2 Նեփի 6, 10

Իսրայելի հավաքումը

միսիոներները սեղմում են տղամարդու ձեռքը

Սուրբ գրություններում բերված շատ մարգարեություններ վերջին օրերի կամ այժմյան օրերի իրադարձությունների մասին են: Նեփիի եղբայր Հակոբը մեր օրերի և Իսրայելի հավաքման մասին մարգարեություններ է արել, որոնք կարող են օգնել մեզ հասկանալ մեր դերը Տիրոջ վերջին օրերի աշխատանքում: Այս դասը կարող է օգնել ձեզ ավելի մեծ ցանկություն զգալ՝ Տիրոջ հետ մասնակցելու Իսրայելի վերջին օրերի հավաքմանը:

Ակտիվ ուսումնական միջավայրի ստեղծում Երբեմն նախընտրելի է խթանել ուսանողի մասնակցությունը և նրանց ուշադրությունը գրավել ֆիզիկական վարժություններով: Կարող եք ուսանողներին օգնել ներգրավվել դասին՝ թույլ տալով նրանց ազատ տեղաշարժվել: Օրինակ՝ ուսանողները կարող են փոխել նստատեղերը, գրել գրատախտակին, կանգնած որևէ սուրբ գրություն կարդալ կամ սուրբ գրությունը ներկայացնել դերախաղով:

Ուսանողի նախապատրաստում. ուսանողներին առաջարկեք պատրաստվել և կիսվել Իսրայելի հավաքմանը մասնակցելու փորձառություններով:

Հնարավոր ուսումնական վարժություններ

Կարևոր բաներ են տեղի ունենում

Կարող եք առանձին-առանձին ցուցադրել նախագահ Ռասսել Մ. Նելսոնի հետևյալ հայտարարությունները՝ կարճատև դադար տալով, որպեսզի նախքան հաջորդին անցնելը ուսանողները կարողանան մտածել յուրաքանչյուր հայտարարության շուրջ:

Ստորև ներկայացվող դրվագները նախագահ Ռասսել Մ. Նելսոնի ուղերձից են: Դրանք կարդալիս մտածեք մի քանի թեմաների մասին, որոնց անդրադարձել է նախագահ Նելսոնը:

• «Այս պահին, այս երկրագնդում ավելի կարևոր ոչինչ չի կատարվում: … Ոչինչ չկա, որ ավելի մեծ նշանակություն ունենա: Բացարձակ ոչինչ» (Ռասսել Մ. Նելսոն և Վենդի Ո. Նելսոն, «Իսրայելի հույսը» [երիտասարդների համաշխարհային հոգևոր հավաք, 3-ը հունիսի, 2018թ.], ChurchofJesusChrist.org):

• «Դա … ձեզ համար պետք է ամեն ինչ նշանակի» (Ռասսել Մ. Նելսոն, «Իսրայելի հույսը»):

• «Դա է այն առաքելությունը, որի համար դուք ուղարկվել եք երկիր» (Ռասսել Մ. Նելսոն, «Իսրայելի հույսը»):

• Ձեր կարծիքով, նախագահ Նելսոնն ի՞նչ թեմաների էր անդրադառնում այս հայտարարություններով:

Դուք գուցե գիտեք, որ նախագահ Նելսոնը խոսում էր Իսրայելի հավաքման մասին: Դիտեք «Իսրայելի հավաքումը» տեսանյութի 39:36–40:05 հատվածը, որը հասանելի է ChurchofJesusChrist.org կայքում կամ կարդացեք ստորև ներկայացվածը՝ նախագահ Նելսոնի ամբողջական հայտարարությանը ծանոթանալու համար:

Նախագահ Ռասսել Մ. Նելսոն

Իմ սիրելի յուրահատուկ երիտասարդնե՛ր, դուք ուղարկվել եք երկիր այս որոշակի ժամանակահատվածում՝ աշխարհի պատմության ամենավճռական պահին, որպեսզի օգնեք հավաքել Իսրայելը: Այս պահին, այս Երկրում ոչինչ չի կատարվում, որն ավելի կարևոր լինի, քան այդ։ Ոչինչ չկա, որ ավելի մեծ նշանակություն ունենա: Բացարձակապես ոչինչ:

Այս հավաքումը պետք է նշանակի ամեն ինչ ձեզ համար: Սա է այն առաքելությունը, որի համար դուք ուղարկվել եք երկիր: (Ռասսել Մ. Նելսոն և Վենդի Վ. Նելսոն, «Իսրայելի հույսը» [երիտասարդների համաշխարհային հոգևոր հավաք, 3 հունիսի, 2018թ.], ChurchofJesusChrist.org)

• Ի՞նչ մտքեր կամ զգացողություններ ունեք նախագահ Նելսոնի հայտարարությունների մասին:

• Ի՞նչ հարցեր ունեք Իսրայելի հավաքման վերաբերյալ:

Դիտարկեք ձեր մտքերը և զգացողությունները Իսրայելի հավաքմանը մասնակցելու վերաբերյալ, որը ներառում է՝ ավետարանի քարոզը երկրի վրա այժմ ապրող մարդկանց համար, և ընտանեկան պատմության ու տաճարային աշխատանքի կատարումը նրանց համար, ովքեր արդեն մահացել են, որպեսզի բոլորը հնարավորություն ունենան գալ դեպի Երկնային Հայրը և Հիսուս Քրիստոսը: Այս աշխատանքը որքանո՞վ է կարևոր ձեզ համար: Այսօր ուսումնասիրելու ընթացքում փնտրեք այն ուսմունքները, որոնք կարող են օգնել մեծացնել Տիրոջ հետ Իսրայելի հավաքմանը մասնակցելու ձեր պատրաստակամությունն ու կարողությունը:

Հակոբն ուսուցանում է Իսրայելի հավաքման մասին

Նեփին իր եղբայր Հակոբին հրավիրեց կիսվելու Հին Կտակարանի մարգարե Եսայիայի մի կարևոր մարգարեությամբ՝ վերջին օրերին Իսրայելի հավաքման մասին (տես 2 Նեփի 6.4–7):

Որպեսզի օգնեք ուսանողներին պատրաստվել և հասկանալ իրենց կարդացած հատվածները, կարող եք ցուցադրել և կարդալ ստորև ներկայացվող սահմանումները և ցուցադրել դրոշ պատկերող մեկ կամ մի քանի նկար:

• Հեթանոսներ. ինչպես օգտագործվում է սուրբ գրություններում, հեթանոս բառը մի քանի իմաստներ ունի: Եսայիայի մարգարեությունում (տես 2 Նեփի 6.5–7) հեթանոս բառի իմաստներից մեկը կարող է վերաբերել այն մարդկանց, որոնք ծագումով Իսրայելից չեն (տես Սուրբ գրություններ, «Հեթանոսներ», scriptures.ChurchofJesusChrist.org):

• Դրոշ. «դրոշակ կամ խորհրդանշան, որի շուրջը մարդիկ հավաքվում են նպատակի կամ ինքնության միասնությամբ» (Սուրբ գրքերի ուղեցույց, «Դրոշ», scriptures.ChurchofJesusChrist.org):

Մորոնի զորավարը և Ազատության դրոշը

Բարձրացրեք ձեր դրոշը

Այս սահմանումներն իմանալով՝ կարդացեք 2 Նեփի 6.5–7 հատվածը: Ձեր օրագրում թվարկեք Եսայիայի մարգարեության այն մանրամասները, որոնք կարևոր են թվում:

Անհրաժեշտության դեպքում ուսանողներին օգնեք սահմանել Եսայիայի մարգարեության այնպիսի կարևոր մանրամասներ, ինչպիսիք են.

• Աստված է սահմանելու դրոշը:

• Հեթանոսները իրենց գիրկն են առնելու Իսրայելի որդիներին ու դուստրերին և նրանց տանեն իրենց ուսերին:

• Հեթանոս թագավորներն ու թագուհիները կերակրող մայրեր ու հայրեր են լինելու:

• Եսայիայի մարգարեության մեջ ի՞նչ մանրամասներ գտաք, որոնք կարևոր են թվում:

• Ուրիշ ի՞նչ հարցեր ունեք այս մարգարեության վերաբերյալ:

Թե՛ Նեփին, թե՛ Հակոբը մշակել են այս մարգարեությունն իրենց գրվածքներում: Փորձեք ավելին հասկանալ Եսայիայի մարգարեության մասին՝ կարդալով հետևյալ հատվածների խմբից առնվազն մեկը: Օգտակար կլինի նաև այդ հատվածները ներկայացնել 2 Նեփի 65–7 հատվածի հետ խաչաձև հղումով կամ կապել այդ հատվածի հետ:

Կարող եք ուսանողներին բաժանել փոքր խմբերի, որոնց մի կեսը կուսումնասիրի Նեփիի, մյուս կեսը՝ Հակոբի խոսքերը: Ապա ուսանողներին առաջարկեք ներկայացնել, թե ինչ սովորեցին իրենց ուսումնասիրած հատվածների մասին:

• 1 Նեփի 22.6–12 (Նեփիի խոսքերը)

• 2 Նեփի 10.3–10 (Հակոբի խոսքերը)

• Ի՞նչ են ուսուցանում Նեփին կամ Հակոբն այդ հատվածներում, որոնք օգնում ձեզ ավելի լավ հասկանալ 2 Նեփի 6.5–7 հատվածը: Ի՞նչ նոր գաղափարներ ձեռք բերեցիք:

Ստորև ներկայացվող երեք հարցերը նախատեսված են օգնելու ուսանողներին՝ ավելի լավ հասկանալ իրենց կարդացած հատվածները: Եթե նրանք արդեն լավ են հասկանում հատվածը, կարող եք անցնել ստորև ներկայացված չորրորդ և հինգերորդ հարցերին:

• Ըստ ձեզ՝ ո՞րն է այն «հրաշալի աշխատանքը», որը տեղի է ունենալու վերջին օրերին և «պետք է մեծ արժեք ունենա» շատ մարդկանց համար (1 Նեփի 22.8): Եթե ուսանողներին օգնություն է անհրաժեշտ՝ հասկանալու, թե որն է հրաշալի աշխատանքը, կարող եք մատնանշել տողատակի ծանոթագրությունը կամ բացատրել, որ այն վերաբերում է ավետարանի վերականգնմանը:

• 1 Նեփի 22.12 հատվածի համաձայն՝ ի՞նչ է իմանալու ցրված Իսրայելի ժողովուրդը, երբ հավաքվի:

• Ի՞նչ դեր են խաղալու հեթանոսների ազգերը վերջին օրերի Իսրայելի հավաքման գործում (տես 1 Նեփի 22.8–9, 2 Նեփի 10.8–9):

• Այս ուսմունքներն ի՞նչ են օգնում ձեզ հասկանալ Հիսուս Քրիստոսի և բոլոր մարդկանց հանդեպ Նրա ունեցած վերաբերմունքի մասին:

• Ի՞նչ են դրանք օգնում ձեզ հասկանալ այն դերի մասին, որ դուք ունեք Իսրայելի հավաքման գործում:

Ճշմարտություններից մեկը, որ կարող ենք սովորել Եսայիայի մարգարեությունից և դասի սկզբում ներկայացված նախագահ Նելսոնի հայտարարությունից, այն է, որ որպես Փրկչի վերականգնված Եկեղեցու անդամներ մենք պատասխանատու ենք մասնակցել Տիրոջ կողմից վերջին օրերին Իսրայելի հավաքմանը:

• Այս ճշմարտությունն ի՞նչ է օգնում ձեզ հասկանալ այն մասին, թե Տերն ինչ է զգում ձեր հանդեպ:

• Ի՞նչ գիտեք Փրկչի մասին, որը մեծացնում է Նրա շուրջը հավաքվելու ձեր ցանկությունը: Սրանով ուրիշների հետ կիսվելն ինչպե՞ս կարող է մեծացնել Փրկչի շուրջը հավաքվելու նրանց ցանկությունը:

Կազմեք ծրագիր, որով կօգնեք Տիրոջը հավաքել Իսրայելը

Նախագահ Նելսոնը նկարագրել է, թե ինչ կարող ենք անել, որպեսզի օգնենք հավաքել Իսրայելը.

Նախագահ Ռասսել Մ. Նելսոն

Ամեն անգամ, երբ մենք ինչ-որ բան ենք անում, որն օգնում է ինչ-որ մեկին վարագույրի այս կամ այն կողմում Աստծո հետ ուխտեր կապելու և դրանք պահելու համար, … մենք օգնում ենք հավաքել Իսրայելը (Ռասսել Մ. Նելսոն, «Թող Աստված տնօրինի», Ensign կամ Լիահոնա, նոյեմբեր, 2020թ., 92–93):

• Հիշելով նախագահ Նելսոնի հայտարարությունը՝ ի՞նչ հատուկ բաներ կարող եք անել, որպեսզի Տիրոջ հետ օգնեք ուրիշներին՝ գալ Նրա մոտ:

• Ի՞նչ փորձառություններ եք ունեցել, երբ օգնել եք ուրիշներին հավաքվել Երկնային Հոր և Հիսուս Քրիստոսի շուրջը կամ ավելի մոտենալ Նրանց:

Մտածեք, թե ինչպես կարող եք Տիրոջ հետ լիարժեք մասնակցություն ունենալ Իսրայելի հավաքման գործին:

Ժամանակ լինելու դեպքում կարող եք տրամադրել ստորև ներկայացվող մեկ կամ մի քանի նյութեր, որպեսզի օգնեք ուսանողներին մտածել առանձնահատուկ գաղափարների շուրջ:

1. Նախագահ Ռասսել Մ. Նելսոնը ներկայացրել է Եկեղեցու երիտասարդների առաջարկած գաղափարներն այն մասին, թե ինչպես կարող են օգնել հավաքել Իսրայելը: Դիտեք «Իսրայելի հույսը» տեսանյութի 40:29–43:38 հատվածը, որը հասանելի է ChurchofJesusChrist.org կայքում:

2. Այցելեք share.churchofjesuschrist.org:

3. Դիտեք «Ընտանիքների հավաքույթ վարագույրի երկու կողմերում» տեսանյութը (3:22) ChurchofJesusChrist.org կայքում:

Կազմեք գործողությունների ծրագիր, թե ինչ կարող եք անել, որպեսզի հրավիրեք ուրիշներին՝ հավաքվելու Փրկչի շուրջը կամ այլ կերպ ասած՝ դարձի գալ դեպի Քրիստոսը՝ Նրա հետ ուխտեր կապելով և պահելով այդ ուխտերը: Անպայման ներառեք այն հատուկ քայլերը, որոնք կարող եք ձեռնարկել: Դա կօգնի ձեզ հավատքով գործել: Դա անելու ձևերից մեկն է՝ ավարտել հետևյալ նախադասությունները.

• Օրվա ավարտին ես

• Այս շաբաթվա մնացած մասը ես

Բացատրական և պատմական տեղեկություններ

Եսայիայի մարգարեությունն ինչպե՞ս է իրականանում 2 Նեփի 6.6–7 հատվածում:

Որպես այդ մարգարեության կատարման մաս՝ Ամերիկայի Միացյալ Նահանգներում, որը հեթանոս պետություն էր, վերականգնվեց ավետարանը (տես Վարդապետություն և Ուխտեր 109.60): Վերականգնված Եկեղեցին Տիրոջ «դրոշ[ն է] ժողովրդի համար» (2 Նեփի 6.6), որի շուրջը վերջին օրերին կհավաքվեն բոլոր ազգերի մարդիկ (տես 1 Նեփի 22.11–12, Եսայիա 2.2–3, 11.12):

Վերջին օրերին բարձրացված «դրոշի» վերաբերյալ Եսայիայի մարգարեությունների մասին ավելին իմանալու համար կարող եք ուսումնասիրել «Առարկաներ սուրբ գրություններից. դրոշ ազգերի համար» (Ensign, սեպտեմբեր 2018թ., 44–45):

Ուրիշ ի՞նչ աղբյուրից կարող եմ ավելին իմանալ Իսրայելի հավաքման մասին:

Իսրայելի հավաքման մասին ավելին իմանալու համար կարող եք ուսումնասիրել «12 փաստ Իսրայելի հավաքման մասին» (Դեյվիդ Ա. Էդվարդս, Նոր դարաշրջան, հուլիս, 2019թ., 16–18):

Ի՞նչ տեղի կունենա, եթե փորձեմ հավաքել Իսրայելը՝ ուսանողներին առաջարկելով որևէ բան անել, իսկ նրանք մերժեն իմ առաջարկը:

Տասներկու Առաքյալների Քվորումից երեց Դիտեր Ֆ. Ուխդորֆն ասել է.

Նախագահ Դիտեր Ֆ. Ուխդորֆ

Հասկացեք, որ մարդկանց դարձի բերելը ձեր աշխատանքը չէ։ Դա Սուրբ Հոգու դերն է։ Ձեր դերն այն է, որ կիսվեք նրանով, ինչ կա ձեր սրտում և կայուն ապրեք ձեր հավատքում։

Այսպիսով, մի վհատվեք, երբ ինչ-որ մեկն ավետարանի ուղերձն անմիջապես չի ընդունում։ Դա ձեր ձախողումը չէ։

Դա անհատի և Երկնային Հոր միջև է:

Ձեր գործն է սիրել Աստծուն և սիրել ձեր մերձավորին՝ Նրա զավակներին։ (Դիտեր Ֆ. Ուխդորֆ, «Միսիոներական աշխատանք. կիսելով այն, ինչ կա ձեր սրտում», Ensign կամ Լիահոնա, մայիս 2019թ., 17):

Օժանդակ ուսումնական վարժություններ

Դրոշ ազգերի համար:

Ուսանողների համար օգտակար կլինի իմանալ մարգարեությունների մասին, որոնք վերաբերում են Փրկչի վերականգնված ավետարանին, որը դրոշ է աշխարհի համար: Նրանց օգնելու համար կարող եք դասարանի հետ կարդալ հետևյալ հատվածներից մի քանիսը կամ բոլորը. Եսայիա 5.26, 11.12, 2 Նեփի 29.2, Վարդապետություն և Ուխտեր 45.9, 64.41–43, 113.5–6:

Կարող եք կարդալ և քննարկել նաև Բրիգամ Յանգի և վաղ շրջանի Եկեղեցու այլ առաջնորդների պատմությունները, որոնք Սոլթ Լեյքի հովիտ գալուց ամնիջապես հետո բարձրացրին դրոշը Էնսայն լեռնագագաթի վրա (տես Սրբեր. Հիսուս Քրիստոսի Վերջին օրերի Եկեղեցու պատմությունը, հատոր 2, Ոչ մի անմաքուր ձեռք, 1846–1893 [2020], 67–68):

Մենք չպետք է ամաչենք:

Կարող եք ուսանողներին առաջարկել մտածել այն մասին, թե երբ են ունեցել տարբեր զգացողություններ, օրինակ՝ ուրախություն, երջանկություն, անհանգստություն կամ նույնիսկ ամոթ՝ Եկեղեցու անդամ լինելու համար: Ուսանողներին առաջարկեք կարդալ 2 Նեփի 6.7, 12–13 հատվածները և փնտրել, թե ինչ էր ուսուցանում Տերն այն մասին, թե ինչ են զգում Իր որդիները, եթե հավատքով սպասում են Իրեն: Ուսանողները կարող են երգել «Հիսուս Քրիստոսի Եկեղեցին» Երեխաների միության երգը (Երեխաների երգարան, 77) և մտածել ավետարանի ճշմարտությունների մասին, որոնք օգնում են նրանց վստահությամբ հետևել Տիրոջը և հավատքով սպասել Նրա վերադարձին: