Unsa ang pipila ka mga leksiyon nga imong nakat-onan gikan sa imong mga ginikanan o mga lider sa Simbahan? Unsa ang pipila ka mga butang nga imong gilaoman nga itudlo sa imong mga anak sa umaabot? Si Alma nakasabot nga ang mga ginikanan adunay sagrado nga responsibilidad sa pagtudlo sa ilang mga anak. Human sa iyang misyon ngadto sa mga Zoramite, gipundok ni Alma ang iyang mga anak nga lalaki aron sa pagtudlo ug pagdasig kanila. Siya mitambag kanila sa pagtuman sa mga sugo sa Dios. Kini nga leksiyon makatabang kanimo nga makat-on nga ang pagpuyo sa mga sugo karon makapanalangin kanimo sa tibuok nimong kinabuhi.
Giyahi ang mga tigkat-on sa paglihok sa personal nga pagpadayag. Imbes nga sultihan ang mga estudyante kon unsay angay nilang buhaton, ikonsiderar ang pagpangutana sa imong kaugalingon, “Unsay akong madapit nga buhaton sa mga estudyante nga makadasig kanila sa pagtinguha og tabang sa Espiritu Santo samtang magkat-on sila sa ilang kaugalingon?” o “Unsay akong madapit nga buhaton sa mga estudyante aron mabuhat ang mga pag-aghat nga ilang nadawat?”
Pagpangandam sa estudyante: Dapita ang mga estudyante sa pagbasa o pagsag-ulo sa Alma 37:35 ug sa pagtambong sa klase nga andam sa pagpakigbahin kon nganong sa ilang hunahuna importante ang “pagkat-on diha sa [ilang] kabatan-on sa paghupot sa mga sugo sa Dios.”
Posible nga mga Kalihokan sa Pagkat-on
Tambag gikan sa usa ka ginikanan
Ipakigbahin ang mosunod nga istorya, o ipakigbahin ang usa ka ehemplo nga mas may kalabotan sa imong mga estudyante kabahin sa tambag nga nadawat sa usa ka batan-on gikan sa usa ka ginikanan o lider sa Simbahan.
Si Presidente Thomas S. Monson (1927–2018) mipakigbahin sa mosunod nga istorya:
Imahe
Presidente Thomas S. Monson
Sa usa ka interbyo nga gimantala sa usa ka nasyonal nga magasin, ang inila nga Amerikano nga NCAA basketball player nga si Jabari Parker, usa ka miyembro sa Simbahan, gihangyo sa pagpakigbahin sa labing nindot nga tambag nga iyang nadawat gikan sa iyang amahan. Mitubag si Jabari, “[Ang akong amahan] miingon, Kinahanglang mao ra ka nga tawo kon anaa sa tago o kon anaa sa publiko.” Importante nga tambag … alang natong tanan. (Thomas S. Monson, “Magmakusganon Ka ug Magmaisog,” Liahona, Mayo 2014, 68)
Ikonsiderar ang pagdapit sa mga estudyante sa pagpamalandong sa mosunod nga mga pangutana. Human sa igong panahon, ipares-pares ang mga estudyante o sa gagmay nga mga grupo ug dapita sila sa pagpakigbahin sa ilang mga tubag sa mga pangutana.
Handurawa nga ikaw giinterbyo ug ang tig-interbyo nangutana kanimo sa mosunod nga mga pangutana:
Unsa ang labing nindot nga tambag nga imong nadawat gikan sa usa ka ginikanan o lider sa Simbahan?
Sa unsang paagi kini nga tambag nakapanalangin kanimo?
Ang Alma 36–42 nagrekord sa tambag nga gihatag ni Alma ngadto sa iyang mga anak nga lalaki human sa pagkompleto sa usa ka misyon ngadto sa mga Zoramite. Imoha nang natun-an ang kadaghanan sa unsay iyang gitudlo sa iyang anak nga lalaki nga si Helaman (Alma 36–37). Niini nga leksiyon imong tun-an ang nahibilin sa iyang tambag ngadto kang Helaman, lakip na sa mga baroganan nga iyang gitudlo sa iyang anak nga lalaki nga si Shiblon (Alma 38). Samtang magtuon ka sa Alma 37–38, pangitaa ang tambag gikan ni Alma nga imong magamit diha sa imong kinabuhi o mapaigbahin sa ubang mga batan-on.
“Pagkat-on og kaalam diha sa imong kabatan-on”
Basaha ang Alma 37:35, mangita sa unsay gusto ni Alma nga makat-onan ni Helaman isip usa ka batan-on. Ikonsiderar ang pagmarka sa unsay imong mapalgan.
