Alma 19

“Ang Iyang Bukton Gipatuy-od ngadto sa Tanan Kinsa Mohinulsol ug Motuo”

batan-on nga nagpaambit sa ebanghelyo sa iyang higala

Samtang maghunahuna ka bahin sa pagpaambit sa ebanghelyo ngadto sa uban, gibati ba nimo nga adunay pipila ka mga tawo nga lagmit dili gayod modawat sa mga pagtulun-an sa Manluluwas? Unsa sa imong hunahuna ang pagtan-aw sa Langitnong Amahan niini nga mga tawo? Gikan sa misyonaryo nga mga kasinatian ni Ammon uban sa mga Lamanite, atong makita nga ang Ginoo nag-andam sa mga kasingkasing sa mga tawo gikan sa tanang kahimtang sa kinabuhi sa pagdawat sa Iyang ebanghelyo. Kini nga leksiyon makatabang kanimo nga makasabot nga ang Ginoo nahigugma sa tanang mga tawo ug nagtinguha nga sila moduol ngadto Kaniya.

Pagrespeto sa mga pagtuo ug sa mga opinyon sa uban. Pagtinguha sa pagpalambo sa usa ka palibot diin ang mga tawo nagtahod sa mga pagtuo ug mga opinyon sa uban. Dasiga ang mga estudyante sa pagpaminaw ug pagsulay sa pagsabot kon ngano nga ang uban lahi og pagtuo kay sa ilang gituohan. Tabangi ang mga estudyante nga makat-on sa pag-ila sa mga gituohan sa uban ug magbansay sa pagpakigbahin sa ilang kaugalingong mga pagtuo nga adunay kamabination ug konsiderasyon. Kini nga pagbansay makaandam kanila sa matinahoron nga pagpaambit sa ebanghelyo ngadto sa uban.

Pagpangandam sa estudyante: Dapita ang mga estudyante sa pagtuon sa Alma 19 ug sa pagpangita sa epekto sa ebanghelyo sa Manluluwas ngadto sa mga Lamanite nga gitudloan ni Ammon.

Posible nga mga Kalihokan sa Pagkat-on

Survey sa imong kaugalingon

Ipakita ang mosunod nga survey ug hatagi ang mga estudyante og panahon sa mahunahunaon ug matinud-anon nga pagtubag. Kon dili kaayo personal, dapita ang mga estudyante sa pagpakigbahin sa ilang mga tubag.

Gradohoi ang imong kaugalingon sa sukdanan nga 1–5 kon unsa ka lagmit nga imong madapit ang mosunod nga mga tawo sa pagkat-on og dugang mahitungod sa ebanghelyo ni Jesukristo.

1. Usa ka tawo nga imong nailhan kinsa mipakita og interes sa Simbahan

2. Usa ka higala o sakop sa pamilya kinsa sa kasagaran nagsunod sa mga sumbanan sa ebanghelyo apan dili pa miyembro

3. Usa ka higala o sakop sa pamilya kinsa wala magsunod sa mga sumbanan sa ebanghelyo

4. Usa ka tawo nga imong nailhan kinsa mibalibad sa nangaging mga pagdapit gikan sa uban aron sa pagkat-on og dugang mahitungod sa ebanghelyo

Pamalandongi ang mga rason nganong mitubag ka sa paagi nga imong gibuhat.

• Sa unsang paagi nga ang atong personal nga mga opinyon mahitungod sa uban makaapekto sa atong mga paningkamot sa pagpaambit sa ebanghelyo?

Sa dihang ang mga anak nga lalaki ni Mosiah misugod sa ilang misyon ngadto sa mga Lamanite, daghang mga tawo ang mikatawa kanila ug nagduhaduha nga sila makaangkon og kalamposan taliwala sa daotan nga mga tawo (tan-awa sa Alma 26:23–25). Bisan pa man, si Ammon ug ang iyang mga igsoon nakasinati og kalamposan. Tingale imong mahinumdoman nga human si Ammon mitudlo sa ebanghelyo ngadto ni Hari Lamoni, ang hari mituo sa mga pulong ni Ammon, nag-ampo alang sa kaluoy, ug natumba ngadto sa yuta samtang siya nabuntog sa Espiritu (tan-awa sa Alma 18:40–43).

