“Ko Hono Maʻu ʻo e ʻIlo Fakalaumālié, Konga 3: Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí” Tohi ʻa Molomoná – Tohi Lēsoni ʻa e Faiakó (2024)
“Ko Hono Maʻu ʻo e ʻIlo Fakalaumālié, Konga 3: Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí” Tohi ʻa Molomoná – Tohi Lēsoni ʻa e Faiakó
Ko Hono Maʻu ʻo e ʻIlo Fakalaumālié, Konga 3
Fekumi ki ha Mahino Lahi Ange ʻo Fakafou ʻi he Ngaahi Maʻuʻanga Tokoni Kuo Fokotuʻu Fakalangí
Ko e taha ʻo e ngaahi taumuʻa ʻo e fakataukei fakatokāteliné ke tokoniʻi koe ke ke ako mo fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié. ʻE lava ke tokoni atu ʻa e lēsoni ko ʻení ke mahino kiate koe ʻa e mahuʻinga ʻo e fekumi ki he moʻoní mei he ngaahi maʻuʻanga tokoni kuo ʻomi ʻe he Tamai Hēvaní mo Sīsū Kalaisí ʻi he ʻofa.
Ko hono ngaue ʻaki ʻo e ngaahi maʻuʻanga tokoni kuo fokotuʻu fakalangí. Akoʻi e kau akó ke nau tafoki ki he ngaahi maʻuʻanga tokoni kuo fokotuʻu fakalangí ʻi he taimi ʻoku nau fekumi ai ki ha tali ki he ngaahi fehuʻi fakalaumālié. Ko e founga ʻe taha ke fai ai ʻení ko hono fakatātaaʻi e foungá ki he kau akó. Tokoniʻi kinautolu ke nau ako ke fakafaikehekeheʻi ʻa e moʻoní mei he meʻa ʻoku halá pea ke mahino ʻoku ʻi ai ha ngaahi maʻuʻanga fakamatala ʻe niʻihi ʻoku ʻikai falalaʻanga pe feinga ke fakaʻauha ʻa e tuí.
Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi fehuʻi pe ngaahi meʻa mahuʻinga ʻoku nau hohaʻa ai pea mo ha ngaahi maʻuʻanga tokoni kehekehe te nau lava ʻo kumi ki ai e ngaahi talí. Poupouʻi kinautolu ke nau mateuteu ke vahevahe ha sīpinga ʻo ha taha ʻo e ngaahi maʻuʻanga tokoni ko ʻení pe ʻomi ha maʻuʻanga tokoni ʻe taha ki he kalasí.
Ngaahi ʻEkitivitī Ako ʻOku Ala Fakahokó
ʻOku mahuʻinga e ngaahi maʻuʻanga tokoní
Fakakaukau ke fakaʻaongaʻi ʻa e vaí ko ha lēsoni fakataumuʻa. Ko e founga ʻe taha ko hono lingi ha ipu vai maʻa pea fakaafeʻi ha tokotaha ako ke inu ia ʻi muʻa he kalasí. Ko ha founga ʻe taha ko hono fakaafeʻi ha tokotaha ako ke fanofano hono nimá ʻi ha vai.
Fakakaukau siʻi ki he mahuʻinga ʻo e vaí ʻi hoʻo moʻuí.
-
Ko e fē taimi ʻoku mahuʻinga taha ai kiate koe hono maʻu ha vai?
-
Ko e hā ʻoku mahuʻinga ai ʻa e maʻuʻanga vai ʻokú ke inu aí?
ʻE lava ke hangē ʻa e fekumi ki he moʻoní ko ha vai inu: ʻoku mahuʻinga e maʻuʻanga tokoní. Fakakaukau ki he ngaahi maʻuʻanga tokoni ʻokú ke tafoki ki ai ʻi he taimi ʻokú ke maʻu ai ha ngaahi fehuʻi pe hohaʻa. Ko e hā ʻa e lahi ʻo hoʻo loto falala ʻoku ʻoatu ʻe he ngaahi maʻuʻanga tokoni ko ʻení ha ngaahi tali ʻoku moʻoní?
Fakakaukau ke poupouʻi e kau akó ke vahevahe e meʻa ne nau fakakaukau ki ai ʻi he teuteu ʻa e tokotaha akó.
ʻE malava ke hoko ha liliu mahuʻinga ʻi hono kumi e ngaahi talí mei he ngaahi maʻuʻanga tokoni falalaʻangá ʻi heʻetau ʻilo e faikehekehe ʻi he vahaʻa ʻo e moʻoní pea mo hano kākaaʻi ʻe he ngaahi fakakaukau halá. Mahalo he ʻikai ke tau fakatokangaʻi maʻu pē ʻa e taimi ʻoku ʻi ai ai ha fakamatala hala ʻi he ngaahi maʻuʻanga tokoní. ʻOku ʻi ai ha ngaahi maʻuʻanga tokoni ʻe niʻihi ʻe ala fokotuʻutuʻu lelei ke ne fakatupu ha taʻefalala, ilifia, mo ha veiveiua. ʻOku finangalo e Tamai Hēvaní ke tali hoʻo ngaahi fehuʻi fakamātoató pea kuó Ne ʻomi ha ngaahi maʻuʻanga tokoni falalaʻanga ke ne tataki koe. ʻOku fakataumuʻa e lēsoni ko ʻení ke tokoniʻi koe ke ke ako mo fekumi ki he ngaahi talí ʻo fakafou ʻi he ngaahi maʻuʻanga tokoni kuo fokotuʻu fakalangí.
Fekumi ki he moʻoní
ʻI he Tohi ʻa Molomoná, naʻe fehangahangai ai ha tangata ko Seialemi mo Sēkope, ko e tokoua ʻo Nīfaí, ʻi haʻane feinga ke “fakaʻauha [e] tui [ʻa Sēkopé]” (Sēkope 7:5). Naʻe pehē ʻe Seialemi naʻe akoʻi ʻe Sēkope ha tokāteline hala fekauʻaki mo Sīsū Kalaisi: “ʻOku ʻikai ʻiloʻi ʻe ha tangata ʻe toko taha ʻa e ngaahi meʻa peheé; he ʻoku ʻikai te ne faʻa lava ʻo fakahā ʻa e ngaahi meʻa ʻe hokó” (Sēkope 7:7). Naʻe tali ia ʻe Sēkope ʻaki ʻene fakahā ange ʻa e founga naʻá ne ʻiloʻi ʻaki ʻa e moʻoni fekauʻaki mo e Fakamoʻuí ʻi he kahaʻú.
Lau ʻa e Sēkope 7:8–12, ʻo kumi e ngaahi maʻuʻanga tokoni naʻe tokoni kia Sēkope ke ne ʻilo fekauʻaki mo Sīsū Kalaisí.
-
ʻOkú ke pehē ko e hā naʻe falala ai ʻa Sēkope ki he ngaahi maʻuʻanga tokoni ko ʻení ke maʻu ʻa e moʻoní?
Fakakaukau ke kamataʻi ha lisi ʻo e ngaahi maʻuʻanga tokoni kuo fokotuʻu fakalangí ʻi he palakipoé. Hili hono hiki e ngaahi maʻuʻanga fakamatala ʻi he Sēkope 7:8–12, mahalo te ke fie ke kole ki he kau akó ke nau hiki ha ngaahi maʻuʻanga fakamatala falalaʻanga kehe ʻoku nau ʻilo ki ai. Poupouʻi e kau akó ke nau mateuteu ke tānaki atu ki he lisí hili hono fakakakato e ʻekitivitī ko ʻení.
Lau ʻa e palakalafi 1, 11-12 ʻi he konga “Maʻu ʻo e ʻIlo Fakalaumālie” ʻi he Fakamatala ki he ʻElito ʻo e Fakataukei Fakatokāteliné, (2022), ʻo kumi ha fakamatala fekauʻaki mo e ngaahi maʻuʻanga tokoni ki he ʻiló. Fakakaukau ke fakaʻilongaʻi e ngaahi lea pe kupuʻi lea ʻoku ʻuhingamālie kiate koé.
-
Ko e hā naʻe makehe kiate koe ʻi he ngaahi palakalafi ko ʻení?
-
ʻE fakahoko fēfē ʻe he ngaahi maʻuʻanga tokoni ʻokú ke fakaʻaongaʻí ha liliu ʻi he fakamatala ʻokú ke maʻú?
-
ʻOku fakahaaʻi fēfē ʻe he ngaahi maʻuʻanga tokoni kuo fokotuʻu fakalangí ʻa e ʻofa ʻa e Tamai Hēvaní mo Sīsū Kalaisi kiate kitautolú?
ʻE tokoni ʻa e ʻekitivitī ko ʻení, ʻa ia ʻokú ne hokoʻi atu e tūkunga ʻa ʻAtelī mei he “Ko Hono Maʻu ʻo e ʻIlo Fakalaumālié, Konga 2,” ke akoako fakahoko ʻe he kau akó hono fakaʻaongaʻi ʻo e ngaahi maʻuʻanga tokoni kuo fokotuʻu fakalangí. Kapau kuo ʻosi angamaheni e kau akó ki hono fakaʻaongaʻi ʻo e ngaahi maʻuʻanga tokoni ko ʻení, fakakaukau ke hoko atu ki he ʻekitivitī ako fakafoʻituituí.
ʻE lava ke ngāue fakafoʻituitui, tauhoa, pe fakakulupu iiki ʻa e kau akó. Fakakaukau ke hiki e fehuʻí ʻi he palakipoé pea fakaʻaliʻali e ngaahi maʻuʻanga tokoni kuo fokotuʻu atú pe ʻoange ia ʻi ha laʻipepa tufa. Tokoniʻi ke fakaʻaongaʻi lelei ʻe he kau akó honau taimí ke nau maʻu ha taimi ki he ʻekitivitī ako fakafoʻituituí.
Ko hono ngaue ʻaki ʻo e ngaahi maʻuʻanga tokoni kuo fokotuʻu fakalangí.
Tohi ʻa Molomoná – Tohi Lēsoni ʻa e Faiakó(2024)—“Ko Hono Maʻu ʻo e ʻIlo Fakalaumālié, Konga 3”
Naʻe fakafeʻiloaki ʻe ha lēsoni kimuʻa ʻa ʻAtelī, ʻa ia naʻá ne fai e fehuʻi “Kapau ʻoku ʻi ai moʻoni ha ʻOtua ʻofa, ko e hā te Ne tuku ai ke faingataʻaʻia e kakaí?” Ke akoako fekumi ki he moʻoní mei he ngaahi maʻuʻanga tokoni kuo fokotuʻu fakalangí, fakaʻaongaʻi ha ngaahi miniti siʻi ke fakakakato ai ha ʻekitivitī ʻe ua pe lahi ange mei heni. Lekooti ʻa e meʻa ʻokú ke akó ʻi hoʻo tohinoa akó.
-
Ngaahi mātuʻá mo e kau taki ʻo e Siasí: ʻAve e fehuʻi ʻa ʻAtelií ko ha pōpoaki telefoni ki ha mātuʻa pe taki ʻo e Siasí pea fakamatalaʻi ange ʻokú ke aleaʻi e fehuʻi ʻi he seminelí mo fie ʻilo pe ko e hā ʻenau fakakaukau ki aí.
-
Lotú: ʻI ha lotu fakalongolongo fakataautaha, kole ki he ʻEikí ha fakahinohino mo ha ueʻi fakalaumālie mei he Laumālie Māʻoniʻoní ki he fehuʻi ko ʻení. Hiki e ngaahi fakakaukau mo e ngaahi ongo ʻokú ke maʻú.
-
Ngaahi Folofolá: Kumi e ngaahi potufolofola ʻe ala tokoni kia ʻAtelií Hangē ko ʻení, ʻe lava ke ke lau fekauʻaki mo e kakai ʻo ʻAlamaá ʻi he Tohi ʻa Molomoná ʻa ia ne nau aʻusia ʻa e faingataʻaʻia ʻi he nofo pōpula fakatuʻasinó (vakai, Mōsaia 23:21–23; 24:8–15).
-
Ko e kau palōfita ʻa e ʻEikí: Kumi ha fakamatala fakaepalōfita ʻe ala tokoni kia ʻAtelī. Hangē ko ʻení, lau e fakamatala ko ʻeni naʻe fai ʻe ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá:
Ko e konga ia hono akoʻi kitautolu he ngāué, ʻa ʻetau ako ko ia ke kātaki lolotonga e ngaahi taimi ʻo e lotofoʻí, faingataʻá mo e mamahí. ʻOku hoko ʻa e ngaahi meʻa ko ʻeni ʻoku tau ʻausiá, neongo ʻene faʻa faingataʻa ke kātekiná, ko e ngaahi meʻa ia ʻokú ne fakatupulaki ʻetau mahinó, langaki hotau ʻulungāngá pea mo fakalahi ʻetau ongoʻi manavaʻofa ki he niʻihi kehé.
Koeʻuhí ne foua ʻe Sīsū Kalaisi ha mamahi lahi, ʻoku mahino ai kiate Ia hotau faingataʻaʻiá. ʻOku mahino kiate Ia hotau mamahí. ʻOku tau aʻusia ai e ngaahi faingataʻá, kae lava ʻo fakatupulaki ʻetau ongoʻi manavaʻofa mo loto mahino ki he niʻihi kehé. (Joseph B. Wirthlin, “Tali Lelei ʻA ia ʻOku Hoko Maí,” Ensign pe Liahona, Nōvema. 2008, 27)
Fakaʻaongaʻi e ngaahi fehuʻi ko ʻení pe ha ngaahi fehuʻi kehe ʻe ala tokoni ke mahino lelei ange ki he kau akó ʻa e founga ʻe lava ke ʻomi ai ʻe he ngaahi maʻuʻanga tokoni kuo fokotuʻu fakalangí ha tali ki he ngaahi fehuʻi faingataʻá.
-
Ko e hā naʻe akoʻi ʻe he ngaahi maʻuʻanga tokoni ko ʻení te ke fie vahevahe mo ʻAtelií?
-
Ko e hā kuó ke ako te ne fai ha liliu ʻi he founga ʻokú ke fekumi ai ki he tali ki he ngaahi fehuʻi faingataʻá?
© 2023 ʻe he Intellectual Reserve, Inc. All rights reserved.
Ngaahi fehuʻi ʻo e lotó
Lolotonga e ʻekitivitī ko ʻení, tokanga ki he kau ako te nau ala fiemaʻu ha tokoni fakafoʻituituí. Fakakaukau ke fakahinohinoʻi kinautolu ki ha ngaahi maʻuʻanga tokoni ʻaonga pe fai ha ngaahi fehuʻi vakaiʻi ke tokoni ke tukutaha ʻenau tokangá ʻi heʻenau ngāué.
Kuo ui ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi fehuʻi faingataʻa mo e ngaahi hohaʻa ʻo e moʻuí ko ha “ngaahi fehuʻi ʻo e lotó” (vakai, “Ka Ne Mou ʻIlo Au,” Ensign pe Liahona, Nōvema 2016, 103). Hiki ʻi hoʻo tohinoa akó ha niʻihi ʻo e “ngaahi fehuʻi ʻo e lotó.” ʻE lava ke hoko ʻeni ko ha ngaahi fehuʻi ʻokú ke maʻu pe ko ha ngaahi fehuʻi ʻe ala maʻu ʻe hoʻo ngaahi kaungāmeʻá pe kau mēmipa ho fāmilí.
Fili ha fehuʻi ʻokú ke fiemaʻu ai e tokoni ʻa e Tamai Hēvaní ke mahino kiate koe. Fakaʻaongaʻi ha taimi ke ke fekumi ai ki ha mahino lahi ange mei he ngaahi maʻuʻanga tokoni kuo fokotuʻu fakalangí. Fakaafeʻi ʻa e Laumālie Māʻoniʻoní ke ne tataki koe, pea hiki ʻi hoʻo tohinoa akó ʻa e mahino ʻokú ke maʻú.
Ke kamatá, te ke lava ʻo fekumi ʻi he ChurchofJesusChrist.org, Gospel Library app, pe ngaahi makasini konifelenisi ʻa e Siasí ke maʻu ha ngaahi fakamatala mei he kau taki ʻo e Siasí ʻoku nau tali hoʻo fehuʻí. ʻE lava foki ke maʻu ʻi he Fakahinohino ki he Ngaahi Folofolá ha ngaahi potufolofola ʻaonga.
Manatuʻi, ʻoku fiemaʻu ha taimi lahi ki he fekumi ki ha tali ki he ngaahi fehuʻi fakalaumālié. ʻI hoʻo muimui ki he sīpinga ʻa e ʻEikí ki hono maʻu ʻo e ʻilo fakalaumālié, ʻe lava ke akoʻi koe ʻe he Laumālie Māʻoniʻoní ʻi he “ʻotu lea ki he ʻotu lea, … ko e siʻi ʻi heni pea siʻi ʻi hena” (2 Nīfai 28:30). Kumi ha ngaahi faingamālie ke vahevahe ai e meʻa ʻokú ke akó mo e kau mēmipa ho fāmilí pe kau taki ʻo e Siasí.
Poupouʻi e kau akó ke vahevahe ʻa e founga ʻoku tokoniʻi ai kinautolu ʻe he fekumi ki ha ngaahi tali mei he ngaahi maʻuʻanga tokoni kuo fokotuʻu fakalangí ke nau ʻunu ʻo ofi ange ai ki he Tamai Hēvaní mo Sīsū Kalaisi. Fakakaukau ke fakahoko hoʻo fakamoʻoni ki he foʻi moʻoni ko ʻení.