“ʻAlamā 36–38: Vakai Fakalūkufuá,” Tohi ʻa Molomoná – Tohi Lēsoni ʻa e Faiakó (2024)
“ʻAlamā 36–38,” Tohi ʻa Molomoná – Tohi Lēsoni ʻa e Faiakó
ʻAlamā 36–38
Vakai Fakalūkufuá
Naʻe faleʻi ʻe ʻAlamā ʻi he ʻAlamā 36–39 ʻa hono ngaahi foha ko Hilamani, Sipiloni, mo Kolianitoní. Naʻá ne fakamatala ki heʻene aʻusia ʻi heʻene mamata ki ha ʻāngeló, ongoʻi e mamahi ʻo ʻene ngaahi angahalá, pea mo hono fakatauʻatāinaʻi ia ʻo fakafou ʻia Sīsū Kalaisí. Naʻá ne akoʻi ʻoku faʻa fakaʻaongaʻi ʻe he ʻEikí ʻa e fanga kiʻi meʻa iiki mo faingofuá ke fai ʻaki ha ngaahi meʻa maʻongoʻonga, hangē ko hono fakaʻatā ʻa e folofolá ke ne fakahinohino ʻa e “feituʻu ke [tau] fou ai” ʻi heʻetau moʻuí (ʻAlamā 37:40). Naʻá ne faleʻi hono ngaahi fohá ke nau tauhi e ngaahi fekau ʻa e ʻOtuá. Naʻá ne faleʻi ʻi he ʻofa hono foha ko Kolianitoní ke siʻaki mo fakatomala mei heʻene ngaahi angahalá, kau ai hono maumauʻi e fono ʻo e angamaʻá.
Teuteu ke Akoʻí
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.
ʻAlamā 36
Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau tafoki kia Sīsū Kalaisi ʻi he tui pea ongoʻi ʻa e fiefia ʻo ʻEne fakahaofí.
-
Teuteu ʻa e tokotaha akó: Fakaafeʻi e kau akó ke nau omi mateuteu ke vahevahe ha sīpinga ʻo ha taha naʻá ne maʻu ʻa e melinó ʻia Kalaisi hili haʻane faingataʻaʻia ʻi ha kiʻi taimi. Ko e hā naʻe tokoni ki he tokotaha ko ʻení ke ne maʻu ʻa e melinó?
-
ʻĪmisi ke fakaʻaliʻalí: Ko ha fakatātā ʻo ʻAlamā ko e Siʻí mo e ʻāngeló
-
Fokotuʻu ki hono akoʻi ʻi he konifelenisi vitioó: Lolotonga hono akoako fakaʻilongaʻi ʻe he kau akó e ngaahi foʻi leá mo e kupuʻi leá ʻi ha ngaahi founga kehekehé, te ke lava ʻo fakaafeʻi ʻa e niʻihi ʻoku nau fakaʻaongaʻi ha folofola fakaʻilekitulōniká ke vahevahe ʻenau screen ke fakahaaʻi ʻa e ngaahi founga lelei kuo nau maʻu ke fakaʻilongaʻi ʻaki ʻenau folofolá.
ʻAlamā 37
Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ngāue ʻaki ʻa e tui kia Sīsū Kalaisí ʻi heʻenau ako ʻEne folofolá ʻi he ngaahi tohi folofolá.
-
Teuteu ʻa e tokotaha akó: Poupouʻi e kau akó ʻi heʻenau ako fakaʻaho e folofolá ke nau fakakaukau ki he ngaahi tāpuaki ʻokú ne ʻomi ki heʻenau moʻuí, tautautefito ki he founga ʻoku tokoni ai ke nau haʻu kia Kalaisí.
-
Ngaahi ʻīmisi ke fakaʻaliʻalí: ʻŪ fakatātā ʻo ha fanga kiʻi meʻa iiki mo faingofua, hangē ko ha polosi fufulu nifo, pōpoaki he telefoni, fakamālohisino, pe ko ha kiʻi ngāue tokoni faingofua; ko ha fakatātā ʻo Līhai mo e Liahoná
-
Vitioó: “ʻOku Faleʻi ʻe ʻAlamā ʻa Hono Ngaahi Fohá” (17:05; mamata mei he taimi 3:15 ki he 5:05)
-
Fokotuʻu ki hono akoʻi ʻi he konifelenisi vitioó: Ke kamata e lēsoní, fakakaukau ke fakaʻaliʻali ki he kau akó ha sīpinga ʻe taha pe ua ʻo e fanga kiʻi meʻa iiki mo faingofua ʻokú ne fakahoko ha liliu lahi ʻi heʻetau moʻuí. ʻOange leva ha sekoni ʻe 30 ki he kau akó ke nau kumi ha sīpinga ʻe taha ʻi honau ʻapí pea ʻomi ia ke fakaʻaliʻali ki he kalasí.
ʻAlamā 37–38
Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻilo ʻe he kau akó, ʻi heʻenau moʻui ʻaki ʻa e ngaahi fekaú he taimi ní, te ne tāpuekina kinautolu ʻi he toenga ʻo ʻenau moʻuí.
