2 Nifae 32:8-9

“E Ao Ina Outou Tatalo E Le Aunoa”

talavou o loo tatalo

O se tasi o poloaiga autu o loo ia i tatou o le tatalo lea i le Tama Faalelagi. Ae e tele mea e mafai ona faalavelavea ai lo tatou tatalo. Na faamanatu atu e Nifae i tagata le taua o le tatalo ma faamanuiaga e oo mai mai fesootaiga masani ma lo tatou Tama Faalelagi. O lenei lesona e mafai ona fesoasoani ia te oe e faateleina ai lou manao e fesootai atu i lou Tama Faalelagi e ala i le tatalo.

Iloiloina o le malamalama o tagata aoga. E eseese tulaga o le malamalama o tagata aoga taitasi i autu o le talalelei. O le valaaulia o tagata aoga e faasoa mai mea ua uma ona latou iloa e mafai ona fesoasoani ia te oe e filifili ai po o a vaega o le lesona e manaomia e tagata aoga e faaalu ai se taimi.

Sauniuniga a le tagata aoga: Mafaufau e valaaulia tagata aoga e matau pe faafia ona latou tatalo ma pe aisea foi.

Gaoioiga e Ono Mafai Ona Aoao Ai

O le a le taimi e te tatalo ai?

Mafaufau e amata i le gaoioiga lenei e fesoasoani ai i tagata aoga e mafaufau pe aisea ma pe o le a le taimi latou te tatalo ai.

Atonu e te manao e tusi le faamatalaga lenei i luga o le laupapa: Ou te tatalo pe a …

Mafaufau i ni auala se tele e mafai ona e faamaeaina sa’o ai le faamatalaga lenei: Ou te tatalo pe a …

Atonu e aoga le valaaulia o tagata aoga e faamaea le faamatalaga i luga o ni fasi pepa laiti e le tusia ai o latou igoa e mafai ona e aoina mai ma faitauina atu leotele.

Afai e mafai, matamata le vitio “I Pray When …” (1:56) e iloa ai pe na faapefea ona faamaea e nisi o tagata le faamatalaga. O loo maua le vitio i le ChurchofJesusChrist.org.

Faaalu sina taimi e mafaufau loloto ai pe faafia ona e tatalo i le Tama Faalelagi ma pe aisea e te tatalo ai. A o faaauau lau suesuega, mafaufau loloto pe na faapefea ona faamanuiaina oe e le Tama Faalelagi ona o au tatalo, faapea foi soo se auala e te lagonaina atonu e finagalo o Ia e te faaleleia ai au fesootaiga ma Ia.

Aoaoga a Nifae e uiga i le tatalo

Ina ua uma ona aoaoina e Nifae lona nuu ina ia tumau i le ala lauitiiti ma le vaapiapi e tau atu i le ola e faavavau ma ia taumamafa fiafia i afioga a Keriso (tagai 2 Nifae 31:19–20; 32:1–3), na ia aoao atu le ala e mafai ai ona latou iloa le moni o Ana afioga.

Faitau upu a Nifae i le 2 Nifae 32:4, 7.

• O a ni mea sa lei naunau nisi o tagata o Nifae e fai?

• Aisea e te manatu ai o le a faalotovaivaia Nifae i lenei mea?

Ona faaauau lea ona aoao atu Nifae e uiga i le taua o le tatalo.

Faitau le 2 Nifae 32:8–9, ma vaavaai mo mea na aoao atu e Nifae e uiga i le tatalo.

O le2 Nifae 32:8–9 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se ala iloga ina ia mafai ai ona e mauaina gofie. O le a e maua se avanoa i le lesona e sosoo ai e faataitai ai ona faaaoga le aoaoga faavae o loo aoaoina i lenei fuaitau i se fesili po o se tulaga.

• O a ni upumoni na e maua?

Uunaia ni tagata aoga e faasoa mai. A o latou faasoa mai upumoni, tusi i luga o le laupapa pe tuu atu i tagata aoga e tusi i luga o le laupapa. O nisi nei o upumoni atonu na faailoa mai e tagata aoga:

O nisi o upumoni na aoao mai e Nifae e aofia ai:

• Afai tatou te tatalo e le aunoa, o le a faapaiaina e le Tama Faalelagi a tatou galuega mo le manuia o o tatou agaga.

