Ալմա 36

«Ես այլևս չկարողացա հիշել իմ ցավերը»

երիտասարդ կինը ժպտում է

Մեր մտերիմ մարդկանց հետ կարևոր հոգևոր փորձառություններով կիսվելը կարող է զորացման աղբյուր լինել նրանց և մեզ համար։ Խոսելով իր որդի Հելամանի հետ՝ Ալման պատմում էր, թե ինչպես է հրեշտակ տեսել, զգացել տանջանքներ իր մեղքերի պատճառով և ազատում գտել Հիսուս Քրիստոսի միջոցով։ Այս դասը նախատեսված է օգնելու ձեզ հավատքով դառնալ դեպի Հիսուս Քրիստոսը և զգալ Նրա միջոցով ազատման ուրախությունը։

Հատվածներում նշումներ կատարելը որպես ուսումնասիրության հմտություն։ Սուրբ գրություններում նշումներ կատարելը կարող է օգնել ուսանողներին կարևոր կապեր ստեղծել և հիշել այն, ինչ սովորում են։ Նրանք կարող են ընդգծել, գունանշել կամ շրջանի մեջ վերցնել հիմնական բառերը կամ արտահայտությունները։ Սուրբ գրությունների էլեկտրոնային տարբերակները նշումներ կատարելու օգտակար գործիքներ են պարունակում։

Ուսանողի նախապատրաստում․ ուսանողներին առաջարկեք պատրաստվել և կիսվել մի մարդու օրինակով, որը որոշ ժամանակ տառապելուց հետո խաղաղություն է գտել Քրիստոսում։ Ի՞նչն օգնեց այդ մարդուն խաղաղություն գտնել։

Հնարավոր ուսումնական վարժություններ

Հակիմաստ բառեր

Այս դասը սկսելու համար օգնեք ուսանողներին մտածել հոգևոր փոփոխության և այն մասին, թե ինչն է դրան նպաստում։ Որպես դա անելու եղանակներից մեկը՝ գրեք հետևյալ բառերը գրատախտակին և ուսանողներին հանձնարարեք գրել դրանցից յուրաքանչյուրի հակիմաստ բառը։

• Ցավ →

• Զղջում →

• Տխրություն →

Խորհեք, թե երբ եք մեղք գործել և ձախ կողմի զգացողությունն ունեցել։ Այդ զգացողությունը երբևէ փոխվե՞լ է աջ կողմի գրվածով։ Ի՞նչ է տեղի ունեցել, որը հնարավոր է դարձրել այդ փոփոխությունը։

Վերոնշյալը քննարկելուց հետո կարող եք հիշեցնել, որ երբ մեղքը բացասական զգացողություններ է պատճառում, միայն Տերը կարող է օգնել մեզ վերափոխել այդ զգացողությունները դրանց հակադիր՝ դրական զգացողությունների։

Ուսանողներին հնարավորություն տվեք լուռ մտածելու, թե Տերն ինչպես է օգնել նրանց փոխվել, երբ մեղք են գործել։ Ցուցադրեք ստորև ներկայացվող ինքնագնահատումը և ուսանողներին խնդրեք օրագրում գրել խորհելու ընթացքում ունեցած բոլոր տպավորությունները։ Դրանք կարող են լինել հարցեր, զգացմունքներ կամ գործելու հուշումներ։

Խորհեք, թե հետևյալ պնդումները որքանով են ճիշտ ձեզ համար․

• Երբ մեղք գործեցի, ես գիտեի ինչպես դիմել Տիրոջը ներում, խաղաղություն և հույս ստանալու համար։

• Ես վստահ եմ, որ Տիրոջ օգնությամբ կարող եմ փոխվել։

• Ես պարբերաբար դիմում եմ Տիրոջը այդ օգնության համար։

Այսօր կուսումնասիրեք, թե Ալմա Կրտսերի մեղքերից առաջացած տագնապային խորը զգացումներն ինչպես ուրախության և խաղաղության զգացումների փոխվեցին, երբ նա աղերսեց Փրկչին օգնել իրեն։ Ուսումնասիրելիս փնտրեք, թե ինչպես կարող եք մեղքը և դրա ազդեցությունները հաղթահարելու համար Տիրոջ օգնությանը դիմել և Հիսուս Քրիստոսի միջոցով ուրախություն զգալ։

