“E paia lou tino,” Mo le Malosi o le Autalavou: O Se Taiala i le Faia o Filifiliga (2022)
“E paia lou tino,” Mo le Malosi o le Autalavou
E paia lou tino
1 Korinito 6:18-20
O lou tino o se meaalofa ofoofogia mai lou Tama Faalelagi. Na Ia tuuina atu ia te oe e fesoasoani ia te oe ia avea atili e faapei o Ia. O le i ai o se tino e te maua ai le mana faateleina e faaaoga ai lou saolotoga e filifili ai. O le talalelei toefuataiina a Iesu Keriso e mafai ona fesoasoani ia te oe e iloa ai lou tino mai le silasila a le Atua. Ma o lena mea e faia ai se eseesega tele i au filifiliga e uiga i le mea e fai i lou tino ma le auala e tausia ai.
Upumoni e faavavau
O lou tino o loo i le faatusa o le Atua—o le Tagata sili ona mamalu ma maoae i le atulaulau. E faatusatusa e tusitusiga paia o tatou tino i se malumalu paia, o se nofoaga e mafai ona afio ai le Agaga. Ioe, e le atoatoa lou tino i le taimi nei. Ae o aafiaga o loo e mauaina i lou tino e mafai ona fesoasoani ia te oe e saunia ai e maua i se aso se tino atoatoa, toetu, ma faamamaluina.
Ua fausia lou agaga mai lou tino ma lou agaga. Mo lenei mafuaaga, o le soifua maloloina faaletino ma le soifua maloloina faaleagaga e vavalalata le fesootaiga. Sa faaali mai e le Faaola le Upu o le Poto e aoao mai ai mataupu faavae o le tausiga o lou tino—ma folafola atu faamanuiaga faaletino ma faaleagaga.
O lagona feusuai o se vaega taua o le fuafuaga a le Atua e fatu ai ni faaipoipoga fiafia ma ni aiga e faavavau. O nei lagona e le agasala—e paia. Ona o lagona feusuai e matua paia ma mamana tele, ua tuuina mai ai e le Atua ia te oe Lana tulafono o le legavia e saunia ai oe e faaaoga nei lagona e pei ona Ia faamoemoeina. O loo tau mai i le tulafono o le ola mama e faapea e faamaonia e le Atua le gaoioiga faalefeusuaiga i le na o le va o se alii ma se tamaitai ua faaipoipoina. E toatele tagata i le lalolagi e le amanaiaina pe tauemu foi i le tulafono a le Atua, ae ua valaaulia i tatou e le Alii ia avea ma Ona soo ma ola i se tulaga faatonuina e maualuga atu nai lo le tulafono a le lalolagi.
Valaaulia
Taulima lou tino—ma tino o isi—ma le faaaloalo. A o e faia ni faaiuga e uiga i ou laei, faiga o lou ulu, ma foliga vaaia, fesili ifo ia te oe lava, “P ou faamamaluina ea lo’u tino o se meaalofa paia mai le Atua?” E finagalo le Tama Faalelagi ia tatou vaai atu i le tasi ma le isi po o ai moni lava i tatou: e le na o tino faaletino ae o Ana fanau pele e i ai se taunuuga paia. Aloese mai sitaili e faamamafa pe tosina atu ai le gauai le talafeagai i lou tino faaletino nai lo le tagata ua avea ai oe o se atalii/afafine o le Atua ma se lumanai e faavavau. Ia avea le amio mama ma le alofa mo le Atua e taiala ai au filifiliga. Saili fautuaga mai ou matua.
Fai mea o le a faamalosia ai lou tino—leai se mea o le a faatiga pe faaleagaina ai. Olioli ma le lotofaafetai i le tele o mea lelei ua saunia e le Atua. Ae ia manatua o le ava malosi, tapaa, kofe, lauti, ma isi fualaau faasaina ma vailaau e le mo lou tino po o lou agaga. E oo lava i fualaau faasaina aoga, e pei o fualaau mai le fomai, e mafai ona faataumaoia pe afai e le sao le faaaogaina.
Ia tausia le paia o lagona feusuai ma faalefeusuaiga. E le tatau ona avea i latou ma mataupu o tala malie po o faafiafiaga. I fafo atu o le faaipoipoga i le va o se alii ma se tamaitai, e sese le pa’i atu i vaega patino, paia o le tino o se isi tagata e tusa lava pe o fai ni lavalava. I au filifiliga e uiga i mea e te faia, vaai i ai, faitau, faalogo, mafaufau i ai, tuu i luga, po o le tesi, aloese mai soo se mea e faaosofia ai ma le faamoemoeina lagona o le tuinanau i isi po o oe lava ia. E aofia ai ponokalafi i soo se ituaiga. Afai e te iloa o tulaga po o gaoioiga e faia ai ni faaosoosoga ia malolosi atu, aloese mai ai. Ua e iloa na tulaga ma gaoioiga. Ma afai e te le o mautinoa, e mafai e le Agaga, ou matua, ma ou taitai ona fesoasoani ia te oe ia iloa. Faaali atu i lou Tama oi le Lagi e te faamamaluina ma faaaloalogia le mana paia e foafoa ai le ola.
Faamanuiaga folafolaina
O le a faateleina lou faaaloalo mo oe lava ma isi a o e faamamaluina lou tino e ala i au amioga, foliga vaaia, ma laei.
Ua folafola mai e le Alii oa sili o le malamalama ia i latou o e tausia le Upu o le Poto. O se tino maloloina, saoloto mai le tagofia o mea ua fai ma vaisu, e faateleina ai foi lou tomai e maua faaaliga faaletagata lava ia, mafaufau manino, ma auauna atu i le Alii.
O le ola ai i le tulafono o le legavia e aumaia ai le faamaoniga a le Atua ma le mana faaleagaga faaletagata lava ia. A e faaipoipo, o lenei tulafono o le a aumaia ai le alofa sili atu, faatuatuaina, ma le lotogatasi i lau faaipoipoga. O le usitaia o lenei tulafono o le a mafai ai e oe ona alualu i luma e faavavau ma avea atili e faapei o lou Tama Faalelagi. O le a tuputupu ae lou mautinoa a o e ola o se soo o Iesu Keriso.
Fesili ma tali
O le a le tulaga faatonuina a le Alii i laei, teuga, pe’a, ma vaega o le tino e tatui? O le tulaga faatonuina a le Alii e mo oe e faamamalu ai le paia o lou tino, e tusa lava pe o lona uiga o le ese mai le lalolagi. Ia avea lenei upumoni ma le Agaga ma ou taiala a o e faia faaiuga—aemaise lava faaiuga e i ai aafiaga tumau i lou tino. Ia atamai ma faamaoni, ma saili fautuaga mai ou matua ma taitai.
E mafai faapefea ona ou faatoilaloina faaosoosoga ma mausa leaga? Ua i ai i le Tama Faalelagi ma Iesu Keriso le mana e fesoasoani ai ia te oe. Faatumu lou olaga i mea e valaaulia ai lena mana i lou olaga, e pei o le tatalo, suesueina o tusitusiga paia, ma le auauna atu i isi. Liliu atu ia Iesu Keriso ma Lana talalelei ma o le a e iloa ai o vaivaiga e mafai ona avea ma malosiaga. Saili le fesoasoani mai matua, taitai, ma faufautua faapolofesa pe a manaomia ai. Mo i latou o e mafatia mai le tagofia o mea ua fai ma vaisu, ua ofoina atu e le Ekalesia se polokalama o le toe faaleleia o olaga mai le tagofia o mea ua fai ma vaisu. O faamanuiaga nei ua saunia e le Ekalesia a le Faaola e fesoasoani ia te oe e toe maua ai le puleaina o lou olaga. O le a alu ai se taimi, ae ia onosai, ma aua lava nei fiu.
Ua ou tosina atu i tagata o la’u lava itupa. E faapefea ona faatatau nei tulaga faatonuina ia te au? O le lagonaina o le tosina atu i le itupa e tasi e le o se agasala. Afai o ia te oe nei lagona ma e te le tuliloaina pe faatinoina, o loo e ola i le tulafono paia a le Tama Faalelagi o le legavia. O oe o se atalii/afafine faapelepele o le Atua ma o se soo o Iesu Keriso. Manatua e malamalama le Faaola i mea uma e te oo i ai. E ala i lau sootaga faalefeagaiga ma Ia, o le a e maua ai le malosi e usitai ai i poloaiga a le Atua ma maua faamanuiaga ua Ia folafola mai. Faalagolago ia te Ia ma Lana talalelei.
Sa sauaina au, ma sa ou lagona le maasiasi. Pe ua ou nofosala ea i le agasala? O le avea ma se tagata ua aafia i soo se sauaga po o le faaoolima e le faapea ua tausalaina oe i le agasala. Faamolemole aua nei lagonaina le tausalaina po o le maasiasi. E alofa le Faaola ia te oe. E finagalo o Ia e fesoasoani ia te oe, faamalolo oe, ma avatu ia te oe le filemu. O faufautua faapolofesa, tagata o lou aiga, ma ou taitai e mafai foi ona fesoasoani.
Tagai i le Kenese 1:27 (ua foafoaina i tatou i le faatusa o le Atua); Ioane 14:18 (ua folafola mai e le Faaola le faamafanafanaga); Filipi 4:7 (o le filemu o le Atua e aumaia ai le malamalama); Mataupu Faavae ma Feagaiga 88:15 (o le agaga ma le tino o le agaga lea); 89 (o le Upu o le Poto); 121:45 (O mafaufauga mama e taitai atu ai i le faateleina o le mautinoa).
Fesili o le pepa faataga o le malumalu
Ua fetalai mai le Alii o mea uma e ao ona “faia i le mamā” i Ona luma (Mataupu Faavae ma Feagaiga 42:41). O e tauivi mo le mamā atoa i ou mafaufauga ma amioga? O e usiusitai i le tulafono o le ola mamā?
O e malamalama ma usiusitai i le Upu o le Poto?