Wala kita masayod nganong gitamod pag-ayo ni Hari Lamoni si Ammon sa una nilang pagkita. Tingali ang kaandam ni Ammon sa pagserbisyo o ang kahayag ni Kristo nga iyang gipabanaag, o nga siya anak nga lalaki ni Hari Mosiah. Bisan unsa pa ang rason sa positibo nga unang impresyon ni Ammon, si Lamoni natandog pag-ayo sa pagkamatinud-anon diin si Ammon mialagad kaniya sa nagsunod nga tulo ka adlaw. Tungod sa iyang gibati, si Lamoni andam nga motuo sa tanang mga pulong ni Ammon. Kini nga leksiyon gituyo nga tabangan ka sa pagpangita og mga paagi sa pagtabang sa uban nga maduol sa Dios pinaagi sa imong Kristohanong gugma ug pagserbisyo.
Gamita sa epektibong pamaagi ang visual media nga giaprobahan sa Simbahan. Ang maalamong paggamit sa visual media makapalambo sa pagsabot sa mga estudyante ug makatabang sa mga estudyante sa pagpalig-on sa ilang mga pagpamatuod. Ikonsiderar ang pagputol sa mas taas nga mga bidyo ngadto sa mas mugbo nga mga bahin. Dapita ang mga estudyante sa pagpangita ug paghisgot kon sa unsang paagi gihulagway ang doktrina ug mga baroganan.
Pagpangandam sa estudyante: Dapita ang mga estudyante sa pagpangutana og usa ka higala o sakop sa pamilya sa pagngalan og mga tawo nga ilang nailhan kinsa nakatabang sa uban nga mas maduol sa Dios pinaagi sa ilang Kristohanong gugma o pagserbisyo.
Posible nga mga Kalihokan sa Pagkat-on
Isangyaw ang ebanghelyo
Ipakigbahin o ipakita ang mosunod nga pamahayag, ug dapita ang mga estudyante sa paghisgot kon unsa sa ilang hunahuna ang gipasabot niini. Mahimo nimong gamiton ang mga pangutana nga nagsunod sa pamahayag aron makatabang sa pagpalambo niini nga panaghisgotan.
Si Presidente Dieter F. Uchtdorf, kaniadto sa Unang Kapangulohan, mitudlo:
Imahe
Presidente Dieter F. Uchtdorf
Usa sa pinakamahinungdanong wali nga nalitok kabahin sa misyonaryo nga buhat mao kining yanong hunahuna nga napahinungod kang St. Francis of Assisi: “Isangyaw ang ebanghelyo sa tanang panahon ug kon gikinahanglan, gamiti og mga pulong.” (Dieter F. Uchtdorf, “Naghulat diha sa Dalan sa Damasco,” Liahona, Mayo 2011, 77)
Unsaon nato pagsangyaw sa ebanghelyo nga dili mogamit og mga pulong?
Nganong gamhanan kaayo kana nga paagi sa pagsangyaw?
Si Jesukristo mao ang hingpit nga ehemplo sa pagtudlo sa ebanghelyo.
Makahunahuna ka ba og mga asoy ni Jesus nga nagtabang sa uban nga makat-on mahitungod sa Langitnong Amahan bisan og wala kaayoy gisulti?
Ikonsiderar ang pagdapit sa mga estudyante sa pagpakigbahin og mga ehemplo kon sa unsang paagi ang Manluluwas mitabang sa uban nga mas maduol sa Langitnong Amahan pinaagi sa Iyang ehemplo, mga milagro, o pagserbisyo sa uban. Ang mga ehemplo mahimong maglakip sa mga asoy gikan sa Juan 11:41–45; 13:4–5, 13–15.
Imahe
Ammon nanalipod sa mga panon
Tingale imong mahinumduman nga sa dihang si Ammon misugod sa iyang misyon taliwala sa mga Lamanite diha sa yuta sa Ishmael, wala dayon siya magsugod sa pagtudlo sa ebanghelyo. Hinuon, siya misaad sa hari, “Ako mahimo nga imong sulugoon” (Alma 17:25). Gitahasan dayon si Ammon sa pagbantay sa mga panon sa hari. Pinaagi sa gahom sa Dios, iyang gipanalipdan ang mga panon ug ang ubang mga sulugoon gikan sa mga Lamanite kinsa misulay sa pagpatibulaag sa mga karnero.
Samtang magtuon ka sa Alma 18 karon, hatagig pagtagad ang epekto sa matinud-anong pagserbisyo ni Ammon ngadto ni Hari Lamoni. Paghunahuna og mga paagi nga makatabang ka sa uban nga mas maduol sa Dios pinaagi sa paghigugma ug pagserbisyo kanila sa Kristohanong mga paagi.
Ang epekto sa Kristohanong gugma ug serbisyo ni Ammon
Ang mosunod nga mga bersikulo mahimong dungan nga tun-an isip usa ka klase, o mahimong magtuon ang mga estudyante uban sa usa ka pares.
Basaha ang Alma 18:1–11, mangita sa epekto sa mga lihok ni Ammon ngadto ni Hari Lamoni. Mahimo usab nimong tan-awon ang “Si Ammon Nanalipod sa mga Panon ni Hari Lamoni” gikan sa time code 2:57 hangtod sa 5:24 samtang nagsubay ka sa imong mga kasulatan. Kini nga bidyo anaa sa ChurchofJesusChrist.org.
Unsa ang mipatigbabaw diha kanimo mahitungod sa mga lihok ni Ammon niini nga mga bersikulo?
Unsa ang epekto sa mga lihok ni Ammon ngadto sa hari?
Human mangandam si Ammon sa mga kabayo ug sa mga karwahe sa hari, miadto siya sa hari ug nakabantay nga ang panagway ni Lamoni nausab. Pinaagi sa Espiritu, si Ammon nakasabot sa mga hunahuna sa hari ug nahibalo nga si Lamoni nahibulong sa milagrosong paagi sa pagpanalipod ni Ammon sa mga panon sa hari (tan-awa sa Alma 18:12–19).
Unsa sa imong hunahuna ang papel sa Kristohanong gugma ug serbisyo ni Ammon diha sa pagkaandam sa hari nga motuo sa mga pulong ni Ammon?
Usa ka kamatuoran nga atong makat-onan gikan niini nga asoy mao nga pinaagi sa atong Kristohanong gugma ug serbisyo, ang Dios makaandam sa mga kasingkasing niadtong atong gialagaran sa pagdawat sa mga kamatuoran sa ebanghelyo.
Ikonsiderar ang pagdapit sa mga estudyante sa paghisgot sa mosunod nga pangutana uban sa gagmay nga grupo. Dayon ang mga miyembro sa matag grupo mahimong mopakigbahin sa pipila sa ilang mga tubag ngadto sa klase.
Unsa ang pipila ka mga paagi nga kita makatabang sa uban nga mas maduol sa Dios pinaagi sa atong Kristohanong gugma ug serbisyo?
Kon mahimo, ipakigbahin ang usa ka ehemplo sa usa ka higayon diin imong nakita ang uban nga mas napaduol sa Dios tungod sa Kristohanong gugma ug serbisyo sa usa ka tawo. Mahimo usab nimong hangyoon ang mga estudyante sa paghunahuna ug pagpakigbahin og mga ehemplo nga ilang nakita.
Ammon nagtudlo ni Lamoni sa mga kamatuoran sa ebanghelyo
Base sa mga panginahanglan ug abilidad sa imong mga estudyante, ikonsiderar kon labing maayo ba nga tun-an sa mga estudyante ang mosunod nga mga bersikulo nga magdungan isip usa ka klase, magpares-pares, o sa tinagsa.
Basaha ang Alma 18:24–43, mangita sa unsay gitudlo ni Ammon kang Lamoni. Mahimong maghimo ka og lista sa imong nakit-an, maghatag og pagtagad sa mga pulong nga “misaysay pag-usab,” “mipatin-aw,” ug “misulti.” Mahimo usab nimong tan-awon ang bidyo nga “Si Ammon Nagtudlo ni Hari Lamoni mahitungod sa Ebanghelyo ni Jesukristo” gikan sa time code 1:56 hangtod sa 5:41, anaa sa ChurchofJesusChrist.org, ug sunda subay diha sa imong mga kasulatan.
Unsa ang pipila ka mahinungdanon nga mga kamatuoran nga gitabang ni Ammon kang Lamoni nga masabtan?
Ikonsiderar nga ipalista sa mga estudyante diha sa pisara ang ilang mga tubag sa miaging pangutana. Mahimo sab nga ang mga estudyante magbutang og bituon sa mga kamatuoran nga gitudlo sa mga misyonaryo karon.
Unsa ang epekto niini nga mga kamatuoran ngadto kang Lamoni?
Ngano nga kini nga mga kamatuoran mahinungdanon nga atong masabtan karon?
Tan-awa ang sugyot diha sa seksiyon sa “Dugang nga mga Kalihokan sa Pagkat-on” nga makatabang sa mga estudyante nga makasabot sa kamahinungdanon sa mga kamatuoran nga gitudlo ni Ammon sa hari niini nga mga bersikulo.
Bisan og daghan sa mga Lamanite ang nagdahom nga si Lamoni namatay sa dihang siya natumba ngadto sa yuta, si Ammon sa kaulahian mitabang kanila nga makasabot nga ang hari “anaa ubos sa gahom sa Dios,” o “giagak ngadto sa Dios” (Alma 19:6). Makakat-on pa ka og dugang mahitungod sa pagkakabig ni Lamoni samtang magtuon ka sa Alma 19.
Paggamit sa unsay imong nakat-onan
Hatagi og panahon ang mga estudyante sa pagkonsiderar kon unsaon nila paggamit ang mga kamatuoran nga ilang gitun-an karon. Mahimong makatabang ang pagpakita sa mosunod nga mga instruksiyon ug dapita ang mga estudyante sa pagrekord sa ilang mga tubag diha sa ilang mga journal sa pagtuon. Mahimo dayon nimong dapiton ang pipila ka mga estudyante sa pagpakigbahin sa pipila sa ilang mga tumong o mga plano, apan dili ang mga ngalan sa mga tawo nga ilang gihunahuna.
Paghunahuna og usa ka tawo nga imong gibati nga mahimo nimong matabangan nga mas maduol sa Dios pinaagi sa Kristohanong gugma ug serbisyo.
Unsaon nimo pagserbisyo o pagpakita og Kristohanong gugma niini nga tawo?
Sa unsang paagi nga ang imong mga paningkamot makatabang niini nga tawo nga mas maduol sa Dios?
Unsa nga mga babag ang imong nakita nga makapalisod sa pagserbisyo niini nga tawo uban sa tiunay nga gugma? Unsaon nimo pagbuntog niadtong mga babag?
