Մոսիա 3.1–17

Փրկություն Հիսուս Քրիստոսի միջոցով

Հիսուս Քրիստոս

Ողջ պատմության ընթացքում հրեշտակներն այցելել են երկիր՝ վկայելու Հիսուս Քրիստոսի մասին և հայտարարելու «մեծ ուրախության ավետիքը» (Մոսիա 3.3, Ալմա 13.22, Հելաման 16.14): Բենիամին թագավորն այդպիսի այց էր ունեցել: Նա իր ժողովրդի հետ կիսվեց Հիսուս Քրիստոսի մասին հրեշտակի վկայությամբ, այն ամենով, ինչով Փրկիչը պետք է անցներ և այն ճշմարտությամբ, որ փրկությունը գալիս է միայն Քրիստոսի անվամբ: Այս դասը կօգնի ձեզ հասկանալ, թե որն է կարևորությունն այն բանի, ինչ Հիսուս Քրիստոսն արել է, որպեսզի կարողանաք փրկվել:

Օգնեք ուսանողներին սովորել խորհել: «Խորհել» նշանակում է մտորել կամ մի բանի մասին խորը մտածել, և այն հաճախ աղոթք է պարունակում: Երբ ուսանողները սուրբ գրությունների անձնական ուսումնասիրության ժամանակ խորհել սովորեն, Հոգին նրանց կբացահայտի ճշմարտությունը և կօգնի նրանց իմանալ, թե ինչպես կարող են Հիսուս Քրիստոսին ավելի նման դառնալ:

Ուսանողի նախապատրաստում. կարող եք ուսանողներին առաջարկել ընտանիքի անդամի, ընկերոջ կամ Եկեղեցու ղեկավարի հետ քննարկել, թե որ օրհնություններն են միայն Հիսուս Քրիստոսով հնարավոր:

Հնարավոր ուսումնական վարժություն

Մեծ ուրախության ավետիքը

Կարող եք ցուցադրել Փրկչի ծնունդն ազդարարող հրեշտակների մի նկար:

• Կարո՞ղ եք մտածել այն ժամանակաշրջանի մասին, երբ հրեշտակները եկան երկիր՝ Հիսուս Քրիստոսի մասին վկայելու համար:

Մեկ օրինակ ներկայացված է Ղուկաս 2.10–12-ում: Կարդացեք այս հատվածները կամ դիտեք «Հովիվներն իմանում են Քրիստոսի ծննդյան մասին» տեսանյութի 0:00-1:47 հատվածը և փնտրեք, թե հրեշտակն ինչ ասաց Փրկչի ծնունդն ազդարարելու համար: Այս տեսանյութը հասանելի է այստեղ՝ ChurchofJesusChrist.org:

Հրեշտակ երևաց նաև Բենիամին թագավորին: Կարդացեք Մոսիա 3.3–4 հատվածը և փնտրեք, թե ինչ նմանություններ են պարունակում հրեշտակի խոսքերը, որոնք նա ասաց հովիվներին և Բենիամին թագավորին:

• Ի՞նչ գիտեք Հիսուս Քրիստոսի մասին, որը կարող է «մեծ ուրախության ավետիք» համարվել:

Մոսիա 3.1–17 հատվածներում Բենիամին թագավորն իր ժողովրդին ուղղված ճառում կիսվել է հրեշտակի մի քանի ուղերձով: Այդ ուղերձը Հիսուս Քրիստոսի կյանքի և առաքելության մասին էր, այն մասին, թե ինչպես կարող են մարդիկ ուրախություն զգալ, և ինչ է առաջարկում Հիսուս Քրիստոսը, որը ուրիշ ոչ ոք չի կարող առաջարկել:

Միակ անունը, որով փրկություն է գալիս

Կարդացեք Մոսիա 3.17 հատվածը և փնտրեք, թե ինչ է առաջարկում Հիսուս Քրիստոսը:

• Ի՞նչ ճշմարտություններ կարող եք առանձնացնել հատված 17-ից:

Ուսանողները կարող են բազմաթիվ ճշմարտոթյուններ առանձնացնել, օրինակ՝ փրկությունը գալիս է միայն Հիսուս Քրիստոսի միջոցով: Շնորհակալություն հայտնեք ուսանողներին իրենց գտած ճշմարտություններով կիսվելու համար և կարող եք դրանցից մեկը կամ մի քանիսը գրատախտակին գրել:

Կարդացեք Տասներկու Առաքյալների Քվորումից երեց Նիլ Լ. Անդերսենի հետևյալ հայտարարությունը՝ փնտրելով, թե ինչից է փրկում մեզ Հիսուս Քրիստոսը.

