“Fakataukei Fakatokāteliné: Mōsaia 2:17—ʻʻI he Tauhi Pē ʻo Homou ʻOtuá,’” Tohi ʻa Molomoná – Tohi Lēsoni ʻa e Faiakó (2024)
“Fakataukei Fakatokāteliné: Mōsaia 2:17,” Tohi ʻa Molomoná – Tohi Lēsoni ʻa e Faiakó
Fakataukei Fakatokāteliné: Mōsaia 2:17
“ʻI he Tauhi Pē ʻo Homou ʻOtuá”
ʻI he lēsoni “Mōsaia 2:1–18,” kuo mou ako ai “ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17). ʻE tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteliné mo e kupuʻi lea mahuʻinga ʻo e folofolá ki he Mōsaia 2:17, fakamatalaʻi ʻa e tokāteliné, pea akoako ʻa hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
Ko hono fakaʻaongaʻi ʻo e ngaahi tūkungá. ʻE lava ke tokoni hono aleaʻi e ngaahi tūkunga moʻoni ʻo e moʻuí pe ngaahi tūkungá ke mahino lelei ange ki he kau akó e founga ʻoku fakaʻaongaʻi ai e ngaahi moʻoni ʻo e ongoongoleleí ʻi he moʻui fakaʻahó. Poupouʻi e kau akó ke nau fakakaukau ki ha ngaahi tūkunga mei heʻenau moʻuí, pea fakaafeʻi leva kinautolu ke nau fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ke ʻiloʻi e ngaahi tukupā ʻe ala fai ki heʻenau ngaahi fehuʻí.
Teuteu ʻa e tokotaha akó: Fakaafeʻi e kau akó ke omi ki he kalasí kuo nau fakakaukau ki ha taimi naʻa nau aʻusia ai ha ngāue tokoni faingataʻa pe ko ha faingamālie ke tokoni ka naʻe ʻikai ke nau fie fai ia.
Ngaahi ʻEkitivitī Ako ʻOku Ala Fakahokó
ʻOku fokotuʻutuʻu ʻa e lēsoni fakataukei fakatokāteline ko ʻení ke akoʻi ia ʻi he hili ʻa e lēsoni “Mōsaia 2:1–18,” ʻa ia ko e lēsoni puipuituʻa ki he potufolofola fakataukei fakatokāteline Mōsaia 2:17. Kapau ʻoku fiemaʻu ke hiki e lēsoni fakataukei fakatokāteline ko ʻení ki ha uike kehe, fakapapauʻi ke akoʻi foki mo hono lēsoni puipuituʻá ʻi he uike ko iá.
Fakamatalaʻi mo ako maʻuloto
Lau ʻa e Mōsaia 2:17 mo e potufolofola fakataukei fakatokāteline ʻo e Fuakava Foʻoú Mātiu 22:36–39, ʻo kumi e ngaahi faitataú.
Ki ha ngaahi founga kehekehe, fakakaukau ke vahevahe ʻa e kau akó ke nau tauhoa pea ʻai ke nau takitaha lau ha taha ʻo e ongo potufolofolá. Fakaafeʻi leva kinautolu ke aleaʻi e ngaahi fehuʻi ko ʻení.
-
Ko e hā ha ngaahi faitatau ʻokú ke vakai ki ai ʻi he vahaʻa ʻo e Mātiu 22:36–39 mo e Mōsaia 2:17?
-
Te ke fakamatalaʻi fēfē ʻa e tokāteline ʻo e ngāue tokoní ʻo fakaʻaongaʻi e ngaahi potufolofola ko ʻení?
