Iakopo 2:22–35

O Le Tulafono o le Lēgaviā

tamaitai talavou

Ua lafoaia e le lalolagi ia tulaga faatonuina o le mamā a’ia’i faalefeusuaiga, ae o le tulaga faatonuina a le Alii o le mamā mai feusuaiga e tumau e le suia. Ina ua uma ona maua mai lana feau mai le Alii, sa aoao atu e Iakopo lona nuu e uiga i le tulafono o le lēgaviā. O loo faaaogaina pea aoaoga a Iakopo i aso nei. O lenei lesona e mafai ona fesoasoani ia te oe e fiafia ai i le lēgaviā e pei o le Alii.

Tatalo ia malamalama i manaoga o tagata aoga. I au taumafaiga e taulai atu i tagata aoga taitasi, tatalo mo tagata aoga i o latou igoa. Ole atu i le Tama Faalelagi e fesoasoani ia te oe ia malamalama i o latou manaoga ma auala e mafai ona e aoao atu ai ina ia faamalieina ai na manaoga. Faalogo mo uunaiga e te maua ma manatu i auala e mafai ona e fesoasoani ai i tagata aoga taitasi.

Sauniuniga a le tagata aoga: E mafai ona e valaaulia tagata aoga e fesili i o latou matua po o se taitai o le Ekalesia e uiga i faamanuiaga e oo mai i le usiusitai i le tulafono o le lēgaviā. Atonu foi e te manao e faafesootai matua e faailoa atu ia i latou o le a aoao tagata aoga e uiga i le tulafono o le lēgaviā ina ia mafai ai e matua ona faaauau le talanoaga i le fale pe afai latou te mananao ai.

Gaoioiga e Ono Mafai Ona Aoao Ai

Lapataiga a Iakopo

Mafaufau e tusi se ata e talitutusa ma le faataitaiga o loo i lalo i luga o le laupapa. Ona valaaulia lea o se talanoaga e faaaoga ai fesili e pei o fesili o loo mulimuli mai i le siata.

Atonu foi e te manao e faasoa atu le vitio “Tutu Malosi i Nofoaga Paia” mai le faailotaimi 3:22 i le 4:50, lea o loo faamatala mai ai e Elder Robert D. Hales (1932–2017) le ala o loo tafetafea mamao atu ai tulaga faatonuina o le lalolagi mai tulaga faatonuina a le Alii. O loo maua lenei vitio i le ChurchofJesusChrist.org.

Siata o tulaga faatonuina

• E faapefea ona e faamatalaina le mea o loo faaalia i lenei ata e uiga i tulaga faatonuina a le Alii ma tulaga faatonuina o le lalolagi?

• O a ni auala o e vaaia ai tulaga faatonuina o le lalolagi o agai ese mai tulaga faatonuina a le Alii?

Sa faasoa mai e Peresitene Russell M. Nelson se tasi o auala o loo agai ese ai le lalolagi mai le tulaga faatonuina a le Alii:

Peresitene Russell M. Nelson

E manaomia le faatuatua e ola ai i se olaga mama a o alaga mai le lalolagi o le tulafono a le Atua o le ola mama ua le toe aoga. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 104)

• O a ni faataitaiga o lenei mea o e vaai i ai?

Afai e i ai ni fesili a tagata aoga e uiga i ni amioga patino e faatatau i le tulafono o le lēgaviā, uunaia i latou e saili tali e ala i le talanoa ma o latou matua po o taitai o le ekalesia ma e ala i le suesueina o tusitusiga paia ma aoaoga a perofeta soifua. Ia nofouta i tagata aoga o e atonu na solia le tulafono o le lēgaviā. Faamanatu atu ia i latou le mana o le Faaola e faamagalo ai ma uunaia i latou e talanoa ma lo latou epikopo.

Ia nofouta i tagata aoga o e atonu na aafia i le sauaina. Afai e foliga mai e talanoa atu se tagata aoga ia te oe e uiga i aafiaga faaletagata lava ia po o le aiga i sauaga, faamalamalama atu e manaomia ona e lipoti atu soo se tuuaiga. Ia onosai, malamalama, ma faamautinoa atu ma uunaia i latou e talanoa ma lo latou epikopo. Afai e lipoti mai e se tagata aoga le sauaina, faafesootai le laina fesoasoani a le Ekalesia po o se faufautua faaletulafono i la outou eria.