Unsa ang gusto ni Alma nga mahibaloan ug buhaton ni Helaman?
Samtang magtubag ang mga estudyante, mahimo nimong isulat kini diha sa pisara: Kinahanglang magkat-on kita sa atong kabatan-on sa pagsunod sa mga sugo sa Dios.
Ngano sa imong hunahuna nga mas maayo ang “pagkat-on sa [imong] kabatan-on sa pagtuman sa mga sugo sa Dios” imbes nga maghulat hangtod nga ikaw motigulang?
Imahe
batan-on nga kahoy nga nakaangkla sa mga ugsok [stake]
Si Presidente Gordon B. Hinckley (1910–2008) mipakigbahin sa mosunod nga kasinatian mahitungod sa pagtanom og kahoy:
Imahe
Presidente Gordon B. Hinckley
Akong gibutangan [og kahoy] ang usa ka dapit diha sa eskina diin ang hangin gikan sa bukid [canyon] ngadto sa silangan mohuyop sa labing kusog. Naglungag ako, gibutang ang gamot, giliyokan kini og yuta, gibu-buan og tubig, ug kasagaran gikalimtan kini. Gamay ra kini nga kahoy, tingali 2 ka sentimetro ang gilapdon. Kini humok kaayo nga sayon nakong bawgon sa bisan asa nga direksiyon. Gamay nga pagtagad ang gihatag ko niini samtang nanglabay ang mga katuigan.
Dayon usa ka tingtugnaw nga adlaw … Akong nakita nga kini nagharag ngadto sa kasadpan, nadaot ang hitsura ug nagtakilid. … Migawas ako ug giandam ang akong kaugalingon atubang niini ingon og iduot kini nga matarong og barog. Apan ang punoan sa karon hapit usa ka pye ang gilapdon. Ang akong kusog walay epekto batok niini. Mikuha ako gikan sa akong butanganan sa mga himan og muton ug pisi. Gihigot ang usa ka tumoy ngadto sa kahoy ug ang usa ngadto sa lig-on nga pagkahimutang nga poste, gibitad nako ang pisi. Ang mga muton nairog lamang og gamay, ug ang punoan sa kahoy nauyog og hinay. Apan mao ra kadto ang tanan. …
Sa kataposan ingon nga nawad-an og paglaom akong gikuha ang akong gabas ug giputol ang dako kaayong bug-at nga sanga sa kasadpang bahin. Ang gabas nagbilin og dako kaayong uwat, nga mga walo ka pulgada nga mitadlas. Misibog ako ug gisuta unsay akong nahimo. Akong naputol ang kinadak-ang bahin sa kahoy, nagbilin og usa lamang ka gamay nga sanga mitubo paingon sa langit. …
Sa dihang ang kahoy gitanom pa, usa ka buok nga gamayng pisi makapugong unta niini batok sa mga kusog nga hangin. Unta akong nahimo ug naabagan kana nga higot uban sa gamay lang kaayo nga kahago. Apan wala nako buhata, ug kini minunot sa mga kusog nga miabot batok niini. (Gordon B. Hinckley, “Bring Up a Child in the Way He Should Go,” Ensign, Nob. 1993, 59)
Sa unsang paagi nga ang pagsunod sa mga sugo sama sa pagsuporta sa usa ka batan-on nga kahoy aron kini motubo nga tul-id ug lig-on bisan pa sa hangin?
Sa unsang paagi nga ang dili pagtagad sa mga sugo hangtod sa ulahing bahin sa kinabuhi makaapekto kanato?
Aron matabangan ang mga estudyante nga mas makasabot sa kamatuoran nga gitudlo diha sa Alma 37:35, ikonsiderar ang pagbutang kanila sa gagmay nga mga grupo ug dapita sila sa paghimo og duha ka tinud-anay nga sitwasyon: ang usa diin ang usa ka tawo naningkamot sa pagtuman sa mga sugo sa Dios sa iyang kabatan-on ug ang usa ka tawo wala. Mahimong ilakip sa mga estudyante kon sa unsang paagi ang mga tawo naningkamot sa pagsunod o dili pagsunod sa piho nga mga sugo sama sa paghigugma sa Dios, pagtuon sa mga kasulatan, o pagsunod sa Pulong sa Kaalam. Ipalakip kanila kon sa unsang paagi kaha kining duha ka tawo mahimong magkalahi human sa lima ngadto sa 10 ka tuig. Dapita ang mga estudyante sa pagpakigbahin sa ilang mga senaryo ug unsay ilang nakat-onan.