Երեց Նիլ Լ. Անդերսեն

Մեր Տերը և Փրկիչը՝ Հիսուս Քրիստոսը, Իր Քավության անզուգական պարգևի շնորհիվ ոչ միայն փրկում է մեզ մահից և ապաշխարության միջոցով մեր մեղքերի համար մեզ ներում առաջարկում, այլև պատրաստ է փրկել մեզ մեր վիրավոր հոգու ցավերից և վերքերից (Նիլ Լ․ Անդերսեն, «Խոցվածը», Ensign կամ Լիահոնա, նոյեմբեր 2018թ., 85):

Ստորև ներկայացվող հարցերը նախատեսված են օգնելու ուսանողներին զգալ, որ ունեն Փրկչի կարիքը: Ուսանողներին առաջարկեք լուռ խորհել իրենց պատասխանների շուրջ: Փնտրեք Հոգու ուղղորդումը, որպեսզի բացահայտեք այլ ձևեր, որոնցով կարող եք օգնել ուսանողներին անհատապես զգալ Հիսուս Քրիստոսի կարիքը:

Մտածեք, թե ինչից է ձեզ անհրաժեշտ փրկվել: Կա՞ն մեղքեր, որոնք ձգտում եք հաղթահարել: Ի՞նչ վշտեր կամ ցավեր ունեք: Մոսիա 3 հատվածն ուսումնասիրելու ընթացքում Սուրբ Հոգու միջոցով ոգեշնչում փնտրեք, որը կօգնի ձեզ իմանալ, թե ինչպես կարող եք ստանալ Հիսուս Քրիստոսի առաջարկած փրկությունը:

Կարդացեք Մոսիա 3.5–10 հատվածները և փնտրեք, թե ինչ արեց Հիսուս Քրիստոսը, որպեսզի դուք կարողանաք փրկվել: Մի շտապեք, կարդացեք դանդաղ և խորհեք: Խորհելով հնարավոր է հրավիրել Սուրբ Հոգուն ուսուցանել ձեզ: Կարող եք ձեր գաղափարներն ու մտքերը գրել ձեր սուրբ գրքերում կամ օրագրերում:

Հավաստիացեք, որ սուրբ գրությունները կարդալու և խորհելու համար ուսանողները բավարար ժամանակ են ունեցել: Այն ուսանողներին, որոնք մյուսներից շուտ կավարտեն, կարող եք առաջարկել վերընթերցել որոշ հատվածներ, կարդալ էջատակի ծանոթագրությունները կամ խորհել:

Բավարար ժամանակ հատկացնելուց հետո ուսանողներին խրախուսեք կիսվել, թե ինչը տպավորեց իրենց ուսումնասիրելիս: Կարող եք օգտագործել ստորև ներկայացվող հարցերից մի քանիսը կամ բոլորը: Կարող եք ուսանողներին առաջարկել նաև հարցեր տալ հատվածների մասին:

• Ի՞նչ տպավորություններ ունեցաք, երբ ուսումնասիրում էիք այդ հատվածները:

• Այս հատվածներից ո՞ր արտահայտությունները տպավորեցին ձեզ:

• Ի՞նչ գտաք, որը ձեզ ուրախություն պարգևեց:

Կարող եք դիտել «Հիսուս Քրիստոսը տառապեց մեզ համար» տեսանյութը, որը հասանելի է այստեղ՝ ChurchofJesusChrist.orgև փնտրել, թե տարբեր մարդիկ ինչպես են օրհնվել Փրկչի Քավությամբ:

Ուսանողներին առաջարկեք կիսվել բոլոր մտքերով ու զգացողություններով, որ ունեցել են տեսանյութը դիտելիս: Կարող եք կիսվել անձնական փորձառությամբ կամ Փրկչի և Նրա առաջարկած փրկության մասին վկայությամբ: Պատրաստակամ ուսանողներին նույնպես առաջարկեք կիսվել իրենց վկայություններով:

Կարդացեք Մոսիա 3.11–13 հատվածը և գտեք, թե ինչ է անհրաժեշտ անել, որպեսզի ուրախություն և փրկություն ստանաք Հիսուս Քրիստոսի միջոցով: Կարդացեք դանդաղ և խորհեք այդ հատվածների շուրջ: Խորհելու համար ձեզ կարող են օգնել հետևյալ հարցերը:

Օգտագործեք ստորև ներկայացվող հարցերից մի քանիսը կամ ձեզ ոգեշնչող այլ հարցեր, որպեսզի օգնեք ուսանողներին քննարկել, թե ինչ ուրախություն կարող է գալ ապաշխարության միջոցով: Կարող եք կիսվել նաև «Բացատրական և պատմական տեղեկություններ» բաժնում ներկայացված ուրախության և ապաշխարության մասին երեց Դեյլ Գ. Ռենլանդի հայտարարությամբ:

