“2 Nīfai 32:1–7: ‘Kuo Pau Ke Mou Vivili Atu Ki Muʻa,’” Tohi ʻa Molomoná – Tohi Lēsoni ʻa e Faiakó (2024)
“2 Nīfai 32:1–7,” Tohi ʻa Molomoná – Tohi Lēsoni ʻa e Faiakó
2 Nīfai 32:1–7
“Keinanga ʻi he Ngaahi folofola ʻa Kalaisí”
Fakakaukau ki ha kātoanga fakafiefia ʻoku lahi ai ha meʻatokoni ifo. ʻOkú ke pehē ko e hā hono lahi hoʻo fiefia ʻi he faʻahinga kātoanga kai peheé? Hili hono akoʻi ʻe Nīfai hono kakaí fekauʻaki mo e muimui kia Sīsū Kalaisi ʻi he hala ʻo e fuakavá, naʻá ne ongoʻi ne nau kei taʻepauʻia pē he meʻa ke fai hili ʻa e papitaisó. Naʻá ne tali ʻaki ʻene poupouʻi hono kakaí ke nau “keinanga ʻi he ngaahi folofola ʻa Kalaisí” pea fakapapauʻi ange ʻe tataki kinautolu ʻe he ngaahi folofola ʻa e Fakamoʻuí ke nau laka ki muʻa (2 Nīfai 32:3). ʻOku fakataumuʻa ʻa e lēsoni ko ʻení ke tokoniʻi koe ke ke keinanga ʻi he ngaahi folofola ʻa Sīsū Kalaisí.
Ko e Aʻusia ʻa e Tokotaha Akó. ʻI heʻetau fakakakato e Kaveinga ʻo e Seminelí mo e ʻInisititiutí, ʻoku tau taumuʻa ai ke tokoniʻi e tokotaha ako takitaha ke ne aʻusia ʻa e uluí, fakamahuʻingaʻí mo e ongoʻi ʻokú ne kau maí. Kumi ha ngaahi founga ke tokoniʻi ai e kau akó ke nau ului kia Sīsū Kalaisi, fakafehokotaki e meʻa ʻoku nau akó ki honau ngaahi tūkunga fakatāutahá, pea ongoʻi malu mo poupoua kinautolu ʻi heʻenau akó.
Teuteu ʻa e tokotaha akó: Fakaafeʻi e kau akó ke fakafehoanaki ʻenau ako folofola fakatāutahá ki he maʻu meʻatokoní pea poupouʻi kinautolu ke nau omi mateuteu ke vahevahe ʻenau ngaahi fakakaukaú lolotonga e kalasí.
Ngaahi ʻEkitivitī Ako ʻOku Ala Fakahokó
Taimi kai!
Ke kamata e kalasí, ʻoua ʻe fakaʻaliʻali e ʻū fakatātā ʻi laló, ka ke fakakaukau ke fakaafeʻi ha ongo tamaiki ako ke na fakatātaaʻi ʻeni kae mateʻi ʻe he toenga ʻo e kalasí ʻa e meʻa ʻoku fakatātaaʻí: kai ha kiʻi kai maʻamaʻa, maʻu ha meʻatokoni, mo e keinanga ʻi ha kātoanga kai pe fakafiefia.
Vakai ki he ʻū fakatātā ko ʻení pea fakakaukau ki he ngaahi meʻa ʻoku faitatau mo faikehekehe ai ʻa e maʻu ha kiʻi kai maʻamaʻá, maʻu ha meʻatokoní, pe keinanga lolotonga ha meʻa makehe ʻoku hokó.
-
Ko e hā ha ngaahi faitatau mo ha ngaahi faikehekehe naʻá ke fakakaukau ki ai?
-
Kapau te tau fakafehoanaki hono ako e folofola ʻa Kalaisí ki he ngaahi founga ko ʻeni ʻe tolu ʻo e kaí, ko e hā ʻe ala fakafofongaʻi ʻe he founga takitaha?
ʻOku finangalo ʻa e Tamai Hēvaní mo Sīsū Kalaisi ke tāpuekina koe ʻaki ha tataki, fakahinohino, tokoni, mo ha fakafiemālie. Fakakaukau ki he taimi fakamuimuitaha naʻá ke ako ai e folofola ʻa e Fakamoʻuí. Te ke fakamatalaʻi nai e aʻusia ko iá ko ha kiʻi kai maʻamaʻa, maʻu meʻatokoni, pe keinanga? Fēfē nai e uike pe māhina kuo ʻosí? ʻI he hoko atu hoʻo akó, fekumi ki he tokoni ʻa e Laumālie Māʻoniʻoní ke ke ʻiloʻi e founga kuo hoko ai hono ako e folofola ʻa Kalaisí ko ha tāpuaki ʻi hoʻo moʻuí. Fekumi foki ki ha ueʻi fakalaumālie ke tokoni atu ke ke ʻiloʻi e founga ke fakaleleiʻi ai hoʻo feinga ke keinanga ʻi he ngaahi folofola ʻa Kalaisí.