O le tulafono a le Alii o le lēgaviā e manino ma e le masuia. “O le lēgaviā o le mamā a’ia’i mai feusua’iga. O i latou o e mamā e ola mama i o latou mafaufauga, upu, ma faatinoga. O le lēgaviā o lona uiga o le le faia o soo se sootaga feusuai a o lei faaipoipo. O lona uiga foi o le faamaoni atoatoa i le tane po o le avā i le faagasologa o le faaipoipoga” (Autu o le Talalelei, “Ola Mama”).

A o e suesue i le Iakopo 2, vaavaai pe o a lagona o le Faaola e uiga i le ola mama.

Sa alofa Iakopo i lona nuu. E ala i le mana o le Alii, sa iloa ai e Iakopo mafaufauga o tagata ma le amioleaga o o latou loto (tagai Iakopo 1:15; 2:5–6). Sa Ia silafia ua “amata [ai] ona latou galulue i le agasala, o se agasala lea ua foliga mai ua sili ona inosia … i le Atua” (Iakopo 2:5). Ina ua uma ona lapataia sa Nifae e uiga i le agasala o le faamaualuga (tagai Iakopo 2:12–21), sa lapataia e Iakopo sa Nifae e uiga i “se solitulafono sili ona leaga [pe ogaoga]” (Iakopo 2:22) sa mafaufau i ai lona nuu.

Faitau le Iakopo 2:22–24, ma vaavaai pe na faapefea ona faamatalaina e Iakopo lenei agasala sili atu ona matuia. (O le faitaaga o le faia lea e se tasi o ni sootaga feusuai ma se isi e ese mai i lona toalua.)

E mafai foi ona e matamata i le vitio “Ua Aoao Atu Iakopo e uiga i le Ola Mama,” loo maua i le ChurchofJesusChrist.org, mai le faailotaimi 0:20 i le 1:51.

• O le a le matafaioi a o tatou mafaufauga i lo tatou usiusitai i le tulafono o le lēgaviā (tagai Mataio 5:28)?

E fiafia le Alii i le ola mama

O nisi o alii sa Nifae sa solia le tulafono o le lēgaviā e ala i le faia o le sili atu ma le tasi le avā, ina ua tausalaina lenei faiga e le Alii a o lei tuua e Liae Ierusalema (Iakopo 2:34). Mafaufau i mea o loo e faia i lou olaga e tetee atu ai i faaosoosoga e faatatau i le tulafono o le lēgavia.

Faitau le Iakopo 2:25–28, ma vaavaai mo mea na aoao atu e Iakopo ia sa Nifae e fesoasoani ai ia i latou e tetee atu i le faaosoosoga o le faia o agasala tau feusuaiga.

• O le a le silasila a le Alii i le lēgaviā?

Fesoasoani i tagata aoga e faailoa mai le upumoni, e fiafia le Alii i le ola mama. E mafai ona aoga i tagata aoga le faailogaina o le upumoni i le fuaiupu 28.

Sa tautala atu Iakopo i alii, o le toatele o i latou sa faatauanauina tamaitai ia solia le tulafono o le lēgaviā. O lea, sa ia tautala ai e uiga i le fiafia o le Alii i le ola mama o tamaitai. E fiafia le Alii i le ola mama o Ana fanau uma—o alii ma tamaitai.

Saunia se kopi o le Mo Le Malosi o le Autalavou (tamaitusi, 2022) i tagata aoga taitasi pe fesoasoani ia i latou e sue kopi faaeletonika. Tuu atu ia i latou e faitau le vaega “E paia lou tino” e i latou lava, ma vaavaai pe aisea ua avea ai le ola ai i le tulafono o le lēgaviā o se mea e tatau ona fiafia i ai.

Ina ia vaai i faataitaiga o le auala e fiafia ai nisi o le autalavou i le lēgaviā, atonu e te manao e matamata le vitio “Ua Ou Filifili ia Mama” (4:19) i le ChurchofJesusChrist.org.

• Aisea e te manatu ai e fiafia le Alii i le ola mama?

• O le a se faamaoniga i le olaga o se tagata e fiafia o ia i le ola mama?

• O a uiga faaKeriso e fesoasoani tatou te atiina a’e ai le ola i le tulafono o le lēgaviā?

Faitau le Iakopo 2:31–35, ma vaavaai pe na faapefea ona aafia o latou aiga i filifiliga lē mamā a alii sa Nifae.

• O a faafitauli e tulai mai pe a tatou lē vaai i le lēgaviā e pei o le Alii?

• O le a faapefea ona ese le lalolagi pe afai e vaai tagata uma i le lēgaviā e pei o le Alii?