• E finagalo le Tama Faalelagi ina ia tatou tatalo.

• E le manao Satani ina ia tatou tatalo.

• E ao ona outou tatalo e le aunoa.

Fesootaiga ma le Tama Faalelagi

Mafaufau po o a mea ua uma ona faasoa mai e tagata aoga e uiga i le tatalo ona fuafua lea po o fea o gaoioiga nei atonu e sili ona aoga. Pe e mafai foi ona e tuuina atu i tagata aoga pepa nei e tufa ma valaaulia i latou e faamae’a se gaoioiga se tasi pe lua latou te lagona o le a sili ona fesoasoani ia i latou.

E mafai e tagata aoga ona galulue na o i latou pe faatasi foi ma se tasi o le vasega. Afai latou te galulue faatasi, e mafai ona latou tuuina atu faatasi mea na latou maua.

Aoao Atili e Uiga i le Tatalo

Tusi Lesona a le Faiaoga o le Tusi a Mamona (2024)-- “2 Nifae 32:8–9: ‘E Ao Ina Outou Tatalo e lē Aunoa’”

Gaoioiga A

O a nisi o mafuaaga e finagalo le Tama Faalelagi tatou te tatalo ai a o faaosoosoina i tatou e Satani ina ia aua nei tatalo?

• O a nisi o auala e ono faaosoosoina ai i tatou e Satani e aua le tatalo?

O se tasi o auala e mafai ai e Satani ona “aoao [i tatou] e le tatau ona [tatou] tatalo” o le taumafai lea e faatalitonu i tatou i pepelo ona ua tatou agasala, ua tatou le toe agavaa ai e tatalo.

Mafaufau loloto po o a faamanuiaga atonu o loo taumafai Satani e taofia i tatou mai le mauaina a o e faia mea nei:

• Faaalu sina taimi e suesue ai e uiga i le tatalo. E mafai ona e sueina le tatalo i le Lomifefiloi po o le Taiala i Tusitusiga Paia, suesue i Autu o le Talalelei, pe vaavaai mo lauga o le konafesi aoao o loo talanoa e uiga i le tatalo. A o e suesue, vaavaai mo faamanuiaga o le tatalo. Atonu foi e te manao e mafaufau i faamanuiaga ua e maua mai le tatalo i lou olaga. E faavae i au suesuega ma aafiaga, mafaufau loloto pe aisea e finagalo ai le Tama Faalelagi ina ia tatou tatalo ma pe aisea e faaosoosoina ai i tatou e Satani ina ia aua nei tatalo.

Afai e mafai, vaavaai mo mafuaaga faaopoopo a o e matamata i le “E Finagalo le Atua ina ia Outou Tatalo” (3:28), o loo maua i le ChurchofJesusChrist.org, o se vitio e uiga i le aafiaga o Kayla i le tatalo a o feagai ai ma luitau.

Tusi i lalo ia le itiiti ifo ma le lua ni upumoni na e aoaoina e uiga i le tatalo. Ia aofia ai le mafuaaga e te manatu ai e finagalo le Tama Faalelagi ina ia tatou tatalo ma mafuaaga e faaosoosoina ai i tatou e Satani ina ia aua nei tatalo.

Gaoioiga E

O le a le uiga o le tatalo e le aunoa?

Mafaufau e faailoga le fasifuaitau “tatalo e le aunoa, ma ia le faavaivai” (2 Nifae 32:9).

Faitau le Alema 34:21, 27, ma vaavaai mo malamalamaaga i le uiga o le tatalo e le aunoa.

• Aisea o le a avea ai le tatalo “i le taeao, aoauli, ma le afiafi” (Alema 34:21) o se faamanuiaga?

• E mafai faapefea ona tatou liliu atu o tatou loto i le Atua, e tusa lava pe tatou te le o tatalo?

