថ្លែងទាំងនេះលេចធ្លោចំពោះពួកគេ។ ចូរពិភាក្សាអំពីវិធីជាក់លាក់ដែលពួកគេអាចចងចាំ និងការពារបានតាមរបៀបដូចព្រះគ្រីស្ទអំពីចំណុចទាំងឡាយដែលបានរាយលើទង់ឥស្សរភាព។
-
តើមានវិធីណាខ្លះដែលអ្នកអាចចងចាំគុណតម្លៃដែលបានរាយលើទង់ឥស្សរភាពនេះ?
-
តើមានវិធីអ្វីខ្លះដែលអ្នកអាចការពារគុណតម្លៃទាំងនេះបានតាមរបៀបដូចព្រះគ្រីស្ទ?
ឥទ្ធិពលនៃទង់ឥស្សរភាព
បន្ទាប់ពីមានការរំឭកអំពីសេចក្ដីពិតសំខាន់ៗទាំងនេះដោយមរ៉ូណៃរួចមក ពួកសាសន៍នីហ្វៃជាច្រើននាក់បានធ្វើសេចក្ដីសញ្ញាមួយថាពួកគេនឹងមិនបោះបង់ព្រះឡើយ ហើយនឹងខិតខំដើម្បីសន្តិភាពឬសេចក្ដីសុខសាន្ត (សូមមើល អាលម៉ា 46:21–22, 28–31)។
សូមអាន អាលម៉ា 46:36–38 ដោយការរកមើលអ្វីដែលមរ៉ូណៃបានធ្វើដើម្បីជួយប្រជាជនគាត់ឲ្យចងចាំព្រះ និងរឿងសំខាន់ៗផ្សេងទៀតដែលមានក្នុងបញ្ជីលើទង់ឥស្សរភាព។
-
តើមានចំណុចមួយណាក្នុងចំណោមចំណុចដែលបានរាយលើទង់ឥស្សរភាពដែលអ្នកមានអារម្មណ៍គិតថាអ្នកពិតជាចង់ចងចាំ ឬក្រោកឈរឡើងដើម្បីឲ្យមានភាពកាន់តែពេញលេញក្នុងជីវិតអ្នក?
-
តើមានអ្វីខ្លះដែលអ្នកអាចធ្វើដើម្បីចងចាំប្រធានបទនេះឱ្យបានកាន់តែល្អ ឬការពារជំនឿអ្នកលើវាបាន?
សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។ សូមលើកទឹកចិត្តសិស្សឲ្យខិតខំគោរព និងចងចាំព្រះ និងចំណុចផ្សេងៗទៀតដែលមានរាយលើទង់ឥស្សរភាព។