• O le a sou manatu e mafai faapefea e le fiafia i le ola mama ona aafia ai lou sootaga ma le Alii ma isi?

malumalu

O se tasi o fesili i le faatalanoaga o le pepa faataga o le malumalu o le “E te usitai i le tulafono o le lēgaviā?”

Valaaulia tagata aoga e tomanatu ma le fifilemu i fesili nei:

• O a ni ou manatu ma lagona pe a e mafaufau e uiga i le taliina o lenei fesili i lau epikopo?

• O le a se mea e mafai ona e faia ina ia mafai ai e le Alii ona fiafia i lou ola mama?

Tomanatu i mea o loo e faia e ola ai i le tulafono o le lēgaviā ma pe faapefea ona aafia lelei ai lou olaga. Afai ua e solia le tulafono o le lēgaviā, talanoa i lou epikopo. E mafai ona ia fesoasoani ia te oe e salamo. E finagalo le Faaola ia faamagalo oe. E mafai ona e maua ia te Ia le faamagaloga, filemu, faamalologa, ma le malosi e ola ai i le tulafono o le lēgaviā.

O le isi vaega o le lesona ua faamoemoe e fesoasoani i tagata aoga ia malamalama i aoaoga a Iakopo e uiga i faaipoipoga autaunonofo. Afai e i ai ni fesili a tagata aoga e uiga i le faiga o faaipoipoga autaunonofo i le talafaasolopito o le Ekalesia, e mafai ona latou saili mo tali i le Gospel Topic Essay “Faaipoipoga Autaunonofo i Le Ekalesia a Iesu Keriso o le Au Paia o Aso e Gata Ai.”

O aoaoga a Iakopo e uiga i faaipoipoga autaunonofo

Ina ua uma ona aoao atu e Iakopo lona nuu ia aua nei sili atu ma le tasi le toalua i le taimi (tagai Iakopo 2:27), sa ia faamalamalama atu le tulaga e mafai ai e le Alii ona faatagaina faaipoipoga autaunonofo (tagai Iakopo 2:30).

• O le a le mea na aoao mai e Iakopo e uiga i faaipoipoga autaunonofo i le fuaiupu 30?

O faaipoipoga autaunonofo e faatoa faatagaina pe a poloaiina ai e le Alii e ala mai i Lana perofeta—le Peresitene o le Ekalesia—ma e le auala mai lava i se isi (tagai i le Mataupu Faavae ma Feagaiga 132:45–48). I taimi ma nofoaga patino i le talafaasolopito o le lalolagi, na poloaiina ai e le Alii Ona tagata e faia faaipoipoga autaunonofo. Mo se faataitaiga, o faaipoipoga autaunonofo sa faia e Aperaamo, Sara, ma Akara (tagai Kenese 16:1–3; Mataupu Faavae ma Feagaiga 132:34–35). O le atalii o le atalii o Aperaamo o Iakopo na faia foi faaipoipoga autaunonofo (tagai Kenese 29–30; Mataupu Faavae ma Feagaiga 132:37). Sa faia mo se taimi i le popofou o le Ekalesia toefuataiina, na amata e le Perofeta o Iosefa Samita. O faaipoipoga autaunonofo ua le toe faia e tagata o le Ekalesia (tagai i le Folafolaga Aloaia 1).

Manatu ma Talaaga o Faamatalaga

O le a le matafaioi o feusuaiga i le fuafuaga a le Tama Faalelagi?

Na apoapoai mai Elder David A. Bednar o le Korama o Aposetolo e Toasefululua:

Elder David A. Bednar

O le mana o le foafoaina o fanau e matuai taua faaleagaga. O le faaaoga sese o lenei mana e faatoilalo ai faamoemoega o le fuafuaga a le Tama ma lo tatou i ai i le olaga nei. O lo tatou Tama Faalelagi ma Lona Alo o e foafoa ma ua faamatuu mai ia i tatou taitoatasi se vaega o lo La’ua mana foafoa. O ni taiala patino mo le faaaogaina tatau o lenei tomai e foafoa ai le ola, o ni elemene taua ia i le fuafuaga a le Tama. O o tatou lagona e uiga i ai ma le faaaogaina o lena mana faalelagi, o le a fuafua ai se fuataga tele o lo tatou fiafia i le olaga nei ma lo tatou taunuuga i le faavavau. …