Lamoni nag-ampo

Karon kamo makakat-on mahitungod sa mga panghitabo nga nahitabo sa panimalay ni Lamoni human si Ammon mitudlo sa hari. Samtang magtuon ka, pangitaa ang mga kamatuoran nga makatabang kanimo nga mas masabtan ang paagi sa pagtan-aw sa Langitnong Amahan sa Iyang mga anak, lakip niadtong daw dili kaayo modawat sa ebanghelyo.

Ammon nagpadayon sa pagtudlo sa panimalay ni Lamoni

Ang katuyoan niini nga seksiyon sa leksiyon mao ang pagtabang sa mga estudyante sa pagtuon sa mga panghitabo nga narekord sa Alma 19 ug sa pag-ila sa baroganan nga gitudlo sa bersikulo 36. Mahimo nimong ikonsiderar ang paggamit og laing mga pamaagi gikan sa mga nalista niini nga seksiyon aron tabangan ang mga estudyante sa pagtuon niini nga kapitulo sa dili pa ilhon ang baroganan.

Pananglitan, mahimo nimong ipresentar kini nga kapitulo isip usa ka pagbasa nga sama sa teatro diin mopili ka og unom ka estudyante ug mag-assign og usa ka bahin sa matag usa. Ang usa ka estudyante mahimong modala isip tigsaysay (kinsa mobasa sa mga bersikulo 1, 6–7, 11–12, 15, 33–36), ug ang laing lima mahimong magbasa sa mga pulong ni o mahitungod sa rayna (mga bersikulo 2, 4–5, 9, 29–30), Ammon (mga bersikulo 3, 6–8, 10, 14, 22–23), King Lamoni (mga bersikulo 12–13, 31), Abish (mga bersikulo 16–17, 28), ug ang ubang mga Lamanites (mga bersikulo 18–21, 24–27, 32). Mahimong makatabang ang paghimo niini nga mga buluhaton sa dili pa magsugod ang klase aron matino sa mga estudyante ang mga bersikulo nga ilang basahon.

Laing paagi mao ang pagpasalida sa bidyo nga“Si Ammon Nagserbisyo ug Nagtudlo ni Hari Lamoni” gikan sa time code 15:18 hangtod sa 23:04. Kini nga bidyo, anaa sa ChurchofJesusChrist.org, nagpakita sa mga panghitabo nga narekord diha sa Alma 19:1–36. Mahimong magsubay ang mga estudyante diha sa ilang mga kasulatan samtang nagtan-aw sila sa bidyo.

Sa dihang ang rayna sa mga Lamanite nahibalo sa kamatayon sa iyang bana, iyang gipatawag si Ammon aron siya makigsulti kaniya (tan-awa sa Alma 19:1–3).

Basaha ang Alma 19:4–17, mangita sa unsay nasinati sa rayna ug sa uban human makigsulti kang Ammon. Mahimo usab nimong tan-awon ang “Si Ammon Nagserbisyo ug Nagtudlo ni Hari Lamoni” gikan sa time code 15:18 hangtod sa 20:06. Kini nga bidyo anaa sa ChurchofJesusChrist.org.

• Unsa ang imong nakat-onan mahitungod sa rayna gikan niini nga mga bersikulo?

• Unsa ang nakat-unan ni Lamoni mahitungod ni Jesukristo sa miaging tulo ka adlaw?

• Ngano sa imong hunahuna nga kini nga kahibalo nakahatag kang Lamoni og ingon niana nga kalipay?

Human sa pagpundok sa uban ngadto sa balay sa hari, ang sulugoon sa rayna nga si Abish natingala ug nasubo sa dihang ang katawhan misugod sa panagbingkil sa ilang mga kaugalingon kon nganong ang hari ug ang uban naghigda sa yuta nga daw sila patay na (tan-awa sa Alma 19:18–28).

Basaha ang Alma 19:29–36, mangita sa unsay gibuhat ni Abish niining higayon sa panagbingkil ug unsay nahitabo taliwala sa mga Lamanite pagkahuman. Mahimo usab nimong tan-awon ang “Si Ammon Nagserbisyo ug Nagtudlo ni Hari Lamoni” gikan sa time code 20:07 hangtod sa 23:04 . Kini nga bidyo anaa sa ChurchofJesusChrist.org.

• Unsa ang epekto sa ebanghelyo ni Jesukristo ngadto sa daghang mga Lamanite kinsa mipili sa pagtuo?

• Unsa nga kamatuoran mahitungod sa Ginoo ang gitudlo ni Mormon sa bersikulo 36 human sa pagpakigbahin niini nga asoy?

Ang tinguha sa Ginoo sa tanan sa pagduol ngadto Kaniya

Gikan sa mga pulong ni Mormon sa bersikulo 36, atong makat-onan nga ang bukton sa Ginoo gipatuy-od ngadto sa tanan nga katawhan kinsa mohinulsol ug motuo sa Iyang ngalan. Ikonsiderar ang pagmarka niini nga kamatuoran diha sa imong mga kasulatan.

Niini nga konteksto, ang bukton sa Ginoo nga gipatuy-od naglakip sa Iyang kaluoy ug kaandam sa pagpasaylo.

• Unsa nga mga kasinatian ang nakatabang nimo nga makita ang katinuod niini nga baroganan diha sa imong kaugalingong kinabuhi o sa kinabuhi sa uban?

Dapita ang mga estudyante sa pagpakigbahin og mga kasinatian nga dili kaayo personal. Mahimo ka usab mopakigbahin og kasinatian.

Mahimo usab nga makatabang ang paggahin og panahon sa pagpangita og mga ehemplo gikan sa kinabuhi sa Manluluwas diin Iyang gipakita ang Iyang kaandam sa pagtabang ngadto sa mga tawo gikan sa tanang matang sa kinabuhi aron sa pagtabang kanila sa pagduol ngadto Kaniya. Taliwala sa uban pa, pipila ka mga ehemplo sa mga tudling sa kasulatan nga mahimo nimong ipaila sa mga estudyante maglakip sa Mateo 9:10–13; Marcos 5:25–34; Lucas 5:18–25; ug Juan 8:2–11. Mahimo usab nimong patun-an sa mga estudyante ang 2 Nephi 26:33 ug ipasumpay nila kini nga bersikulo sa Alma 19:36 diha sa ilang mga kasulatan.

Usahay kita mahimong sayop nga mohukom nga ang usa ka tawo mahimong dili interesado sa ebanghelyo tungod sa hitsura niana nga tawo o unsa ang iyang nahimo sa nangagi. Paggahin og kadiyot sa paghanduraw sa usa ka tawo niini nga sitwasyon. Kini mahimo nga usa ka piho nga tawo nga imong nailhan, o mahimo nimong hunahunaon ang mga tawo nga sa kasagaran mohaom niini nga paghulagway.

Mahimo nimong hangyoon ang mga estudyante sa pagdrowing og stick figure sa ilang mga journal sa pagtuon nga nagrepresentar sa tawo nga gihulagway sa miaging parapo. Mahimo nilang irekord ang ilang mga tubag sa mosunod nga mga pangutana ubos sa stick figure nga ilang gidrowing. Dayon hisgoti kon unsay gisulat sa mga estudyante.

• Unsay gibati sa Dios mahitungod niining tawhana?

• Sa unsang paagi nga ang pagsabot sa pagbati sa Dios niini nga tawo makaimpluwensiya sa imong mga pagbati ngadto kaniya?

Ipamatuod ang mga kamatuoran nga imong nahisgotan karon, ug dasiga ang mga estudyante sa pagtinguha nga mas makakita sa uban sama sa pagtan-aw sa Dios.

Komentaryo ug Background nga Impormasyon

Mahimo ba kong makabig ngadto sa Ginoo gikan sa usa ka gamhanang kasinatian?

Ang mga Lamanite nga gitudloan ni Ammon nakasinati og pagkakabig sa usa ka talagsaon nga paagi nga sila nabuntog sa Espiritu ug natumba ngadto sa yuta. Dili kini kasagaran nga paagi diin ang kadaghanan sa mga anak sa Langitnong Amahan makasinati og pagkakabig.

Si Elder David A. Bednar sa Korum sa Napulog Duha ka Apostoles mitudlo:

Elder David A. Bednar

Kasagaran ang pagkakabig padayon nga proseso ug dili usa lang ka hitabo nga moresulta gikan sa gamhanan o dramatikong kasinatian. Pagtulun-an human sa usa ka pagtulun-an ug lagda human sa usa ka lagda, hinay-hinay ug hapit dili gani mabantayan, ang atong mga motibo, mga hunahuna, mga pulong, ug mga binuhatan mahiangay sa kabubut-on sa Dios. Ang pagkakabig ngadto sa Ginoo nagkinahanglan og kamakanunayon ug pailob. (David A. Bednar, “Nakabig ngadto sa Ginoo,” Liahona, Nob. 2012, 108)

Unsa ang gibati ni Jesukristo niadtong wala dawata sa uban?

Si Sister Sharon Eubank, kanhi Unang Magtatambag sa Kinatibuk-ang Kapangulohan sa Relief Society, mitudlo:

Sister Sharon Eubank

Ang Bag-ong Tugon nagpakita sa dakong mga paningkamot nga gihimo ni Jesus sa pagtabang sa tanang klase sa katawhan: ang mga sanglahon, mga maniningil sa buhis, mga bata, mga taga-Galilea, mga babayeng tigbaligya og dungog, kababayen-an, mga Pariseo, mga makasasala, mga Samaritano, mga biyuda, mga Romano nga senturyon, mga mananapaw, ang mga hugaw sa ritwal nga paagi. Sa hapit kada sugilanon, Siya mitabang sa usa ka tawo nga dili kasagaran gidawat sa katilingban. (Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, Mayo 2019, 74)

Sa unsang paagi ang pagpaningkamot sa pagtan-aw sa uban sama sa pagtan-aw sa Dios makaapekto kanako?

Si Elder Dale G. Renlund sa Korum sa Napulog Duha ka Apostoles mitudlo:

Elder Dale G. Renlund

Aron epektibong makaserbisyo sa uban, kinahanglan ato silang makita pinaagi sa panan-aw sa usa ka ginikanan, pinaagi sa panan-aw sa Langitnong Amahan. Niana lamang nga masugdan nato pagsabot ang tinuod nga bili sa usa ka kalag. Niana lamang nga mabati nato ang gugma sa Langitnong Amahan alang sa tanan Niyang mga anak. Niana lamang nga mabati nato ang kahingawa sa Manluluwas alang kanila. (Dale G. Renlund, “Pinaagi sa Panan-aw sa Dios,” Liahona, Nob. 2015, 94)

Dugang nga mga Kalihokan sa Pagkat-on

Nangaging mga paningkamot sa mga Nephite sa pagpaambit sa ebanghelyo ngadto sa mga Lamanite

Sa pagsugod sa leksiyon, makat-onan sa mga estudyante nga daghan sa mga Nephite ang mibiaybiay kang Ammon ug sa iyang mga igsoong lalaki tungod sa ilang paningkamot sa pagsangyaw ngadto sa mga Lamanite (tan-awa sa Alma 26:23–25). Mahimong makatabang ang pagpasabot nga pipila niini nga mga pagbati mahimong naimpluwensiyahan sa nangaging mga paningkamot sa mga Nephite sa pagsangyaw ngadto sa mga Lamanite. Mahimo nimong tun-an ang Jacob 7:24 ug Enos 1:20 aron mabasa ang mahitungod niining nangaging mga paningkamot.

Alma 19:36. Bukton sa Dios gipatuy-od ngadto sa tanan

Susama nga mga tubag sa kadaghanan nga nakabig sa Basahon ni Mormon

Daghan sa mga tawo sa Basahon ni Mormon kinsa nakasinati og pagkakabig sa talagsaong mga paagi misulti og susama nga mga butang human sa ilang kasinatian sa pagkakabig. Kanunay nilang gidayeg ang Dios, namulong sa ilang nausab nga mga tinguha, ug nagdasig sa uban sa pagsunod sa Manluluwas. Mahimong interesado ang mga estudyante nga makakita og mga ehemplo niini nga sumbanan. Ikonsiderar ang pagpakigbahin sa mosunod nga mga bersikulo ug dapita ang mga estudyante sa pagpangita og mga pagkaparehas sa mga tubag sa mga tawo nga namulong: Mosiah 5:2–3; 27:23–26; Alma 19:12–14, 29, 33.