2 Nephi 17–19

Ang mga Titulo ug mga Tahas ni Jesukristo

Jesukristo

Ngano nga ang Manluluwas nga si Jesukristo ang tawo nga imong masaligan? Niini nga mga kapitulo, gidasig sa Ginoo ang duha ka hari kinsa gihulga sa kusgan nga kasundalohan nga mosalig Kaniya. Si Isaias dayon nanagna sa Manluluwas nga si Jesukristo, naglista sa pipila sa Iyang mga titulo ug mga hiyas. Kini nga leksiyon gituyo aron sa pagtabang kanimo sa pagsalig ni Jesukristo pinaagi sa pagtuon ug pagsabot sa Iyang mga hiyas ug mga titulo.

Pagpamalandong sa mga titulo ni Jesukristo. Ang mga kasulatan naglangkob og kapin sa usa ka gatos ka lain-laing mga ngalan ug mga titulo nga nagpaila ug naghulagway ni Jesukristo. Samtang ang mga estudyante makaila sa lain-laing mga tahas ug mga titulo sa Manluluwas, dapita sila sa pagpamalandong kon sa unsang paagi Iyang gituman kadtong mga titulo sa ilang kaugalingong mga kinabuhi ug sa mga kinabuhi niadtong nagpalibot kanila.

Pagpangandam sa estudyante: Sa ilang inadlaw nga pagtuon sa kasulatan, dapita ang mga estudyante sa pag-ila sa bisan unsang mga titulo sa Manluluwas ug sa pagpamalandong kon unsa kahay gipasabot niadto nga mga titulo ug sa unsang paagi kini makatabang nila nga mosalig ug mas mahigugma sa Manluluwas.

Mga Posibleng Kalihokan sa Pagkat-on

Unsay atong makat-onan gikan sa mga titulo?

Ikonsiderar ang pagsulat sa mosunod nga mga titulo diha sa pisara ug ipangutana ang mga pangutana sa ubos.

Hunahunaa nga wala pa nimo nakaila ang mosunod nga upat ka mga tawo, apan nahibaloan nimo ang ilang mga titulo:

• Doktor

• Opisyal sa Pulisya

• Obispo

• Presidente sa Young Women

• Kinsa niining mga tawhana ang imong adtoon aron mangayo og tabang kon adunay nagsulay sa pagpanulis kanimo? Kon ikaw adunay usa ka lisod nga isyu sa kahimsog? Alang sa espirituhanong tambag?

• Sa unsa pa nga mga sitwasyon nga kini nga mga tawo mahimong talagsaon nga kuwalipikado sa pagtabang?

• Sa unsang paagi nga ang pagkahibalo sa ilang mga titulo makatabang nimo nga masabtan kon unsa ang angayan nilang matabang?

Paggahin og panahon sa pagpamalandong sa bisan unsang mga sitwasyon o mga hagit nga tingale imong giatubang nga nagtinguha ka og tabang.

Ikonsiderar ang pagbahin sa pisara nga adunay linya sa tunga ug dapita ang mga estudyante sa paglista sa pikas nga katunga sa lisod nga mga sitwasyon nga mahimong atubangon sa usa ka tin-edyer. Imohang sulatan ang pikas katunga sa pisara unya sa leksiyon.

Si Jesukristo adunay daghang mga tahas ug mga titulo. Ang matag usa kanila nagtudlo kanato og usa ka butang nga importante mahitungod Kaniya ug sa Iyang abilidad sa pagtabang kanato. Samtang magtuon ka karon, pangitaa ang Iyang mga titulo ug tahas ug pagpamalandong kon sa unsang paagi Siya mahimong talagsaon nga kwalipikado sa pagtabang kanimo.

Ang pulong sa Ginoo ngadto sa duha ka hari sa Juda

Samtang imong ipasabot ang mosunod nga impormasyon, ikonsiderar ang pagdapit sa mga estudyante nga morepresentar ni Hari Achaz sa Juda, Hari Resin sa Siria, Hari Peka sa Israel, Hari Ezequias sa Juda, ug ang hari sa Asiria diha sa atubangan sa lawak klasehanan. Mahimo kang mag-andam og mga name tag alang sa matag usa.Tingali dapita ang mga estudyante nga nagrepresentar ni Hari Achaz ug ni Hari Ezequias sa pagbasa sa ilang katugbang nga mga bersikulo sa ubos.

