Ալմա 15

Հիսուս Քրիստոսի բժշկող զորությունը

Զիզրոմի բժշկումը

Հիսուս Քրիստոսի մահկանացու կյանքի ծառայության նպատակը տառապողներին օգնության հասնելն էր։ Աստծո ձեռքով բանտից հրաշքով ազատվելուց հետո Ալման և Ամուղեկը նույն նպատակն ունեին։ Այս դասը կարող է օգնել ձեզ հաղորդակից լինել Հիսուս Քրիստոսի միջոցով տրվող բժշկող զորությանը։

Ջանասիրաբար սովորելու կոչ արեք։ Ուսանողներին օգնեք հասկանալ, որ ավետարանի ուսումնասիրությունը նախատեսված չէ լինելու պասիվ փորձառություն։ Այն պահանջում է ուշադիր դատողություն, ուսումնասիրություն, աղոթք և գործողություն։ Դուք կարող եք օգնել ձեր ուսանողներին՝ ստեղծելով փորձառություններ, որոնք կխրախուսեն նրանց մասնակցել քննարկումներին, կիսվել իրենց փորձով և հարցեր տալ:

Ուսանողի նախապատրաստում․ ուսանողներին առաջարկեք կարդալ սուրբ գրությունների ընտանեկան ուսումնասիրության գաղափարը Ալմա 15.1–12-ի ներքո՝ ուսումնասիրման համառոտ շարադրանքում «Հունիսի 24–30։ Ալմա 13–16․ Մտնել Տիրոջ հանգիստը», Եկ, հետևիր ինձ․ Անհատների և ընտանիքների համար․ Մորմոնի Գիրք 2024։

Հնարավոր ուսումնական վարժություններ

Ֆիզիկական և հոգևոր հիվանդություն

Հետևյալը նախատեսված է օգնելու ուսանողներին ճանաչել մեղքի ախտանշանները կամ ազդեցությունը: Անհրաժեշտության դեպքում թվարկված հիվանդությունների փոխարեն կարող եք ընտրել նրանք, որոնք ծանոթ են ուսանողներին։

Ուսումնասիրեք հիվանդությունների հետևյալ ցանկը։ Մտածեք դրանց ախտանշանների, նաև այն բուժումների մասին, որոնք օգտագործվում են դրանք մեղմելու կամ բուժելու համար։

• Սրտային հիվանդություն

• Քաղցկեղ

• Կոտրված ոսկոր

• Ի՞նչ կպատահի, եթե բուժեն միայն այս հիվանդությունների ախտանշանները՝ չփորձելով հասկանալ հիմքում ընկած խնդիրը։

Երբ ներկայացնեք հետևյալ պարբերությունը և հնարավոր հարցերը, մի խրախուսեք կամ թույլ մի տվեք, որ ուսանողներն անձնական մեղքերի մասին խոսեն։

Մեղքը կամ հոգևոր հիվանդությունը նույնպես ախտանշաններ ունեն, ինչպես ֆիզիկական հիվանդությունը։ Մտածեք, թե մեղքն ինչ ախտանշաններ կարող է ունենալ և մի պահ խորհեք ձեր հոգևոր առողջության վիճակի մասին։ Ձեզ կօգնեն հետևյալ հարցերը։

• Ի՞նչ ազդեցություններ ունի մեղքը՝ ըստ Ավետարանական թեմաների «Մեղք» հոդվածի (topics.ChurchofJesusChrist.org)։

• Մեղքն ինչպե՞ս կարող է ազդել մեր հանդեպ ունեցած սեփական զգացմունքների և ուրիշների հետ մեր հարաբերությունների վրա։

Ուսումնասիրելու ընթացքում լսեք Սուրբ Հոգուն, որպեսզի ուսուցանի ձեզ, թե ինչպես կարող եք ավելի լավ հաղորդակից լինել Հիսուս Քրիստոսի բժշկող զորությանը՝ ձեր հոգևոր բարեկեցությունը բարելավելու համար։