Ալմայի զորեղ փոփոխությունը

Երբ զորամացիները մերժեցին իրենց ուսուցանված ավետարանը, միացան լամանացիներին, որպեսզի նրանց հրահրեն նեփիացիների դեմ։ Հետո զորամացիները և լամանացիները հարձակվեցին նեփիացիների վրա, ինչը մեծ պատերազմի վերածվեց։ Նեփիացիներից շատերի սրտերը նույնպես «սկսում էին կարծրանալ» Աստծո խոսքի դեմ (Ալմա 35.15)։ Ի պատասխան նեփիացիների հոգևոր մերժման՝ Ալման հավաքեց իր որդիներին, որպեսզի «նրանցից ամեն մեկին առանձին տա իր հանձնարարությունը, արդարությանը պատկանող բաների վերաբերյալ» (Ալմա 35.16)։ Նա նախ խոսեց իր որդի Հելամանի հետ և պատմեց իր դարձի փորձառության մասին։

Ցուցադրեք հետևյալ պատկերը: Ուսանողներին առաջարկեք ստորև ներկայացվող հարցին պատասխանելու համար աշխատել դասընկերոջ հետ։

Որպես մեկ այլ տարբերակ գրատախտակին գրեք նմանատիպ բառեր՝ Ալմա, Մոսիայի որդիները, ոչնչացնել եկեղեցին, հրեշտակ, երեք օր։ Հետո զույգերին խնդրեք պատմել պատմությունը՝ օգտագործելով բառերից կամ արտահայտություններից յուրաքանչյուրը։

Ալմա Կրտսերի դարձը

• Ի՞նչ եք հիշում Ալմա Կրտսերի մասին, և ի՞նչ է պատկերված այս նկարում։

Կարդացեք Ալմա 36.6–11 հատվածները և փնտրեք մանրամասներ, որոնք գուցե բաց եք թողել։

• Ըստ ձեզ՝ հրեշտակի խոսքերն ինչո՞ւ էին այդքան ազդեցիկ Ալմայի համար։

• Բացի հրեշտակ տեսնելուց, ի՞նչը կարող է ստիպել մարդուն հասկանալ, որ նա փոփոխության կարիք ունի։

Կարող եք օգնել ուսանողներին հասկանալ սուրբ գրություններում նշումներ կատարելու արժեքը և խրախուսեք նրանց դասի ընթացքում վարժվել այս հմտության մեջ։ Եթե հնարավոր է, կարող եք ցուցադրել սուրբ գրությունների էլեկտրոնային կամ տպագիր տարբերակը և դրանց վրա սուրբգրային հատվածները նշելու եղանակներ ցույց տալ։

Ստորև բերված վարժության համար կարող եք ուսանողներին առաջարկել, որ տարբեր ձևերով նշեն բառերն ու արտահայտությունները։ Հատվածների առաջին խմբի վրա կարող եք աշխատել դասարանով՝ վարժությունը հարմարեցնելով դրանց։ Հետո ուսանողները կարող են ինքնուրույն աշխատել հատվածների երկրորդ և երրորդ խմբերի վրա։ Երբ ավարտեն, կարող են դասընկերոջ կամ դասարանի հետ կիսվել, թե ինչ են գտել և ինչպես են նշել գտածը։

Հատվածների ստորև ներկայացվող խմբերում կարդացեք, թե ինչ էր նկարագրում Ալման իր տեսածի ու զգացածի մասին այն երեք օրվա ընթացքում, երբ չէր կարողանում շարժվել։ Կարող եք նշել այն, ինչ առաջարկված է։

• Ալմա 36.12–16․ բառեր կամ արտահայտություններ, որոնք նկարագրում են, թե Ալման ինչ էր զգում իր մեղքերի պատճառով