Ko e ngaahi folofola ʻa Sīsū Kalaisí
Manatuʻi ne akoʻi ʻe Nīfai hono kakaí kau ki he “hala fāsiʻi mo lausiʻi ʻa ia ʻoku fakatau ki he moʻui taʻengatá” pea mo e ngaahi meʻa ʻoku fiemaʻu ke kamata ʻaki e fononga ko iá (vakai, 2 Nīfai 31:17–18). Naʻe ʻiloʻi ʻe Nīfai naʻe fifili hono kakaí pe ko e hā e meʻa te nau fai ʻi he hili hono maʻu e ouau ʻo e papitaisó mo e founga ke hokohoko atu ai ʻi he hala ʻo e fuakavá.
Lau ʻa e 2 Nīfai 32:1–3, ʻo kumi e faleʻi ʻa Nīfai kau ki hono ako ʻo e ngaahi folofola ʻa Kalaisí. ʻI hoʻo fai iá, fakakaukau ki he ngaahi meʻa ʻokú ke hohaʻa ki aí, ngaahi fehuʻí, mo e ngaahi fiemaʻú pea mo e founga ʻe lava ke ʻaonga ai kiate koe e ngaahi akonaki ʻa Nīfaí. Mahalo ʻe tokoni ke ʻiloʻi ʻoku ʻuhinga ʻa e kupuʻi lea “lea ʻaki ʻa e lea ʻa e kau ʻāngeló” (2 Nīfai 32:2) “[ke] … lea ʻi he mālohi ʻo e Laumālie Māʻoniʻoní” (Boyd K. Packer, “The Gift of the Holy Ghost: What Every Member Should Know,” Ensign, Aug. 2006, 50).
Ko e 2 Nīfai 32:3 ko ha potufolofola fakataukei tokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
-
Ko e hā e meʻa naʻá ke ʻiló?
ʻI hono vahevahe ʻe he kau akó ʻa e meʻa ne nau maʻú, fakafanongo fakalelei pea hiki ʻi he palakipoé ha faʻahinga tefitoʻi moʻoni pē ʻoku nau vahevahe.
Ko e moʻoni ʻe taha mahalo naʻá ke maʻu mei he 2 Nīfai 32:3 ko e taimi ʻoku tau keinanga ai ʻi he folofola ʻa Sīsū Kalaisí, te nau fakahā mai ʻa e ngaahi meʻa kotoa ʻoku totonu ke tau faí. Fakakaukau ke fakaʻilongaʻi e foʻi moʻoni ko ʻení ʻi hoʻo folofolá.
-
Ko e fē feituʻu te tau lava ʻo maʻu ai e ngaahi folofola ʻa Kalaisí?
-
ʻOkú ke pehē ko e hā hono ʻuhinga naʻe fakaʻaongaʻi ai ʻe Nīfai ʻa e foʻi lea “keinangá” ʻi hono fakamatalaʻi e founga ʻoku totonu ke tau ako ai e folofola ʻa e Fakamoʻuí (2 Nīfai 32:3)?
Lau e fakamatala ko ʻeni naʻe fai ʻe ʻEletā Takasi Uata ʻo e Kau Fitungofulú. Kapau ʻoku maʻu, fakakaukau ke ke sio ʻi he pōpoaki ʻa ʻEletā Uatá ʻi he ChurchofJesusChrist.org ” mei he taimi 0:53 ki he 1:42.
ʻI heʻeku kei talavoú, ne u fakakaukau ko e keinangá ko ha maʻu meʻatokoni lahi mei he laisé, susi mo e soiá. ʻOku ou ʻiloʻi he taimí ni ko e keinangá ʻoku ope atu ia ʻi ha maʻu meʻatokoni lelei. Ko ha ongo ia ʻo e fiefia, maʻu meʻatokoni, kātoangaʻi, fevahevaheʻaki, fakahaaʻi ʻo e ʻofa ki he fāmilí mo e ngaahi ʻofaʻangá, fakahaaʻi ʻetau houngaʻia ki he ʻOtuá, pea fokotuʻu ha vā fetuʻutaki mo fiefia ʻi ha meʻatokoni lahi mo ifo ʻaupito. ʻOku ou tui ko e taimi ko ia ʻoku tau keinanga ai he folofola ʻa Kalaisí, ʻoku totonu ke tau fakakaukau ki ha aʻusia tatau. ʻOku ʻikai ko e keinanga ʻi he folofolá ʻa hono laú pē. ʻOku totonu ke ne ʻomi kiate kitautolu ha fiefia moʻoni mo fakatupulaki hotau vā fetuʻutaki mo e Fakamoʻuí. (Takashi Wada, “Keinanga ʻi he Folofola ʻa Kalaisí,” Ensign pe Liahona, Mē 2019, 38–39)
-
Ko e hā naʻe makehe kiate koe mei he fakamatala ʻa ʻEletā Uatá?
Fakakaukau ke fakaʻaongaʻi ha niʻihi pe ko e kotoa ʻo e ngaahi fehuʻi ko ʻení ke tokoniʻi e kau akó ke ʻanalaiso e moʻoni kuo fakaʻilongaʻi atú.
Fakaafeʻi ha kau ako ʻe niʻihi ke nau tali pea fakakaukau ke hiki ʻenau talí ʻi he palakipoé. Kapau ʻe fiemaʻu, fakamanatu ange e ngaahi meʻa ko ʻení:
-
Ko e hā ʻokú ne tokoniʻi koe, pe te ne lava ʻo tokoniʻi koe, ke ke keinanga ʻi he folofola ʻa Kalaisí kae ʻikai ko hano lau pē ia?
-
ʻI hoʻo manatuʻi e meʻa ʻokú ke ʻilo fekauʻaki mo Sīsū Kalaisí, ko e hā ka ʻomi ai ʻe Heʻene folofolá ha ngaahi ongo ʻo e fiefiá, mālohí, mo e ʻofá?
-
ʻE ʻomi fēfē ʻe he keinanga ʻi he folofola ʻa e Fakamoʻuí ha fakahinohino ki hoʻo moʻuí pea tala atu e meʻa ʻoku totonu ke ke faí?
ChurchofJesusChrist.org
ʻE lava hoʻo fakakaukau ki hoʻo ngaahi aʻusiá ʻo tokoniʻi koe ke ke keinanga ʻi he folofola ʻa Kalaisí.
ʻOku lahi ha ngaahi founga ako ke fakatupulaki ʻaki e keinanga ʻi he folofola ʻa Kalaisí ʻa ia ʻe ala tokoni, kau ai e lotua ha ueʻi fakalaumālie kimuʻa peá ke akó, fai ha ngaahi fehuʻi kimuʻa pea mo e lolotonga e akó, fakaʻuhingaʻi e ngaahi leá, fakalaulaulotó, fakafekauʻaki [e folofolá], hiki ha fakamatalá, fekumi ki he ngaahi moʻoni fekauʻaki mo e Tamai Hēvaní pea mo e Fakamoʻuí, pea mo hono fakatatau e folofolá ki heʻetau moʻuí (Vakai, 1 Nīfai 19:23).
-
Ko e hā ha ngaahi ongo fakalūkufua pe fakahinohino pau kuó ke maʻu lolotonga hoʻo keinanga ʻi he ngaahi folofola ʻa Kalaisí?
Ko e Keinanga ʻi he Ngaahi Folofola ʻa Kalaisí
Tuku ha taimi feʻunga maʻá e kau akó ki he ʻekitivitī ko ʻení. Tuku ki he kau akó ke nau vakai ki he ngaahi fakakaukau ʻi he palakipoé ki ha ngaahi founga ako te nau lava ʻo ʻahiʻahiʻi ʻi heʻenau fakakakato ʻa e ʻekitivitī keinangá.
Fakaʻaongaʻi e meʻa kuó ke ako he ʻaho ní, toʻo ha ngaahi miniti siʻi ke akoako keinanga ai ʻi he ngaahi folofola ʻa Kalaisí. ʻE lava ke kau heni hono ako ʻo e folofolá pe ngaahi lea ʻa e kau palōfitá. Feinga ke fakahoko ha taha pe lahi ange ʻo e ngaahi meʻá ni lolotonga hoʻo keinangá:
-
Fakamālohia Ho Vā Fetuʻutaki mo e Tamai Hēvaní mo Sīsū Kalaisí
-
ʻOfa mo falala lahi ange kiate Kinaua.
-
Kumi ha ngaahi moʻoni ʻokú ne ʻomi kiate koe ʻa e fiefiá mo e mālohí.
-
Maʻu ha fakahinohino ki he meʻa ʻoku totonu ke ke fai ʻi hoʻo moʻuí.
Lekooti ha niʻihi ʻo e ngaahi meʻa naʻá ke ako, ongoʻi, mo aʻusia lolotonga hoʻo keinanga ʻi he folofola ʻa Kalaisí.
ʻI he ngaahi miniti fakaʻosi ʻo e kalasí, fakaafeʻi ha kau ako ʻe niʻihi ke vahevahe fekauʻaki mo ʻenau ngaahi aʻusia ʻi he keinanga ʻi he folofola ʻa Kalaisí. Poupouʻi kinautolu ke vahevahe e ngaahi moʻoni, ongo pe fakahinohino ne nau maʻú, ʻo ka feʻunga ke fai pehē. ʻE lava ke hoko e fanongo mei honau toʻú ko ha aʻusia mālohi maʻá e kau akó.
Fakakaukau ke vahevahe hoʻo ngaahi aʻusiá mo fai hoʻo fakamoʻoni ki he ngaahi tāpuaki ʻoku tau maʻu ʻi heʻetau keinanga ʻi he folofola ʻa Kalaisí.