Sa panahon ni Isaias, si Hari Achaz sa Juda ug pagkahuman ang iyang anak nga lalaki, si Hari Ezequias, parehong nag-atubang og lisod kaayo nga mga sitwasyon: ang gamhanang mga nasod mihulga sa pag-atake kanila. Sa duha ka mga kaso, ang Ginoo miawhag sa mga hari ug sa ilang mga katawhan sa pagsalig diha Kaniya kay sa makig-alyansa sa ubang mga nasod. Basaha ang mosunod nga mga bersikulo, nga mangita sa mga pulong nga nagpakita nga ang Ginoo nagdapit kanila sa pagsalig Kaniya.

• 2 Nephi 17:3–7. Si Hari Achaz gihulga ni Hari Resin sa Siria ug ni Hari Peka sa Israel, kinsa nagplano sa pag-atake ug pagbutang og bag-ong hari sa trono.

• 2 Nephi 18:11–13, 17. Si Hari Ezechias gisulong sa mga Asirianhon ug nahibalo nga ang iyang kasundalohan dili paigo ang kusog sa pagpahunong kanila. (Ang pulong nga panag-abin nagpasabot sa paghimo og alyansa sa ubang mga nasod aron sa pagpanalipod sa ilang kaugalingon.)

• Unsay imong nakit-an?

• Ngano kaha nga lisod alang sa usa ka hari ug sa iyang katawhan ang pagsalig sa Ginoo kay sa makig-alyansa sa laing nasod?

• Unsa ang kinahanglan nilang mahibaloan mahitungod sa Ginoo aron mosalig Kaniya?

Samtang nagpadayon ka sa pagtuon, pamalandong kon unsay ipasabot sa salig sa Ginoo sa piho nga mga hagit nga imong giatubang.

Mga Titulo sa Manluluwas

Sa bersikulo nga imong gitun-an, si Isaias migamit og piho nga titulo ni Jesukristo nga, kon sabton, makatabang niini nga mga hari ug sa ilang katawhan nga mosalig Kaniya. I-rebyo ang 2 Nephi 18:13 ug ikonsiderar ang pagmarka niini nga titulo.

Ikonsiderar ang pagsulat og Si Jesukristo mao … sa blangko nga bahin sa pisara ug hangyoa ang mga estudyante sa pagkompleto sa kapahayag gamit ang titulo nga ilang nakit-an.

Ang pag-ila ug pagsabot sa mga titulo sa Manluluwas makatabang nato nga makaila, mahigugma, ug mas mosalig Kaniya sa atong mga kinabuhi. Aron matabangan ka nga masabtan ang titulo nga “Ginoo sa mga Panon,” pangitaa kon unsa ang gipasabot niini diha sa Giya ngadto sa mga Kasulatan.

• Unsa ang imong nakat-onan mahitungod ni Jesukristo?

• Sa unsang paagi nga kini nga tahas talagsaon nga makapahimo sa Manluluwas sa pagtabang niini nga mga hari ug sa ilang mga katawhan kon hulgaon sa ubang mga kasundalohan?

Mga Panagna ni Isaias

Si Isaias nanagna usab ngadto niini nga mga hari ug sa ilang mga katawhan sa pagkatawo sa Manluluwas ug sa paghari sa milenyo. Basaha ang 2 Nephi 17:14–15; 19:2, 6–7, nga mangita sa unsay gitudlo ni Isaias mahitungod ni Jesukristo, ilabi na sa Iyang mga titulo.

Kon gusto nimong mailhan ang dugang nga mga titulo sa Manluluwas nga narekord sa Basahon ni Mormon, ikonsiderar ang pagbasa sa pipila sa mosunod nga mga bersikulo: 1 Nephi 10:4–6; 12:18; 13:41; 15:14–15; 17:30; 19:12; 2 Nephi 1:10; 2:6, 10; 9:5, 46; 10:3, 14; 15:16. Aduna usab mga titulo ug mga pakisayran sa kasulatan diha sa Giya ngadto sa mga Kasulatan, ubos sa “Jesukristo.”

Dapita ang mga estudyante sa pag-adto sa pisara ug sa pagdugang sa lista sa mga titulo sa Manluluwas.

Pagpili og usa ka titulo sa Manluluwas nga gusto nimong masayran pa. Dayon buhata ang mosunod:

• Ipasabot kon unsa ang kahulugan niini nga titulo kanimo. (Ikonsiderar ang pagpangita sa titulo diha sa Giya ngadto sa mga Kasulatan. Kon ang titulo wala malista, ikonsiderar ang pagtuon sa kinatibuk-ang entry mahitungod ni Jesukristo ug pamalandong kon sa unsang paagi ang titulo nga imong gipili mahimong may kalabotan sa Iyang kinatibuk-ang kinaiya ug misyon. Mahimo usab nga makatabang ang pagpangita sa titulo diha sa usa ka regular nga diksyonaryo.)

• Paghunahuna og istorya o pangita og litrato nga nagpakita sa Manluluwas nga nagbuhat sa tahas nga imong gipili.

• Ipasabot unsa ang gitudlo kanimo sa titulo mahitungod kon kinsa ang Manluluwas, Iyang mga motibo, Iyang gugma, ug Iyang gahom.

• Ipasabot sa unsa nga paagi nga kini nga tahas talagsaon nga makapahimo sa Manluluwas sa pagtabang kanimo sa imong kinabuhi o ngano nga ikaw mahimong mosalig Kaniya. (Kini mahimong maglakip kon sa unsang paagi ang Manluluwas nakatabang na kanimo sa imong kinabuhi.)

Dapita ang pipila ka estudyante sa pagpaambit unsay ilang giandam mahitungod sa usa sa mga titulo. Ang usa ka paagi tingali mao ang paghangyo sa mga estudyante sa pag-adto sa pisara, paglingin sa titulo nga ilang gipili, ug mopaambit sa ilang mga hunahuna atubangan sa klase. Ikonsiderar usab ang pagpaambit sa imong mga hunahuna.

Pagkahuman, dapita ang mga estudyante sa pagtan-aw sa duha ka habig sa pisara ug paghimo og bisan unsang piho nga koneksiyon tali sa mga problema nga ilang giatubang ug sa usa ka titulo sa Manluluwas nga nagpakita sa Iyang abilidad sa pagtabang.

Pagsalig sa Ginoo

Subo lang, si Hari Achaz ug daghan sa mga tawo sa Juda mipili nga dili motuo kang Isaias ug wala mosalig sa Ginoo alang sa proteksiyon. Ang iyang katawhan gisulong, ug daghan ang nadakpan ug naulipon. (Tan-awa sa 2 Kings 16; 2 Chronicles 28.) Si Hari Ezechias, dili sama sa iyang amahan, mipili nga mosalig sa Ginoo ug misunod sa tambag ni Isaias. Isip resulta, gipanalipdan sa Ginoo ang mga tawo sa Jerusalem pinaagi sa pagpadala og anghel aron sa paggun-ob sa misulong nga kasundalohan. (Tan-awa sa 2 Kings 19:15–20, 32–35.)

Pamalandong kon unsa ang imong nakat-onan ug gibati mahitungod ni Jesukristo niini nga leksiyon. Sa imong journal sa pagtuon, isulat kon sa unsang paagi nimo madugangan ang imong pagsalig diha Kaniya. Mahimo nimong ilista ang usa ka piho nga titulo o tahas nga naa Niya ug sa unsang paagi nimo buot nga mas mosalig Kaniya sa kana nga tahas.

Komentaryo ug Background nga Impormasyon

Unsa pa ang atong nahibaloan bahin kang Achaz ug Ezechias ug sa mga kasundalohan nga ilang giatubang?

Sa mga adlaw ni Hari Achaz, ang mga nasod sa Israel, Siria, ug Juda gihulga sa mas kusgan nga Imperyo sa Asiria. Gusto sa mga hari sa Israel ug Siria nga si Hari Achaz sa Juda moapil kanila sa usa ka alyansa batok sa gamhanang imperyo sa Asiria. Sa dihang si Hari Achaz midumili sa pag-apil sa alyansa batok sa Asiria, ang Israel ug Siria misulong sa Juda aron sa pagbutang og laing magmamando sa trono sa Juda nga mosuporta sa alyansa batok sa Asiria (tan-awa sa 2 Nephi 17:1, 6). Imbes nga mosalig sa panalipod sa Ginoo, gitulis ni Achaz ang tipiganan sa templo sa Jerusalem ug gitanyag kadto nga mga kabtangan ngadto sa Asiriahanon sa pagsulay sa pagpalit sa ilang panalipod ug pabor. Apan, gisulong gihapon sa mga Asiriahanon ang Juda (Tan-awa sa 2 Kings 16:8; 2 Cronicas 28:21).

Sa mga adlaw ni Hari Ezechias—ang anak nga lalaki ni Achaz—si Isaias mitandi sa kasundalohan sa Asiria ngadto sa usa ka suba nga simbolikong mobaha sa yuta sa Juda ug “mosanap gani hangtod sa liog”—nagpasabot sa mga paril sa Jerusalem (2 Nephi 18:8). Kini nga panagna natuman sa dihang 185,000 ka mga Asiriahanon nga mga sundalo ang miabot aron mosulong sa Jerusalem, nga mihunong diha sa mga paril sa siyudad. Si Hari Ezechias, dili sama sa iyang amahan, si Achaz, mipili nga mosalig sa Ginoo ug misunod sa tambag ni Isaias. Isip resulta, gipanalipdan sa Ginoo ang mga tawo sa Jerusalem pinaagi sa pagpadala og anghel aron sa paggun-ob sa misulong nga kasundalohan (Tan-awa sa 2 Kings 19:32–35).

Unsa ang gipasabot sa mga titulo sa Manluluwas diha sa 2 Nephi 19:6?

Si Elder Jeffery R. Holland sa Korum sa Napulog Duha ka Apostoles mipasabot:

Elder Jeffery R. Holland

Ang kamatuoran nga ang panggamhanan sa kataposan maanaa sa mga abaga ni [Jesukristo] nga nagpamatuod kon unsay ilhon sa kalibotan sa umaabot nga adlaw—nga siya Ginoo sa mga ginoo ug Hari sa mga hari ug sa umaabot nga adlaw personal nga maghari sa yuta ug sa iyang Simbahan. …

Isip “Katingalahang Magtatambag,” siya ang atong tigpataliwala, atong tigpangamuyo, nga manalipod sa atong kawsa diha sa hukmanan sa langit. …

Ang “Makagagahom nga Dios” nagpasabot og butang bahin sa gahom sa Dios, sa iyang kalig-on, pagkagamhanan sa tanan, ug dili masakop nga impluwensya. …

Ang “Walay Kataposan nga Amahan” naghatag og gibug-aton sa sukaranang doktrina nga si Kristo usa ka Amahan—Tiglalang sa mga kalibotan nga dili maihap, ang Amahan sa gipahiuli nga pisikal nga kinabuhi pinaagi sa Pagkabanhaw, ang Amahan sa kinabuhing dayon alang sa espirituhanong mga anak nga lalaki ug mga anak nga babaye, ug ang Usa nga naglihok alang sa Amahan (Elohim) pinaagi sa balaanong pagtugyan sa awtoridad. (Jeffrey R. Holland, Christ and the New Covenant [1997], 80–81)

Dugang nga mga Kalihokan sa Pagkat-on

Usa ka alternatibong paagi sa pagsugod sa leksiyon

Dapita ang mga estudyante sa pagsulat sa mga ngalan sa duha ka tawo sa klase nga ilang gidayeg pag-ayo ug ngano sa lain nga mga piraso sa papel. Dayon pundoka ang mga piraso sa papel ug basaha kini ngadto sa klase. Mahimong maalamon ang pagseguro nga ang matag usa sa klase mahatagan og gibug-aton pinaagi sa pag-assign sa mga estudyante sa pagsulat unsa ang ilang gidayeg mahitungod sa tawo nga naglingkod sa ilang wala, ingon man usab sa pagpili og laing usa pa ka tawo. Mahimo ka usab nga magsulat og daghang mga mubo nga sulat sa imong kaugalingon. Dayon hangyoa ang klase sa pagpamalandong kon unsa nga mga kinaiya sa Manluluwas ang ilang naila ug gidayeg, ug sa unsang paagi kana nakaapekto kanila. Dapita sila sa pagpangita og dugang nga mga kinaiya sa Manluluwas samtang magtuon sila niini nga leksiyon.

Pagkahimong sama ni Jesukristo

Human matun-an sa mga estudyante ang mga titulo ug tahas sa Manluluwas, mahimong mapuslanon usab ang pagdapit sa mga estudyante sa pagsusi pag-ayo sa usa o duha ug pagpamalandong kon aduna bay angay nga paagi nga sila maningkamot nga mahimong mas sama sa Manluluwas niana nga tahas.

Dugang nga mga kalihokan

Kon anaa, mahimo usab nimong buhaton ang usa o duha sa mosunod isip kabahin sa leksiyon:

Kantaha o paminawa ang himno nga “Buhi ang Akong Manunubos” (Himno, nu. 79).

Pagsabot sa konteksto sa pagtudlo ni Isaias

Kon gibati nimo nga makatabang ang pagpaambit sa dugang nga konteksto sa kon unsa ang nahitabo sa panahon ni Isaias, ipaambit ang una nga entry sa Komentaryo ug Background nga Impormasyon. Mahimong makatabang ang pagdrowing og mga biswal diha sa pisara nga susama niadtong mosunod. Sa imong pagpaambit sa lain-laing mga bahin sa konteksto, mahimo nimong i-adjust ang mga arrow aron magrepresentar sa unsay imong gipaambit.

diagram sa mga hari sa Asiria

diagram sa mga hari sa Asiria 2

diagram sa mga hari sa Asiria 3

diagram sa mga hari sa Asiria 4