• Ալմա 36.17–18․ բառեր կամ արտահայտություններ, որոնք ցույց են տալիս, թե ինչ էր հիշում Ալման և ինչ արեց, որը հանգեցրեց փոփոխության

• Ալմա 36.19–21․ բառեր կամ արտահայտություններ, որոնք նկարագրում են, որ Ալման զգում է ինչ-որ հակառակ բան կամ հակասում է նրան, ինչ նա ի սկզբանե զգացել է

Ուսանողներին հնարավորություն տվեք կիսվելու, թե ինչ նկատեցին կամ սովորեցին 12–21 հատվածներն ուսումնասիրելիս։ Անհրաժեշտության դեպքում կարող եք նմանատիպ հարց տալ․ «Ի՞նչ նկատեցիք՝ համեմատելով Ալմայի զգացումները նրա փոփոխությունից առաջ և հետո»։ Կարող եք տալ նաև հետևյալ հարցերից մի քանիսը։

• Ի՞նչն է տպավորում ձեզ այն ամենում, որը հանգեցրեց Ալմայի փոփոխությանը։

• Ի՞նչ ճշմարտություններ կարող ենք սովորել նրա փորձառությունից։

Ճշմարտություններից մեկը, որ կարող ենք սովորել, հետևյալն է. Հիսուս Քրիստոսը մեզ մեր մեղքերի ցավից ազատելու և մեզ ուրախությամբ լցնելու զորություն ունի։

• Ալման ինչպե՞ս հրավիրեց Փրկչի ազատման զորությունը։

Ստորև ներկայացվող խոսքերը կարող են օգնել ուսանողներին ավելի խորությամբ հասկանալ թավագիր ճշմարտությունը։ Կարող եք ուսանողներին առաջարկել նաև ուսումնասիրել 24–26 հատվածները և փնտրել, թե ինչ եղանակներով էր Ալման հավատք գործադրում առ Հիսուս Քրիստոս։

Տասներկու Առաքյալների Քվորումի նախագահ Բոյդ Ք. Փաքերը (1924–2015) բացատրել է.

Նախագահ Բոյդ Ք․ Փաքեր

Կարիք չկա իմանալ ամեն ինչ նախապես, որպեսզի Քավության զորությունը գործի ձեզ համար։ Հավատացեք Քրիստոսին, այն սկսում է գործել խնդրելու օրվանից: (Բոյդ Ք. Փաքեր, «Մաքրված», Ensign, մայիս 1997 թ․, 10)

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Երեց Նիլ Լ. Անդերսեն

Երբ մենք ազնվորեն խոստովանում ենք մեր մեղքերը, ուղղում ենք այն, ինչ կարող ենք, և թողնում ենք մեր մեղքերը՝ պահելով պատվիրանները, ներում ստանալու գործընթացի մեջ ենք մտնում։ Ժամանակի ընթացքում մենք կզգանք, որ մեր վշտի ցավը հեռանում է՝ «վերցնելով հանցանքը մեր սրտերից» և պարգևելով «խղճմտանքի խաղաղություն»: (Նիլ Լ․ Անդերսեն, «Ապաշխարեք, … որպեսզի ես կարողանամ բժշկել ձեզ», Ensign կամ Լիահոնա նոյեմբեր 2009 թ․, 42)

• Ի՞նչ նոր գաղափարներ ձեռք բերեցիք այս խոսքերից։

Օգտակար կլինի նշել, որ Հիսուս Քրիստոսից եկող օգնությունը կարող է սկսվել այն պահին, երբ խնդրում ենք այն, բայց ապաշխարության և ներված զգալու գործընթացը կարող է ավելի աստիճանական լինել։

Կարող եք ուսանողներին հանձնարարել փոքր խմբերով կամ զույգերով քննարկել, թե ինչպես կարձագանքեին ստորև բերված իրավիճակներում։

Ի՞նչ կասեիք այն պատանուն, որը․

• Զղջման և ցավի մեծ զգացում ունի իր մեղքերի պատճառով։

• Զգում է, որ իր մեղքերը սարսափելի չեն և ժամանակի ընթացքում առանց ապաշխարության ինքնուրույն կլուծվեն։

Մի պահ մտածեք ձեր իրավիճակի և այն մասին, թե այսօրվա դասն ինչպես կարող է կիրառվել ձեր կյանքում։ Մտածեք մեկ բան, որը կարող եք անել այսօր, որպեսզի դառնաք դեպի Փրկիչը և ձեր կյանք հրավիրեք Նրա ազատման զորությունը։

Կարող եք կիսվել Փրկչի բժշկող զորությամբ օրհնվելու ձեր վկայությամբ և ձեր վստահությամբ այն մասին, որ Նա ցանկանում է խաղաղություն և ուրախություն բերել ձեր ուսանողների կյանք։

Բացատրական և պատմական տեղեկություններ

Ալմա 36.12–16 Ի՞նչ են նշանակում Ալմայի օգտագործած որոշ բառեր։

Տասներկու Առաքյալների Քվորումի նախագահ Բոյդ Ք. Փաքերն (1924–2015) ուսուցանել է.

Նախագահ Բոյդ Ք. Փաքեր

Պրկված նշանակում է «խոշտանգված»։ Հնում պրկանոցը մի շրջանակ էր, որի վրա պառկեցնում էին զոհին և նրա յուրաքանչյուր կոճ ու դաստակ սռնուն ամրացնում։ Այնուհետև սռնին պտտում էին, որպեսզի անտանելի ցավ պատճառեն զոհին։

Ցաքանը շրջանակ է, որի վրա սրածայր գամեր են ամրացված։ Հողի միջով քաշելիս դրանք տակնուվրա են անում հողը։ Սուրբ գրություններում հաճախ խոսվում է մեղքով «ցաքանված» (տակնուվրա եղած) հոգիների ու մտքերի մասին։

Տանջանք նշանակում է «գալարել»՝ տանջելու միջոց, որն այնքան ցավոտ էր, որ նույնիսկ անմեղը կխոստովաներ։ (Բոյդ Ք. Փաքեր, «Տիրոջ ձեռքի հպումը», Ensign, մայիս 2001 թ․, 23)

Ալմա 36.19 Եթե ապաշխարեմ, կմոռանա՞մ մեղքերս։

Խոսելով մեր մեղքերը հիշելու մասին՝ Տասներկու Առաքյալների Քվորումից երեց Դիտեր Ֆ. Ուխդորֆը բացատրել է․

Նախագահ Դիտեր Ֆ. Ուխդորֆ

Սատանան կփորձի ստիպել մեզ հավատալ, որ մեր մեղքերը չեն ներվել, քանի դեռ մենք կարող ենք հիշել դրանք։ Սատանան ստախոս է, նա փորձում է աղավաղել մեր տեսադաշտը և հեռացնում է մեզ ապաշխարության և ներման ուղուց: Աստված չի խոստացել, որ մենք չենք հիշի մեր մեղքերը։ Հիշելը կօգնի մեզ չկատարել նորից նույն սխալները: Բայց եթե մենք մնանք ճշմարիտ և հավատարիմ, մեր մեղքերի հիշողությունները ժամանակի ընթացքում կմեղմանան: Դա կլինի ապաքինման և սրբագործման անհրաժեշտ ընթացքի մասը։ Ալման վկայում էր, որ երբ Հիսուսի ողորմածությունն աղերսեց, նա դեռ շարունակում էր հիշել իր մեղքերը, բայց իր մեղքերի մասին հիշելն այլևս չէր վշտացնում ու տանջում նրան, քանի որ գիտեր, որ ներված է (տես Ալմա 36.17–19) (Դիտեր Ֆ. Ուխդորֆ, «Ապահով վերադարձի կետ», Ensign կամ Լիահոնա, մայիս 2007 թ., 101)

Ապաշխարության հետ կապված տառապանքն ինչպե՞ս է համեմատելի այն տառապանքի հետ, որը կզգանք, եթե չապաշխարենք։

Տասներկու Առաքյալների Քվորումից երեց Դ. Թոդ Քրիստոֆերսոնն ուսուցանել է.

