Ang mga kasulatan nagtudlo kanato unsa ang “labing madanihon” ug “labing hingpit nga kalipay ngadto sa kalag” sa tanang mga butang nga atong natagamtaman niini nga kinabuhi (1 Nephi 11:22–23). Samtang si Nephi nakig-istorya sa langitnong mga mensahero, siya adunay usa ka panan-awon sa Manluluwas sa kalibotan ug nakadawat sa iyang kaugalingong panabot sa unsay makahatag og labing kalipay: ang gugma sa Dios. Kini nga leksiyon makatabang kanimo nga mobati sa gugma sa Langitnong Amahan ug ni Jesukristo alang kanimo.
Paghigugma niadtong imong gitudloan. Ang tanan nga nabuhat sa Manluluwas sa tibuok Niyang pangalagad sa yuta dinasig pinaagi sa gugma. Samtang imong sundon ang Iyang ehemplo, ang gugma mao ang mahimong rason ug kadasig sa imong pagtudlo. Ang gugma makaimpluwensiya sa imong gibuhat ug giunsa nimo pagpakig-uban sa mga estudyante.
Pagpangandam sa estudyante: Dapita ang mga estudyante sa pagdala og butang sa klase nga naghulagway sa usa ka paagi nga ang Dios nagpakita sa Iyang gugma alang kanila.
Posibleng mga Kalihokan sa Pagkat-on
Ang kamahinungdanon sa gugma sa Dios
Si Sister Susan H. Porter sa Kinatibuk-ang Kapangulohan sa Primary miingon:
Unsa ang mahimong mausab kon ang usa ka tawo nakahibalo ug nakasabot sa gugma sa Dios alang kaniya?
Sa unsang paagi nga ang pagbati nga gihigugma ka sa Dios makaimpluwensiya sa imong kinabuhi?
Ikonsiderar ang paghatag og higayon sa mga estudyante sa pagpamalandong kon unsa ka dako nilang gibati ang gugma sa Dios ug ang ebidensiya nga ilang nakita sa Iyang gugma sa ilang kinabuhi. Dapita ang mga estudyante, samtang sila nagtuon sa 1 Nephi 11, sa pagpangita og ebidensiya sa gugma sa Langitnong Amahan ug ni Jesukristo alang kanila.
Panan-awon ni Nephi
Imahe
Damgo ni Lehi
Dapita ang mga estudyante sa paghinumdom sa mahinungdanong mga simbolo gikan sa damgo ni Lehi nga narekord sa 1 Nephi 8. Kon ang mga estudyante nagkinahanglan og tabang, dapita sila sa pagrebyo og daklit niana nga kapitulo.
Unsa nga mahinungdanong mga simbolo ang imong mahinumdoman gikan sa damgo ni Lehi nga narekord sa 1 Nephi 8?
Gusto kaayo ni Nephi nga makasabot sa kahulogan sa damgo sa iyang amahan ug mituo nga ang Ginoo mopahibalo niini ngadto kaniya. Samtang siya namalandong diha sa iyang kasingkasing, ang Espiritu sa Ginoo mipakita ug gipakita ngadto kaniya ang kahoy sa kinabuhi. Sa dihang si Nephi mihangyo nga makahibalo sa interpretasyon sa kahoy, usa ka anghel ang mipakita aron sa pagtabang kaniya nga makat-on pa og dugang mahitungod sa unsay iyang nakita sa panan-awon (tan-awa sa 1 Nephi 11:1–14).
Isip kabahin sa pagtabang ni Nephi nga makasabot sa kahulogan sa kahoy, ang anghel nangutana kang Nephi og pangutana. Basaha ang 1 Nephi 11:16 aron makita kon unsa nga pangutana ang gipangutana.
Ikonsiderar ang pagpares sa mga estudyante ug papangutan-a sila sa usag usa ug patubaga sa pangutana diha sa bersikulo 16 una pa nila basahon ang bersikulo 17.
Unsaon nimo pagtubag ang pangutana sa bersikulo 16?
Basaha ang bersikulo 17 aron makita kon giunsa pagtubag ni Nephi.
Unsa ang mahinungdanon diha kanimo mahitungod sa tubag ni Nephi sa bersikulo 17?
Ang “pagpakig-angay” nagpasabot sa boluntaryong pagkanaog gikan sa posisyon sa ranggo o dignidad. Pananglitan, ang buhat sa Manluluwas nga naghugas sa mga tiil sa Iyang mga disipulo mahimong isipon nga usa ka buhat sa pagpakig-angay. (tan-awa sa Juan 13:3–17). Samtang ang pagpakig-angay sa Dios nga gihulagway niini nga mga bersikulo makatudlo usab mahitungod sa pagpakig-angay sa Langitnong Amahan, kini nga leksiyon labing nagpokus sa pagpakig-angay ni Jesukristo.
Basaha unsa ang nakita ni Nephi sa 1 Nephi 11:13–23, nga mangita og ebidensiya sa pagpakig-angay sa Dios.
Unsa nga ebidensiya ang imong nakit-an sa pagpakig-angay sa Dios?
Unsa nga mga kamatuoran ang imong nakat-onan mahitungod sa pagpakig-angay sa Dios?
Usa ka kamatuoran nga atong makat-onan mao nga ang pagpakig-angay sa Dios nagpakita sa Iyang gugma alang kanato.
Sa unsang paagi sa imong hunahuna nga ang pagkatawo sa Manluluwas nagpakita niini nga kamatuoran?
Basaha ang 1 Nephi 11:26–33, nga mangita og dugang nga mga paagi sa pagpakig-angay ni Jesus aron sa pagpakita sa Iyang gugma alang sa katawhan.
Ikonsiderar ang pagbahin sa mga estudyante ngadto sa mga grupo o sa managpares ug i-assign sila og mas gagmay nga mga bahin sa 1 Nephi 11:26–33. Human nila mabasa ang gi-assign sa ilaha nga mga bersikulo, mahimo nilang hisgotan ang mosunod nga mga pangutana uban sa ilang mga grupo o mga pares.
Laing ideya mao ang pagpakita og mga hulagway sa mga parte sa kinabuhi sa Manluluwas nga gihisgotan niini nga mga bersikulo. Dayon dapita ang mga estudyante sa pagpangita og mga asoy diha sa Bag-ong Tugon nga naghulagway sa panghitabo nga gipakita sa matag hulagway.
Mahimo usab nga tan-awon sa mga estudyante ang usa ka litrato, pangitaon ang katugbang nga asoy sa Bag-ong Tugon, ug ipasabot kon giunsa sa asoy paghulagway sa pagpakig-angay sa Dios.
Unsa nga ebidensiya sa pagpakig-angay sa Manluluwas ang imong nakit-an?
Sa unsang paagi kini nga mga buhat nagpakita sa Iyang gugma?
Unsa ang ubang mga ehemplo gikan sa kinabuhi ni Jesukristo nga imong gibati nga nagpakita sa Iyang gugma ug pagpakig-angay?
Basaha ang gisulti ni Elder Quentin L. Cook sa Korum sa Napulog Duha ka Apostoles mahitungod kon giunsa niini nga mga panghitabo pagtabang kanato nga makita ang gugma sa Manluluwas alang kanato. O mahimo nimong tan-awon ang bidyo “Ang Mahangtorong mga Butang nga Nahitabo Kada Adlaw” gikan sa time code 4:01 hangtod sa 4:43, anaa sa ChurchofJesusChrist.org.
Imahe
Elder Quentin L. Cook
Ang ehemplo sa Manluluwas sa pagkamapainubsanon ug pagsakripisyo alang sa tanang katawhan mao ang labing tulukibon nga panghitabo sa kasaysayan. Ang Manluluwas, bisan isip miyembro sa Dios nga Kapangulohan, andam nga moanhi sa yuta isip ordinaryo nga masuso ug misugod sa pagpakabuhi nga naglakip sa pagtudlo ug pag-ayo sa Iyang mga kaigsoonan ug sa kataposan nag-antos sa dili mahulagway nga kasakit sa Getsemani ug sa krus aron mahingpit ang Iyang Pag-ula. Kining buhat sa gugma ug pagkamapainubsanon sa bahin ni Kristo nailhan isip ang Iyang pagpakig-angay. Gibuhat Niya kini alang sa matag lalaki ug babaye nga gilalang o ilalang sa Dios. (Quentin L. Cook, “Ang Mahangtorong mga Butang nga Nahitabo Kada Adlaw,” Liahona, Nob. 2017, 52)
Giunsa sa pamahayag ni Elder Cook pagtabang kanimo nga mas makasabot sa pagpakig-angay [condescension] sa Dios?
Nagpadayon nga mga panalangin sa pagpakig-angay sa Manluluwas
Ang pagpakig-angay sa Manluluwas nagpadayon nga ebidensiya sa Iyang gugma alang kanato karon.
Ikonsiderar ang pagpaambit kon giunsa ka napanalanginan sa pagpakig-angay sa Manluluwas. Makatabang sa mga estudyante nga mobati sa gugma sa Langitnong Amahan ug ni Jesukristo alang kanila.
Mahimong makaayo sa mga estudyante ang pagtubag sa mosunod nga mga pangutana diha sa ilang journal sa pagtuon.
Giunsa pagpakita sa Langitnong Amahan ug ni Jesukristo ang Ilang gugma alang kanimo?
Sa unsang paagi nga ang Ilang gibuhat makaimpluwensiya sa imong gibati mahitungod Kanila?
Unsa ang imong gibati nga nadasig nga buhaton aron sa pagpakita sa imong gugma alang sa Langitnong Amahan ug ni Jesukristo?
Human mahatagan og panahon ang mga estudyante sa pagsulat, ikonsiderar ang pagdapit sa andam nga mga estudyante sa pagpaambit sa ilang mga hunahuna ug mga pagbati. Kon ang mga estudyante nihimo sa pagpangandam sa klase, mahimo nilang ipaambit ang butang nga ilang gidala ug ipasabot kon sa unsang paagi kanang butanga nagtabang kanila nga mobati sa gugma sa Dios alang kanila.
