Pasiunang mga Materyal

Pag-angkon og Espirituhanong Kahibalo, Bahin 1

Lihok diha sa Hugot nga Pagtuo

Batan-ong babaye nga nagbasa ug nagtuon

Ang usa sa mga katuyoan sa doktrinal nga kahanas mao ang pagkat-on sa paggamit sa mga baroganan sa pag-angkon og espirituhanong kahibalo aron matabangan ka nga magtukod og imong pundasyon kang Jesukristo. Kini nga leksiyon makatabang nimo sa paglihok diha sa hugot nga pagtuo kang Jesukristo samtang nangita ka og mga tubag sa mga pangutana ug mga kabalaka sa imong kinabuhi.

Pagtudlo sa mga estudyante sa mga baroganan sa pag-angkon og espirituhanong kahibalo.Kon mahibaloan ug magamit sa mga estudyante ang mga baroganan sa pag-angkon og espirituhanong kahibalo, mas matuman nila ang mga katuyoan sa doktrinal nga kahanas. Seguroha nga kanunay nga ribyuhon kini nga mga baroganan diha sa klase ug tabangi ang mga estudyante nga makasabot niini. Ang mga estudyante adunay mga kahigayonan sa paggamit niining mga baroganan sa mga leksiyon sa doktrinal nga kahanas.

icon, instruksiyon sa pagtudlo

Pagpangandam sa estudyante: Dapita ang mga estudyante sa pagpangutana sa usa ka miyembro sa pamilya o lider sa Simbahan kinsa nagpakita og dakong pagtuo kang Jesukristo kon unsay iyang gipangbuhat aron magpabiling lig-on kon mag-atubang og mga pangutana o mga kabalaka mahitungod sa ebanghelyo.

Posible nga mga Kalihokan sa Pagkat-on

icon, instruksiyon sa pagtudlo

Pahinumdom: Mas labing maayo nga itudlo kini nga leksiyon sa pagsugod sa tuig sa pagtungha o bisan kanus-a nga ang mga estudyante unang gipaila sa mga baroganan sa pag-angkon og espirituhanong kahibalo.

Ang mga pangutana maayo ba o dili?

Hunahunaa kon hain sa mosunod nga mga tubag ang magamit niini nga pangutana:

• Hain sa mosunod ang posibleng mga rason nga ang usa ka tawo tingale adunay mga pangutana mahitungod sa ebanghelyo o sa Simbahan ni Jesukristo?

  icon, instruksiyon sa pagtudlo

  Ikonsiderar ang pagbasa sa mosunod nga mga kapilian ngadto sa mga estudyante. Hunong human sa matag kapilian sa pagpangutana sa pipila ka mga estudyante ngano nga sila nagtuo nga kini tingale tukma o dili tukma. Tabangi ang mga estudyante nga makasabot nga bisan asa niini nga mga kapilian mahimong tukma o dili tukma magdepende sa mga tinguha ug mga pagpili sa usa ka tawo.

  1. Wala pa silay pagpamatuod sa ebanghelyo.

  2. Igo ang ilang pagpakabana sa ebanghelyo nga gusto nilang mas makasabot pa og dugang.

  3. Nagduda sila sa pagtuo nga kaniadto anaa sila.

  4. Mahimong ang Dios nagdasig kanila sa paghunahuna mahitungod sa usa ka butang nga gusto Niyang itudlo kanila.

     Ang tubag nagdepende sa kinaiya sa matag tawo ug mga rason sa pagpangutana. Basaha ang parapo 3 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022), nga mangita kon sa unsang paagi ang atong pag-atubang sa mga pangutana sa ebanghelyo makapalig-on o makapahuyang sa atong hugot nga pagtuo kang Jesukristo.

• Unsay mipatigbabaw diha kanimo niini nga parapo? Ngano?

icon, instruksiyon sa pagtudlo

Ikonsiderar ang pagdapit sa mga estudyante sa pagpamalandong kon sa unsang paagi ang mga pangutana o mga kabalaka nakaapekto sa ilang kaugalingong espirituhanong pag-uswag. Ang mosunod nga parapo mahimong makatabang niini.

