Seminelí
2 Nīfai 31:14–21: “Kuo Pau Ke Mou Vivili Atu Ki Muʻa”


“2 Nīfai 31:14–21: ‘Kuo Pau Ke Mou Vivili Atu Ki Muʻa,’” Tohi ʻa Molomoná – Tohi Lēsoni ʻa e Faiakó (2024)

“2 Nīfai 31:14–21,” Tohi ʻa Molomoná – Tohi Lēsoni ʻa e Faiakó

2 Nīfai 31:14–21

“Kuo Pau Ke Mou Vivili Atu Ki Muʻa”

ʻĪmisi
toʻu tupu ʻoku lue lalo

Taimi ʻe niʻihi ʻe ngali faingataʻa e fononga ki he moʻui taʻengatá. Kuo teʻeki tuku ʻe heʻetau Tamai Hēvaní mo Hono ʻAlo ko Sīsū Kalaisí, ke tau fononga toko taha pē ʻi he fonongaʻanga ko ʻení; ʻOkú Na finangalo ke tokoniʻi kitautolu ʻi heʻetau fonongá. ʻE lava ke tokoniʻi koe ʻe he lēsoni ko ʻení ke fakatupulaki hoʻo holi ke vivili atu ki muʻa mo kātaki ki he ngataʻangá koeʻuhí ke ʻi ai ha ʻaho te ke aʻusia ai ho ikuʻanga taupotu tahá: ʻa e moʻui taʻengata mo hoʻo Tamai Hēvaní.

Vakai ki he kau akó ʻo hangē ko e ʻafio mai ʻa e ʻEikí kiate kinautolú. ʻI he taimi ʻoku feinga ai e kau faiakó ke ʻofa ʻo hangē ko e ʻofa ʻa e Fakamoʻuí, ʻoku kamata leva ke nau vakai ki he niʻihi kehé ʻo hangē ko ʻEne ʻafio mai kiate kinautolú. ʻOku ueʻi ʻe he ʻofa faka-Kalaisí ʻa e kau faiakó ke nau vilitaki ʻi hono tokoniʻi e tokotaha ako takitaha ke ului moʻoní. ʻE lava ke tokoniʻi koe ʻe he Laumālie Māʻoniʻoní ke ke ʻiloʻi ʻa e mahuʻinga fakalangi ʻo e tokotaha ako kotoa pē pea tokoniʻi kinautolu ke nau aʻusia honau ivi malavá.

Teuteu ʻa e tokotaha akó: Fakaafeʻi e kau akó ke omi mateuteu ki he kalasí ke vahevahe e founga te nau ala tokoniʻi ai ha taha ʻoku fāifeinga ke vilitaki ke kei laka maʻu ai pē ki muʻa ʻi he māʻoniʻoní ʻi heʻenau fonongaʻanga ke foki ki he Tamai Hēvaní.

Ngaahi ʻEkitivitī Ako ʻOku Ala Fakahokó

Ko ʻetau fononga mamaʻó

Fakakaukau ke fakaʻaliʻali ha fakatātā ʻo ha tokotaha lele pe ko ha lova, hangē ko ia ʻi he kamataʻanga ʻo e lēsoni ko ʻení. ʻEke ange pe kuo ʻi ai ha taha ʻi he kau akó kuo lele ʻi ha lova mamaʻo pea ʻai ke nau fakamatalaʻi e meʻa ne nau aʻusiá.

Kapau ʻe ʻaonga, liliu ʻa e sīpinga ko ʻení ki ha toe ʻekitivitī kehe ʻa ia ʻe ala fiemaʻu ai ha kātaki fuoloa ʻa ia ʻe felāveʻi mo hoʻo kau akó.

  • ʻI ha lova mamaʻo, ko e hā ha ngaahi meʻa te ne ala fakatupu ha tokotaha lele ke loto-foʻí?

  • Ko e hā ha meʻa te ne poupouʻi ha tokotaha lele ke fakaʻosi ʻa e lová ʻi he taimi ʻoku faingataʻa aí?

  ChurchofJesusChrist.org   

Fakafehoanaki hoʻo fononga ke foki ʻo nofo mo e Tamai Hēvaní ki ha lova mamaʻo. Fakalaulauloto ki he ngaahi meʻá ni:

Fakakaukau ke fakaʻaliʻali e ongo fehuʻi ko ʻení pea fakaafeʻi e kau akó ke lekooti ʻenau ngaahi talí ʻi heʻenau tohinoa akó.

  • Ko e hā ʻokú ne fakaʻaiʻai koe, pe te ne lava ʻo fakaʻaiʻai koe, ke vilitaki atu ki muʻa ʻi hoʻo fononga foki ki he Tamai Hēvaní?

  • Ko e hā ha ngaahi faingataʻa ʻokú ke fehangahangai mo ia?