Ուսանողներին օգտակար կլինի բացահայտել հետևյալ սկզբունքը. եթե մենք հավատք գործադրենք առ Հիսուս Քրիստոս և ապաշխարենք, կարող ենք փրկվել մեր մեղքերից և ցնծալ չափազանց մեծ ուրախությամբ:

• Ի՞նչ եք զգացել կամ սովորել Հիսուս Քրիստոսի մասին, որը ձեզ մղում է ապաշխարության:

• Ինչո՞ւ եք կարծում, որ մեղքերի թողությունը կարող է ուրախություն բերել:

Վերհիշեք, թե ինչից է ձեզ անհրաժեշտ փրկվել: Մտածեք, թե ինչ ուսումնասիրեցիք Մոսիա 3 գլխում և ինչ տպավորություններ ստացաք Հոգուց: Ձգտեք հավատք գործադրել, ապաշխարել և հավատալ Քրիստոսին, որպեսզի կարողանաք ստանալ Փրկչի օգնությունն ու ուրախությունը, որը գալիս է ներված լինելուց:

Բացատրական և պատմական տեղեկություններ

Մոսիա 3.7 Որքա՞ն է տառապել Հիսուս Քրիստոսը, որպեսզի ես կարողանամ փրկվել:

Տասներկու Առաքյալների Քվորումից երեց Ջեյմս Ի. Թալմիջը (1862–1933) ուսուցանել է.

Երեց Ջեյմս Ի. Թալմիջ

Նա տառապեց և հառաչեց այնպիսի մի բեռի տակ, որը ոչ մի այլ արարած, որն ապրել է երկրի վրա, չէր կարող երբևէ հնարավոր համարել: Դա զուտ ֆիզիկական ցավ կամ մտավոր տառապանք չէր, որն ստիպեց Նրան նման տանջանք կրել, որի հետևանքով արյուն հոսեց յուրաքանչյուր ծակոտիից, այլ հոգու այնպիսի հոգևոր տառապանք, որը միայն Աստված կարող էր տանել: … Տառապանքի այդ ժամին Քրիստոսը հանդիպեց և հաղթահարեց բոլոր սարսափները, որոնք Սատանան` «այս աշխարհի իշխանը» [Հովհաննես 14.30], կարող էր պատճառել: …

Ինչ-որ ձևով` իսկական ու սարսափելի իրական, չնայած մարդու համար անհասկանալի, Փրկիչն Իր վրա վերցրեց մարդկության մեղքերի բեռը` Ադամից մինչև աշխարհի վերջը (Ջեյմս Է. Թալմեջ, Հիսուս Քրիստոսը, 3-րդ հրատ. [1916], 613):

Մոսիա 3.8: Ինչո՞ւ Հիսուսը ծնվեց անմահ Հորից և մահկանացու մորից:

Տասներկու Առաքյալների Քվորումից երեց Ռոբերտ Դ. Հեյլսը (1932–2017) կիսվել է հետևյալով.

Երեց Ռոբերտ Դ. Հեյլս

Ինչո՞ւ Հիսուս Քրիստոսը, և միայն Նա կարողացավ քավել աշխարհի մեղքերը: …

Միայն Հիսուս Քրիստոսը կարող էր կատարել քավիչ զոհաբերությունը՝ ծնված լինելով մահկանացու մորից՝ Մարիամից և ստացած լինելով կյանքի զորությունն Իր Հորից (տես Հովհաննես 5.26): Կյանքի այդ զորության շնորհիվ Նա հաղթեց մահին, գերեզմանի զորությունը անէացավ և Նա դարձավ մեր Փրկիչն ու Միջնորդը և մեր Հարության Տերը, որի միջոցով փրկությունը և անմահությունը տրվում է մեզ բոլորիս: Մենք բոլորս հարություն կառնենք և անմահ կդառնանք Հիսուս Քրիստոսի քավիչ զոհաբերության շնորհիվ (Ռոբերտ Դ. Հեյլս, «Փրկչի Քավությունը. ճշմարիտ քրիստոնեության հիմքը», Ensign, ապրիլ 2017, 23):

Ո՞րն է Փրկչի դերն ապաշխարության մեջ, և ո՞րն է իմ դերը:

Տասներկու Առաքյալների Քվորումից երեց Դիտեր Ֆ. Ուխդորֆն ուսուցանել է.