-
Teuteu ʻa e tokotaha akó: Fakaafeʻi e kau akó ke nau lau pe ako maʻuloto ʻa e ʻAlamā 37:35 pea omi mateuteu ki he kalasí ke vahevahe ʻa e ʻuhinga ʻoku nau pehē ai ʻoku mahuʻinga ke “ako ʻi [heʻenau] kei siʻí ke tauhi ʻa e ngaahi fekau ʻa e ʻOtuá.”
-
Laʻiʻata ke fakaʻaliʻalí: Ko ha laʻiʻata ʻo ha fuʻu ʻakau kei siʻi
-
Vitiō: “Ko e Tauhi Pau ki Heʻetau Ngaahi Palōmesí mo e Ngaahi Fuakavá” (14:39; mamata mei he taimi 7:29 ki he 8:35)
-
Fokotuʻu ki hono akoʻi ʻi he konifelenisi vitioó: ʻI he taimi ʻoku tali ai ʻe he kau akó ʻa e fehuʻi fekauʻaki mo e faleʻi lelei taha kuo nau maʻu mei ha mātuʻa pe taki ʻo e Siasí, fakakaukau ke fakaafeʻi ke nau fokotuʻu ʻa e faleʻí ki he polokalama fetalanoaʻakí. ʻE lava heni ke nau fevakaiʻiʻaki ʻenau ngaahi fakamatalá. Te ke lava leva ʻo fakaafeʻi ke nau vahevahe pe ko hai naʻa nau maʻu ʻa e faleʻí mei aí pea mo e founga kuó ne tāpuekina ai kinautolú.
ʻAlamā 39
Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e mamafa ʻo e angahala fakasekisualé mo e founga ke tekeʻi ʻaki ʻa e ʻahiʻahi ke maumauʻi ʻa e fono ʻo e angamaʻá.
-
Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ʻoku nau ʻilo fekauʻaki mo e fono ʻo e angamaʻá, ongo ʻoku nau maʻu felāveʻi mo iá, mo ha faʻahinga fehuʻi pē ʻoku nau maʻu.
-
Vitiō: “ʻOku Ou Fili Ke U Maʻa” (4:19)
-
Fokotuʻu ki hono akoʻi ʻi he konifelenisi vitioó: Tuku ke fakaʻaongaʻi ʻe he kau akó ʻa e polokalama fetalanoaʻakí ke nau aleaʻi ha ngaahi founga ʻe lava ke ngāue ʻaki ai ʻe he toʻu tupu ʻo e ʻaho ní ʻa e mapuleʻi kitá mo ikunaʻi ʻa e ʻahiʻahí. Te ke lava foki ʻo fakakaukau ke fakaʻaongaʻi ha polokalama telefoni toʻotoʻo ʻokú ne fakaʻatā e kau akó ke vahevahe ʻenau ngaahi fakakaukaú ʻo ʻikai ʻilo pe ko hai naʻá ne fai e vahevahé.
Fakataukei Fakatokāteliné: ʻAlamā 39:9
Taumuʻa ʻo e lēsoní: ʻE lava ke tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ki he ʻAlamā 39:9, fakamatalaʻi ʻa e tokāteline naʻe akoʻi ʻi he potufolofola ko ʻení, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.
-
Teuteu ʻa e tokotaha akó: Fakaafeʻi e kau akó ke feinga ke kamata ako maʻuloto ʻa e kupuʻi lea folofola mahuʻinga ki he ʻAlamā 39:9. Te ke lava foki ʻo poupouʻi ke nau feinga ke ako maʻuloto ʻa e vēsí kakato.
-
Fokotuʻu ki hono akoʻi ʻi he konifelenisi vitioó: ʻI he ʻekitivitī akoako hono fakaʻaongaʻí, fakakaukau ke fakakulupu e kau akó ʻi he ngaahi loki fakatahá koeʻuhí ke nau lava ʻo aleaʻi e founga ke tokoniʻi ai ʻa ʻAivení. Fokotuʻu ʻa e ngaahi fehuʻi ko ʻení ʻi he polokalama fetalanoaʻakí: “ʻE fēfē nai hono vakaiʻi ʻe ʻAiveni hono tūkungá ʻaki ha fakakaukau ʻoku taʻengatá? Ko e hā ha ngaahi sīpinga ʻe niʻihi ʻo e ngaahi maʻuʻanga tokoni kuo fokotuʻu fakalangí ʻe lava ʻo tokoni kia ʻAivení? Ko e hā ha meʻa ʻe lava ke fai ʻe ʻAiveni ke ngāue ai ʻi he tuí pea ʻʻikai toe muimui ʻi he ngaahi holi ʻa [hono] matá’ (ʻAlamā 39:9)?” Fakakaukau ke ke ʻaʻahi ki he loki fakataha takitaha kapau ʻe lava. ʻO ka fiemaʻu, fakakaukau ke tohi ʻi he polokalama fetalanoaʻakí ha toe ngaahi fehuʻi ʻoku lisi atu ʻi he lēsoní ʻe ala tokoni ki he kau akó.