ʻI hoʻo ako e lēsoni ko ʻení, kumi e ngaahi moʻoni pe ngaahi fakakaukau ʻe ala tokoni atu ke ke ikunaʻi ai ho ngaahi faingataʻaʻiá pea feinga ke toe foki ki hoʻo Tamai Hēvaní.

Ko ha fakaafe fakalangi

ʻĪmisi
Ko hono akoʻi ʻe Nīfai ha kulupu

Hili hono akoʻi ʻe Nīfai e papitaisó mo hono maʻu ʻo e Laumālie Māʻoniʻoní, naʻá ne akoʻi ha tafaʻaki mahuʻinga ʻe taha ʻo e tokāteline ʻo Kalaisí ʻo fakaʻaongaʻi ha kupuʻi folofola fakahangatonu mei he Tamai Hēvaní. Lau ʻa e 2 Nīfai 31:15 ʻo kumi e meʻa naʻe akoʻi ʻe he Tamai Hēvaní.

  • ʻOkú ke pehē ko e ʻuhinga ki he hā ke kātaki ki he ngataʻangá?

  • ʻOkú ke pehē ko e hā e faikehekehe ʻi he kātakiʻi peé, mo e kātaki ʻi he muimui ki he sīpinga ʻa e Fakamoʻuí?

Naʻe fakaʻaongaʻi ʻe Nīfai ʻa e fakatātaá ke tokoniʻi kitautolu ke tau sioloto ki heʻetau fononga foki ki he Tamai Hēvaní. Lau ʻa e 2 Nīfai 31:17–20 pea tā ha fakatātā faingofua ʻo e hala naʻe fakamatalaʻi ʻe Nīfaí. Fakahingoa ʻa e meʻa ʻoku fakafofongaʻi ʻe he ngaahi tafaʻaki kehekehe ʻi he halá.

  • Te ke fakamatalaʻi fakanounou fēfē nai ʻa e meʻa naʻá ke akó?

Ko e meʻa ʻe taha ʻoku tau ako mei he ngaahi veesi ko ʻení ko e taimi ʻoku tau muimui ai ki he sīpinga ʻa e Fakamoʻuí pea kātaki ki he ngataʻangá, te tau maʻu ʻa e moʻui taʻengatá mo ʻetau Tamai Hēvaní.

  • Ko e hā ʻokú ke fiemaʻu ai ke maʻu ʻa e moʻui taʻengatá mo hoʻo Tamai Hēvaní?

Vivili atu ki muʻa

Naʻe hiki ʻe Nīfai ʻi he veesi 19–20 ʻa e ngaahi tōʻonga fakakaukau mo e ngaahi ngāue kehekehe naʻe fiemaʻu ke vivili atu ai ki muʻa ʻi he hala ki he moʻui taʻengatá. Toe vakaiʻi e ongo veesi ko ʻení pea lisi ʻi he hala naʻá ke taá ʻa e ngaahi ʻulungaanga mo e ngaahi ngāue naʻá ke maʻú. Kapau ʻokú ke fie sio ʻi ha vitiō ʻokú ne fakatātaaʻi hono ʻomi ʻe Nīfai e ngaahi akonaki ko ʻení, sio ʻi he “ʻOku Fakamatalaʻi ʻe Nīfai ʻa e Tokāteline ʻo Kalaisí,” taimi 2:55 ki he 3:47, ʻoku lava ke maʻu ʻi he ChurchofJesusChrist.org, pea muimui ki ai ʻi hoʻo folofolá.

Fakaʻaongaʻi ha kiʻi taimi ke fakafuofuaʻi ai koe ʻi ha meʻafua 1–5 (1 ʻoku maʻulalo; 5 ʻoku māʻolunga) ki he lahi hoʻo mahino mo hoʻo feinga ke moʻui ʻaki e ngaahi ʻulungaanga mo e ngaahi angafai ko ʻení.

Fili ha taha ʻo e ngaahi kupuʻi lea ʻokú ke fiemaʻu ke mahino pe moʻui ʻaki ke toe lelei angé. Kumi ha potufolofola pe kupuʻi lea ʻe tokoni ke fakalahi hoʻo mahinó. Fakakaukau ke fakaʻaongaʻi ʻa e Fakahinohino ki he Ngaahi Folofolá, polokalama Gospel Library, ngaahi lea konifelenisi lahí, pe ngaahi maʻuʻanga tokoni falalaʻanga kehé.

Fakakaukau ke fakaafeʻi e kau akó ke vahevahe e meʻa ne nau ako mei he ʻekitivitī mo e kalasí, ʻi ha ngaahi kulupu iiki, pe tautau toko ua. Mahalo te ke fakakaukau ke ʻeke ha niʻihi pe kotoa ʻo e ngaahi fehuʻi ko ʻení ke fakatupulaki e mahino mo e holi ʻa e kau akó ke fakaʻaongaʻi e meʻa ne nau akó.

