Human gipakita sa usa ka panan-awon sa mosangpot nga apostasiya ug pagkalaglag sa iyang katawhan, nakita ni Nephi nga ang bantogan ug salawayon nga simbahan modaot sa mga pagtulun-an sa Biblia ug makig-away batok sa mga Santos sa Dios. Hunahunaa ang kalipay ni Nephi nga makita usab nga ang ebanghelyo ipahiuli, mopanalangin sa tanan nga modawat sa mga pagtulun-an ug mga pakigsaad sa Manluluwas. Ang katuyoan niini nga leksiyon mao ang pagtabang kanimo nga makasabot sa kamahinungdanon sa mga pakigsaad ug pagpalambo sa imong tinguha sa paghimo ug pagtuman niini.
Pagpahayag nga ang mga kontribusyon sa mga tigkat-on gihatagan og bili. Kon ang mga estudyante mopataas sa ilang kamot aron mokomentaryo, tawaga sila sa ilang ngalan ug tabangi sila nga mobati nga ang ilang mga komentaryo makatabang sa uban nga makat-on.
Pagpangandam sa estudyante: Ikonsiderar ang pagdapit sa mga estudyante sa pagtambong nga andam sa pagpaambit sa unsay ilang gihunahuna nga pipila sa labing importante nga mga panghitabo gikan sa miaging 500 ka tuig.
Posibleng mga Kalihokan sa Pagkat-on
Timan-i: Ang 1 Nephi 13:20–42 itudlo nga mas detalyado sa sunod nga leksiyon.
Ang kamot sa Dios sa kasaysayan
Hunahunaa nga gipakita kanimo ang usa ka panan-awon sa labing mahinungdanon nga mga panghitabo sa miaging 500 ka mga tuig, lakip ang atong panahon.
Ikonsiderar ang pagsulat o ipasulat sa mga estudyante ang mga tubag sa mosunod nga pangutana sa pisara. Ang pagkakita sa mga tubag sa pisara mahimong makapapukaw og mga ideya gikan sa ubang mga estudyante.
Unsa nga mga panghitabo sa imong hunahuna ang mahimo nimong makita niini nga panan-awon? Ngano man?
Si propeta Nephi gipakita og usa ka panan-awon nga naglakip sa mahinungdanong mga panghitabo gikan niini nga yugto sa panahon. Pamatikdi unsa ang gideklarar ni Presidente Russell M. Nelson mahitungod sa panan-awon ni Nephi:
Imahe
Presidente Russell M. Nelson
Kita nakasaksi gayod unsay nakita ni propeta Nephi sa panan-awon lamang. …
Kamo, akong kaigsoonan, apil niadtong mga lalaki, mga babaye, ug mga bata nga nakita ni Nephi. Hunahunaa kana! (Russell M. Nelson, “Paminaw Kaniya,” Liahona, Mayo 2020, 88)
Samtang nagtuon ka sa 1 Nephi 13–14, pangitaa ang ebidensiya sa gahom sa Dios sa mga panghitabo padulong sa atong panahon ingon man usab sa mahinungdanong mga saad nga tumanon sa Ginoo sa imong kinabuhi.
Ang mosunod nga kalihokan mahimong magamit sa daghang paagi. Pananglitan, mahimo nimong ipakita ang mga panghitabo ug ang katugbang niini nga mga kasulatan ug dayon dapita ang mga estudyante sa pagbasa sa mga bersikulo ug pagsulat og mubo nga summary sa tanang panghitabo. Mahimo ka usab nga maghimo og pasulit diin ang mga estudyante ipares ang mga panghitabo ngadto sa mga bersikulo.
Basaha ang mga tudling sa kasulatan ug ipares ang gihulagway sa mga bersikulo ngadto sa mga panghitabo nga nalista sa ubos. Timan-i: Ang Mga Hentil nga gigamit niini nga mga bersikulo nagpasabot sa mga tawo nga dili gikan o wala nagpuyo sa yuta sa Judah.
Ang rekord sa mga Nephite (Basahon ni Mormon) ug ang ubang kasulatan nagtukod sa kamatuoran sa rekord sa mga Judeo (Biblia) ug nagpahiuli sa yano ug bililhong mga kamatuoran.
Kahibulongan nga buhat (Pagpahiuli sa ebanghelyo) mitungha. Ang mga Hentil mipili kon dawaton ba o isalikway ang mga panalangin niini.
Mga tubag: 1-b, 2-c, 3-a, 4-d. Mahimo nimong pangutan-on ang mga estudyante kon unsay ilang nahibaloan o kon duna silay mga pangutana mahitungod sa mga panghitabo.
Unsa sa imong hunahuna ang mahinungdanon mahitungod niini nga mga panagna?
Ang mga estudyante mahimong makabenepisyo gikan sa pagtuon sa 1 Nephi 13:12–13, 16–19 sa pagdiskobre kon giunsa sa Espiritu ug gahom sa Dios nga anaa niadtong kinsa mibiyahe ngadto sa gisaad nga yuta.
Unsa ang imong nakat-onan mahitungod sa Dios gikan niini nga mga bersikulo?
Kini mahimong usa ka maayong oportunidad sa pagpaambit sa imong pagpamatuod sa kamot sa Dios sa pagpadayag sa Pagpahiuli. Mahimo usab nimong dapiton ang mga estudyante sa pagpaambit sa ilang mga pagbati.
Sa unsang paagi nga kini nga panabot mahitungod Kaniya makapanalangin sa imong kinabuhi karon?
Paggamit sa gahom sa Dios sa atong kinabuhi
Si Nephi gipakita sa ulahing mga adlaw ug nakakita sa Pagpahiuli sa Simbahan ni Jesukristo ug sa oposisyon nga atubangon niini. Nakita usab niya ang mga panalangin nga gisaad sa mga sumusunod ni Jesukristo nga nagtuman sa pakigsaad.
Basaha ang 1 Nephi 14:12–14, nga mangita sa unsay nahibaloan ni Nephi mahitungod sa ulahing mga adlaw nga mga miyembro sa Simbahan ni Jesukristo.
Unsa ang mahinungdanon kanimo gikan sa paghulagway ni Nephi sa Simbahan ni Jesukristo ug sa mga miyembro niini sa atong panahon? Ngano man?
Ikonsiderar ang paghisgot sa mga hunahuna ug pagbati sa mga estudyante mahitungod sa pagkahimo nga usa sa pipila ka mga miyembro sa Simbahan sa tibuok kalibotan. Mahimo nimo silang dapiton sa pagpaambit og mga paagi nga ilang nakita ang mga tawo nga nakig-away batok sa Manluluwas ug unsaon nila pagsanong nga magmatinud-anon ug magmahigugmaon sa maong mga hagit.
Aron sa pagpatunhay sa diskusyon, ikonsiderar ang pagdapit sa mga estudyante sa pagtubag sa mga komentaryo nga gihimo sa ilang mga kauban. Tinguhaa ang direksiyon gikan sa Espiritu aron makahibalo unsa nga follow-up nga mga pangutana ang ipangutana.
Unsa nga mga baroganan ang imong nailhan sa bersikulo 14?
Usa ka baroganan nga atong makat-onan gikan niini nga mga bersikulo mao ang kon kita motuman sa atong mga pakigsaad, kita masangkapan sa katarong ug sa gahom sa Dios.
Unsa nga mga pakigsaad ang imong nahimo o imong himoon uban sa Dios?
Unsa ang pipila ka mga pamaagi nga nagtabang kanimo nga magpabiling nakatutok sa pagtuman sa mga pakigsaad nga imong gihimo?
Si Elder David A. Bednar sa Korum sa Napulog Duha ka Apostoles mitudlo mahitungod sa unsay kahulogan sa gisangkapan sa katarong ug sa gahom sa Dios sa dakong himaya:
Imahe
Elder David A. Bednar
Ang mga pulong nga “gisangkapan sa katarong ug uban sa gahom sa Dios sa dako nga himaya” [1 Nephi 14:14] dili lamang nindot nga ideya o usa ka ehemplo sa nindot nga mga pulong sa kasulatan. Hinuon, kini nga mga panalangin tataw nga anaa kanunay sa mga kinabuhi sa dili maihap nga mga disipulo sa Ginoo sa ulahing mga adlaw. …
… Ako mopamatuod nga ang mga katawhan sa pakigsaad sa Ginoo karon sa pagkatinuod gisangkapan sa katarong ug sa gahom sa Dios sa dakong himaya. Ako nakasaksi sa hugot nga pagtuo, kaisog, panglantaw, kamakanunayon, ug hingpit nga kalipay nga molabaw pa kaayo sa mortal nga kapasidad––ug nga ang Dios lamang ang makahatag. (David A. Bednar, “Uban sa Gahom sa Dios sa Dako nga Himaya,” Liahona, Nob. 2021, 29–30)
Unsa ang pipila ka posibleng mga ehemplo sa mga tawo sa imong kaedad nga “gisangkapan sa katarong”?
Kanus-a nimo nasinati ang pipila niini nga mga panalangin “nga ang Dios lamang ang makahatag”?
Unsa ang gisulti sa imong inadlaw-adlaw nga mga lihok mahitungod sa unsa ka importante ang mga pakigsaad nga imong gihimo?
Ngano nga kinahanglan nimo ang gahom nga nagagikan sa mga pakigsaad uban sa Langitnong Amahan?
Sa unsang paagi nimo mas hingpit nga madapit sa imong kinabuhi ang mga panalangin sa paghimo ug pagtahod sa mga pakigsaad uban sa Langitnong Amahan?