Երեց Դ. Թոդ Քրիստոֆերսոն

Ապաշխարության հետ կապված ցանկացած ցավ կլինի շատ ավելի թույլ, քան այն տառապանքը, որն անհրաժեշտ է չլուծված մեղսագործության դիմաց արդարության բավարարման համար: Փրկիչը շատ չի խոսել այն մասին, թե ինչ տառապանք է կրել արդարության պահանջները բավարարելու և մեր մեղքերը քավելու համար, բայց Նա ասել է հայտնություն պարունակող հետևյալ արտահայտությունը.

«Քանզի ահա, ես՝ Աստվածս, տառապել եմ այս բաները բոլորի համար, որպեսզի նրանք չտառապեն, եթե ապաշխարեն,

Բայց եթե չապաշխարեն, նրանք պետք է տառապեն, ճիշտ ինչպես ես․

«Տառապանք, որը ստիպեց ինձ, նույնիսկ Աստծուս, բոլորից մեծագույնիս, ցավից դողալ և արյունահոսել ամեն մի ծակոտիից և տառապել՝ թե մարմնով, թե ոգով,– և ես ցանկացա, որ գուցե չխմեմ դառը բաժակը» (Վ&ևՈւ 19.16–18)։ (Դ. Թոդ Քրիստոֆերսոն, «Ապաշխարության աստվածային պարգևը», Ensign կամ Լիահոնա, նոյեմբեր 2011 թ․, 40)

Օժանդակ ուսումնական վարժություններ

Խիազմ

Օգնեք ուսանողներին հասկանալ, որ Ալմա 36 գլուխը շարադրված է եբրայերեն գրական ոճով, որը կոչվում է խիազմ։ Խիազմում բառերը կամ մտքերը շարադրվում են որոշակի հերթականությամբ և հետո կրկնվում են հակառակ հերթականությամբ: Այս կրկնությունը կարևոր գաղափարներ ու բառեր է ընդգծում, և գրողի հիմնական գաղափարը հաճախ խիազմի կենտրոնական մասում է։

Ստորև բերված աղյուսակում նկատեք, որ խիազմի կենտրոնական ուղերձը Ալմա 36.17–18 հատվածներն են, երբ Ալման սփոփանք ստանալու համար դարձավ դեպի Հիսուս Քրիստոսը։

Եթե որոշեք այս տեղեկությունը ներառել դասի մեջ, ուշադիր եղեք, որ այն չփոխարինի Ալմա 36 գլխի հիմնական բովանդակությունը։

Ալմա 36 գլխի խիազմի կառուցվածքի պատկերը

Ալմա 36.2–3, 27–29 Եթե հնազանդվենք Աստծուն, Նա կաջակցի մեզ փորձության պահերին։

Եթե ուսանողները բացահայտեն այս ճշմարտությունը, օգնեք նրանց խորացնել դրա վերաբերյալ իրենց հասկացողությունը, որի համար խնդրեք նրանց գտնել այլ սուրբգրային պատմություններ և ավելացնել դրանք Ալմայի նշած այն պատմություններին, որոնք հաստատում են այս ճշմարտությունը։ Այնուհետև կարող եք հանձնարարել ուսանողներին այս պատմություններից մեկի կամ երկուսի օգնությամբ փորձել մեկ ուրիշին բացատրել, թե Աստված ինչպես կարող է օգնել իրենց փորձությունների ժամանակ։ Կարող եք ուսանողներին մի սցենար ներկայացնել, որի հերոսը հուսահատված է այն փորձությունների պատճառով, որոնց նա բախվում է։

Չափազանց մեծ ուրախություն

Կարող եք առաջարկել ուսանողներին կարդալ Ալմա 36.25–26 հատվածները և փնտրել, թե ավետարանն ուսուցանելու Ալմայի ջանքերն ինչպես ազդեցին իր և ուրիշների վրա։ Ուսանողները կարող են կիսվել իրենց գտածով։ Օգնեք ուսանողներին հասկանալ, որ մենք կարող ենք մեծ ուրախություն ստանալ, երբ ձգտենք ուրիշներին բերել դեպի Քրիստոսը։