O Le Ekalesia a Iesu Keriso o le Au Paia o Aso e Gata Ai e i ai se tulaga faatonuina e tasi, e mausali o le ola mama faalefeusuaiga: o sootaga mafana felata’i e na o le va lava o se alii ma se tamaitai i le sootaga o le faaipoipoga ua faatonu mai i le fuafuaga a le Atua, e tatau ai. O na sootaga ua le na o se naunau e fiailoa, se manaoga ia faamalieina, po o se ituaiga o taaloga po o faafiafiaga e tulimatai ma le manatu faapito. E le o se osigātoilalo pe ua na o se taga e faatino. Ae, ua latou i ai i le olaga faitino o se tasi o faailoaga taua o lo tatou natura paia ma gafatia, ma o se auala o le faamalolosia o noataga faalelagona ma faaleagaga i le va o le tane ma le ava. O i tatou o tagata ua faamanuiaina i le faitalia e filifili ai le mea tonu, ma ua tulaga ese i lo tatou tofi paia o ni fanau a le Atua—ae le o amioga feusuai po o uiga ma tulafono faanei ona po, po o filosofia faalelalolagi. (David A. Bednar, “Matou te Talitonu i le Nofomama,” Ensign po o le Liahona, Me 2013, 41–42)

E mafai ona faamagaloina a’u i agasala tau feusuaiga?

A o saunoa atu ia i latou o e ua solia le tulafono o le lēgaviā, sa molimau mai ai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Ua tuuina atu ia te outou le filemu ma le faafouina o le salamo ua avanoa e ala i le taulaga togiola a le Alii o Iesu Keriso. I na tulaga ogaoga, e le faigofie ona amataina pe uia le ala o le salamo e aunoa ma tiga. Ae o le a savalia e le Faaola o le lalolagi lena malaga taua faatasi ma oe. O le a Ia faamalosia oe pe a tautevateva. O le a avea o Ia ma ou malamalama pe a foliga mai ua sili ona pogisa. O le a Ia uu lou lima ma avea ma ou faamoemoe pe a foliga mai e na o le faamoemoe o loo totoe ia te oe. O lona agaalofa ma le alofa mutimutivale, faatasi ai ma lo la mana e faamamā ai ma le faamalologa uma, e ofofua mai ia i latou uma e moomoo moni mo le faamagaloga atoatoa ma o le a faia laasaga e tau atu i ai. (Jeffrey R. Holland, “Ola Mama Patino,” Ensign po o le Liahona, Nov. 1998, 78)

O fea e mafai ona ou maua ai le fesoasoani e faatoilalo ai ponokalafi?

• Dallin H. Oaks, “Faamaloloina Mai le Mailei o Ponokalafi,” Ensign po o le Liahona, Oketopa 2015, 32–38

• AddressingPornography.ChurchofJesusChrist.org

O faatinoina lava faaipoipoga autaunonofo i le Ekalesia i aso nei?

I le 1890 na musuia ai Peresitene Wilford Woodruff e tuuina atu se manifeso lea na ia folafola atu ai e tatau ona aloese le Au Paia o Aso e Gata Ai mai le faia o autaunonofo (tagai Folafolaga Aloaia 1). O se vaega toaitiiti o faaipoipoga autaunonofo sa faia i lalo o le faatagana a nisi o taitai o le Ekalesia seia oo i le faaaliga lona lua, na tusia e Peresitene Iosefa F. Samita, na faamuta ai lea faiga i le lalolagi atoa i le 1904. Talu mai lena taimi, o soo se tasi o le Au Paia o Aso e Gata Ai na te faia lenei faiga e ono aveesea ai lona avea ai ma tagata o le Ekalesia (tagai Tusitaulima Aoao, 32.6.2.5).

Matamata i le vitio “Aua le Faata’ita’ia Faiga Autaunonofo” (1:12), o loo maua i le ChurchofJesusChrist.org.

E mafai foi ona e faitauina le Gospel Topic Essay “Faaipoipoga Autaunonofo i Le Ekalesia a Iesu Keriso o le Au Paia o Aso e Gata Ai.”

Gaoioiga Faaopoopo e Aoao Ai

Solaese Mai Faaosoosoga

Mafaufau e faitau ma talanoaina le tala ia Iosefa i Aikupito o se faataitaiga o le teenaina o faaosoosoga tau feusuaiga. Tagai i le Kenese 39:1–12.

E mafai foi e tagata aoga ona usuina pe talanoaina le fuaiupu lona lua o le viiga “Ua Naunau ia te Oe” (Viiga, 57).

Atamai i Aoaoga Faavae. Alema 39:9; Kenese 39:9; 1 Korinito 6:19–20

E mafai e tagata aoga ona faitau ma talanoaina pe mafai faapefea e mataupu faavae na aoaoina i se tasi pe sili atu foi o fuaitau o le atamai i aoaoga faavae ona fesoasoani ia i latou e usitaia le tulafono o le lēgaviā.