Զիզրոմի հիվանդությունը

Ամմոնիայի բանտից Աստծո ձեռքով հրաշքով ազատվելուց հետո Ալման և Ամուղեկն ուղևորվեցին Սիդոմ (տես Ալմա 15.1–2)։ Սիդոմում գտնվելու ժամանակ նրանք ծառայում էին նրանց, ում արտաքսել էին Ամմոնիայից՝ Հիսուս Քրիստոսի մասին իրենց ուղերձին հավատալու համար։ Այդ մարդկանցից մեկը, ում նրանք ծառայում էին, Զիզրոմն էր։

Կարող եք ուսանողներին բաժանել ստորև ներկայացվող թերթիկը։ Նրանք կարող են միասին աշխատել փոքր խմբերով՝ օգտվելով Ալմա 15.4–12 հատվածներից, որպեսզի նշեն Զիզրոմի ախտանշանները և որոշեն, թե որ դեղատոմսը կարող է բուժել նրան։

Կարդացեք «Ախտանշաններ» վերնագրի ներքո բերված սուրբ գրությունները։ Դրանց ներքևում գրեք բոլոր այն բառերն ու արտահայտությունները, որոնք նկարագրում են Զիզրոմի հիվանդությունը։

• Ինչպե՞ս կնկարագրեիք Զիզրոմի հիվանդությունը և նրա հոգևոր բարեկեցությունը։

• Ի՞նչ եք հիշում Զիզրոմի մասին, որը կարող էր նրա՝ այդպես զգալու պատճառը լինել։

Կարող եք ուսանողներին առաջարկել, որ կիսվեն Զիզրոմի անցյալի մասին պատմության որևէ հատվածով։ Հետևյալ հատվածները կարող են օգնել․ Ալմա 10.31, 11.21–22, 12.1, 7–8։ Կարող եք կիսվել նաև «Բացատրական և պատմական տեղեկություններ» բաժնում ներկայացված Նախագահ Էզրա Թաֆթ Բենսոնի խոսքերով։

Ֆիզիկական հիվանդությունը ոչ միշտ է մեղքի հետ կապված (տես Հովհաննես 9.2–3)։ Ալմա 14.6 հատվածից նշեք Զիզրոմի մեղքի զգացումները։ Թեև մեղքի զգացումը հաճելի չէ, բայց այն որևէ նպատակի է ծառայում։ Տասներկու Առաքյալների Քվորումից երեց Դեյվիդ Ա. Բեդնարը բացատրել է, թե ինչ նպատակ կարող են ունենալ այդ զգացումները։ Դիտեք «Մենք հավատում ենք մաքրաբարո լինելուն» տեսանյութի 13:15-13:49 հատվածը, որը հասանելի է ChurchofJesusChrist.org կայքում կամ կարդացեք ստորև ներկայացվող տեքստը։

Երեց Դեյվիդ Ա. Բեդնար

Մենք բոլորս զգացել ենք ցավ, որն ուղեկցել է ֆիզիկական վնասվածքին կամ վերքին: Երբ ցավի մեջ ենք, մենք, սովորաբար, ձգտում ենք մեղմել այն և շնորհակալ ենք դեղերի և բուժման համար, որոնք օգնում են թեթևացնել մեր տառապանքը: Համարեք մեղքը որպես հոգևոր վերք, որը մեղքի զգացում, կամ ինչպես Ալման է նկարագրում իր որդի Կորիանթոնին, «խղճի խայթ» է առաջացնում (Ալմա 42.18)։ Մեղքը մեր հոգու համար նույնն է, ինչ ցավը մեր մարմնի համար՝ նախազգուշացում վտանգի մասին և պաշտպանություն հավելյալ վնասից: (Դեյվիդ Ա. Բեդնար, «Մենք հավատում ենք մաքրաբարո լինելուն», Ensign կամ Լիահոնա, մայիս 2013 թ․, 44)

• Ըստ երեց Բեդնարի՝ ո՞րն է մեղքի զգացում ունենալու նպատակներից մեկը։

• Դա ինչպե՞ս կարող է փոխել սխալ գործելուց հետո մեղքի զգացում ունենալու վերաբերյալ մեր հեռանկարը։

• Ըստ ձեզ՝ Զիզրոմի ախտանշաններն ինչո՞վ էին համարվում «վտանգի նախազգուշացում և պաշտպանություն լրացուցիչ վնասից»։

Բժշկում Հիսուս Քրիստոսի զորությամբ

Ալմա 15.4–12 հատվածներում ուշադիր կարդացեք Զիզրոմի բժշկման մասին։ Կարող եք դիտել «Զիզրոմը բժշկվում է և մկրտվում» տեսանյութը (2:42), որը հասանելի է ChurchofJesusChrist.org կայքում։ Կարդալու ընթացքում ուշադրություն դարձրեք այն մանրամասներին, որոնք օգնեցին Զիզրոմի բժշկմանը։ Կարող եք ձեր բժշկի թերթիկի «Դեղատոմս» բաժնում նշումներ կատարել այդ մանրամասների վերաբերյալ։

• Ի՞նչ սկզբունքներ կամ ճշմարտություններ կարող ենք սովորել Զիզրոմի բժշկումից։

Սկզբունքներից մեկը, որ սովորում ենք այս հատվածներից, այն է, որ երբ հավատք գործադրենք Հիսուս Քրիստոսի հանդեպ, կարող ենք բժշկվել։

• Այս հատվածներում Զիզրոմի կողմից նրա բժշկումից թե՛ առաջ, թե՛ հետո Հիսուս Քրիստոսի հանդեպ գործադրած հավատքի ի՞նչ ապացույց տեսաք։

• Ինչպե՞ս կարող ենք նույն ձևով հավատք գործադրել Հիսուս Քրիստոսի հանդեպ։

Երեց Դեյվիդ Ա. Բեդնարը բացատրել է, թե ինչպես կարող ենք հավատք գործադրել։ Դիտեք «Մենք հավատում ենք մաքրաբարո լինելուն» տեսանյութի 13:49-ից մինչև 14:17 հատվածը, որը հասանելի է ChurchofJesusChrist.org կայքում կամ կարդացեք ստորև ներկայացվող տեքստը։

Երեց Դեյվիդ Ա. Բեդնար

Փրկչին հաճախ դիմում են Մեծ բժիշկ, և այս տիտղոսն ինչպես խորհրդանշական, այնպես էլ բառացի նշանակություն ունի։ … Փրկիչի Քավությունից հոսում է հանգստացնող բալասանը, որը կարող է բժշկել մեր հոգևոր վերքերը, վերացնել հանցանքը: Սակայն այդ բալասանը կարող է միայն կիրառվել առ Տեր Հիսուս Քրիստոս հավատքի, ապաշխարության և հետևողական հնազանդության սկզբունքով: Անկեղծ ապաշխարության արդյունքներն են՝ խղճի խաղաղությունը, մխիթարությունը և հոգևոր ապաքինումն ու նորոգումը: (Դեյվիդ Ա. Բեդնար, «Մենք հավատում ենք մաքրաբարո լինելուն», Ensign կամ Լիահոնա, մայիս 2013 թ․, 44)։

Դասի վերջին վարժությանը պատրաստվելու համար ուսանողները պետք է մի քանի հստակ պատասխան մտածեն առաջին հարցին։ Այս հարցը դասարանով քննարկելու ընթացքում կարող եք ուսանողների գաղափարները գրել գրատախտակին։ Օգնեք նրանց տարբեր գաղափարներ մտածել։

Մյուս երկու հարցերը կարելի է օգտագործել որպես այս քննարկման լրացուցիչ հարցեր։

• Ի՞նչ եղանակներով կարող ենք հաղորդակից լինել Երկնային Հոր և Հիսուս Քրիստոսի բժշկող զորությանը։

• Ձեր կարծիքով, ինչո՞ւ է «Մեծ Բժիշկը» համապատասխան տիտղոս հանդիսանում Փրկչի համար: Ըստ ձեզ՝ Նա ինչո՞ւ է կարողանում բժշկել մեզ։

  Եթե ուսանողների համար օգտակար կլինեն որոշ սուրբ գրություններ, որոնք հաստատում են Քրիստոսի բժշկող զորությունը, կարող եք կիսվել հետևյալով․ Սաղմոսներ 30.2, 147.3, Եսայիա 53.5։

• Ե՞րբ եք դուք (կամ ձեր ծանոթը) զգացել Փրկչի բժշկումը։

Գուցե ոչ բոլորս տառապենք այնպես, ինչպես Զիզրոմը, բայց բոլորս ունենք խնդիրներ ու տառապանքներ, որոնք հաղթահարելու համար մենք ունենք Փրկչի կարիքը:։ Մտածեք, թե ինչ ազդեցություն կարող են ունենալ դեռահասների գործած մեղքերը կամ սխալները, և նրանք ինչպես կունենան Փրկչի բժշկող զորության կարիքը։

Կարող եք գրատախտակին գրել ուսանողների գաղափարները։ Գաղափարները մտածելու համար նրանք կարող են նաև զույգերով կամ փոքր խմբերով աշխատել, ապա դասարանով կիսվել գաղափարներով։

Ստեղծեք բժշկի մեկ այլ թերթիկ՝ որևէ մեկին օգնելու համար։ Կարդացեք 3 Նեփի 9.13–14 հատվածները և դեղատոմսը կազմելու համար օգտագործեք այն, ինչ այսօր սովորեցիք։ Կարող եք օգտվել Ալմա 15 գլխից։ Կիսվեք, թե Հիսուս Քրիստոսն ինչպես կարող է օգնել, և ինչ է նշանակում հավատք գործադրել Նրա հանդեպ։ Անպայման ավարտեք հետևյալ անավարտ պնդումը․

• Եթե մարդը [թվարկեք մեղքի նշանները] … է զգում, պետք է հիշի [նշեք դեղատոմսը կամ բուժման միջոցները] …

Հիշեցրեք ուսանողներին, որ բոլորս ունենք մեր Երկնային Հոր և Հիսուս Քրիստոսի և Նրանց կողմից մեզ տրվող բժշկման կարիքը։ Վկայեք, որ Հիսուս Քրիստոսի հանդեպ հավատք գործադրելը և Նրան հավատալը միշտ կօգնեն մեզ։ Առաջարկեք ուսանողներին կիսվել իրենց սովորածով, նաև՝ ինչն ամենաշատը տպավորեց նրանց այսօր ուսումնասիրածից։

Բացատրական և պատմական տեղեկություններ

Ո՞վ կարող է բժշկել ինձ։

Յոթանասունից երեց Մեթյու Ս․ Հոլլանդը վկայել է․

Երեց Մեթյու Ս․ Հոլլանդ

Անկախ մեր ամենավատ ցավերի և կսկիծների պատճառներից, մեծագույն սփոփանքի աղբյուրը նույնն է` Հիսուս Քրիստոսը: Նա է միակը, որ պահում է լիակատար ուժը և բուժիչ բալասանը` ուղղելու ամեն սխալ, ճիշտ դարձնելու ամեն անիրավություն, ուղղելու ամեն թերություն, կապելու ամեն վերք և հասցնելու ամեն ուշացած օրհնություն: (Մեթյու Ս․ Հոլլանդ, «Որդու սքանչելի պարգևը», Ensign կամ Լիահոնա, նոյեմբեր 2020 թ․, 46)

Ինչպե՞ս կարող եմ լիովին ապավինել Հիսուս Քրիստոսին, որպեսզի Նա բժշկի և օգնի ինձ։

Առաջին Նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ. Օուքս

Երբ մենք հավատք ունենք Տեր Հիսուս Քրիստոսի հանդեպ, մենք պետք է վստահենք Նրան։ Մենք պետք է այնքան վստահենք Նրան, որ գոհունակությամբ ընդունենք Նրա կամքը՝ իմանալով, որ Նա գիտի, թե որն է լավագույնը մեզ համար։ …

… Հավատքը, անկախ նրանից, թե որքան ուժեղ է, չի կարող ունենալ այնպիսի արդյունք, որը հակառակ է նրա կամքին, ում զորությունը կիրառում է այն։ … Մենք չենք կարող ճշմարիտ հավատք ունենալ Տիրոջ հանդեպ, առանց լիահատար վստահություն ունենալու նաև՝ ինչպես Տիրոջ կամքի, այնպես էլ Տիրոջ ժամանակի հանդեպ: (Դալլին Հ․ Օուքս, «Հավատք առ Տեր Հիսուս Քրիստոս», Ensign, մայիս 1994 թ․,99–100)

Ինչո՞ւ եմ դեռ հիշում իմ մեղքերը նույնիսկ, եթե ես ներվել եմ։

Դիտեք «Հիսուս Քրիստոսի Քավությունը» տեսանյութի 5:48-6:56 հատվածը (հասանելի է ChurchofJesusChrist.org կայքում), որում Կիրակնօրյա դպրոցի նախկին գերագույն նախագահ և Յոթանասունի Բարձրագույն իշխանության պատվավոր անդամ եղբայր Թեդ Ռ. Քալիսթերը բացատրում է, թե ինչու կարող ենք հիշել մեր մեղքերը նույնիսկ ներվելուց (forgiven) հետո։

Որո՞նք են մեղքի ազդեցությունները

Նախագահ Էզրա Թավտ Բենսոնը (1899–1994) պարզաբանել է.