Երեց Դիտեր Ֆ. Ուխդորֆ

Ապաշխարությունը չէ, որ փրկում է մեզ: Մեզ փրկում է Հիսուս Քրիստոսի արյունը: Մենք փրկվում ենք ոչ թե մեր վարքի անկեղծ ու ազնիվ փոփոխության շնորհիվ, այլ «շնորհի միջոցով է, որ մենք փրկվում ենք՝ այն ամենից հետո, ինչ մենք կարող ենք անել» (2 Նեփի 25.23): Սակայն անկեղծ ապաշխարությունը պայմաններից մեկն է՝ Աստծո ներումը կյանքում ստանալու համար (Դիտեր Ֆ. Ուխդորֆ, «Ապահով վերադարձի կետ», Ensign կամ Լիահոնա, մայիս 2007, 100):

Ինչպե՞ս կարող եմ ուրախություն զգալ ապաշխարության միջոցով:

Տասներկու Առաքյալների Քվորումից երեց Դեյլ Գ. Ռենլանդն ուսուցանել է.

Երեց Դեյլ Գ. Ռենլանդ

Ես հրավիրում եմ ձեզ զգալ ավելի շատ ուրախություն ձեր կյանքում․ ուրախություն այն գիտելիքից, որ Հիսուս Քրիստոսի Քավությունն իրական է, ուրախություն՝ Փրկչի ներելու ունակության, պատրաստակամության և ցանկության համար և ուրախություն՝ ապաշխարելն ընտրելու համար: Եկեք հետևենք «ուրախութեամբ … ջուր կ’քաշէք փրկութեան աղբիւրներիցը» հրահանգին [Եսայիա 12.3]: Թող որ մենք ընտրենք ապաշխարությունը, թողնենք մեր մեղքերը և մեր սրտով ու կամքով հետ դառնանք, որպեսզի հետևենք մեր Փրկչին (Դեյլ Գ. Ռենլանդ, «Ապաշխարություն՝ ուրախալի ընտրություն», Ensign կամ Լիահոնա, նոյեմբեր 2016թ., 124):

Օժանդակ ուսումնական վարժություններ

Մորմոնի Գրքի տեսանյութ

Կարող եք ցուցադրել «Բենիամին թագավորը փոխանցում է հրեշտակի մարգարեությունը Հիսուս Քրիստոսի մասին» տեսանյութի 0:00-3:28 հատվածը:

Հիսուս Քրիստոսի տառապանքը

Հիսուս Քրիստոսի տառապանքն ավելի լավ հասկանալու համար ուսանողները կարող են կարդալ սուրբ գրությունների հետևյալ հատվածները. Մատթեոս 26.38–39, Ղուկաս 22.42–44, Վարդապետություն և Ուխտեր 19.16–19:

Ծրագրել մեղք գործել հիմա և ապաշխարել ավելի ուշ

Որպեսզի օգնեք ուսանողներին տեսնել ապագայում ապաշխարելու նպատակով միտումնավոր մեղք գործելու վտանգը, կարող եք օգտագործել այս վարժությունը:

Կարդացեք Մոսիա 3.12 հատվածը և քննարկեք, թե ինչ է նշանակում ըմբոստանալ Աստծո դեմ: Կարող եք հետևյալով կիսվել Երիտասարդներին զորացնելու համար գրքույկից.

«Որոշ մարդիկ գիտակցաբար խախտում են Աստծո պատվիրանները՝ մտածելով, թե հետո կապաշխարեն, օրինակ` տաճար գնալուց կամ միսիայում ծառայելուց առաջ: Նման միտումնավոր մեղքը ծաղրանք է Փրկչի Քավության նկատմամբ» (Երիտասարդներին զորացնելու համար [գրքույկ, 2011], 29):

Քննարկեք, թե միտումնավոր մեղքն ինչպես է ծաղրում Փրկչի Քավությունը, և ինչպես է անկեղծ ապաշխարությունը ցույց տալիս, որ մենք գնահատում ենք այն, ինչ Փրկիչն անում է մեզ համար: Այս քննարկման ընթացքում կարող եք հղում կատարել Մոսիա 3.7 հատվածին:

Փոքր երեխաների փրկությունը

Եթե ուսանողների համար օգտակար լինի հասկանալը, թե փոքր երեխաներն ինչպես են փրկված Փրկչի Քավությամբ, այս վարժությունը կարող է օգնել:

Կարդացեք Մոսիա 3.16–18 հատվածները և փնտրեք, թե ինչ է ուսուցանել Բենիամին թագավորը փոքր երեխաների և Հիսուս Քրիստոսի Քավության մասին: Ուսանողները կարող են կարդալ և քննարկել նաև Մորոնի 8.8–12 և Վարդապետություն և Ուխտեր 137.10 հատվածները: Ուսանողներին առաջարկեք կիսվել, թե փոքր երեխաների փրկությունն ինչ է ուսուցանում Երկնային Հոր և Հիսուս Քրիստոսի մասին: