“Talateu ki he Tohi ʻa Molomoná: Ko e Maka-tuʻu-loto ʻo ʻEtau Tui Fakalotú,” Tohi ʻa Molomoná – Tohi Lēsoni ʻa e Faiakó (2024)
“Talateu ki he Tohi ʻa Molomoná,” Tohi ʻa Molomoná – Tohi Lēsoni ʻa e Faiakó
Ngaahi Peesi Fakafeʻiloaki ʻo e Tohi ʻa Molomoná
Talateu ki he Tohi ʻa Molomoná
Ko e Maka-tuʻu-loto ʻo ʻEtau Tui Fakalotú
Naʻe ui ʻe he Palōfita ko Siosefa Sāmitá ʻa e Tohi ʻa Molomoná ko e maka-tuʻu-loto ia ʻo ʻetau tui fakalotú. ʻOku ʻi loto ʻi he tohí ha fakaafe ke fehuʻi ki he ʻOtuá pe ʻoku moʻoni ia. Kuo laui miliona ha kakai kuo nau muimui ʻi he fakaafe ko ʻení pea maʻu ha fakamoʻoni mei he Laumālie Māʻoniʻoní ki hono moʻoni ʻo e Tohi ʻa Molomoná. ʻOku fakataumuʻa ʻa e lēsoni ko ʻení ke tokoniʻi koe ke fakatupulaki hoʻo holi ke ako fakaʻaho ʻa e Tohi ʻa Molomoná ke fakamālohia hoʻo fakamoʻoni ki hono moʻoní.
Ko e poupouʻi ‘a e lau folofola fakaʻahó. ʻE lava ke tāpuekina ʻa e kau akó ʻi he toenga ʻo ʻenau moʻuí ʻe ha ʻulungaanga ʻo e ako folofola fakaʻahó. Kumi ha ngaahi founga ke akoʻi ai e kau akó fekauʻaki mo e ngaahi tāpuaki ʻo hono ako fakaʻaho ʻo e folofolá.
Teuteu ʻa e tokotaha akó: Fakaafeʻi e kau akó ke nau lau pe fanongo ki he lea ʻa ʻEletā Keuli E. Sitīvenisoni ko e “Tafoki ki he Tohí, Tafoki ki he ʻEikí” mei he konifelenisi lahi ʻo ʻOkatopa 2016.
Ngaahi ʻEkitivitī Ako ʻOku Ala Fakahokó
Ko e ngaahi tāpuaki mei he Tohi ʻa Molomoná
Fakakaukau ke fakaʻaliʻali ʻa e lisi ko ʻeni ʻo e ngaahi tāpuaki ʻoku maʻu mei hono lau ʻo e Tohi ʻa Molomoná. Aleaʻi pe ko e fē ʻa e ngaahi tāpuaki ʻoku holi lahi taha ki ai ʻa e kau akó mo e founga ʻe tākiekina ai ʻe he ngaahi tāpuakí ʻenau moʻui fakaʻahó. ʻE lava foki ke vahevahe ʻe he kau akó ʻa e meʻa te nau loto fiemālie ke fai ke maʻu ai kinautolú. ʻOku fakamatalaʻi ʻa e ngaahi tāpuaki ko ʻení ʻi he ngaahi fakamatala fakaepalōfitá.
ʻOku maʻu ha niʻihi ʻo e ngaahi fakamatala fakaepalōfita ko ʻení ʻi he lēsoní, pea mo ha ngaahi fakamatala kehe ʻoku ʻi he konga “Fakamatala Fakamahinó mo e Puipuituʻá.”
Lau pea fakakaukau ke fakaʻilongaʻi ʻa e lea ‘a Siosefa Sāmita ʻi he palakalafi 6 ʻo e talateu ki he Tohi ʻa Molomoná.
-
Ko e hā ʻoku mahuʻinga kiate koe mei he fakamatala ʻa Siosefa Sāmitá?
Ko e maka-tuʻu-loto ʻo ʻetau tui fakalotú
Tokoni ke mahino ki he kau akó ʻa e fatongia ʻo ha maka-tuʻu-loto (ko e foʻi maka ʻi lotomālie ʻi he konga ki ʻolunga ʻo ha ʻāleso. Ko e fili ʻe taha ko hono fakaʻaliʻali ha fakatātā ʻo ha maka-tuʻu-loto ʻi ha ʻāleso pea tuku ke aleaʻi ʻe he kau akó pe ko e fē ʻa e foʻi maka ʻoku mahuʻinga taha ʻi he ʻālesó.