Նախագահ Էզրա Թաֆտ Բենսոն

[Դուք] չեք կարող սխալ բան անել և լավ զգալ, դա անհնար է։ Ամեն անգամ, երբ մարդը խախտում է Աստծո օրենքը, նա տույժ է վճարում՝ սրտի կսկիծով, տխրությամբ, խղճի խայթով, ինքնահարգանքի բացակայությամբ և հեռանում է Աստծո Հոգու հետ շփումից: (Եկեղեցու նախագահների ուսմունքներ. Էզրա Թաֆտ Բենսոն [2014], 221):

Ալմա 15.8–9 Բավական է ընդամենը հայտարարել, որ մենք հավատում ենք Հիսուս Քրիստոսին։

Առաջին Նախագահությունից նախագահ Դալլին Հ. Օուքսը բացատրել է, թե ինչու է անհրաժեշտ ավելին անել, քան պարզապես հավատալ Հիսուս Քրիստոսին․

Նախագահ Դալլին Հ. Օուքս

Դեպի [Հիսուսը] դարձի գալը, ինչը պահանջվում էր երկնային արքայություն մտնողներից (տես Մատթեոս 18.3), շատ ավելին էր, քան պարզապես դարձի եկած լինելը՝ ավետարանի ճշմարտացիության մասին վկայելու համար։ Վկայել նշանակում է իմանալ և հայտարարել։ Ավետարանը հրավիրում է մեզ «դարձի գալ», որը մեզնից պահանջում է կատարել և դառնալ։ Եթե մեզնից որևէ մեկն ապավինում է բացառապես ավետարանի իր գիտելիքներին և վկայությանը, ապա մենք նույն դիրքում ենք, որում օրհնված, բայց դեռ ոչ լիովին փոխված առաքյալներն էին, և որոնց Հիսուսը «դարձի գալու» կոչ արեց։ (Դալլին Հ․ Օուքս, «Դառնալու մարտահրավերը», Ensign, նոյեմբեր 2000 թ․, 33)

Օժանդակ ուսումնական վարժություններ

Փրկիչը և Նրա ավետարանը բժշկող զորություն ունեն

Կարող եք ուսանողներին առաջարկել ուսումնասիրել հետևյալ հատվածներից մի քանիսը և ուշադրություն դարձնել, թե ինչ կարող են զգալ ու սովորել Փրկչի բժշկող զորության մասին․ Սաղմոսներ 30.2, 147.3, Եսայիա 53.5, Մատթեոս 4.23, Հակոբ 2.8։ Այդ հատվածներում ի՞նչն ամենաշատը տպավորեց ձեզ: Այդ ամենի ընկալումը ինչպե՞ս կարող է օգնել Փրկչի զորությունը կիրառել ձեր կյանքում:

Ամուղեկից սովորած դասերը

Կարող եք ուսանողներին առաջարկել ուսումնասիրել Ամուղեկի կյանքը։ Ուսանողներին առաջարկեք կարդալ Ալմա 15.16–18 հատվածները և մտածել, թե ինչ զգացողություններ, հույզեր և փորձություններ ունեցավ Ամուղեկը։ Ի՞նչ դադարեց անել Ամուղեկը, երբ որոշեց ապրել ավետարանով և ծառայել որպես միսիոներ։ Ի՞նչ ստացավ նա։ Ի՞նչ էր պետք նրան ուժեղացնելու համար։ Կարող եք ուսանողներին հիշեցնել նախագահ Դիտեր Ֆ. Ուխդորֆի «Սովորենք Ալմայից և Ամուղեկից» ուղերձը, (Ensign կամ Լիահոնա նոյեմբեր 2016 թ․, 71–74)։