2 Նեփի 9.27–49

«Հոգևոր մտածելակերպով լինելը հավերժական կյանք է»

երիտասարդ աղջիկները ժպտալով քայլում են

Որքա՞ն հաճախ եք մտածում այն մասին, թե ուր են տանելու ձեր գործողություններն ու մոտեցումները: Երբ Հակոբը հայտարարեց, որ Հիսուս Քրիստոսը բոլոր մարդկանց հեռացնում է Անկման ազդեցություններից, այնուհետև նախազգուշացրեց այն գործողությունների և մոտեցումների մասին, որոնք մեզ հեռացնում են Տիրոջից: Նա վկայեց Հիսուս Քրիստոսի և այն մասին, թե ինչ կարող ենք անել Նրա մոտ գալու և փրկվելու համար: Այս դասը կօգնի ձեզ խուսափել այնպիսի վարքագծից, որը դժբախտություն է բերում և ձեզ հեռացնում է Հիսուս Քրիստոսից:

Տալ հարցեր, որոնք ինքնաճանաչում են բերում Ինքնաճանաչումը և ինքնագնահատումը կարող է հրավիրել Սուրբ Հոգուն՝ օգնելու յուրաքանչյուր ուսանողի տեսնել իրերն «այնպես, ինչպես դրանք իրականում են և … կլինեն իրականում» (Հակոբ 4.13): Արդյունավետ ինքնագնահատումն օգնում է ուսանողներին հաշվի առնել ավետարանի ճշմարտությունների իրենց ներկայի ընկալումը և իրենց ցանկությունները կամ շարժառիթները:

Ուսանողի նախապատրաստություն. ուսանողներին առաջարկեք ուշադրություն դարձնել, թե այս և հաջորդ դասի միջև իրենց կատարած որ գործողությունները կարող են օգնել իրենց ավելի մոտ լինել Աստծուն, և որոնք կարող են հեռացնել Նրանից:

Հնարավոր ուսումնական վարժություններ

Հեռացում Աստծուց

Նախքան դասը սենյակում որևէ տեղ կարող եք մեկ կամ մի քանի կոնֆետ թաքցնել (կամ մեկ այլ բան, որը գտնելուց ուսանողները կուրախանան): Մի քանի ուսանողի առաջարկեք որոնել առարկաները: Օգնեք՝ ասելով տաք է կամ ավելի տաք է, երբ ուսանողները մոտենան այն տեղին, որտեղ թաքցված են առարկաները, և օգտագործեք ցուրտ է կամ ավելի ցուրտ է բառերը, երբ նրանք հեռանան այդ տեղից: Կոնֆետը կամ այլ առարկաները գտնելուց հետո կարող եք տալ նմանատիպ հարցեր.

• Հուշումներն ինչպե՞ս օգնեցին ձեզ գտնել առարկաները:

• Մարդն ինչո՞ւ չի հետևի հուշումներին, որոնք նախատեսված են օգնելու նրան՝ մի օգտակար բան ստանալ:

Ուսանողներին առաջարկեք լուռ խորհել ստորև ներկայացվող պարբերության շուրջ.

Մտածեք ձեր կյանքի այնպիսի ժամանակների մասին, երբ զգացել եք, որ հատկապես մոտ եք Աստծուն, և այնպիսի ժամանակների մասին, երբ Նրանից հեռացած լինելու զգացողություն եք ունեցել: Ո՞ր գործողությունները կարող էին նման արդյունքի բերել:

• Ի՞նչ գտաք:

• Ըստ ձեզ՝ ի՞նչն օգնեց Հակոբին զգալ այն ճանապարհը, որը նա նկարագրում է 2 Նեփի 9.49 հատվածում:

Մտածեք ձեր սեփական կյանքի մասին և այն մասին, թե ներկայումս որքան մոտ եք ձեզ զգում Աստծուն: Երբ 2 Նեփի 9 գլխում մանրամասն ուսումնասիրեք Հակոբի քարոզը, փնտրեք ուսմունքներ, որոնք կարող են օգնել ձեզ ավելի մոտենալ Երկնային Հորն ու Հիսուս Քրիստոսին:

«Ականջ արեք իմ խոսքերին»

Երբ Հակոբն ավարտեց Հիսուս Քրիստոսի դերի մասին ուսուցումը, որով Նա մեզ օգնում է հաղթահարել մեղքն ու մահը (տես 2 Նեփի 9.1–26), նա նախազգուշացրեց նեփիացիներին այն մոտեցումների ու վարքագծերի մասին, որոնք կհեռացնեին նրանց Աստծուց:

