Fakataukei Fakatokāteliné: Mōsaia 3:19

“Liʻaki ʻa e Tangata Fakakakanó kae Hoko ko ha Tangata Māʻoniʻoni ʻi he Fakalelei ʻa Sīsū Kalaisí.”

ko e fāʻofua ha ongo toʻu tupu

ʻI hoʻo ako ʻa e Mōsaia 3:19, naʻá ke ako ai ʻa e founga ke ikunaʻi ʻa e tangata fakakakanó ʻo fakafou ʻi he Fakalelei ʻa Sīsū Kalaisí. ʻE lava ke tokoni atu ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea fakafolofola mahuʻinga ki he Mōsaia 3:19. ʻE lava foki ke tokoni atu ke ke fakamatalaʻi ʻa e tokāteline ʻoku akoʻi ʻi he potufolofola ko ʻení pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

Poupouʻi e ako fakalaumālié ʻo fakafou ʻi he ngāue. ʻOku fiemaʻu ʻi hono ako ʻo e ongoongoleleí ʻa ia ʻokú ne ohi hake ʻa e uluí mo tokoni ki hono fakahū ʻo e ongoongoleleí ki he loto ʻo e kau akó, ha meʻa ʻoku lahi ange ʻi he feinga faivelenga pē ʻa e faiakó. ʻOku fiemaʻu ʻi he ako fakalaumālié ʻa e feinga mālohi ʻi he konga ʻa e tokotaha akó. Tokoniʻi hoʻo kau akó ke nau ʻilo honau fatongia ʻi he founga akoʻí mo e akó.

Teuteu ʻa e tokotaha akó: Fakaafeʻi e kau akó ke nau kamata feinga ke ako maʻuloto ʻa e Mōsaia 3:19. Fakamatalaʻi ange te ke ʻoange ha taimi ʻi he kalasí ke ako maʻuloto ai ʻa e kupuʻi lea mahuʻinga ʻo e folofolá, ka ʻe toe ʻaonga foki kiate kinautolu ke nau akoako ako maʻuloto ʻa e vēsí kotoa.

Ngaahi ʻEkitivitī Ako ʻOku Ala Fakahokó

ʻOku totonu ke ke akoʻi ʻa e lēsoni fakataukei fakatokāteline ko ʻení hili ʻa e lēsoni “Mōsaia 3:19,” ʻa ia ko e lēsoni puipuituʻa ia ki he potufolofola fakataukei fakatokāteline Mōsaia 3:19. Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo e lēsoni fakamatala fekauʻaki mo iá lolotonga e uike ko iá.

Ako maʻuloto pea fakamatalaʻi

Lolotonga e lēsoni kimuʻá, naʻá ke ako ai ʻa e moʻoni ko ʻení mei he Mōsaia 3:19: ʻI heʻetau talangofua ki he ngaahi fakahinohino ʻa e Laumālie Māʻoniʻoní, te tau lava ʻo ikunaʻi ʻa e tangata fakakakanó pea hoko ko ha kau māʻoniʻoni ʻi he Fakalelei ʻa Sīsū Kalaisí. Ko e kupuʻi lea fakafolofola mahuʻinga ki he Mōsaia 3:19 ko e “Liʻaki ʻa e tangata fakakakanó kae hoko ko ha tangata māʻoniʻoni ʻo fakafou ʻi he Fakalelei ʻa Sīsū Kalaisí.”

ʻOange ki he kau akó ha founga ke ako maʻuloto ai ʻa e potufolofola mo e kupuʻi lea fakafolofola mahuʻinga ko ʻení. Ko e ʻekitiviti ko ʻení ko ha founga ia ʻe taha ke fakahoko ai ʻeni.

Tā ha tapatolu ʻo hangē ko ʻení ʻi hoʻo tohinoa akó. Vahevahe e potufolofolá mo e kupuʻi lea fakafolofola mahuʻinga ki he Mōsaia 3:19 ki ha konga ʻe fā. Hiki ʻa e ngaahi konga ʻe faá ʻi hoʻo tapatolu. Hangē ko ʻení, te ke lava ʻo hiki ʻa e “Mōsaia 3:19” ʻi he konga ki ʻolunga ʻo hoʻo fakatātaá, “Liʻaki ʻa e tangata fakakakanó” ʻi he konga hono uá, pea fai pehē hifo ai pē. Ako maʻuloto ʻa e kupuʻi lea kotoa pē ʻo kamata mei ʻolunga ki lalo ʻo hoʻo fakatātaá kae ʻoua kuó ke ongoʻi fiemālie ke lau maʻuloto ia kae ʻoua ʻe toe sio ki ai.

fakatātā faingofua lanu ʻuliʻuli mo hinehina ʻo ha tapatolu ʻoku konga ʻe fā

ʻAi ʻa e kau akó ke nau akoako hono fakamatalaʻi ʻa e tokāteliné ʻi he lea pē ʻanautolu. Te ke lava ʻo fakaʻaongaʻi ʻa e fakakaukau ko ʻení pe ko ha fakakaukau kehe ke tokoni ki he kau akó ke nau akoako.

Fakakaukauloto ʻokú ke akoʻi ha lēsoni fekauʻaki mo e Mōsaia 3:19 ki ha kalasi Palaimeli ʻi ho uōtí pe koló. Te ke fakamatalaʻi fēfē ʻa e pōpoaki ʻo e potufolofola fakataukei fakatokāteline ko ʻení ki ha kulupu ʻo ha fānau iiki? Hiki ha palakalafi nounou ʻi hoʻo lea pē ʻaʻau ʻokú ne fakamatalaʻi ʻa e tokāteline ʻo e Mōsaia 3:19.

Fakakaukau ke vahevahe e kau akó ke tauhoa ke fakakakato ʻenau ngaahi fakamatalá. Te ke lava ʻo fakaafeʻi e kau ako ʻoku loto lelei ke nau lau ʻenau ngaahi fakamatalá ki he kalasí kotoa.

Akoako hono fakaʻaongaʻí

ʻAi ke toe vakaiʻi ʻe he kau akó ʻa e ngaahi tefitoʻi moʻoni ki hono maʻu ʻo e ʻilo fakalaumālié. Ko e founga ʻe taha ke fai ai ʻení ko hono fakaafeʻi ha niʻihi ʻo e kau akó ke tā ha ngaahi fakaʻilonga pe fakatātā faingofua ʻi he palakipoé ʻokú ne fakafofongaʻi e ngaahi tefitoʻi moʻoni takitaha ʻe tolú. Feinga ke fokotuʻutuʻu e ʻekitivitií koeʻuhí ke lau miniti pē ʻa e taimi kalasí.

ʻOange ki he kau akó ha tūkunga tatau mo ʻení ke tokoni ke nau akoako fakaʻaongaʻi kotoa e ngaahi tefitoʻi moʻoni ʻe tolu ki hono maʻu ʻo e ʻilo fakalaumālié.

Kuo fefaʻuhi ʻa Tovia mo e feinga ke mapuleʻi ʻene ʻitá ʻi ha ngaahi taʻu lahi. ʻOkú ne faʻa ʻita ki hono ngaahi tokouá mo e mātuʻá pea leʻolahi mo hono leʻó. ʻOkú ne faingataʻaʻia foki ke feohi lelei mo e niʻihi kehe ʻi he akó. ʻI ha ʻaho ʻe taha, lolotonga haʻane talanoa ki heʻene ongomātuʻá fekauʻaki mo ʻene fakapoʻuli vavé, naʻá ne pehē: “ʻOku ou fakaʻamu ko ha tokotaha faʻa kātaki ange au, ka ʻoku ʻikai ke u ongoʻi te u lava. Ko hoku natulá pē ʻeni ʻoʻoku.”

Te ke lava ʻo liliu e tūkunga ko ʻení ke feau lelei ange e ngaahi fiemaʻu hoʻo kau akó. Te ke lava ʻo liliu e ʻulungaanga ʻo e fakapoʻuli vave ʻi he talanoá ki ha faingataʻa ʻe taha hangē ko e fakapikopikó, lea taʻe fakaʻapaʻapá, pe taʻeʻofá. Ko ha fili ʻe taha ko hono fakaafeʻi e kau akó ke hiki ha lisi ʻi he palakipoé ʻo e ngaahi tōʻonga ʻoku angamaheni ki he tangata fakakakanó. Hili ia pea ʻe lava ke fili ʻe he kau akó ha taha ʻo e ngaahi ʻulungāngá pea liliu ʻa e tūkungá ke fakakau ia.