Na tuuina mai e Elder David A. Bednar o le Korama a Aposetolo e Toasefululua se faataitaiga se tasi i le uiga o le tatalo e le aunoa:

Elder David A. Bednar

Talanoa ma le Tama Faalelagi i le tatalo i le taeao. …

I le faagasologa o le aso, tatou te teuina pea se tatalo i o tatou loto mo se fesoasoaniga ma se tomatauga faifai pea. …

I le faaiuga o lo tatou aso, tatou te toe tootutuli ai ma toe lipoti atu i lo tatou Tama. Tatou te toe iloiloina mea na tutupu i le aso ma faailoa atu le faafetai mai le taele o o tatou loto mo faamanuiaga atoa ai ma le fesoasoani sa tatou maua. Tatou te salamo ma, faatasi ai ma le fesoasoani mai o le Agaga o le Alii, faailoa ala e mafai ona tatou faia ia lelei atili ai taeao. O lea, o la tatou tatalo i le afiafi e faavae i luga ma o se faaauauga o la tatou tatalo i le taeao. O la tatou tatalo i le afiafi o se sauniuniga foi lea mo se tatalo anoa i le taeao. (David A. Bednar, “Tatalo e le Aunoa,” Ensign po o le Liahona, Nov. 2008, 41–42)

Tusi i au lava upu lou manatu i le uiga o le tatalo e le aunoa.

Gaoioiga I

E faapefea ona faapaiaina e le Tama Faalelagi a tatou taumafaiga mo le manuia, po o le lelei, o o tatou agaga?

Na aoao mai Nifae “e ao ona e tatalo atu i le Tamā i le suafa o Keriso, ina ia faapaiaina e ia lau galuega mo oe, ina ia mafai ona avea mo le manuia o lou agaga” (2 Nifae 32:9). Ina ia faapaiaina o lona uiga ia faamanūina pe faamamaluina.

Mafaufau ia le itiiti ifo ma le tasi se faataitaiga na faamanuiaina ai e le Tama Faalelagi se tasi a o latou tatalo ma taumafai e fai le mea sa Ia finagalo ai. E mafai ona avea lenei mea ma se aafiaga patino, se faataitaiga faaonaponei, pe e mafai foi ona e sueina se tala i tusitusiga paia (faaaoga le Taiala i Autu, Faasinomaga, po o le Taiala i Tusitusiga Paia e sue ai se faataitaiga pe a manaomia).

Tusi i lalo le faataitaiga ma le mea na aoaoina ai oe e uiga i le ala o le a faamanuiaina ai e le Tama Faalelagi a tatou galuega e faataunuu ai Lona finagalo a o tatou tatalo.

© 2024 Puletaofia e le Intellectual Reserve, Inc. Ua taofia aia tatau uma.

O nisi o faataitaiga atonu e mafaufau i ai tagata aoga mo le Gaoioiga I e aofia ai Nifae o loo tatalo ma le motusia o ona noataga (tagai 1 Nifae 7:16–19) ma Liae o loo tatalo mo le taitaiga e fesoasoani ai ia Nifae ia maua mai meaai mo lo latou aiga (tagai 1 Nifae 16:21–26, 30–32).

Valaaulia ni tagata aoga se toatele e faasoa mai mea sa latou aoaoina mai le gaoioiga sa latou faamaeaina. O le faia o lena mea o le a mafai ai e tagata aoga ona aoao mai aafiaga a o latou tupulaga. E mafai foi e tagata aoga ona faasoa mai soo se latou fesili o i ai. Afai latou te faia, valaaulia isi tagata aoga e faaaoga mea sa latou suesueina ma o latou lava aafiaga e fesoasoani ai e tali ia fesili.

O mea ou te manao e manatua

Tomanatu i mea na e aoaoina i le asō. Mafaufau e tusi i lalo mea e te manao e manatua pe faia o se taunuuga. Mo se faataitaiga, atonu e te manao e faateleina taimi e te tatalo ai, taumafai ia iloa pe faapefea ona faamanuiaina oe e le Alii a o e tatalo ma galue, pe taumafai e faatoilalo soo se faaosoosoga e te lagona ina ia aua nei tatalo.

Afai e te lagona e talafeagai, mafaufau e valaaulia tagata aoga e taofi ma tatalo le leoa, ma faaaoga mea na latou mafaufau i ai e faatatau i le tatalo.

Manatu ma Talaaga o Faamatalaga

Aisea e taua tele ai le tatalo?

Na taua e Elder José A. Teixeira o le Korama a le Au Fitugafulu:

Elder José A. Teixeira

Ua tatou ola i se taimi e na o sina pa’i po o se leo o poloai mai, e mafai ona tatou amata saili mo tali mo le toetoe o soo se autu i le anoanoai o utufaamatalaga o loo teuina and organized i upegafesootai lavelave o komepiuta.

I se isi itu, ua ia i tatou se valaaulia faigofie e amata sailia ai tali mai le lagi. “Tatalo e le aunoa, ma o le a ou liligi atu lo’u Agaga i ou luga.” Ona folafola mai lea e le Alii, “Ma o le a tele lava lou faamanuiaga—ioe, e sili atu lava nai lo ʼoa o le lalolagi.” [Mataupu Faavae ma Feagaiga 19:38].

Ua silafia atoatoa e le Atua i tatou taitoatasi ma ua saunia e faafofoga mai i a tatou tatalo. Pe a tatou manatua e tatalo, tatou te maua Lona alofa lagolago, ma o le tele ona tatou tatalo i lo tatou Tama o i le Lagi i le suafa o Keriso, o le tele foi lena tatou te aumaia ai le Faaola i o tatou olaga ma o le atili lelei foi lea o lo tatou iloa o le ala ua Ia faailogaina e toe foi atu ai i lo tatou aiga faalelagi. (José A. Teixeira, “Manatua Lou Ala e Toe Foi Ai i le Aiga,” LiahonaMe 2021, 93)

O le a se mea e mafai ona ou faia ina ia anoa ma aoga atili ai tatalo?

Na ta’ua Peresitene M. Russell Ballard o le Korama a Aposetolo e Toasefululua:

Peresitene M. Russell Ballard

O le tatalo mo le faamasinotonu, filemu, mo e matitiva, ma e mama’i e tele ina le lava. A uma ona tatou tootutuli i le tatalo, e manaomia ona tatou tutu a’e i luga ma faia mea tatou te mafaia e fesoasoani ai—e fesoasoani ai ia i tatou lava faapea ma isi. (M. Russell Ballard, “Ia Outou Mataala ma Tatalo e le Aunoa,” Ensign po o le Liahona, Nov. 2020, 78–79)

I le lauga “Tatalo e le Aunoa” na aoao mai ai e Elder David A. Bednar o le Korama a Aposetolo e Toasefululua ni mataupu faavae se tolu e faamalosia ai a tatou fesootaiga ma le Tama Faalelagi.

O le tusiga “Idea List: Pray with Power” (New Era, Aok. 2006) o loo tuuina mai ai ni fautuaga i le auala e fesoasoani ai i au tatalo i le Tama Faalelagi ina ia sili atu ona anoa.

Gaoioiga Faaopoopo e Aoao Ai

O laasaga i le tatalo

Afai e manaomia e tagata aoga se fesoasoani i le aoaoina pe faapefea ona fai se tatalo, mafaufau e valaaulia i latou e faitau le tatalo a le Alii i le Mataio 6:9–13. Ina ia fesoasoani i tagata aoga e faailoa mai elemene taua o le tatalo, valaaulia i latou e toe faamanatu le saunoaga a Peresitene Russell M. Nelson “Lesona mai le Tatalo a le Alii” (Ensign po o le Liahona, Me 2009). Uunaia i latou e mafaufau pe mafai faapefea ona latou faaaogaina nei mea i a latou lava tatalo.

Suesue se lauga o le konafesi aoao

Valaaulia ni vaega eseese o tagata aoga e faitau taitasi se tasi o mataupu faavae e tolu o le saunoaga a Elder David A. Bednar “Tatalo e le Aunoa.” Ona mafai lea e tagata aoga ona lipoti mai mea na latou aoaoina ma pe faapefea ona fesoasoani ia i latou e tatalo ai e le aunoa.

Faaosoosoga ina ia aua nei tatalo

E mafai e tagata aoga ona mafaufau i auala ma mafuaaga e ono taumafai ai Satani e faaosooso se talavou ina ia aua nei tatalo. Ona mafai lea ona latou suesue i tusitusiga paia mo upumoni e mafai ona fesoasoani i se talavou e faatoilalo ai nei faaosoosoga.

handout learning more about prayer page 1

handout learning more about prayer page 2