Atamai i Aoaoga Faavae: 2 Nifae 32:8–9

“E Ao Ina Outou Tatalo E Le Aunoa”

talavou o loo tatalo

I se lesona talu ai, “2 Nifae 32:8–9,” na e aoaoina ai afai tatou te tatalo e le aunoa, o le a faapaiaina e le Tama Faalelagi a tatou galuega mo le manuia o o tatou agaga. O lenei lesona o le a fesoasoani ia te oe e tauloto ai mau faasino ma le fasifuaitau autu o le mau mo le 2 Nifae 32:8–9, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani faalesoifuaga.

Uunaia tagata aoga e tatalo. Uunaia tagata aoga e tatalo i aso taitasi e faailoa atu le lotofaafetai ma saili le fesoasoani i taimi e manaomia ai (tagai i le 3 Nifae 18:19). O le a oo ina iloa atili e tagata aoga le Tama Faalelagi ma Iesu Keriso a o latou malamalama ma faaaoga ia mataupu faavae o le tatalo.

Sauniuniga a le tagata aoga: Mafaufau e valaaulia tagata aoga e faailoa mai se taimi i o latou olaga po o le olaga o se tasi latou te iloa ina ua fesoasoani le tatalo faamaoni ia i latou e latalata atili atu ai i le Tama Faalelagi ma Iesu Keriso.

Gaoioiga e Ono Mafai Ona Aoao Ai

O lenei lesona o le atamai i aoaoga faavae ua mamanuina ia aoaoina pe a maea le lesona o le “2 Nifae 32:8–9,” o le lesona faatatau lea mo le fuaitau o le atamai i aoaoga faavae 2 Nifae 32:8–9. Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e o faatasi ai i le vaiaso foi lena.

Faamatala ma tauloto

Fesoasoani i tagata aoga e tauloto le mau ma le fasifuaitau autu o le mau mo le 2 Nifae 32:8–9. Uunaia au tagata aoga e mafaufau e tauloto le tele o fuaitau o le atamai i aoaoga faavae latou te mafaia ae e le manaomia ai lenei mea. O le polokalama o le atamai i aoaoga faavae e mafai ona fesoasoani ia i latou i le taulotoina.

Iloilo le mau faasino o le atamai i aoaoga faavae “2 Nifae 32:8–9” ma le fasifuaitau autu o le mau “E ao ina outou tatalo e le aunoa.” Fatu se tala puupuu e faafesootai ai numera taitasi i le mau faasino i le fasifuaitau autu—mo se faataitaiga, “Sa tatalo Addi mo le 32 itula i le aso.” E le afaina pe afai o mea e te fatuina e le talafeagai. O le manatu o le fesoasoani lea ia te oe e faafesootai le mau faasino i le fasifuaitau autu o le mau.

Fesoasoani i tagata aoga e faamalamalama le aoaoga faavae o loo aoao mai i le 2 Nifae 32:8–9. Ia mautinoa e tuu atu i tagata aoga taitasi se avanoa e faataitai ai ona faamatalaina atu le aoaoga faavae. Afai e galulue tagata aoga i paga, o le a mafai e tagata aoga taitasi ona faataitai e aunoa ma le tele o le taimi o le vasega e alu i le faia o le gaoioiga. E mafai ona e faaaogaina le vaaiga faataitai ma faatonuga nei pe faaaoga se vaaiga faataitai na e fetuunaia pe fatuina.

Vaai faalemafaufau faapea o loo e talanoa ma se uo e le o lagonaina le agavaa e tatalo ai. Faaaoga fasifuaitau mai le 2 Nifae 32:8–9 e fesoasoani ai ia i latou ia malamalama pe aisea e manaomia ai ona tatou tatalo e le aunoa. Ia aofia i lau faamalamalamaga ou manatu i le uiga o le tatalo e le aunoa.

Faataitai le faaaogaina

Faaali atu pe valaaulia tagata aoga e toe faamanatu mataupu faavae e tolu o le mauaina o le malamalama faaleagaga. Valaaulia tagata aoga e filifili se mataupu faavae se tasi ma tusi mea e mafai ona latou manatua e faatatau i ai i le minute e tasi. Ina ia vaai po o a nisi mea e mafai ona latou faaopoopo i ai, ona mafai lea ona latou faatusatusa mea na latou tusia ma se isi tagata aoga na iloiloina le mataupu faavae lava lea e tasi, pe mafai foi ona latou faatusatusaina ma le parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

A uma ona iloilo mataupu faavae o le mauaina o le malamalama faaleagaga, valaaulia tagata aoga e tusi i luga o le laupapa popolega po o fesili e ono i ai i tagata e uiga i le tatalo i le Tama Faalelagi. Ona tuu atu lea ia i latou taitoatasi e filifili se tasi ma faataitai le faaaogaina o mataupu faavae o le mauaina o le malamalama faaleagaga e saunia ai se tali i le popolega. Afai e manaomia, e mafai ona e faaaofia ai fesili e oo mai i se taimi mulimuli ane o le lesona e fesoasoani e taiala ai tagata aoga i a latou suesuega.

I se isi itu, e mafai ona e faaaogaina se tasi o mea nei e fesoasoani ai i tagata aoga e faataitai.

1. Valaaulia tagata aoga e filifili se tasi o luitau o loo lisiina i luga o le laupapa ma fai se vaaiga faataitai o se talavou o loo i ai lenei luitau. E mafai e tagata aoga ona ta’u mai lenei tagata, tuu atu ia i latou se mafuaaga latou te le tatalo ai, ma faaopoopo i ai isi faamatalaga talafeagai.

2. Faasoa atu le vaaiga faataitai lenei ma valaaulia tagata aoga e faaaoga mataupu faavae o le mauaina o le malamalama faaleagaga e tali atu ai: Ua auina atu e se uo ia te oe se savali e faapea, “A o ou faalogologo i se lauga i le lotu, sa ou iloaina ai nai lo le fesoasoani ia te au e fesootai ai ma le Tama Faalelagi, ua avea a’u tatalo ma faiga masani. Ou te le o lagona le toe mauaina o ni tali i a’u tatalo. Ua amata ona ou popole i lagona o le Tama Faalelagi e uiga ia te au. Ou te manao e toe maua lena sootaga. Sa ou faamoemoe e mafai ona ta talanoa i se taimi taeao ma atonu e mafai ona e fesoasoani mai ia te au e fuafua po o le a le mea e fai.”

Saili le malamalama atili e ala i punavai mamana ua filifilia

• O a punavai mamana filifilia o le a e faaaogaina e tali atu ai?

Faaaoga se punavai mamana ua filifilia e fesoasoani ia te oe e saunia ai se tali. E mafai ona e auina atu se savali i se matua po o se taitai o le Ekalesia e talosagaina ai se fesoasoani i ni tali talafeagai. E mafai foi ona e suesue i tusitusiga paia po o anomea i le ChurchofJesusChrist.org. Mo nisi o atugaluga, e mafai ona fesoasoani le saunoaga lenei a Peresitene Polika Iaga (1801–1877):

Peresitene Polika Iaga

E le afaina pe o oe po o au ua lagona le manao ina ia tatalo, afai e oo mai le taimi e tatalo ai, tatalo. Afai e le o maua se lagona e tatalo ai, e ao ona tatou tatalo seia oo mai lena lagona. (Aoaoga a Peresitene o le Ekalesia: Polika Iaga [1997],45)

Iloilo manatu faavae ma fesili ma se vaaiga e faavavau

• O le a se mea ua e iloa e uiga i le Tama Faalelagi ma Iesu Keriso e fesootai i lenei fesili po o le atugaluga?

• O a upumoni faavavau mai le 2 Nifae 32:8–9 e mafai ona fesoasoani i se tasi o i ai lenei fesili po o le atugaluga?

Faatino i le faatuatua

• O le a se mea e te fautuaina lenei tagata e faia e faatino ai le faatuatua ia Iesu Keriso? Aisea?

• O le a se mea e te valaaulia lenei tagata e manatua e mafai ai ona fesoasoani ia i latou e faatino ai i le faatuatua?

Valaaulia tagata aoga e talanoaina pe faapefea e le faaaogaina o mataupu faavae o le mauaina o le malamalama faaleagaga ona fesoasoani ia i latou e tali atu ai. Uunaia i latou e faaaoga nei mataupu faavae i le lumanai pe a tulai mai ni fesili po o ni atugaluga mo i latou po o ni isi.

Iloiloga o le atamai i aoaoga faavae

I le taimi o se lesona o le a sosoo ai, ia le silia ma le lima minute e iloilo ai le mau faasino ma le fasifuaitau autu o le mau “2 Nifae 32:8–9: ‘E ao ina outou tatalo e le aunoa.’” O se tasi o auala e iloilo ai o le faaali atu lea o se ata o se tasi o loo tatalo ma fai i le vasega e toe mafaufau i le mau faasino ma le fasifuaitau autu o le mau a o latou tilotilo i le ata.

first 12 doctrinal mastery chart