“Savavali i le malamalama o le Atua,” Mo le Malosi o le Autalavou: O Se Taiala i le Faia o Filifiliga (2022)
“Savavali i le malamalama o le Atua,” Mo le Malosi o le Autalavou
Savavali i le malamalama o le Atua
Kalatia 5:25
E sili atu au filifiliga pe a mafai ona e vaai manino i mea. O le mea lena e taua tele ai le malamalama: o le malamalama e faafaigofie ai ona vaai i le ala sao. Ua tuuina mai e le Tama Faalelagi ia te oe le malamalama faalelagi—o le meaalofa o le Agaga Paia—e fesoasoani ia te oe ia iloa manino ai le mea e lelei ma leaga, sao ma sese.
Upumoni e Faavavau
I le papatisoga e te ulu atu ai i se sootaga fiafia o le feagaiga ma le Tama Faalelagi ma Iesu Keriso. I totonu o le malumalu, o le a e osia ai ni feagaiga faaopoopo e mafai ona faamalosia ai lena sootaga. O vaiaso taitasi i le taimi o le faamanatuga, e te faafouina ai au feagaiga. E te faailoa atu lou naunautaiga e tausi poloaiga, ma e faamanuiaina oe e le Alii i le avanoa e maua ai le Agaga Paia e avea ma au soa tumau. O se tasi lea o Ana meaalofa silisili ia te oe.
O le faia o filifiliga lelei e faaleleia ai lou tomai e lagona ai le Agaga. E tele mea lelei ma atoatoa i lenei lalolagi. E pei lava ona aafia lou tino i mea e te ai ma inu, e matua aafia lou mafaufau ma lou agaga i mea e te faitauina, matamata, ma faalogo i ai.
Valaaulia
Faaavanoa se taimi mo le Alii i aso uma. Aoao e uiga ia te Ia. Manatua pea o Ia. Tatalo atu i lou Tama Faalelagi. Suesue i tusitusiga paia ma upu a perofeta soifua. Ona taumafai lea e ola i mea ua e aoaoina.
Saili mea e siitia ai, musuia, ma valaaulia ai le Agaga. A o e faia filifiliga e uiga i mea e matamata ai, faitau, faalogo i ai, pe auai ai, mafaufau pe o a ni ou lagona. Pe o valaaulia ai ni mafaufauga lelei? Aloese mai soo se mea e tauemu i mea paia po o mea e le mama. Aua e te auai i soo se mea e faanenefu ai lau faamasinoga po o le nofouta i le Agaga, e pei o le faasaua, ava malosi, ma fualaau faasaina. Ia maua le lototele e tape ai se vitio po o se taaloga, savali ese mai se tifaga po o se siva, sui lau musika, pe liliu ese mai soo se mea e le ogatusa ma le Agaga.
Faaaoga ala o faasalalauga faaagafesootai e siitia ai. O ala o faasalalauga faaagafesootai e mafai ona avea ma se meafaigaluega mamana o fesootaiga. Afai e te faaaogaina, taulai atu i le malamalama, faatuatua, ma le upumoni. Aua le faatusatusaina lou olaga i mea e foliga mai o loo feagai ma isi tagata. Manatua o lou taua e sau mai le avea ma se atalii/afafine o ni matua faalelagi, ae le mai ala o faasalalauga faaagafesootai.
Saili ni aafiaga lelei ma ni sootaga moni ma tumau. Ia faaeteete o lou faaaogaina o tekinolosi ma ala o faasalalauga e le suia ai le faaaluina o le taimi ma aiga ma uo. O ala o faasalalauga faaagafesootai ma isi tekinolosi e mafai ona faaalu ai le tele o lou taimi e aunoa ma le tuuina mai ia te oe o le tele o le taua. Fai se malologa mai le lalolagi faatekinolosi, ma fesootai ma tagata i le olaga moni.
Faamanuiaga folafolaina
E mafai ona faatasi le Agaga ma oe i taimi uma. O le a molimau atu le Agaga Paia ia te oe e uiga i le Tama Faalelagi ma Iesu Keriso. O le a Ia faamafanafana, taiala, lapatai, ma faapaiaina oe. O le a Ia fesoasoani ia te oe ia iloa le upumoni ma vaai i le lelei i le lalolagi.
Fesili ma tali
E mafai faapefea ona ou iloa pe o ou lagonaina le Agaga Paia? O le aoao ia nofouta i le Agaga e alu ai le taimi, faataitai, ma le onosai. E talanoa o Ia i tagata eseese i auala eseese. Aua e te le amanaiaina ni mea faigofie—o lagona toafilemu e te lagonaina i le molimau a se tasi po o lagona le mautonu e te oo i ai pe a uma ona faia se filifiliga sese. Suesue i tusitusiga paia mo auala eseese e fesootai mai ai le Agaga, tatalo e uiga i ai, ma saili pea mo avanoa e lagona ai le Agaga.
O le a le ponokalafi? Aisea e tatau ai ona ou aloese mai ai? O ponokalafi o se faailoaga, i ata po o upu, ua mamanuina e faaosofia ai lagona feusuai. O ponokalafi e oo mai i le tele o ituaiga, e aofia ai vitio, ata, tusi, ma musika. E mafai foi ona avea ma savali po o ata e auina atu i le va o uo. O ponokalafi e taulimaina mea e paia—o o tatou tino faaletino ma lagona feusuai—ma le le faaaloalo. E mafai ona e tau atu i ponokalafi e aunoa ma se mafaufau i ai. Pe e te tau atu i ponokalafi ma le loto i ai pe leai, ia vave ona liliu ese. Atonu foi e te manao e talanoa i se matua po o se isi tagata matua faatuatuaina. O le matamata ma le loto i ai i ponokalafi o se agasala ma e faamanualia ai lou tomai e lagona ai le Agaga. E faavaivaia ai lou loto pulea ma faafefiloi ai le ala e te vaai ai ia te oe lava ia ma isi. Ua ia Iesu Keriso le mana e fesoasoani ai ia te oe e tetee atu i ponokalafi ma salamo. Liliu atu ia te Ia; liliu ese mai le pogisa. E mafai e lou epikopo ona fesoasoani ia te oe ia maua le malosi ma le faamagaloga e ala i le Faaola.
Tagai Amosa 5:14 (saili le lelei); Kalatia 5:22–23 (o fua o le Agaga); Moronae 7:18–19 (o le malamalama o Keriso); Mataupu Faavae ma Feagaiga 6:23 (e fetalai mai le Alii i le filemu); 20:77, 79 (o tatalo o le faamanatuga).
Fesili o le faatalanoaga o pepa faataga o le malumalu
Ua fetalai mai le Alii o mea uma e ao ona “faia i le mamā” i Ona luma (Mataupu Faavae ma Feagaiga 42:41). O e tauivi mo le mamā atoa i ou mafaufauga ma amioga? O e usiusitai i le tulafono o le ola mamā?
O e tauivi ia tausia le paia o le aso Sapati, i le aiga ma i le lotu; auai i au sauniga; saunia ma agavaa e taumafa i le faamanatuga; ma soifua i lou olaga ia ogatusa ma tulafono ma poloaiga o le talalelei?