Ikonsiderar ang pagpahinumdom sa mga estudyante mahitungod sa mga kasinatian ni Alma isip usa ka batan-ong lalaki. Pangutan-a, “Ngano sa inyong hunahuna si Alma mihatag niini nga tambag ngadto sa iyang anak?”
Ikonsiderar ang pagtan-aw sa bidyo nga “Barogan ang Atong mga Saad ug mga Pagkigsaad,” gikan sa time code 7:29 hangtod sa 8:35, anaa sa ChurchofJesusChrist.org. Si Elder Ronald A. Rasband sa Korum sa Napulog Duha ka Apostoles mipakigbahin kon sa unsang paagi siya nakahukom sa pagsunod sa mga sugo sa Dios sa iyang pagkabatan-on.
Paggahin og pipila ka minuto sa pagsulat diha sa imong journal kon unsay imong nakat-onan mahitungod sa pagsunod sa mga sugo sa Dios. Mainampoong magtinguha nga mahibalo kon giunsa ka pagpanalanginan tungod sa mga paagi nga ikaw nagsunod sa mga sugo.
Pangutana kon aduna bay mga estudyante nga gustong moboluntaryo sa pagpakigbahin sa ilang mga hunahuna ug mga pagbati. Ikonsiderar usab ang pagpakigbahin sa imong kaugalingon.
Ikonsiderar ang paghimo og tumong sa usa ka paagi nga gusto nimong mapalambo ang imong pagkamasulondon sa mga sugo sa Ginoo karon samtang batan-on ka pa. Tinguhaa ang giya gikan sa Espiritu Santo samtang imong himoon kini nga tumong.
Tambag alang sa kabatan-onan
Si Alma mihatag og dugang nga tambag ngadto sa iyang mga anak nga lalaki nga makatabang kanato.
Tun-i ang mosunod nga mga tudling sa kasulatan. Ikonsiderar ang pagmarka sa tambag nga imong gibati nga makatabang sa kabatan-onan karon, lakip sa imong kaugalingon. Andama ang imong mga tubag sa mga pangutana sa ubos.
Alma 37:33–37 (“pagkamaaghop ug pagkamapainubsanon” = daling matudloan, matarong)
Alma 38:1–5 (“ipahimulag gikan sa iyang atubangan” = pisikal o espiritwal nga nahimulag sa Dios)
Alma 38:6–9 (“matawo sa Dios”= ang Espiritu sa Ginoo naghinungdan og dakong kabag-ohan sa kasingkasing sa usa ka tawo)
Alma 38:10–15 (“magmapugnganon” = pagpakita og pagkamakasaranganon o pagpugong sa kaugalingon; “pagpalabi-labi” = dominante nga kinaiya)
Unsa ang usa ka butang nga gusto ni Alma nga buhaton o mahibaloan sa iyang mga anak nga lalaki? Sa unsang bersikulo nimo kini nakaplagan?
Sa unsang paagi nga ang pagkahibalo o pagsunod niini nga baroganan makatabang sa usa ka batan-on nga mas makasunod ni Jesukristo?
Sa unsang paagi kini nga pagtulon-an magamit sa kinabuhi sa usa ka batan-on? Makahunahuna ka ba og bisan unsang mga ehemplo sa dihang nakita nimo kini nga gigamit diha sa imong kinabuhi? (Palihog ayaw ipakigbahin ang bisan unsa nga personal kaayo.)
Human matubag sa mga estudyante ang mga pangutana, ikonsiderar ang paghangyo kanila sa paglingkod sa usa ka sirkulo aron sila makakita sa usag usa samtang maghisgot sila sa tambag ni Alma isip usa ka klase. Pagdapit og daghang mga estudyante kutob sa mahimo sa pagpakigbahin sa unsay ilang nakaplagan. Dasiga ang tanang estudyante sa pagpaminaw og maayo ug pagkat-on gikan sa usag usa. Ikonsiderar ang paghunong usahay aron mangutana sa mga estudyante kon unsay ilang nakat-onan gikan sa ilang mga kaedad.
Paggahin og kadiyot sa pagpamalandong, ug irekord ang bisan unsang mga hunahuna o mga impresyon mahitungod sa dugang nga mga paagi nga imong magamit ang tambag nga imong nakat-onan karon. Sama pananglit, mahimo kang maghunahuna og usa ka butang nga bag-o lang gidasig sa imong ginikanan o lider sa Simbahan nga sugdan o hunongon sa pagbuhat. O mahimo kang makigtambag sa Ginoo ug magtinguha sa Iyang direksiyon.