Ko ha founga ʻe taha, te ke lava ʻo fakaʻaliʻali ha niʻihi pe kotoa ʻo e ngaahi fehuʻí pea tuku ke tali ia ʻe he kau akó ʻi heʻenau akó. Fakaafeʻi leva ha niʻihi ʻo e kau akó ke nau vahevahe.

Fakatokangaʻi ange: ʻE nofotaha ange ʻa e lēsoni hokó ʻi he keinanga ʻi he ngaahi folofola ʻa Kalaisí.

  • Ko e hā naʻá ke ako fekauʻaki mo e tōʻonga pe angafai naʻá ke filí?

  • ʻE fēfē nai hano fakahaaʻi ʻe ha taha ʻa e tōʻonga pe angafai naʻá ke filí?

  • Ko e fē nai ha taimi kuó ke ongoʻi ai hono tāpuakiʻi koe pe ko ha taha ʻokú ke ʻiloʻi ʻe he Tamai Hēvaní koeʻuhí ko ha taha ʻo e ngaahi tōʻonga pe angafai ko ʻení?

Ko hoʻo fononga fakafoʻituituí

 

Fakakaukau ki hoʻo moʻuí mo hoʻo fonongaʻanga lolotonga ke foki ki he Tamai Hēvaní. Fakalaulauloto ki he tuʻunga ʻokú ke ʻi ai ʻi he kātaki ki he ngataʻangá.

Fakakaukau ke fakaafeʻi e kau akó ke hiki ʻenau tali ki ha taha ʻo e ngaahi fehuʻi ko ʻení ʻi he fakatātā ne nau taá pe ʻi he tafaʻakí. ʻE lava leva ke nau ʻalu mo ia ki ʻapi ʻo tuku ia ʻi ha feituʻu te nau lava ʻo toe sio ki ai.

  • Ko e hā kuó ke ako he ʻahó ni ʻokú ne tokoniʻi koe ke ke vivili atu ki muʻa ki he Tamai Hēvaní?

  • Te ke fie fakaʻaongaʻi fēfē nai ʻa e meʻa naʻá ke ako he ʻaho ní? (Mahalo ko ha sīpinga ʻe taha ko e lelei ange hoʻo moʻui ʻaki ha taha ʻo e ngaahi kupuʻi lea kuó ke akó.)

Lau e lea ko ʻeni meia ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻo fakalaulauloto ki he meʻa naʻá ke tohí. Mahalo te ke fakakaukau ke mamataʻi ha konga mei heʻene lea “ʻE Fai ʻe [he ʻEikí] ha Ngaahi Mana ʻIate Kimoutolu ʻApongipongí na” mei he taimi 15:12 ki he 16:20, ʻoku maʻu ʻi he ChurchofJesusChrist.org.

Kapau te tau momoi hotau lotó ki he ʻOtuá, kapau te tau ʻofa ki he ʻEiki ko Sīsū Kalaisí, kapau te tau fai hotau lelei tahá ke moʻui ʻaki e ongoongoleleí, pea tā ʻe hoko ʻa e ʻapongipongí mo e ʻaho kotoa ko ha ngaahi ʻaho fakaʻofoʻofa, neongo he ʻikai ke tau fakatokangaʻi maʻu pē ʻoku pehē. Ko e hā hono ʻuhingá? Koeʻuhí he ko e finangalo ia ʻo ʻetau Tamai Hēvaní! ʻOkú [Ne] finangalo ke tāpuakiʻi kitautolu. Ko e tefitoʻi kaveinga ʻo ʻEne palani ʻaloʻofa ki Heʻene fānaú ko ha pale ʻoku lahi mo e moʻui taʻengatá! Ko ha palani ia ʻoku makatuʻunga ʻi he foʻi moʻoni “ʻoku fengāueʻaki fakataha ʻa e ngaahi meʻa kotoa pē ke lelei ai ʻa kinautolu ʻoku ʻofa ki he ʻOtuá.” Ko ia, ʻofa pē. Feinga pē. Falala pē. Tui pē. Hoko atu pē hoʻo tupulakí. ʻOku poupouʻi kimoutolu mei he langí he ʻahó ni, ʻapongipongi pea taʻengata. (Jeffrey R. Holland, “ʻE Fai ʻe he ʻEikí] ha Ngaahi Mana ʻIate Kimoutolu ʻApongipongí na,” Ensign pe Liahona, Mē 2016, 127)

Fakakaukau ke vahevahe hoʻo fakamoʻoní. Te ke lava foki ʻo fakaafeʻi e fānaú ke vahevahe ʻenau ngaahi fakamoʻoní pe fakakaukaú.