Ke tokoni ke ako maʻuloto ʻe he kau akó ʻa e kupuʻi lea fakafolofola mahuʻinga ko ʻení, te ke lava ʻo vahevahe ʻa e kalasí ki ha konga ʻe ua. Vahe ki he vaeua ʻo e kalasí ʻa e konga ʻuluaki ʻo e kupuʻi leá: “ʻO ka mou ka ʻi he tauhi ʻo homou kāingá.” Vahe ki he toenga ʻo e kalasí ʻa e konga hono ua ʻo e kupuʻi leá: “ʻOku mou ʻi he tauhi pē ʻo homou ʻOtuá.” Tuhu ki he kulupu ʻuluakí pea kole ange ke nau toe lau ʻa e kupuʻi lea ne vahe angé. Toe fai pē meʻa tatau ki he kulupu hono uá. Ka hili hono toutou lea ʻaki e ongo kupuʻi leá, lea fakataha kotoa ʻaki ʻa e “Mōsaia 2:17.” Te ke lava ʻo toe fai ʻa e ʻekitivitií kae ʻai ʻa e ongo kulupú ke fetongi e ongo kupuʻi lea ʻoku nau toutou lea ʻakí. Fakamanatu ki he kau akó ke nau loto ʻapasia ʻi he taimi ʻoku nau lea ai fekauʻaki mo e ʻOtuá.
Akoako hono fakaʻaongaʻí
Manatuʻi ko e taumuʻa ʻo hono toe vakaiʻi e ngaahi tefitoʻi moʻoni ki hono maʻu ʻo e ʻilo fakalaumālié, ke tokoniʻi e kau akó ke nau ʻiloʻi lelei ia ke fakanatula pē ʻenau fakaʻaongaʻí ʻi heʻenau moʻuí ʻi he taimi ʻoku nau fehangahangai ai mo e ngaahi fehuʻi fakalaumālié. Fakaʻaongaʻi e ngaahi ʻekitivitī fakamanatu ko ʻení ke siviʻi e ʻilo ʻa e kau akó ki he ngaahi tefitoʻi moʻoní. Liliu pe toutou fakahoko kinautolu ʻo ka fiemaʻu.
Vahevahe e kau akó ki ha ngaahi kulupu tautau toko tolu, pea vahe ki he tokotaha ako takitaha ʻi he kulupú ha taha ʻo e ngaahi tefitoʻi moʻoni mei he Fakamatala ki he ʻElito ʻo e Fakataukei Fakatokāteliné (2022): ngāue ʻi he tui, vakaiʻi e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá, pea fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí. Fakaafeʻi e tokotaha ako takitaha ke kumi ha sētesi ʻe ua mei heʻenau konga ne vahe angé ʻoku nau pehē ʻoku mahuʻinga ke mahino. Kole ange ke nau vahevahe e ongo sētesi ko ʻení mo ʻenau kulupú pea fakakau ai e ʻuhinga ne nau fili ai iá.
ʻE lava pē ke fakahoko fakafoʻituitui ʻa e ʻekitivitī ko ʻení, pe fakahoko tauhoa pe fakakulupu iiki. Kapau ʻe fili e kau akó ke hiki ha tūkunga, ʻoku totonu ke kau ʻi he tūkungá ha faingataʻa pe fepakipaki ʻe lava ke vakai ki ai ʻo fakafou ʻi he ngaahi tefitoʻi moʻoni ʻo hono maʻu ʻo e ʻilo fakalaumālié. Tuku ke fakafetongi ʻe he kau akó ʻenau ngaahi tūkungá. Fakaafeʻi leva kinautolu ke ngāueʻi e ngaahi tefitoʻi moʻoni ʻo hono maʻu e ʻilo fakalaumālié ke tali e tūkunga ne nau maʻú. Kapau ʻe fiemaʻu, ʻoange ki he kau akó e ngaahi fehuʻi ʻoku hiki atu ʻi he konga takitaha.
Ko e ngāue tokoní ko ha aʻusia lelei ia kiate kinautolu ʻoku kau ki aí pea mo kinautolu ʻoku tokoniʻí. Neongo ia, ka ʻoku ʻi ai foki mo ha ngaahi faingataʻa ʻe lava ke hoko ko ha konga ʻo e ngāue tokoní. Fakakaukau ki he ngaahi faingamālie ngāue tokoni ne ke toki maʻú. Ko e hā ha niʻihi ʻo e ngaahi faingataʻa naʻe hoko fakataha mo e ngāue tokoní? Ko e hā ha ngaahi ʻuhinga ʻe fili ai ha kakai e niʻihi ke ʻoua te nau ngāue tokoní?