Ang tanan adunay mga pangutana ug mga kabalaka. Kinahanglang magmatngon kita nga dili hukman ang hugot nga pagtuo sa uban kon aduna silay mga pangutana, ug dili kita kinahanglang magduda sa atong kaugalingong pagtuo kon aduna kitay mga pangutana. Ang atong hugot nga pagtuo kang Jesukristo ug ang atong pagpamatuod sa gipahiuli nga ebanghelyo mahimong makapalig-on o makapahuyang depende kon giunsa nato pag-atubang ang atong mga pangutana ug mga kabalaka. Samtang nagtuon ka karon, hunahunaa ang papel nga gidala sa imong mga pangutana diha sa imong espirituhanong pag-uswag. Unsa nga mga pangutana ang anaa ka mahitungod sa ebanghelyo o sa Simbahan ni Jesukristo? Gibati ba nimo nga ang imong mga pangutana mas nakapaduol nimo sa Manluluwas ug sa Iyang Simbahan?

Pag-angkon og espirituhanong kahibalo

Sa tibuok nimong kasinatian sa seminary, mahatagan ka og kahigayonan sa pagpraktis gamit ang mga baroganan sa pag-angkon og espirituhanong kahibalo. Ang mosunod nga tulo ka mga baroganan makatabang nimo nga mas maduol kang Jesukristo kon ang mga pangutana o mga kabalaka moabot sa imong kinabuhi:

1. Lihok diha sa Hugot nga Pagtuo.

2. Susiha ang mga konsepto ug mga pangutana uban sa mahangtorong panglantaw.

3. Pagtinguha pa og dugang nga panabot pinaagi sa balaang gitudlo nga mga tinubdan.

icon, instruksiyon sa pagtudlo

Kon ang ubang mga estudyante sa klase nakatambong na og seminary kaniadto, ikonsiderar ang pagpangutana kanila kon unsa na ang ilang nahibaloan mahitungod niining tulo ka mga baroganan. Makahatag kini sa klase og mubo nga kinatibuk-ang pagpasabot sa mga baroganan ug mahimong magpakita sa kasamtangan nga lebel sa pagsabot sa mga estudyante.

Ang nahabilin niini nga leksiyon magtutok sa baroganan sa paglihok diha sa hugot nga pagtuo kang Jesukristo.

Basaha ang mga parapo 5–7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas, nga mangita og pipila ka mga pamaagi nga imong mahuman ang mosunod nga kapahayag.

icon, instruksiyon sa pagtudlo

Ikonsiderar ang pagsulat sa mosunod nga wala mahuman nga kapahayag diha sa pisara.

Kon ang mga pangutana o mga kabalaka moabot, kita makalihok diha sa hugot nga pagtuo kang Jesukristo pinaagi sa… .

icon, instruksiyon sa pagtudlo

Dapita ang pipila ka mga estudyante sa pagduol sa pisara ug humanon ang pamahayag. Ikonsiderar ang pagpangutana og follow-up nga mga pangutana aron matabangan ang mga estudyante nga ma-personalize ang ilang nakit-an. Pananglitan:

Kon ang estudyante nagsuwat og, “Pagpadayon sa pagsunod sa mga sugo” (tan-awa ang parapo 5), mahimong ang follow-up nga pangutana kay “Sa imong hunahuna sa unsang paagi ang pagsunod sa mga sugo makatabang nimo nga magpabiling duol kang Jesukristo samtang mag-atubang ka og lisod nga mga isyu? Aduna ba kaninyo ang gustong mopaambit og kasinatian nga inyong nasinati niana?”

Kon ang estudyante nagsuwat og, “Paggunit sa nahibal-an na nato nga tinuod” (tan-awa ang parapo 6), mahimong ang follow-up nga pangutana kay “Paggahin og usa ka minuto sa pagpamalandong kon unsay imong nahibaloan nga tinuod nga imong mahuptan kon ang mga pangutana moabot. Giunsa man nimo pagkahibalo nga kadtong mga butanga tinuod?”

Kon ang estudyante nagsuwat og, “Pagsalig sa Dios hangtod moabot ang tubag” (tan-awa ang parapo 7), mahimong ang follow-up nga pangutana kay “Unsa ang imong nahibaloan mahitungod sa Dios nga makatabang kanimo sa pagsalig Kaniya samtang naghulat ka sa mga tubag? Ngano kaha nga ang Dios mopili usahay nga dili dayon mohatag kanato og kompletong mga tubag?”

• Hain sa mga pamaagi nga imong gipili nga sa imong hunahuna labing magamit sa mga ten-edyer karon o bisan sa imong kinabuhi? Ngano?

• Sa unsang paagi nga ang pagpili sa paglihok uban sa hugot nga pagtuo niining paagiha makaapekto sa relasyon sa usa ka tawo ngadto sa Manluluwas?

• Kinsa ang imong nailhan nga milihok sa hugot nga pagtuo sa dihang nag-atubang sa mga pangutana o mga kabalaka? Unsa ang iyahang gibuhat?

icon, instruksiyon sa pagtudlo

Mga Ehemplo sa Kasulatan

icon, instruksiyon sa pagtudlo

Ikonsiderar ang pagtipon sa sugyot sa “Dugang nga Kalihokan sa Pagkat-on” sa mosunod nga kalihokan aron matabangan ang mga estudyante nga makakita kon sa unsang paagi nga ang kinaiya ug mga pagpili mahimong mosangpot sa pag-uswag o pagkunhod sa hugot nga pagtuo kang Jesukristo.

Ang mga kasulatan naglangkob og daghang mga asoy niadtong nag-atubang og lisod nga mga pangutana o mga kabalaka uban sa hugot nga pagtuo kang Jesukristo. Usa niini mao si propeta Nephi. Basaha ang mosunod nga mga ehemplo gikan sa kinabuhi ni Nephi, nga mangita kon giunsa niya paglihok diha sa hugot nga pagtuo kang Jesukristo sa dihang nag-atubang og mga pangutana ug ubang mga isyu.

• 1 Nephi 2:16—Pipila sa iyang mga minahal sa kinabuhi nasuko mahitungod sa unsay gisugo sa iyang amahan, si propeta Lehi, nga ilang buhaton.

• 1 Nephi 3:7—Gihangyo siya sa pagbuhat og lisod nga butang.

• 1 Nephi 9:5–6—Ang Ginoo misugo kaniya sa pagbuhat og usa ka butang alang sa mga rason nga wala niya masabti.

• 1 Nephi 10:17; 11:1–5—Gusto niya og iyang kaugalingong saksi sa unsay gitudlo sa iyang amahan, ang propeta.

• 1 Nephi 11:17—Wala siya hingpit nga nahibalo sa tubag sa usa ka pangutana nga gipangutana kaniya mahitungod sa ebanghelyo.

• Unsa nga mga elemento sa paglihok uban sa hugot nga pagtuo ang labing maayo nga gipakita ni Nephi?

icon, instruksiyon sa pagtudlo

Ikonsiderar ang pagdapit sa mga estudyante nga mopaambit sa mosunod diha sa gagmayng grupo aron mas daghang estudyante ang mahatagan og kahigayonan nga makapaambit.

Ihulagway ang modernong pangutana o kabalaka nga makaapekto sa hugot nga pagtuo sa usa ka tawo ngadto kang Jesukristo o sa Iyang Simbahan. Sa unsang paagi ang usa ka tawo molihok diha sa hugot nga pagtuo kon mag-atubang niana nga pangutana o isyu?

• Sa unsang paagi nga ang pagpili sa paglihok diha sa hugot nga pagtuo o dili paglihok sa hugot nga pagtuo makaapekto sa iyang relasyon sa Manluluwas?

• Unsa ang labing gusto nimo nga gamiton diha sa imong kinabuhi gikan sa imong gitun-an karon? Sa unsang paagi kini makatabang kanimo sa imong kinabuhi?

Komentaryo ug Background nga Impormasyon

OK ra ba nga adunay mga pangutana mahitungod sa ebanghelyo?

Si Presidente Dieter F. Uchtdorf, nga kanhi sa Unang Kapangulohan, mitudlo:

Presidente Dieter F. Uchtdorf

Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabot. Dunay pipila ka miyembro sa Simbahan kinsa, sa usa ka higayon, wala makasulay og seryuso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa hugot nga pagtuo—bisan sa balason nga yuta sa pagduhaduha ug kawalay kasiguroan. Ang hugot nga pagtuo molaom sa mga butang diin dili makita diin mga tinuod.

Busa, mga kaigsoonan—akong mga higala—palihog, duhaduhai una ang inyong pagduhaduha sa dili pa mo magduhaduha sa inyong pagtuo. Dili gayod nato tugotan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug gasa nga moabot pinaagi sa hugot nga pagtuo kang Ginoong Jesukristo. (Dieter F. Uchtdorf, “Dayon, Pakig-uban Kanamo,” Liahona, Nob. 2013, 23)

Si Presidente Russell M. Nelson mipasabot:

Presidente Russell M. Nelson

Ang Ginoo makatudlo lamang sa mapangutana nga hunahuna. (Russell M. Nelson, sa M. Russell Ballard, “What Came from Kirtland” [Brigham Young University devotional, Nob. 6, 1994], 8, speeches.byu.edu)

Unsa ang akong buhaton kon ako nanlimbasog sa mga pagduda mahitungod sa Dios o sa Simbahan?

Si Presidente Russell M. Nelson miingon:

Presidente Russell M. Nelson

Pilia nga motuo kang Jesukristo. Kon kamo adunay pagduhaduha mahitungod sa Dios nga Amahan ug sa Iyang Hinigugmang Anak, o sa kabalido sa Pagpahiuli o sa katinuod sa balaang tawag ni Joseph Smith isip propeta, pilia nga motuo ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga imong makit-an ang sipyat sa kinabuhi sa propeta o sayop sa mga kasulatan. Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 103)

Si Elder Ronald A. Rasband sa Korum sa Napulog Duha ka Apostoles miingon:

Elder Ronald A. Rasband

[Ako moawhag] kaninyo karon, nga hinumduman, ilabi na gayod sa panahon sa kalisod, ang panahon nga inyong nabati ang Espiritu ug ang inyong pagpamatuod lig-on; hinumdumi ang espirituhanon nga mga pundasyon nga inyong natukod. Mosaad ko kaninyo nga kon inyo kining buhaton, maglikay sa mga butang nga dili mopalig-on sa inyong pagpamatuod o nga nagbugal-bugal sa inyong mga tinuohan, kadtong bililhong mga panahon nga miuswag ang inyong pagpamatuod mobalik sa inyong hunahuna pinaagi sa mapainubsanong pag-ampo ug pagpuasa. Mopasalig ko kaninyo nga mobati kamo pag-usab sa luwas ug nindot nga mga pagbati nga konektado sa ebanghelyo ni Jesukristo. (Ronald A. Rasband, “Kay Tingali Lamang Unya Mahakalimot Ka,” Liahona, Nob. 2016, 114)

Dugang nga Kalihokan sa Pagkat-on

Mga Ehemplo sa Kasulatan

Kini nga sugyot mamahimong gamiton nga puli sa sugyot sa pagtuon sa kasulatan nga nagsusi lamang sa ehemplo ni Nephi.

Ikonsiderar ang pagpakita sa mosunod nga hulagway sa pamilya ni Lehi nga nagbiyahe sa kamingawan. Dapita ang mga estudyante nga mopaambit og mga pangutana ug mga kabalaka nga tingali aduna sila kon sila usa sa mga anak ni Lehi.

Si Lehi ug ang iyang pamilya nga nagbiyahe sa disyerto

Dayon dapita ang mga estudyante sa pagtandi sa unsay gibuhat ni Laman ug Lemuel mahitungod sa ilang mga pangutana ug mga kabalaka sa 1 Nephi 2:12–13 ngadto sa gibuhat ni Nephi sa bersikulo 16.

Ang mga estudyante mahimong susama nga magtandi sa kinaiya ni Laman ug Lemuel sa pagpangita og mga tubag sa mga pangutana sa ebanghelyo sa 1 Nephi 15:2–3, 8–9 ngadto sa kinaiya ni Nephi sa 1 Nephi 10:17; 11:1.

Dapita ang mga estudyante sa paghisgot kon sa unsang paagi ang mga ehemplo niini nga managsoon magamit nato karon.