Կարող եք դասարանը կիսել և առանձին հանձնարարել ստորև ներկայացվող ընթերցանության նյութը (դասարանի մի կեսը կարող է կարդալ 2 Նեփի 9.27–30, իսկ մյուս կեսը՝ 2 Նեփի 9.31–38 հատվածները):

Կարդացեք 2 Նեփի 9.27–38 հատվածները՝ փնտրելով մոտեցումներ և գործողություններ, որոնց մասին Հակոբը նախազգուշացրել էր: Կարող եք ընթերցելիս կազմել դրանց ցանկը:

Մտածեք, թե Հակոբի նախազգուշացրած վարքագծերից յուրաքանչյուրն ինչպես է այսօր կիրառելի դեռահասների համար: Օրինակ՝ թեև շատ դեռահասներ չեն մասնակցում սպանության, հատված 35-ը կարող է օգնել ձեզ հիշել, որ պետք է խուսափել բռնություն պարունակող մտքերից, զգացողություններից և վարքագծից (տես Մատթեոս 5.21–22, 38–42):

Որպեսզի օգնեք ուսանողներին տեսնել, թե ինչպես են Հակոբի ուսմունքներն առնչվում իրենց կյանքին, առաջարկեք նրանց Երիտասարդներին զորացնելու համար. Ընտրություն կատարելու ուղեցույց գրքույկից (2022) առանձնացնել այն ուսմունքները, որոնք առնչվում են 2 Նեփի 9 գլխին: Ուսանողներին կարող եք խնդրել ուսումնասիրել թեման և դասարանի հետ կիսվել իրենց գտած մի քանի խորհրդով: Ուսմունքների օրինակներ են՝ հավերժական ճշմարտությունները, հրավերները և խոստացված օրհնությունները էջեր 31–32 (հատվածներ 28–29, 34-ի վերաբերյալ) և մաքրաբարոյության օրենքի մասին ուսմունքները էջեր 23–28 (հատված 36-ի վերաբերյալ):

• Ի՞նչ օրինակներ կան այն մասին, թե Հակոբի ուսմունքներն ինչպես են այսօր առնչվում դեռահասներին:

• Հակոբի թվարկած մոտեցումներն ու վարքագծերն ինչպե՞ս են ազդում Աստծո հետ մեր ունեցած հարաբերության վրա:

Անձը, որը դրսևորում է այն մոտեցումներն ու վարքագծերը, որոնց մասին նախազգուշացրել էր Հակոբը, կարող են նկարագրվել որպես «մարմնական մտածելակերպով» (2 Նեփի 9.39):

Կարդացեք 2 Նեփի 9.39 հատվածը՝ փնտրելով, թե ինչ էր ուսուցանում Հակոբը մարմնական և հոգևոր մտածելակերպով լինելու ազդեցությունների մասին:

Որպեսզի օգնեք ուսանողներին յուրացնել Հակոբի ուսմունքները 2 Նեփի 9.39 հատվածում, կարող եք նրանց առաջարկել մի գծագիր կամ մեմ նկարել, որը պատկերում է «հոգևոր մտածելակերպով լինելը հավերժական կյանք է» արտահայտությունը:

• Ի՞նչ բացահայտեցիք։

• Ձեր կարծիքով, ի՞նչ է նշանակում հոգու խորհրդին հետևել:

Այս հատվածից մենք իմանում ենք, որ մարմնական մտածելակերպով լինելը տանում է հոգևոր մահվան: Հոգևոր մտածելակերպով լինելը տանում է դեպի հավերժական կյանք:

• Ի՞նչ ամենօրյա գործողություններ կարող եք ձեռնարկել, որպեսզի ձեր միտքը հոգևոր առումով կենտրոնացած պահեք Հիսուս Քրիստոսի ուղղությամբ:

Մարմնական մտածելակերպին հատուկ մոտեցումներից ու վարքագծերից հեռու մնացած և Հիսուս Քրիստոսի միջոցով օրհնված մարդու օրինակ տեսնելու համար կարող եք դիտել «Նրա շնորհը. փոփոխությունը հնարավոր է Քրիստոսի միջոցով» տեսանյութը (3:29), որը հասանելի է ChurchofJesusChrist.org կայքում:

• Ի՞նչ մտքեր կամ զգացողություններ ունեք նախագահ Նելսոնի հայտարարություններից:

Դարձի եկեք դեպի Իսրայելի Սուրբը

Ուսանողներին առաջարկեք լուռ խորհել այն մասին, թե նրանց սովորածն ինչպես է կիրառելի հենց իրենց համար: Կարող եք ստորև ներկայացված պարբերությունում թվարկված հարցերի նման մի քանի հարց տալ, սակայն մի հանձնարարեք ուսանողներին կիսվել:

Վերհիշեք 2 Նեփի 9.27–38 հատվածներում Հակոբի թվարկած մարմնական մտածելակերպով առաջնորդված վարքագծերը: Այս նախազգուշացումներից ո՞րն եք համարում ամենադժվարը: Ի՞նչ փոփոխություններ կարող եք անել, որոնք կօգնեն ձեզ ավելի մոտենալ Երկնային Հորը և Հիսուս Քրիստոսին: Մտածեք, թե ինչ քայլեր կարող եք ձեռնարկել:

Ձեր իսկ հանգամանքների մասին մտածելու ընթացքում կարդացեք Հակոբի խոսքերը 2 Նեփի 9.40–45 հատվածում: Փնտրեք նրա ուսմունքները, մասնավորապես Փրկչի մասին ուսմունքները, որոնք կարող են օգնել ձեզ ձեր ներկայիս իրավիճակում:

• Ո՞ր բառերն ու արտահայտություններն եք ամենից կարևոր համարում: Ինչո՞ւ։

• «Իսրայելի Սրբի մեծության» (հատված 40) մասին հիշելն ինչպե՞ս կարող է օգնել ձեզ ավելի հոգևոր մտածելակերպ ունենալ:

Ուսանողներին ժամանակ տվեք մտածելու, թե ինչ սովորեցին ու զգացին այսօրվա դասից: Նրանց առաջարկեք, որ օրագրերում գրանցեն իրենց մտքերն ու տպավորությունները: Ավարտելուց հետո կարող եք մի քանի կամավորների առաջարկել կիսվել օրագրերում գրածով, եթե խիստ անձնական չլինի: Վկայեք ձեր քննարկած ճշմարտությունների մասին:

Մեկնաբանություն և ընդհանուր տեղեկություններ

2 Նեփի 9.28–29 Ինչո՞ւ է կարևոր հոգևոր կրթությունը առաջնային դիտարկել աշխարհիկ կրթությունից:

Առաջին Նախագահությունից նախագահ Հենրի Բ. Այրինգն ուսուցանել է.

Նախագահ Հենրի Բ. Այրինգ

Պարզ է, որ հոգևոր կրթությունն առաջին տեղում դիտարկելը չի ազատում մեզ աշխարհիկ բաներ սովորելուց: Հակառակը, այն նպատակ է հաղորդում մեր աշխարհիկ կրթությանը և մղում է մեզ ավելի ջանասիրաբար աշխատել դրա վրա:

Եթե մենք ճիշտ տեղում պահենք հոգևոր կրթությունը, ստիպված կլինենք մեր ժամանակը ճիշտ օգտագործելու հետ կապված որոշ դժվար ընտրություններ կատարել: Սակայն որպես մեր կյանքի օրինաչափություն՝ հոգևոր կրթությունը երկրորդական դարձնելու գիտակցված ընտրություն երբեք չի կարող լինել: Երբեք: Դա ողբերգության կհանգեցնի: Ողբերգությունն առաջին հայացքից ակնհայտ չի լինի, ոչ էլ մահկանացու կյանքում երբևէ պարզ կլինի: Բայց հիշեք, դուք հետաքրքրված եք կրթություն ստանալ ոչ միայն մահկանացու կյանքի, այլև՝ հավերժական կյանքի համար: Եթե հոգևոր տեսանկյունից հստակ տեսնեք այդ իրականությունը, դուք առաջնահերթություն կհամարեք հոգևոր կրթությունը և միևնույն ժամանակ չեք անտեսի աշխարհիկ կրթությունը: Իրականում, երբ ունենաք հոգևոր տեսլականը, ավելի ջանասիրաբար կաշխատեք ձեր աշխարհիկ կրթության ուղղությամբ (Հենրի Բ․ Այրինգ, «Կրթություն իրական կյանքի համար», Ensign, հոկտեմբեր 2002թ., 18):

Դիտեք «Հոգու անկեղծ ցանկությունը» տեսանյութը՝ Աստծուն ձեր կրթական նպատակներում և գործողություններում ներգրավելու կարևորության մասին իմանալու համար:

2 Նեփի 9.39 Ինչպե՞ս կարող է հոգևոր մտածելակերպով լինելու ձգտումն օգնել ինձ իրերը տեսնել այլ տեսանկյունից:

Առաջին Նախագահությունից նախագահ Դալլին Հ. Օուքսն ուսուցանել է.

Նախագահ Դալլին Հ. Օուքս

Երբ մենք հեռանում ենք աշխարհիկ հոգսերից, ավելի ենք մոտենում մեր Հորը Երկնքում, և ավելի է մեծանում Հոգով առաջնորդվելու մեր կարողությունը: Կյանքի այս որակը մենք անվանում ենք հոգևորություն:

Հավատքով ապրողների համար հոգևորությունը ոսպնյակ է, որի միջով տեսնում ենք կյանքը, և չափման գործիք է, որով գնահատում ենք այն: …

Հոգևոր մտածելակերպով լինելը նշանակում է տեսնել և գնահատել մեր փորձառությունները հավերժության ընդլայնված հեռանկարով:

… Հոգևորության ոսպնյակի միջով Աստծո պատվիրանները մենք տեսնում ենք որպես օրհնությունների հրավերներ (Դալլին Հ. Օուքս, «Հոգևորություն», Ensign, նոյեմբեր, 1985թ., 61, 63):

2 Նեփի 9.40 Ինչպե՞ս կարող է «Իսրայելի Սրբի մեծության» մասին հիշելը օգնել ինձ պահպանել հոգևոր մտածելակերպով մոտեցումը:

Տասներկու Առաքյալների Քվորումից երեց Դեյլ Գ. Ռենլանդը հայտարարել է.

Երեց Դեյլ Գ. Ռենլանդ

Մեր Երկնային Հայրը ցանկանում է, որ մենք հիշենք Նրա և Նրա սիրելի Որդու բարությունը, ոչ թե Նրանց գոհության համար, այլ այն ազդեցության համար, որ ունենում է մեզ վրա այդ հիշողությունը։ Խորհելով Նրանց բարության մասին, մեր տեսլականը և հասկացողությունը ընդլայնվում են։ Մտածելով նրանց կարեկցանքի մասին՝ մենք ավելի խոնարհ, աղոթող և հաստատուն ենք դառնում: …

Հրավիրում եմ ձեզ ամեն օր հիշել Երկնային Հոր և Հիսուս Քրիստոսի մեծությունը, և այն, ինչ Նրանք արել են ձեզ համար: Թող Նրանց մեծության մասին ձեր մտքերն ավելի ամուր կապեն ձեր դեգերող սիրտը Նրանց հետ: Մտածեք Նրանց կարեկցանքի մասին և հոգևոր ավելի մեծ զգայունությամբ կօրհնվեք ու ավելի Քրիստոսանման կդառնաք (Դեյլ Գ. Ռենլանդ, «Մտածեք Աստծո բարության և մեծության մասին», Ensign կամ Լիահոնա, մայիս 2020թ., 41, 44):

Օժանդակ ուսումնական վարժություններ

2 Նեփի 9.27: Դասը սկսելու այլ տարբերակ

Որպես դասը սկսելու այլընտրանքային եղանակ՝ ուսանողներին առաջարկեք բերել որոշ իրեր, որոնք նրանց խնդրել են չվատնել: Քննարկեք չվատնող լինելու օգուտները: Կարդացեք 2 Նեփի 9.27 հատվածը և ուսանողներին առաջարկեք գտնել Հակոբի խորհուրդն ու քննարկել, թե ինչ կարող է նշանակել վատնել «[մեր] փորձության օրերը»: Ուսանողներին խրախուսեք դասի ընթացքում բացահայտել այն վատնողական մոտեցումներն ու վարքագծերը, որոնց մասին Հակոբը նախազգուշացնում է:

Ուսանողներին օգնեք հասկանալ, որ նույնիսկ եթե ներգրավվել են քննարկված վարքագծերից ցանկացածում, նրանց կյանքը չի վատնվել, և երբ նրանք «դարձի գան դեպի Տերը» (2 Նեփի 9.41), կարող են ավելի երջանիկ ու ավելի արդյունավետ կյանք ապրել:

2 Նեփի 9.28–29 «Ուսյալ լինելը լավ է»

Եթե ուսանողներին կարող է օգուտ տալ ավելի ծավալուն քննարկումը սովորելու և այն մասին, թե ինչպես խուսափել Հակոբի նկարագրած ծուղակներից, կարող եք 2 Նեփի 9.28–29 հատվածի ընթերցումից հետո տալ ստորև ներկայացված հարցերի նման հարցեր.

• Ինչպե՞ս կարող է աշխարհի իմաստությանը վստահելը հեռացնել ձեզ Հիսուս Քրիստոսից:

• Ի՞նչ կարող ենք անել՝ հավաստիանալու համար, որ դա տեղի չի ունենա:

Կարող եք ուսանողների հետ ուսումնասիրել նաև «Կրթություն» բաժնում ներկայացված որոշ գաղափարներ, 9–10, Երիտասարդներին զորացնելու համար գրքույկից (2011թ.):