Hiki haʻo tūkunga pē ʻaʻau ʻo fakamatalaʻi ha faingataʻa ʻi he ngāue tokoní. Ko ha sīpinga ʻeni: Naʻe kole ʻe he kau taki ʻo e Siasí kia Sōfia ke ne ʻave ha kiʻi meʻaʻofa faiʻaho ki ha taʻahine māmālohi ʻi heʻene kalasi ʻi he Kau Finemuí. ʻI he aʻu mai ʻa e kiʻi taʻahiné ki he matapaá, naʻe ʻikai ke ne fuʻu anga fakakaumeʻa kia Sōfia. ʻI he ongoʻi mamahi ʻa Sōfiá, naʻá ne mavahe mo ʻene fakaʻiseʻisa ʻi heʻene fai e ngāue tokoní.
Ngāue ʻi he tuí
-
ʻOku hoko fēfē ʻa e ngāue tokoni neongo e ngaahi faingataʻá ko ha ngāue ʻi he tui?
-
ʻE tokoniʻi fēfē ʻe he tokāteline naʻe akoʻi ʻi he Mōsaia 2:17 ʻa e tokotaha ʻi he tūkunga ko ʻení ke ngāue ʻi he tuí?
Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá
-
Ko e hā ha ngaahi liliu ʻi he taimi ʻokú ke vakai ai ki he tūkungá ʻaki ha fakakaukau ʻoku taʻengatá?
-
ʻE tokoniʻi fēfē ʻe he tokāteline naʻe akoʻi ʻi he Mōsaia 2:17 ʻa e tokotaha ko ʻení ke ne vakai ki he ngaahi meʻá ʻi ha fakakaukau ʻoku taʻengatá?
-
ʻOkú ke fakakaukau ʻe ngāue fēfē ʻa e Fakamoʻuí ʻi he tūkunga ko ʻení?
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
Ke tokoni ke maʻu ʻe he kau akó ha fakamatala, te ke lava ʻo fakaʻaliʻali ha ngaahi kupuʻi lea mei he konga “Fakamatala Fakamahinó mo e Puipuituʻá” ʻo e lēsoni “Mōsaia 2:1–18.”
Kumi ha potufolofola kehe pe ko ha fakamatala mei he konifelenisi lahí te ke lava ʻo vahevahe ke tokoniʻi ha taha ke ngāue ʻi he loto fiemālie. Ke fai ʻení, feinga ke fekumi ʻa e “ngāue tokoní” ʻi he polokalama Gospel Library, pea vakai leva ki he ngaahi folofola pe ngaahi lea konifelenisi ʻoku ʻohake aí. Te ke toe lava foki ʻo kumi ʻa e “Ngāue Tokoní” ʻi he Fakahinohino ki he Ngaahi Folofolá.
Fakaafeʻi e kau akó ke vahevahe e meʻa naʻa nau maʻú. Te ke lava ʻo fakaʻosi ʻaki hono fakaʻaiʻai e kau akó ke nau feinga ke ikunaʻi e ngaahi faingataʻa ʻokú ne taʻofi kinautolu mei he ngāue tokoní. Fakamanatu kiate kinautolu ʻa e palani ngāue tokoni naʻa nau fakahoko lolotonga ʻenau ako ʻa e Mōsaia 2:1–18 mo e ngaahi faingamālie ʻokú ne ʻākilotoa kinautolu ʻi he ʻaho takitaha ke tokoniʻi e niʻihi kehé.
Toe vakaiʻi ʻo e fakataukei fakatokāteliné
Hiki ʻa e potufolofola mo e kupuʻi lea fakafolofola mahuʻingá ʻi he palakipoé, pea fakaafeʻi e kau akó ke lau leʻolahi fakakalasi kinautolu. Tamateʻi ha ngaahi foʻi lea ʻe niʻihi pea fakaafeʻi e kau akó ke nau toe lau e potufolofola mo e kupuʻi lea kakató. Toutou fai ʻeni kae ʻoua kuo tamateʻi ʻa e meʻa kotoa pē pea lava ke toutou lau ʻe he kau akó ʻa e fakamoʻoni fakafolofolá mo e kupuʻi leá mei heʻenau manatú.