Naʻe akoʻi ʻe Palesiteni ʻEselā Tafu Penisoni (1899–1994):
Ko e Tohi ʻa Molomoná ko e maka-tuʻu-loto ia ʻo ʻetau fakamoʻoni kia Sīsū Kalaisí, he ko Ia foki ʻa e makatuliki ʻo e meʻa kotoa pē ʻoku tau faí. ‘Oku fakamoʻoni ia ʻi he mālohi mo e lea mahinongofua ʻo kau kiate Ia. …
… Ko e Tohi ʻa Molomoná ko e maka-tuʻu-loto ia ʻo e fakamoʻoní. ʻE hangē pē holo ‘a e ʻālesó ʻi ha toʻo ‘a e maka-tuʻu-lotó, mo ha tuʻu maʻu ‘a e Siasí pe ko haʻane tō ʻi hano toʻo ʻa e moʻoni ʻo e Tohi ‘a Molomoná. (Ezra Taft Benson, “The Book of Mormon—Keystone of Our Religion,” Ensign, Nov. 1986, 5, 6)
Ko e makatuʻu-loto ‘o ‘etau fakamoʻoni kia Sīsū Kalaisí
-
ʻOkú ke pehē ʻoku ʻuhinga ki he hā ko e Tohi ʻa Molomoná ko e maka-tuʻu-loto ia ʻo ʻetau fakamoʻoni kia Sīsū Kalaisí?
Naʻe toutou fakamoʻoni maʻu pē ʻa kinautolu naʻa nau hiki e Tohi ʻa Molomoná kia Sīsū Kalaisi.
ʻOku lahi ha ngaahi founga ke kau ai ʻa e kau akó ʻi he ngāue ko ʻení. Mohu founga, pea kumi ha ngaahi founga ke fakakau ai ʻa e tokotaha ako takitaha. Ko ha fakakaukau ʻe taha ke ʻoange ki he tokotaha ako takitaha ha peesi naʻe hiki mei he Tohi ʻa Molomoná pea kole ange ke nau fakaʻilongaʻi ʻa e fakamoʻoni fakafolofola takitaha ki he Fakamoʻuí ʻi heʻenau pēsí. ʻE lava leva ke fakaʻaliʻali e ngaahi pēsí ke sio ki ai ʻa e kau ako kehé.
Fili ha peesi pē mei he Tohi ʻa Molomoná, pea kumi ʻa e fakamoʻoni fakafolofola kotoa pē ki he Fakamoʻuí ʻi he peesi ko iá.
-
Ko e hā ha meʻa naʻá ke maʻu fekauʻaki mo e Fakamoʻuí?
-
Ko e hā ʻoku tokoni atu e ngaahi potufolofola naʻá ke maʻú ke mahino pe ongoʻi fekauʻaki mo e Fakamoʻuí?
Fakakaukau ki he founga ʻe tāpuekina ai koe ʻi haʻo maʻu ha fakamoʻoni mālohi ange kia Sīsū Kalaisi. ʻI hoʻo ako ʻa e Tohi ʻa Molomoná, kumi ha ngaahi fakamoʻoni fakafolofola kia Sīsū Kalaisi pea mo e meʻa ʻokú ke ako fekauʻaki mo Iá. ʻI hoʻo fai iá, ʻe tupulaki hoʻo ʻilo mo e fakamoʻoni ki he Fakamoʻuí.
Ko e maka-tuʻu-loto ʻo ʻetau fakamoʻoní
Fakaafeʻi e kau akó ke nau fakalaulauloto fakalongolongo pē ki he fakamatala ko ʻení.
-
Ko e fē ʻi he ngaahi fakamatala ko ʻení ʻokú ne fakamatalaʻi lelei taha hoʻo ngaahi ongo kau ki he Tohi ʻa Molomoná?
-
ʻOku ou falala ki he niʻihi kehe kuo nau maʻu haʻanau fakamoʻoni fakataautaha mo fakapapauʻi mai ʻoku moʻoni e Tohi ʻa Molomoná.
-
‘Oku ‘ikai ke u fakapapauʻi pe ‘oku ou ‘iloʻi ʻoku moʻoni ʻa e Tohi ʻa Molomoná.
-
Kuó u maʻu ha fakamoʻoni mei he Laumālie Māʻoniʻoní ʻoku moʻoni ʻa e Tohi ʻa Molomoná.
-
-
ʻOkú ke pehē ko e hā ʻoku fiemaʻu ai ʻe he Tamai Hēvaní ke ke ʻiloʻi ʻoku moʻoni ʻa e Tohi ʻa Molomoná?
Lau ʻa e palakalafi fika ua fakamuimui ʻi he talateú, pea pehē foki ki he Molonai 10:3–5, ʻo kumi ʻa e meʻa te ke lava ʻo fai ke ʻiloʻi ai pe ʻoku moʻoni ʻa e Tohi ʻa Molomoná.
-
Fakatatau ki he meʻa naʻá ke laú, ko e hā ʻoku fiemaʻu ke fai ʻe ha taha ke ne ʻiloʻi ai pe ʻoku moʻoni e Tohi ʻa Molomoná?
Tokoni ke ʻiloʻi ʻe he kau akó ha tefitoʻi moʻoni hangē ko ʻení: Kapau te u lau ʻa e Tohi ʻa Molomoná, fakalaulauloto ki hono pōpoakí, pea fehuʻi ki he ʻOtuá pe ʻoku moʻoni ia, te u lava leva ʻo maʻu ha fakamoʻoni mei he Laumālie Māʻoniʻoní.
Naʻe vahevahe ʻe ‘Eletā ʻUlise Sōalesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga naʻe tupulaki ai ʻene fakamoʻoni ki he Tohi ʻa Molomoná lolotonga ʻene ʻalu ki he seminelí. Mahalo te ke fie mamata ʻi he “Ko Hono ʻOmi ʻo e Tohi ʻa Molomoná,” ʻoku maʻu ʻi he ChurchofJesusChrist.org, mei he taimi 12:03 ki he 14:12.
Lau ʻa e palakalafi fakaʻosi ʻi he talateu ki he Tohi ʻa Molomoná, ʻo kumi ki he ngaahi ʻilo kehe ʻoku maʻu ʻi ha fakamoʻoni ki he Tohi ʻa Molomoná.
-
ʻE liliu fēfē hoʻo moʻuí ʻi hono maʻu ha fakamoʻoni ki he Tohi ʻa Molomoná?
Fakakaukau ke vahevahe hoʻo fakamoʻoni ki he Tohi ʻa Molomoná pea fakaafeʻi ha kau ako te nau loto fiemālie ke fakamoʻoní.
Ako fakaʻaho ʻa e Tohi ʻa Molomoná
Naʻe fakahoko ʻe Palesiteni Lāsolo M. Nalesoni ha palōmesi kiate kitautolu kotoa ʻo kapau te tau ako fakaʻaho e Tohi ʻa Molomoná. Lau ʻa e fakamatala ko ʻení, pe mamata ʻi he foʻi vitiō “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?” ʻi he ChurchofJesusChrist.org mei he taimi 11:52 ki he 13:05.
ʻOku ou palōmesi atu ʻi hoʻo ako [ʻi he faʻa lotu] e Tohi ʻa Molomoná he ʻaho kotoa peé, ʻe toe lelei ange ai hoʻo fai tuʻutuʻuní—he ʻaho kotoa pē. ʻOku ou palōmesi atu ʻi hoʻo fakalaulauloto ki he meʻa ʻokú ke akó, ʻe fakaava mai e ngaahi matapā ʻo e langí, pea te ke maʻu e tali ki hoʻo ngaahi fehuʻí mo e tataki ki hoʻo moʻuí. ʻOku ou palōmesi atu ʻi hoʻo fakaʻutumauku fakaʻaho he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá, kau ai e haʻahaʻa fakalilifu ʻo e ponokalafí mo e ngaahi maʻunimā ʻokú ne fakakonahi ʻetau fakakaukaú.
ʻI haʻaku fanongo ki ha taha, ʻo aʻu pē kiate au, ʻokú ne pehē, “ʻOku ou ʻiloʻi ʻoku moʻoni e Tohi ʻa Molomoná,” ʻoku ou fie pehē ange au, “ʻOku lelei ia, ka ʻoku ʻikai feʻunga ia!” ʻOku fiemaʻu ke tau ongoʻi moʻoni ʻi he konga “loloto taha” ʻo hotau lotó [ʻAlamā 13:27], ko e Tohi ʻa Molomoná ko e folofola moʻoni ia ʻa e ʻOtuá. Kuo pau ke tau fuʻu ongoʻi moʻoni ia pea ʻikai ke tau teitei loto ke ʻosi atu ha ʻaho taʻe te tau moʻui ʻaki ia. (Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?,” Ensignpe Liahona, Nōvema. 2017, 62–63)
-
Ko e hā ʻoku mahuʻinga kiate koe mei he fakamatala ko ʻení?
-
Ko e hā hoʻo ongo fekauʻaki mo e fakaafe ke lau fakaʻaho e Tohi ʻa Molomoná?
Aleaʻi ʻa e ngaahi meʻa ʻokú ne fakafeʻātungiaʻi ʻa e ako folofola fakaʻahó mo e ngaahi founga ke ikunaʻi ai kinautolú.
Kapau kuo teʻeki ai fokotuʻu ʻe he kau akó ha taumuʻa ako folofola fakataautaha ʻi heʻene fekauʻaki mo e maaka ʻi he seminelí ki he fakaʻosi akó, mahalo ko ha faingamālie ʻeni ke nau fakahoko ai ia. Kapau ʻoku loto ki ai e kau akó, te nau lava ʻo vahevahe ʻenau taumuʻá mo ha mēmipa ʻo e fāmilí, taki ʻo e Siasí, pe faiako semineli. Fakakaukau ke vahevahe ha ngaahi tāpuaki fakataautaha mei hono lau ʻo e Tohi ʻa Molomoná pea fakaafeʻi e kau ako te nau loto-fiemālie ke fai e meʻa tatau.