• Te ke fakaʻaongaʻi fēfē ʻa e ngaahi akonaki ʻo e Mōsaia 3:19 mo e ngaahi tefitoʻi moʻoni ʻo hono maʻu ʻo e ʻilo fakalaumālié ke tokoni ʻi he tūkunga ko ʻení?

Tuku ke aleaʻi ʻe he kau akó ʻa e founga ʻe lava ke tokoni ai ʻa e ngaahi tefitoʻi moʻoni takitaha ʻo hono maʻu ʻo e ʻilo fakalaumālié mo e tokāteline ʻoku akoʻi ʻi he Mōsaia 3:19 ʻi he tūkunga ko ʻení. ʻE lava ke fakahoko fakakalasi pe fakakulupu iiki ʻe he kau akó ʻa e ʻekitivitī ko ʻení.

Kapau ʻoku fiemaʻu ʻe he kau akó ha fakahinohino lahi ange, ko e ngaahi sīpinga ʻeni ʻo e faʻahinga fehuʻi te ke lava ʻo vahevahe mo kinautolu ko ha konga ʻo e fealēleaʻaki ko ʻení.

Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• ʻOkú ke fakakaukau ʻoku founga fēfē ʻa e hanga ʻe he faiakoʻi ʻo e Mōsaia 3:19 ʻo tokoniʻi ʻa e tūkunga ko ʻení?

• Ko e hā ha ngaahi potufolofola pe ngaahi fakamatala kehe mei he kau taki ʻo e Siasí ʻokú ke fakakaukau ʻe tokoni?

Fakakaukau ke fakamanatu ki he kau akó e ngaahi potufolofola fakafekauʻaki ne nau ako ʻi he lēsoni kuo ʻosí ʻi heʻenau aleaʻi ʻa e fehuʻi ko ʻení. Pe ko hoʻo vahevahe ha niʻihi pe kotoa ʻo e ngaahi fakamatala ʻoku maʻu ʻi he “Fakamatala Fakamahinó mo e Puipuituʻá” mei he lēsoni kimuʻá.

Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá

• Ko e hā ha ngaahi founga te ke lava ai ʻo vakai ki he hohaʻa ko ʻení ʻaki ha fakakaukau ʻoku taʻengatá?

• ʻE tokoni fēfē hono manatuʻi e ngaahi taumuʻa ʻa e ʻEikí ki hono fakaʻatā kitautolu ke tau nofo ʻi ha māmani hingá?

• Ko e hā ha meʻa ʻokú ke ʻilo fekauʻaki mo Sīsū Kalaisi mo ʻEne Fakaleleí te ne lava ʻo fai ha liliu ʻi he tūkunga ko ʻení?

Ngāue ʻi he tuí

• Ko e hā ha ngaahi founga ʻe lava ke ngāue ai ha taha ʻi he tūkunga ko ʻení ʻi he tui?

Toe vakaiʻi ʻo e fakataukei fakatokāteliné

Fakakaukau ke fakaʻaongaʻi e ʻekitivitī fakamanatu ko ʻení ʻi ha lēsoni ʻe akoʻi hili pē ʻa e lēsoni ko ʻení. Tā ha foʻi tapatolu ʻi he palakipoé ʻo hangē ko ia mei he lēsoní. Kamata mei ʻolunga, fakaafeʻi e kau akó ke nau fakakakato e tuʻunga takitaha ʻo e foʻi tapatolú ʻaki e kupuʻi lea folofola mahuʻinga ki he Mōsaia 3:19: “Liʻaki ʻa e tangata fakakakanó kae hoko ko ha tangata māʻoniʻoni ʻi he Fakalelei ʻa Sīsū Kalaisí.” Toutou fai ʻeni kae ʻoua kuo lava ʻe he kau akó ʻo lau maʻuloto ia.