Ang pagpakigbahin og malumo nga espirituhanong mga kasinatian uban niadtong atong minahal mahimong tinubdan sa kalig-on alang kanila ug kanato. Namulong ngadto sa iyang anak nga lalaki nga si Helaman, si Alma miasoy sa iyang kasinatian sa pagkakita og usa ka anghel, pagbati sa kasakit sa iyang mga sala, ug pagkaplag og kaluwasan pinaagi ni Jesukristo. Kini nga leksiyon gituyo aron pagtabang kanimo nga modangop ngadto ni Jesukristo diha sa hugot nga pagtuo ug mobati sa hingpit nga kalipay sa Iyang kaluwasan.
Kahanas sa pagtuon—pagmarka sa mga tudling. Ang pagmarka sa mga kasulatan makatabang sa mga estudyante sa paghimo og makahuloganon nga mga koneksiyon ug pagpabilin sa unsay ilang nakat-onan. Mahimo nilang linyahan, i-shade, o ilatid [outline] ang mahinungdanon nga mga pulong o mga hugpong sa mga pulong. Ang elektronik nga mga bersiyon sa mga kasulatan naglakip sa makatabang nga mga himan sa pagmarka sa mga kasulatan.
Pagpangandam sa estudyante: Dapita ang mga estudyante sa pagtambong nga andam sa pagpakigbahin og ehemplo sa usa ka tawo kinsa nakakaplag og kalinaw diha ni Kristo human sa pag-antos sa makadiyot. Unsay nakatabang niini nga tawo nga makakaplag og kalinaw?
Posible nga mga Kalihokan sa Pagkat-on
Mga Katugbang
Sa pagsugod niini nga leksiyon, tabangi ang mga estudyante sa paghunahuna mahitungod sa espirituhanon nga kausaban ug unsa ang makapadali niini. Usa ka paagi sa pagbuhat niini mao ang pagsulat sa mosunod nga mga pulong diha sa pisara ug ipasulat sa mga estudyante ang katugbang sa matag tagsa.
Kasakit →
Pagbasol →
Kaguol →
Pamalandong sa higayon nga ikaw tingali nakasala ug nakasinati sa pagbati diha sa wala. Kana ba nga pagbati nahimo na sa unsay imong gilista sa tuo? Unsa ang nahitabo aron mahimong posible ang maong kausaban?
Human sa paghisgot sa ibabaw, mahimo nimong ipasabot nga kon ang negatibo nga mga pagbati gumikan sa sala, ang Ginoo lamang ang makatabang kanato sa pag-usab niadto nga mga pagbati ngadto sa ilang positibo nga mga katugbang.
Hatagi ang mga estudyante og kahigayonan sa hilom nga pagpamalandong kon sa unsang paagi ang Ginoo mitabang kanila nga magbag-o kon sila nakasala. Ipakita ang mosunod nga pagsukod sa kaugalingon ug hangyoa ang mga estudyante sa pagrekord diha sa ilang mga journal sa bisan unsang mga impresyon nga ilang nabatonan samtang sila namalandong. Mahimo kini nga mga pangutana, mga pagbati, o mga pag-aghat sa pagbuhat.
Pamalandongi kon unsa ka tinuod ang mosunod nga mga pamahayag alang kanimo:
Kon ako nakasala, nakahibalo ako kon unsaon pagdangop sa Ginoo aron makadawat og kapasayloan, kalinaw, ug paglaom.
Aduna akoy pagsalig nga uban sa tabang sa Ginoo ako makahimo nga magbag-o.
Kanunay ko nga modangop sa Ginoo alang niini nga tabang.
Karong adlawa imong tun-an kon sa unsang paagi ang mga pagbati ni Alma nga Batan-on sa hilabihang kasakit tungod sa iyang mga sala nahimong mga pagbati sa kalipay ug kalinaw samtang siya nangamuyo ngadto sa Manluluwas. Samtang magtuon ka, pangitaa kon unsaon nimo pagtinguha ang tabang sa Ginoo sa pagbuntog sa sala ug sa mga epekto niini ug makasinati og kalipay pinaagi ni Jesukristo.
Dakong kausaban ni Alma
Human sa pagsalikway sa ebanghelyo nga gitudlo ngadto kanila, ang mga Zoramite nakigkonsabo sa mga Lamanite aron sa pagkutaw kanila sa kasuko batok sa mga Nephite. Dayon ang mga Zoramite ug mga Lamanite misulong sa mga Nephite, nga misangpot sa usa ka dakong gubat. Daghan usab sa mga kasingkasing sa mga Nephite “misugod sa pagkatig-a” batok sa pulong sa Dios (Alma 35:15). Agig pagsanong sa espirituhanon nga pagkunhod sa mga Nephite, si Alma mitawag sa iyang mga anak nga lalaki aron “makahatag ngadto kanila matag usa sa iyang katungdanan sa tinagsa-tagsa, mahitungod sa mga butang kabahin ngadto sa pagkamatarong” (Alma 35:16). Una siyang nakigsulti sa iyang anak nga lalaki nga si Helaman ug miasoy sa iyang kasinatian sa pagkakabig.
Ipakita ang mosunod nga hulagway. Dapita ang mga estudyante sa pagpakigtinabangay uban sa usa ka pares sa pagtubag sa mosunod nga pangutana.
Laing kapilian mao ang pagsulat og mga pulong nga susama sa mosunod diha sa pisara: Alma, mga anak nga lalaki ni Mosiah, pagguba sa simbahan, anghel, tulo ka adlaw. Dayon hangyoa ang mga paresan sa pag-asoy sa istorya gamit ang matag usa sa mga pulong o mga hugpong sa mga pulong.
Imahe
ang pagkakabig ni Alma nga Batan-on
Unsa ang imong nahinumdoman mahitungod ni Alma nga Batan-on ug unsa ang gipakita niini nga hulagway?
Basaha ang Alma 36:6–11 ug pangitaa ang mga detalye nga mahimo nga imong nalaktawan.
Ngano sa imong hunahuna nga ang mga pulong sa anghel adunay kusog kaayo nga epekto ngadto kang Alma?
Gawas sa pagkakita og usa ka anghel, unsa kaha ang makadala sa usa ka tawo nga makaamgo nga kinahanglan siyang magbag-o?
Mahimo nimong tabangan ang mga estudyante nga makasabot sa kamahinungdanon sa pagmarka sa mga kasulatan ug dasiga sila sa pagbansay niini nga kahanas atol niini nga leksiyon. Kon ang opsiyon anaa, ikonsiderar ang pagpakita og elektronik nga bersiyon sa mga kasulatan o usa ka hugpong sa papel ug pagpakita og mga paagi sa pagmarka sa mga tudling sa kasulatan.
Alang sa mosunod nga kalihokan, ikonsiderar ang pagdapit sa mga estudyante sa pagmarka sa mga pulong ug sa mga hugpong sa mga pulong sa nagkalainlaing mga paagi. Ikonsiderar ang pagbuhat sa unang hugpong sa mga bersikulo isip usa ka klase, nga magpakita og ehemplo sa kalihokan alang kanila. Dayon ang mga estudyante magbuhat sa ikaduha ug ikatulo nga mga hugpong sa mga bersikulo sa ilang kaugalingon. Kon mahuman na sila, mahimo nilang ipakigbahin sa mga kauban o sa klase kon unsay ilang nakaplagan ug giunsa nila kini pagmarka.
Basaha ang paghulagway ni Alma sa unsay iyang nasinati ug gibati sulod sa tulo ka adlaw nga dili siya makalihok diha sa mosunod nga mga hugpong sa mga bersikulo. Ikonsiderar ang pagmarka kon unsay gisugyot.
Alma 36:12–16: mga pulong o mga hugpong sa mga pulong nga naghulagway sa gibati ni Alma mahitungod sa iyang mga sala
Alma 36:17–18: mga pulong o mga hugpong sa mga pulong nga nagpakita kon unsay nahinumdoman ug gibuhat ni Alma nga misangpot sa iyang kausaban
Alma 36:19–21: mga pulong o mga hugpong sa mga pulong nga naghulagway ni Alma nga mibati og butang nga sukwahi o lahi sa unsay una niyang nasinati
Hatagi ang mga estudyante og kahigayonan sa pagpakigbahin sa unsay ilang namatikdan o nakat-onan samtang sila nagtuon sa mga bersikulo 12–21. Kon gikinahanglan, ikonsiderar ang pagpangutana sama sa “Unsa ang inyong namatikdan pinaagi sa pagtandi sa mga emosyon ni Alma sa wala pa ug human sa iyang kabag-ohan?” Mahimo usab nimong ipangutana ang pipila sa mosunod nga mga pangutana.
Unsa ang nakapadani kanimo mahitungod sa unsay nagdala sa kabag-ohan ni Alma?
Unsa nga mga kamatuoran ang atong makat-onan gikan sa iyang kasinatian?
Usa ka kamatuoran nga atong makat-onan mao nga si Jesukristo adunay gahom sa pagluwas kanato gikan sa kasakit sa atong mga sala ug pagpuno kanato sa hingpit nga kalipay.
Giunsa pagdapit ni Alma ang gahom sa Manluluwas sa pagluwas?
Ang mosunod nga mga pamahayag makatabang sa mga estudyante nga mas makasabot sa gipabag-an nga letra [bolded] nga kamatuoran. Mahimo usab nimong dapiton ang mga estudyante sa pagtuon sa mga bersikulo 24–26, mangita sa mga paagi nga si Alma milihok nga may hugot nga pagtuo kang Jesukristo.
Si Presidente Boyd K. Packer (1924–2015) sa Korum sa Napulog Duha ka Apostoles mipasabot:
Imahe
Presidente Boyd K. Packer
Wala gikinahanglan nga mahibaloan ninyo ang tanang butang sa dili pa moepekto diha kaninyo ang gahom sa Pag-ula. Pagbaton og hugot nga pagtuo kang Kristo; magsugod kini sa pag-epekto sa adlaw nga inyo kining pangayoon! (Boyd K. Packer, “Washed Clean,” Ensign, Mayo 1997, 10)
Si Elder Neil L. Andersen sa Korum sa Napulog Duha ka Apostoles mitudlo:
Imahe
Elder Neil L. Andersen
Samtang kita matinuoron nga mokompisal sa atong mga sala, mopahiuli kutob sa atong mahimo ngadto sa nasakitan, ug mosalikway sa atong mga sala pinaagi sa pagsunod sa mga sugo, kita anaa sa proseso sa pagdawat sa kapasayloan. Uban sa panahon, kita mobati sa kasakit sa atong kasubo nga nag-anam og kawala, motangtang “sa mga kasaypanan gikan sa atong mga kasingkasing” ug magbaton og “kalinaw sa tanlag.” (Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 42)
Unsa nga dugang nga mga panabot ang imong nakuha gikan sa mga pamahayag?
Mahimong makatabang ang pagpasabot nga ang tabang gikan ni Jesukristo mahimong magsugod sa higayon nga kita mangayo niini apan ang proseso sa paghinulsol ug pagbati nga gipasaylo mahimong mas hinay-hinay.
Ikonsiderar ang pagpahisgot sa mga estudyante diha sa ginagmay nga mga grupo o nga magpares kon unsaon nila sa pagtubag sa mosunod nga mga sitwasyon.
Unsa ang imong isulti sa usa ka tin-edyer kinsa:
Mibati og tumang pagmahay ug kasakit tungod sa iyang mga sala.
Mibati nga ang iyang mga sala dili makalilisang ug mosulbad ra sa ilang mga kaugalingon sa paglabay sa panahon nga walay paghinulsol.
Paggahin og kadiyot sa pagpamalandong sa imong kaugalingong sitwasyon ug sa unsang paagi ang leksiyon karong adlawa magamit sa imong kinabuhi. Ikonsiderar ang usa ka butang nga mahimo nimong buhaton karon aron sa pagdangop ngadto sa Manluluwas ug pagdapit sa Iyang gahom sa pagluwas sa imong kinabuhi.
Ikonsiderar ang pagpakigbahin sa imong pagpamatuod kon sa unsang paagi ka napanalanginan sa makaayo nga gahom sa Manluluwas ug sa imong pagsalig sa Iyang tinguha sa pagdala og kalinaw ug kalipay sa kinabuhi sa imong mga estudyante.